Mariya e endelwa ngu ngilozi Gabriyeli

Ka didhoropa da Nazareta khe Galileya, ku txi zumba dihorana a di di nga txi dhanwa ku i Mariya. I ti dixaka da Elizabheti ni ku di txi lava kutekwa ngu Josefa awu i nga ti m’vati wa mapulango. Mbimo yi txirumbo txa Elizabheti txi nga ti ni 6 wa mitxima, ngilozi Gabriyeli yi tsute yi ya womba-womba ni Mariya. Yona yi ti kha yona: ‘Ditxite Mariya, Jehovha a ku tsakete ngutu.’ Mariya kha ti pfisisa ti to ngilozi yi txi lava kuwomba txani. Se ngilozi yi m’txhamusete yi txi kha yona: ‘Awe u na veleka mwanana wa mfana, u na mraya ditina do i Jesu. A nava Mkoma wa Mfumo awu wu no fuma ngu ha ku si gumiko.’

Kambe Mariya a karatekile nguku ene a si khali kuwotela ni wamwamna. Se a ndi na tikotisa kutxani kuva ni mwanana. Ngilozi yi ti kha yona: ‘Mariya, ka Jehovha totshe ta koteka, ngu kuthumisa mtamo wakwe awe u na va ni mwanana. Dixaka dako Elizabheti ni dona di ni txirumbu.’ Mariya a gete tiya ngilozi: ‘Ngu tona, ti na maheke kwangu ati Jehovha a ti lavako.’

Se Mariya a tsute e ya pfuxela Elizabheti. Mbimo yi Mariya a nga txi womba-womba ni Elizabheti, Elizabheti a to pfa mwanana a txi ndaka-ndaka mndani. Se Elizabheti a to khene: ‘Mariya, awe u wa msikati awu a nga katekiswa ngu Jehovha. Litsako la hombe kwangu kuamukela mame wa Mesiya. Mariya a to xamula atxi khene: ‘Ditshuri Elizabheti, ani na m’bonga ngutu Jehovha ngu toneto.’ Mariya a zumbile mitxima yiraru mtini ka Elizabheti, e gwita e tshumela mtini kwakwe khe Nazareta.

Mbimo yi Josefa a nga ziva ti to Mariya a ti ni txirumbo, a to wona ti to i ti tshuku ku m’leka. Kambe ngilozi yi ti ya womba-womba ni Josefa ngu mu ka mloro yi txi kha yona: ‘U nga thave kutxhadha ni Mariya, ene kha maha to biha.’ Se Josefa a txhadhile ni Mariya, e m’teka e tsula nayo mtini kwakwe.