Ezra a gondisile Mlayo wa Txizimu

Se ku ti pinda 70 wa malembe na wungi wa Vaisrayeli va di tshumete Jerusalema. Kambe vamwani va txi ngadi va txi hanya kha makhalo o hambanelana a mfumo wa Persiya. Mmweyo wa Vaisrayeli vonevo i to mprista awu a nga txi dhanwa ku i Ezra. Ene mbimo yotshe a txi gondisa vathu milayo ya Jehovha. Ezra a zivile ti to Vaisrayeli ava va nga ti Jerusalema va si engisi Milayo ya Jehovha. Ngu toneto, a lavile kutsula e ya va vhuna. Se mkoma wa Persiya, Aritasasta a gete tiya Ezra: ‘Txizimu txako txi ku ningile wutxhari wo gondisa Milayo ya txona, tsula Jerusalema. Ngaku va di ho a va va ti lavako kutsula ni nawe, va na tsuli. Se Ezra a sengeletile votshe ava va nga txi lava kutshumela ve ya Jerusalema. Vona va mahile mkombelo ka Jehovha ve mkombela ti to e va vhikela ka liendo lawe, se ve khukha ve tsula.

Ku di pindile 4 wa mitxima, vona va hokile Jerusalema. Vathangeli va khe Jerusalema va gete Ezra ti to Vaisrayeli vamwani va ti txhadhile ni vavasikati ava va nga txi khozela sizimu sa makuho. Mbimo yi Ezra a nga pfa eto, a to khizama masoni ka vathu e maha mkombelo, a txi khene: ‘Jehovha, awe u hi mahete timhaka tatingi tatinene, kambe athu hi mahile timhaka tatingi ati ti si ku tsakisi.’ Vaisrayeli va ti pfite mnando, hambi keto va simamile ve maha timhaka to biha. Ngu mhaka ya toneto, Ezra a to sawula madhota ni valamuli kasiku ve khatalela mhaka yile. Ka mitxima yiraru ayi yi nga londisela, vathu ava a nga si khozeli Jehovha va txo hingwa Jerusalema.

Ku di pindile 12 wa malembe mimuro ya Jerusalema se yi ti wusetilwe. Se Ezra a tshanganisile vathu kasiku e ta lera milayo ya Txizimu. Mbimo yi a nga tula dibhuku, votshe vathu va to khukha ve ema. Se votshe va to tumelelana nayo ve dhumisa Jehovha. Mbimo yi Ezra a nga txi lera ni kutxhamusela milayo, vathu va txi engisela khakwati. Vaisrayeli va tumete ti to va ti lekile kuengisa Jehovha, se va to dila. Ka ditshiku a di di nga londisela, Ezra a tshumete e lera kambe milayo masoni ka vathu. Vaisrayeli va woni ti to ku txi txhota masiku a madotho kasiku kuhoka M’buso wa Midhute. Ti sa nga swela, vona va to khata ku ti lulamisela kasiku ve maneka ka Fexta yoneyo ya hombe.

Ka 7 wa masiku a fexta Vaisrayeli va tsakile ngutu ni ku va bongile Jehovha ngu kuva a di katekisile tithembwe tawe ti pfuna. Dikhambi do gwita adi Vaisrayeli va nga di mahile M’buso wa Midhute ku ve mbimo yi a nga di ngadi a txi hanya Joxuwa. Msana ka kuva va di mahile fexta, vathu va to sengeletana ve maha mkombelo va txi kha vona: ‘Jehovha, awe u hi humisile Egipta. U hi ningile sakudya txitingani amu hi nga di kona ni ku u hi ningile wukhalo wuwa wo tshura ngutu. Kambe mbimo yotshe athu hi txi maha timhaka to biha. U rumete vaprofeti ti to ve ta hi vhuna, kambe athu kha ha va engisa. Hambiketo, awe u hi timiselete, u hetisisa ati u nga thembisa Abrahamu. Konku, athu ha kuthembisa ti to hi na kuengisa.’ Se vona va to bhaletela totshe tiya va nga di thembisile. Se kasi kutsanisa ti to vathu va ndi na maha totshe ati va nga di thembisile, vathangeli, Valevhi ni vaprista va to ginja txitambo.