Mkoma wo khata wa Israyeli

Jehovha a ti sawute valamuli kasiku ve khatalela Vaisrayeli, kambe aku vathu va matiko otshe va nga ti ni vakoma Vaisrayeli ni vona va txi lava mkoma. Ngu toneto, va di ya gela Samuwele ti to va txi lava Mkoma. Kambe Samuwele a txi pimisa ti to eto ti di bihile. Ngu toneto, a mahile mkombelo ka Jehovha. Jehovha a m’gete tiya: ‘Samuwele, vathu evo kha va lambi awe, kambe va lamba ani. Va gele ti to va nava ni mkoma, kambe a na va xanisa.’ Samuwele a di ya gela Vaisrayeli ati Jehovha a nga m’gela. Kambe vona va to kha vona: ‘Kha hi nga ni mhaka ni toneto, athu ho lava mkoma dwe.’

Jehovha a gete Samuwele ti to dijaha adi di nga txi dhanwa ku i Sawule, di ndi nava mkoma wa Vaisrayeli. Ditshiku dimwani, Sawule a tsute ka Samuwele khe Rama. Se kasi kukombisa ti to Sawule a di sawutwe ngu Jehovha kasiku e va mkoma Vaisrayeli, Samuwele a mthete mafura hamsungo kwakwe.

Msana keto, Samuwele a to dhana votshe Vaisrayeli kasiku e ta va komba awu a nga di sawutwe kasiku e va mkoma wawe. Kambe va si mmani Sawule. Wa ti ziva to ngu kutxani? Ene a ti ko ya barama. Msana ka kuva va di mxoletete va gwitisile ku mmana. Ene a ti laphile ngutu kupinda votshe ni ku a ti tshurile ngutu. Se Samuwele a tekile Sawule e tsula nayo e ya m’emisa hagari ka vathu e va gela tiya: ‘Wonani, awuwa ngene mkoma awu Jehovha a nga mi sawulela. Vathu va to tsaka ngutu mbimo yi va nga wona ti to se va ti ni mkoma.

Makhatoni, Sawule a txi engisa Jehovha ni ku a txi maha totshe ati Samuwele a nga txi m’ruma. Kambe ngu kutsimbila ka mbimo, ene a khatile ku ti hunda. Dikhambi dimwani, Sawule a to maha mningelo ka Jehovha. Kambe ene a si nga ni fanelo yo maha toneto. Awu a nga ti ni fanelo yo maha toneto i ti Samuwele. Samuwele a ti m’gete Sawule ti to e m’emela kala e hoka. Kambe Sawule a ti woni i di kuswela kuemela Samuwele, a to maha mningelo ekha. Ngu toneto, mbimo yi Samuwele a nga hoka a to ta bhongela Sawule a txi khene: ‘U sa fanela kwa mbi engisa Jehovha.’ Msana ka kuva va di m’bhongete, ina Sawule a emile kwa mbi engisa Jehovha?

Ngu kutsimbila ka mbimo, Sawule a ti yalwa ni vathu ava va nga txi dhanwa ti to Vaamaleki. Jehovha a ti m’gete ti to a sa fanela ku va pfela wusiwana vathu vale. Kambe Sawule a pfete wusiwana mkoma wa Vaamaleki awu a nga txi dhanwa ku Agage. Jehovha a gete tiya Samuwele: ‘Sawule kha ti lavi ku ni engisa.’ Samuwele a henyile ngutu ni ku a tsute e ya womba-womba ni Sawule. E m’gela ti to aku ene a nga si engisi, Jehovha a di na sawula mmwani mkoma kasiku e ta m’vhaleta. Mbimo yi Samuwele a nga tshembereka e tsula, Sawule a to ñola dibhaji da Samuwele, se di vharuka. Samuwele a to m’gela tiya: ‘Kufana ni dibhaji diya di nga vharuka, Jehovha a na kutekela wukoma.’ Se i mani a ndi nova mkoma wamphya wa Israyeli? Jehovha a ndi na sawula m’thu awu a ndi no m’dhunda ni ku m’engisa.