Jesu e wusa Lazaro

Jesu a ti ni vangana vararu ava va nga ti zumba ka didhoropa da Bhetaniya. I ti Lazaro ni tindiya takwe ta timbidi Mariya ni Marta. Ditshiku dimwani, Jesu a ti ka didhoropa da kule ni Bhetaniya. Se Marta ni Mariya va to rumela didungula da txikuluveta ngutu ka Jesu va txi khona: ‘Lazaro wa lwala ngutu. Hi kombela u kuluveta u ta!’ Kambe Jesu a swete kutsula kheya. Ku di pindile masiku mambidi, Jesu a gete vagondiswa vakwe atxi khene: ‘Tsimbilani Bhetaniya. Lazaro a otete, se ni lava kuya m’wusa.’ Vagondiswa vakwe va to khona: ‘A di otete tinene, a na kuluveta ku kalamuka.’ Mbimo yi Jesu a nga tumbula ti to vagondiswa vakwe va sa tipfisisa ati a nga womba, ene ato khene: ‘Lazaro a fite.’

Mbimo yi Jesu a nga hoka Bhetaniya, se ku ti pinda 4 wa masiku na Lazaro adi fite. Ku ti ni vathu vavangi ava va nga txi dila ni Marta ni Mariya. Mbimo yi Marta a nga ziva ti to Jesu a ti hokile, a to huma e tutuma e tsula ka Jesu, eya khene: “Mkoma, ngaku awe u ti ko vaho ndiyangu a sa fa.” Jesu a to khene: ‘Marta ndiyako a na tshumela e hanya. Ina wa kholwa?’ Marta a to khene: ‘Ina Jesu, ani na kholwa ti to ndiyangu a na wuswa mbimo ayi yi tako.’ Se Jesu a to khene: “Marta ani ngani kuwuka ni wutomi.”

Marta a to tsula eya gela Mariya ti to Jesu a ti hokile. Mariya a to tutuma eya ka Jesu, se vathu ni vona va to m’londisa. Mariya a to khizama masoni ka Jesu a txi dila, atxi khene: ‘Mkoma, ngaku awe u ti ko vaho hawa ndiyangu a sa fa!’ Mbimo yi Jesu a nga wona Mariya atxi dila, nene a to khata kudila. Akule vathu va nga wona Jesu a txi dila va to khene: ‘Hi nga wonani ati Jesu a nga txi m’randisa tona Lazaro.’ Kambe vamwani va txi ti wotisa ti to ngu kutxani Jesu a nga sa maha txilo kasi kuhulikisa mngana wakwe Lazaro. Se ngu tihi ati Jesu a ndi no ti maha?

Jesu a tsute dithithani ka Lazaro, e kombela vathu ti to ve thavisa dirigwi da hombe adi di nga ti vhate hale. Marta a to khene: ‘Se kupinda 4 wa masiku adi fite! Mmidi wakwe se wa nunga.’ Hambiketo, va thavisile dirigwi. Se Jesu a to maha mkombelo atxi khene: ‘Tata, na bonga ngu kuva u txi ni engisa. Ani na tiziva ti to mbimo yotshe wa ni engisa. Kambe ni womba eto kasiku votshe vathu vava ve tiziva to awe u ni rumile ti to ni ta hamafuni.’ Mbimo yi a nga gwita kumaha mkombelo, Jesu a to kwangula atxi khene: “Lazaro, huma hahanze!” Se ku to maheka timhaka to xamalisa ngutu: Lazaro a to huma ngu dithithani. Msana keto, Jesu a to va gela ti to ve txhatxhela tinguwo ati ti nga di tombetete mmidi wa Lazaro.

Vathu vavangi ava va nga wona txidiwukiso txiya va to khata kukholwa ka Jesu. Kambe vamwani va tsute veya gela Vafarisi. Vafarisi va to henya ngutu, ve lava kudaya Jesu ni Lazaro. Judhasi, mmweyo wa 12 wa vapostoli a to tsula eya womba-womba ni Vafarisi, a txi khene: ‘Mi nga ni ninga male muni ngako ni txo mi gela amu Jesu aku kona?’ Vafarisi vale va to khona va ndi na m’ninga 30 wa mamowedha a prata. Judhasi a tumete se a to khata kulavetela tinzila to ningela Jesu ka Vafarisi kasiku ve m’daya.