Nahanani ni txihoranana txa Muisrayeli

Ka wukhalo awu va nga txi khona i Siriya, awu wu nga txi maneka kule ni ditiko da Israyeli, ku ti zumba txihoranana txa Muisrayeli. Txona txi tiya tekwa ngu masotxhwa a Vasiriya, txiya zumba kule ni maxaka a txona. Txihoranana txile txi tiya maha txithumi txa msikati wa Nahanani, awu i nga ti mmweyo wa vathangeli va masotxhwa a Siriya. Mtini mule a si ngaho wu a nga txi thumela Jehovha, i ti kova txihoranana txile basi.

Nahanani a ti ni silonda sasingi ka mmidi wakwe asi si nga txi panda ngutu. Txihoranana txile txi txi lava ku m’vhuna. Se txi tiya womba-womba ni msikati wa Nahanani txi txi kha txona: ‘Ku ni m’thu wu ni m’zivako wo a nga hanyisa mwamna wako. Akhe Israyeli ku ni mprofeti wa Jehovha awu a dhanwako ku i Elixa. Ene a nga hanyisa mwamna wako ka malwati yale.’

Awule wamsikati a tsute eya gela Nahanani ati txihoranana txile txi nga m’gela. Nahanani a txi ti lava ngutu kuhanya ka wulwati wule, se a tsute mtini ka Elixa khe Israyeli. Aku Nahanani a nga txi ti wona i di m’thu wa lisima ngutu, ene atxi emela ti to Elixa a ndina huma eta womba-womba nayo. Kambe Elixa kha nga huma. Ene a to rumela txithumi txakwe txiya gela tiya Nahanani: ‘Tsula ka Mnambu wa Jordhani u ya samba 7 wa makhambi. U na hanya ka wulwati wako.’

Nahanani kha ti tsakela toneto. Ene a to khene: ‘Ani ni txi pimisa ti to mprofeti wule a ndina ni hanyisa ngu kumaha mkombelo ka Txizimu ni ku ni sanzeka manza akwe e ma yisa kheno ni kheno. Kambe ani ruma ku ni ya samba ka mnambu wa muwa Israyeli. Phela, minambu ya Siriya nja yinene kupinda wuwa. Ngu kutxani a nga mbi ni ruma ku ni tsula kheya?’ Nahanani a henyile ngutu, se a to huma mtini ka Elixa.

Kambe sithumi sakwe si to m’gela tiya: ‘Mkoma, awe u wombile ti to u ndina maha totshe kasiku u hanya ka malwati ako. Ngu kutxani u si mahi ati mprofeti a nga kugela? Phela nem kha ti karati.’ Nahanani a mahile ati sithumi sakwe si nga m’gela. Ene a tsute ka Mnambu wa Jordhani eya samba 7 wa makhambi. Mbimo yi Nahanani a nga huma matini ngu dikhambi da wu 7, se a ti hanyile ka wulwati wakwe. Phela a tsakile ngutu aha koza e tshumela eya bonga Elixa. Nahanani a ti khene: ‘Konku ani na tiziva ti to Jehovha ngene i ku Txizimu txa ditshuri.’ Hi nga alakanya nzila yi txihoranana txile txa Muisrayeli txi nga tsaka ngu yona mbimo yi txi nga wona Nahanani a txi wuya mtini a di hanyile ka wulwati wakwe!