Rute ni Nowemi

Dikhambi dimwani, ku vite ni nzala ya hombe khe Israyeli. Se wamsikati wo kari awu va nga txi khona i Nowemi, a tsute eya zumba Mowabhi ene ni mwamna wakwe ni vanana vawe vavambidi va vafana. Ku dipindile mbimo, mwamna wa Nowemi a fite. Msana keto, vanana vakwe va txhadhile ni vavasikati va Vamowabhi, i ku Rute ni Orpa. To mbi tsakisa ngu ti to, ku di pindile mbimo vanana va Nowemi ni vona va fite.

Mbimo yi Nowemi a nga ziva ti to ku ti ni sakudya khe Israyeli, a woni to i ti tshuko e tshumela. Rute ni Orpa va tsute nayo. Kambe va di hagari ka liendo, Nowemi a va gete tiya: ‘Anu mi ni mahete timhaka tatinene ani ni vanana vangu. Ni lava ti to anu mi tshumela mitxhadha. Se tshumelani, mi tsula mitini ka vaveleki vanu.’ Vona va to kha vona: ‘Ahim-him mama! Athu ha kudhunda ngutu, kha hi lavi ku kuleka.’ Nowemi a simamile e sinzisa Rute ni Orpa ti to ve tshumela. Orpa a gwitisile kutumela kutshumela e tsula ditikoni kwakwe. Nowemi a gete Rute ti to e tshumela nene. Kambe, Rute a txi m’dhunda ngutu Nowemi, ngu toneto a ti khene: ‘Ani kha ni nambi kuleka. Vathu vako va nava vathu vangu ni Txizimu txako txi nava Txizimu txangu.’ U pimisa ti to Nowemi a ti pfisile kutxani mbimo yi Rute a nga womba tiya?

Rute ni Nowemi va hokile Israyeli. Ditshiku dimwani, Rute a tsute eya rolela sevhadha ayi yi nga txi saletela thembweni ka Bhowazi mwanana wa Rahabhi. Bhowazi a ti pfite ti to Rute i ti Mmowabhi ni ku a si ti lavi kuhambana ni Nowemi. Ngu toneto, Bhowazi a gete sithumi sakwe si leka Rute e rolela sevhadha a ti a nga txi ti lavisa tona thembweni mule kwakwe.

Mbimo yi Rute a nga tshumela e tsula mtini ni minova, Nowemi a di ya m’wotisa tiya: ‘Nyamsi u txi thuma thembweni ka mani?’ Rute a to khene: ‘Ni txi thuma thembweni ka dijaha a di va ku khona i Bhowazi.’ Nowemi a to khene: ‘Bhowazi dixaka da mwamna wangu. Simama u ya rolela sevhadha thembweni kwakwe ni mamwani mahorana. Akheya kha ngaho a no kukhulumetela.’

Rute a simamile eya thuma thembweni ka Bhowazi kala ve gwita kuelula. Bhowazi a woni ti to Rute i ti wamsikati wamnene awu a nga txi dhunda kuthuma. Se Bhowazi a txhadhile nayo. Vona va velekile mwanana awu va nga m’raya ditina do i Obhedhi, awu ngu msana a nga va vhovho wa mkoma Dhavhidha. Vangana va Nowemi va tsakile ngutu, aha koza ve m’gela tiya: ‘Kukhata, Jehovha a ku ningile Rute awu a nga kumahela ta tinene se konku a ku ningile mtukulu. A na bongwe Jehovha ngu totshe tiya.’