Jesu e humelela ka vagondiswa vakwe

Ku di pindile mbimo, Pedro a tsute e ya daya sihaka ka linene la Galileya. Tomasi, Jakobe, Johani ni vamwani vagondiswa va tsute nayo. Vona va ti ya heta wusiku wotshe va txi dota kambe kha va mana nem txihaka tximwetxo.

Mangwanani ka kona ni mixo, va to wona dijaha di ti hahanze ka linene. Dijaha dile di to kwangula di wotisa vagondiswa ti to va di si koti kumana sihaka kani? Vona va wombile ti to va sa mana txilo. Se dijaha dile di to va gela ti to ve rinza likoka ka didhawa da txinene ka ngalava. Vagondiswa va to maha toneto. Se mbimo yi va nga ndinda likoka ti ti tate ngu sihaka. I ti sihaka sasingi a ha koza va si tikoti kundinda likoka li bela mndani ka ngalava. Ka yona mbimo yile, Johani a to tekela ku ti tumbula ti to dijaha dile i ti Jesu, se to khene: ‘I Jesu.’ Pedro a to tekela kundaka, e ti rinza matini e sambela kala hahanze ka linene. Vagondiswa vale vamwani ni vona va to jikisa ngalava ve londisa Pedro.

Mbimo yi vagondiswa va nga hoka hahanze ka linene va to wona mapawa ni sihaka si txi bawulwa. Jesu a to gela vagondiswa ti to ve tisa sihaka simwani kasiku ve ta bawula. Se Jesu ni vagondiswa vakwe va to khata kudya.

Msana keto, Jesu a to khata kuwombawomba ni Pedro a txi khene: ‘Pedro, ina awe wa ni randa kupinda mthumo wako wo daya sihaka kani?’ Pedro a to khene: ‘Mkoma, awe wa tiziva ti to ani na kuranda.’ Jesu a to khene: ‘Dyisa sinvutana sangu.’ Jesu a to tshumela e wotisa kambe Pedro ti to a txi m’randa kani. Pedro a tshumete e xamula kambe ti to a txi m’randa Jesu. Se Jesu a to tshumela e gela Pedro ti to e dyisa sinvutana sakwe. Mbimo yi Jesu a nga wotisa ngu dikhambi da wuraru ti to Pedro a txi m’randa, Pedro a to swireka e xamula a txi khene: ‘Mkoma awe wa tiziva totshe, wa tiziva ti to ani na kuranda.’ Se Jesu a to ruma Pedro ku e dyisa sinvutana sakwe ni kusimama e va mgondiswa wakwe.