Mmuru wa Jerusalema

Ka masiku a Ezra ku ti ni Muisrayeli awu a nga txi dhanwa ku i Nehemiya, i nga di txithumi txa Aritasasta, mkoma wa Susani, i nga ti dimwedo da madhoropa a Persiya. Ditshiku dimwani, Hanani a endete Nehemiya a txi khukhela Judha, e ya m’gela mahungu o mbi tsakisa. A ti ya m’gela tiya: ‘Vathu ava va nga tshumela Jerusalema va ka phango. Kala kuwa, kha ngaho a nga wuseta mimuru a didhoropa ayi yi nga hoxotwa ngu va Bhabhilona.’ Nehemiya a karatekile ngutu mbimo yi a nga pfa tile. Ene a txi ti lava kutsula Jerusalema kasiku e ya vhuneta, kambe a si tsaniseki ti to mkoma a ndi na mtumelela. Se ene a mahile mkombelo ka Jehovha ti to e m’vhuna.

Ditshiku dimwani, mkoma a woni Nehemiya a sa tsaka, se a m’wotisile ti to ngu kutxani a nga sa tsaka. Nehemiya a wombile ti to a sa tsaka ngu mhaka ya ti a nga di getwe ngu Hanani. Mkoma a m’wotisile ti to a ndi na m’vhuna ngu txani. Se ka yona mbimo yile, Nehemiya a to maha mkombelo ngu mbiluni, e gwita e gela tiya mkoma: ‘Ani ni lava kutsula Jerusalema ni ya wuseta mimuru, ina wa ni tumelela mkoma?’ Mkoma Aritasasta a tumete, e tshumela e maha totshe ati a nga ti kota kasiku Nehemiya e va ni diendo da dinene. Mkoma a tshumete e veka Nehemiya kota mkoma wa Judha ni kutshumela e mninga mapulango kasiku e ya maha ngu ona matimba a Jerusalema.

Mbimo yi Nehemiya a nga hoka Jerusalema, ene a woni mimuru ya didhoropa, ngu msana a sengeletile majaha a lisima ngutu a Jerusalema e ma gela tiya: ‘Txiemo txiya hi nga txa txinene, a hi wuseteni mimuru yiya.’ Vathu va tumete, se kukhatwa kuakwa mimuru.

Kambe valala vawe va khatile ku va seka va txi kha vona: ‘Eto mi akisako tona, hambi nyapwe yi txo kalavata si nga wa siya.’ Kambe Vaisrayeli kha va nga va ni mhaka ni toneto, va to simama ve aka. Se mimuru yi yite yi lapha ni kutiya.

Valala va to maha txisungo txo ya xasela Jerusalema. Mbimo yi Vajudha va nga ti ziva, va to va ni dizowa. Kambe Nehemiya a va gete tiya: ‘Mi nga thaveni, Jehovha a ni nathu.’ Se Nehemiya a vekile vawoneleli kasiku ve vhikela avale va nga txi aka mimuru. Se eto ti mahile ti to valala va si ti koti kuxasela Jerusalema.

Mimuru ni matimba a didhoropa si hetilwe kuakwa ngu 52 wa masiku basi. Se kasiku ve ta busa, Nehemiya a tisile Valevhi Jerusalema, e va abanisa ngu mitxawa yimbidi. Nehemiya a zumbile ka mtxawa wumwani, se Ezra nene e zumba ka mtxawa wule wumwani. Va to kwela sikadha ve huma, mtxawa wule wumwani wu tsimbila ngu kheno, se awule wumwani wu tsimbila ngu didhawa dimwani. Ve horoloka didhoropa na va txi embelela tindando to dhumisa Jehovha kala kuza ve ya manana dithempeleni. Votshe, majaha, vavasikati ni vanana va ningete miningelo ka Jehovha. Vona va di tsakile ngutu aha koza hambi u di kule ti txi koteka ku u va pfa.