GONDO 100

Paulo ni Timoti

Eunise, Loyidhe ni Timoti i ti ngadi m’dotho

Timoti i ti dijovhem da dibanza da Listra. Tate wakwe i ti M’griki, mwamwakwe i ti M’judha. Mwamwakwe a txi dhanwa ku i Eunise se vhovho wakwe i ti Loyidhe. Vona va gondisile Timoti ngu Jehovha kukhukhela mbimo yi i nga ti ngadi m’dotho.

Mbimo yi Paulo a nga pinda ngu Listra ka diendo dakwe da wumbidi da wutxhumayeli, ene a woni ti to Timoti a txi va dhunda ngutu vanathu ni ku a txi ti dhunda ku va vhuna. Se Paulo a rambile Timoti ti to e enda kumweko nayo. Ngu kuvhunwa ngu Paulo, Timoti a gondile kutxhumayela ni kugondisa ngu nzila ya yinene.

Txizimu txi txi thumisa moya wa txona wo sawuleka kasi kukomba Paulo ni Timoti amu va nga ti fanete kuya kona. Ka wusiku wo kari, Paulo a ve ni muwoniso. Ka muwoniso wonewo, dijaha do kari di gete tiya Paulo: ‘Ngono Makedhoniya, u ta hi vhuna.’ Se Paulo, Timoti, Silasi ni Luka va tsute veya txhumayela Makedhoniya ni kumaha mabanza.

Tesalonika i ku dimwedo da madhoropa a Makedhoniya, vathu vavangi va ve Makristu. Kambe, Majudha o kari ma txi m’nyenya Paulo ni vangana vakwe. Se vona va to sengeletana kota mtxawa wa hombe, ve ndinda Paulo ni vangana vakwe veva yisa ka vakoma va didhoropa, veya kwangula va txi khona: ‘Majaha yawa valala va wukoma wa Roma!’ Phela kusimama ve zumba hale, ku ndi nava phango ka Paulo ni Timoti. Ngu toneto, va pfhukile ni wusiku ve tsula Bhereya.

Vathu va Bhereya va txi ti lava ngutu kupfa mahungu a manene. Vajudha ni Vagriki va khe Bhereya, vave Makristu. Mbimo yi Vajudha vo kari va Tesalonika va nga tsula Bhereya veya wusa mazunga, Paulo ti lavile e tsula Atena. Kambe, Timoti ni Silasi va simamile ve zumba Bhereya kasiku ve tsanisa likholo la vanathu. Ngu kutsimbila ka mbimo, Paulo a kombete Timoti ti to e tshumela e tsula Tesalonika, kasiku eya vhuna vanathu ti to ve wonisana ni kuxaniswa aku va nga txi manana nako. Ku di pindile mbimo, Paulo a tshumete e kombela Timoti ti to e pfuxela ni kutsanisa mabanza mamwani amangi.

Mpostoli Paulo a geletela Timoti a ti a fanelako kubhala ka dipasi adi jele, a sungilwe litxhini ali va nga sunga disotxhwa

Paulo a gete tiya Timoti: ‘Awu a lavako kuthumela Jehovha a na xaniswa.’ Timoti a xanisilwe ni kubetwa jele ngu ku i ngati Mkristu. Kambe ene a txi pfa litsako, nguku atile ti txi m’vhuna kukombisa ti to a di thembekile ka Jehovha.

Paulo a gete tiya Vafilipiya: ‘Ani ni kombete Timoti ti to eta kheyo. Ene a na mi gondisa kuhanya kota malanda a Jehovha, a na tshumela e mi gondisa kutxhumayela.’ Paulo a txi m’themba ngutu Timoti. Vona va thumile votshe kudingana malembe amangi ni ku i ti vangana va hombe ngutu.

‘Kha ni nga ni mmwani m’thu wa mbilu ya kufana ni ya Timoti, awu a sikotako ku mi khatalela. Votshe va khatalela wutomi wawe, i si nga timhaka ta Jesu Kristu.’—Vafilipiya 2:20, 21