Jehovha e lwela Josafati

Josafati i ti mkoma wa Judha. Ene a gumisile wotshe wukhozeli wa Bhahali ka wotshe mfumo wakwe. Josafati a txi lava ti to vathu votshe ve engisa Jehovha. Ngu toneto, ene a sawute majaha o kari aya ma nga txi yi ziva kwati Milayo ya Jehovha kasiku me gondisa vamwani.

Matiko ya ma nga ti hafuhi ni Judha ma txi thava ku va wukela nguku ma txi ti ziva ti to Jehovha atxi vhikela vathu vakwe. Matiko oneyo ma txi veka ni kuyisa maprezenti me ya ma ningela ka mkoma Josafati. Kambe Vamowabhi, Vaamoni ni va va nga txi zumba hafuhi ni Seyiri, va tsute ve yalwa ni vathu va Judha. Josafati a txi tiziva ti to a txi lava txivhuno txa Jehovha. Se ene a gete majaha, vavasikati ni vanana kasiku ve tsula Jerusalema. Mbimo yi va nga hokha kheya, ene a ti ya ema masoni ka votshe, e maha mkombelo a txi khene: ‘Jehovha, kha hi na mbi va xula votshe vale hi si nga ni txivhuno txako. Ngu toneto, hi kombela u hi gela ati hi fanelako ku ti maha.’

Se Jehovha a xamute a txi khene: ‘Mi nga thaveni, ani ni ni nanu. Kha ti na mbi lava milwa, wonetelani ati ani ni no ti maha.’ Se Jehovha a ndi na maha txani kasiku e hulukisa vathu vakwe?

Mangwanani ka kona, Josafati a sawute majaha o kari aya ma nga txi ti ziva kuembelela. Majaha oneyo ma di fanete kuthangela masoni ka masotxhwa, ma txi embelela ngu litsako ka Jehovha. Vona va tsimbite kukhukhela Jerusalema kala ka wukhalo awu wu nga txi dhanwa ku i Tekowa, a ha yimbi yi ndi no ya khatela kona.

Mbimo yi va nga txi embelela, Jehovha a mahile timhaka to xamalisa ngutu. Ene mahile ti to Vaamoni ni Vamowabhi velwa ngu txawe. Se votshe va fite, kambe Jehovha a vhikete vathu vakwe nga ha a nga di thembisile ngu kona. Vathu va matiko aya ma nga txi maneka hafuhi ni Judha, va ti zivile ati Jehovha a nga di ti mahile ni ku va ti woni ti to ene a txi ngadi a txi vhikela vathu vakwe. Wa ti wona? Jehovha mbimo yotshe wa maha txo kari kasi kuvhikela vathu vakwe. Nem kha lavi kuvhunwa ngu m’thu kasi kumaha toneto.