Paulo e tsula Roma

Diendo da wuraru da wutxhumayeli da Paulo di gwitete Jerusalema. A kheya ene a tiya ñolwa e betwa jele. Ka wusiku wo kari, Jesu a humelete ka Paulo ngu ka muwoniso, e m’gela tiya: ‘Tsula Roma u ya txhumayela kheya.’ Paulo va m’tekile Jerusalema ve m’yisa Khezareya, se a tiya vhalelwa jele kona kheya kudingana malembe mambidi. Mbimo yi a nga txi xuxiswa ngu mkoma wa Khezareya awu a nga txi dhanwa ku i Festo, Paulo a kombete tiya: ‘Ani ni lava kuya xuxiswa ngu Khezari, khe Roma.’ Festo a tumete. Se Paulo a to bela ka txitimela txa matini atxi txi nga txiya Roma. A to tsula ni vangana vakwe vavambidi, Luka ni Aristarkusi.

Ka mbimo yile va nga txi enda, ku to va ni moya wa hombe ngutu linene mule kudingana masiku amangi. Votshe vathu ava va nga ti ka txitimela txile va txi pimisa ti to va ndi na fa. Kambe Paulo ava gete tiya: ‘Hemanoo! Vanani ni txibindi, hi nambi fa. Ngilozi yi ni tete ngu mu ka mloro ni wusiku yi ta ni gela tiya: “U nga thavi Paulo. Awe u na hoka Roma, votshe ava va no va ni nawe amu ka txitimela va na huluka.”’

Moya wule wu simamile wu peka kudingana 14 wa masiku. Majaha aya ma nga txi tsimbitisa txitimela txile, ma to wona txitondolo. I ti txitondolo txa Malta. Se majaha yale ma to jikisa txitimela me tsula kona kheya. Mbimo yi va nga ti hafuhi ni kuhoka ka txitondolo, txitimela txi to ya peka txitunga txa mafu, se txitimela txile txi to haxukela. Kambe votshe vathu vale 276, ava va nga tiho mule va hulukile. Vamwani va to sambela ve tsula ka txitondolo txile, se vamwani va to ñoleta sipevhu sa txitimela. Mbimo yi va nga hoka kheya, vathu va Malta va tiya va khatalela ve tshumela ve dhivela mndilo kasiku ve ora.

Ku di pindile mitxima yiraru, masotxhwa ma tekile Paulo me m’heleketa Roma ngu txitimela. Mbimo yi Paulo a nga hoka Roma, vanathu va tsute veya wonana nayo. Mbimo yi Paulo a nga wona vanathu, a to bonga Jehovha eva ni txibindi. Hambiku Paulo i nga ti txibotxhwa, va m’leki e lugara nyumba kasiku e zumba ka yona na a txi wonelelwa ngu disotxhwa. Ene a zumbile kheya malembe mambidi. Mbimo yi vathu va nga txi tsula veya wona Paulo, ene atxi va txhumayela mahungu a manene a Mfumo ni kuwombawomba ngu Jesu. Paulo a tshumete e bhalela mapasi mabanza aya ma nga txi maneka khe Aziya wa M’dotho ni Judheya. Matimu a Paulo ma hi gondisa ti to, Jehovha a m’thumisile kasiku e hokisa mahungu a manene ka vathu va makhalo amangi.