Elizabheti e mana txirumbu

Se ku ti pinda 400 wa malembe mimuru ya Jerusalema yi ti wusetilwe. Hafuhi ni didhoropa dile, ku txi zumba mprista Zakariya ni msikati wakwe Elizabheti. Vona va ti ni malembe amangi va di txhadhile kambe va si nga ni vanana. Ditshiku dimwani Zakariya a bete dithempeleni, ka wukhalo wo sawuleka kasiku e ya hisa dibaselo ka Jehovha. Se ngilozi Gabriyeli yi humelete. Se Zakariya a to thava, kambe ngilozi yi m’gete tiya: ‘U nga thavi Zakariya, Jehovha a ni rumete kwako kasiku ni ta kugela mahungu o tsakisa. Msikati wako a na va ni mwanana, awu u no mraya ditina do i Johani. Jehovha a sawute Johani kasiku e maha mthumo wo sawuleka.’ Kambe Zakariya ni Elizabheti se va ti kumbile ngutu ni ku ti txi woneka nga ti si na kukoteka ku ve va ni vanana. Ngu toneto, Zakariya kha kholwa ati ngilozi yi nga m’gela. Se ngilozi Gabriyeli yi to m’gela tiya: ‘Phela Txizimu txi nga ni ruma ti to ni ta kugela tiya. Kambe aku awe u nga mbi kholwa ati ni nga kugela, u na maha txiduma kala mwanana e velekwa.’

Zakariya a di ya swela ngutu dithempeleni mule. Se mbimo yi a nga huma, vathu va txi lava kuziva ati ti nga di mahekile. Kambe Zakariya a si ti koti kuwombawomba. A txo kota kuwombawomba ngu kuthumisa mawoko dwe. Se vathu va tekete ku ti tumbula ti to Zakariya a ti amukete didungula do ta ngu ka Txizimu.

Ku di pindile mbimo, nga ha ngilozi yi nga di wombile ngu kona, Elizabheti a mani txirumbo e veleka mwanana wa mfana. Vangana vakwe ni maxaka akwe va tsakile ngutu ve tsula ve ya wona mwanana. Elizabheti a wombile ti to ditina da mwanana wule i Johani, kambe vona va to khene: ‘Kha ku nga ni m’thu ka mwaya wako va ku khene i Johani, mwanana wuwa mrayi to i Zakariya, i ku ditina da tate wakwe.’ Se Zakariya a to teka txipulangwana e bhala tiya: ‘Ditina dakwe i Johani.’ Ka yona mbimo yile, Zakariya a to khata kuwombawomba. Votshe vathu ava va nga txi zumba Judheya, va ti zivile ati ti nga di mahekile se ve pimisa tiya: ‘A na va m’thu wo zumbisa kutxani mwanana wuwa mbimo yi a no kula?’

Se Jehovha a to maha ti to Zakariya e tala ngu moya wo sawuleka. Zakariya a to khene: ‘A na dhumiswi Jehovha. Ene a thembisile Abrahamu ti to a ndi na rumela Mesiya kasiku e ta hi hulukisa. Johani a na va mprofeti ni ku m’thumo wakwe i na va kululamisela vathu ka kuhoka ka Mesiya.’

Kutshumete kuhumelela timhaka to xamalisa ka dixaka da Elizabheti, i ku dihorona a di va nga txi khona i Mariya. Ku to maheka txani? Hi na tiwona ka matimu a ya ma londiselako.