Hi nga maha txani ti to Txizimu txi amukela wukhozeli wathu?

Nga ha hi nga ti wona ngu kona ka gondo ayi yi nga pinda, hi nga totshe titxhetxhe ti tsakisako Txizimu. Kambe ti nga koteka ku hi khozela M’vangi wathu ngu nzila yi yi mu tsakisako. Se ngu wuhi “wukholwa [wukhongeli] wa ditshuri” awu wu tsakisako Txizimu? (Jakobe 1:27) Wona ati Bhiblia yi ti wombako.

1. Wukhongeli wathu wu fanete kuseketelwa ka txani?

Wukhongeli wathu wu fanete kuseketelwa ka Bhiblia. Jesu a gete Txizimu atxi khene: “Dipswi dako ngu dona ditshuri.” (Johani 17:17) Titxhetxhe to tala kha ti londisi ati Dipswi da Txizimu di ti wombako. Tona ti ninga ngutu lisima sihena ni tigondo ta vathu. Kambe Jehovha kha va tsakeli ava ‘va eyisako mlayo wakwe.’ (Lera Marku 7:9.) Kuhambana ni toneto, hi tsakisa mbilu ya Jehovha mbimo yi hi engisako milayo yakwe yi ku mu ka Bhiblia.

2. Hi nga mu khozelisa kutxani Jehovha?

Hi fanete kukhozela Jehovha dwe nguko ngene m’vangi wathu. (Mtuletelo 4:11) Eto ti womba to, kha ha fanela kuthumisa sithombe mwendo sifaniso ka wukhozeli wathu, nguko hi fanete kuranda Jehovha ni kukhozela ene dwe.—Lera Isaya 42:8.

Wukhozeli wathu wu fanete kuva wo ‘sawuleka ni kutsakisa’ ka Jehovha. (Varoma 12:1) Eto ti womba to ati hi hanyisako tona ti fanete kupfana ni milayo ya Txizimu. Ngu txikombiso, ava va dhundako Jehovha va engisa milayo ayi a nga yi veka ka va va nga tekana. I si nga eto dwe, vona kha va dhahi, kha va thumisi timbangi mwendo kuleva.a

3. Ngu kutxani hi di fanete kukhozela Jehovha hi di mitshanganoni?

Mitshangano ya divhiki ni divhiki yi hi ninga mkhanjo wo hi “dhumisa MKOMA . . . msengeletanoni.” (Masalmo 111:1, 2) Yimweyo ya tinzila to dhumisa Jehovha ngu embelela. (Lera Masalmo 104:33.) Jehovha a lava ti to hi mkhozela hi di mitshanganoni, nguko wa hi dhunda ni ku wa tiziva ti to eto ti na hi vhuna ku hi ta hanya wutomi wo tsakisa kala kupinduka. Mbimo yi hi tshanganako ni vanathu ha tsanisana.

ENGETELA WUZIVI WAKO

4. Kha ha fanela kuthumisa sithombe ka wukhozeli wathu

VHIDHIYO: Ina Txizimu txa tumela ti to hi thumisa sithombe ka wukhozeli wathu? (3:26)

• Ku humelete txani ka vathu va Txizimu ava va nga zama ku txi khozela ngu kuthumisa sithombe?

Vamwani va zama kutipfa va di hafuhi ni Txizimu ngu kuthumisa sithombe mbimo yi va txi khozelako. Ina toneto ngu ditshuri ta va tshuketisa ka Txizimu? Lera Eksodha 20:4-6 ni Masalmo 106:35, 36, mi gwita mi bhula ngu siwotiso siya:

• Ngu sihi sithombe simwani u si zivako asi vathu va si thumisako ka wukhozeli wawe?

• Jehovha a ti pfisa kutxani ngu kuthumiswa ka sithombe?

• Awe u ti pfisa kutxani ngu kuthumiswa ka sithombe?

5. Kukhozela Jehovha ta hi khulula ka tigondo ta makuhu

VHIDHIYO: Ditshuri di mkhulute (5:16)

Lera Masalmo 91:14, mi gwita mi bhula ngu Txiwotiso txiya:

• Ngu tihi ati Jehovha a no hi mahela ngako hi txi kombisa ti to ha mranda ngu kukhozela ene dwe?

6. Ha khozela Txizimu hi di mitshanganoni

Ha dhumisa Jehovha ni kutsanisana ngu kuembelela ni kuningela tixamulo hi di mitshanganoni. Lera Masalmo 22:22, mi gwita mi bhula ngu siwotiso siya:

• Ina ta kutsakisa kupfa tixamulo ta vamwani u di mitshanganoni?

• Ina u nga lulamisela ti to u ya xamula nawe?

7. Jehovha wa tsaka ngako hi txi bhulela vamwani ati hi ti gondako

Ku ni tinzila to tala to bhulela vamwani ati hi ti gondako amu ka Bhiblia. Lera Masalmo 9:1 ni 34:1, mi gwita mi bhula ngu txiwotiso txiya:

• Ngu tihi ati u nga ti gonda amu ka Bhiblia u tsakelako kubhulela vamwani?

ATI HI NGA TI WONA

Hi tsakisa M’vangi wathu ngu kukhozela ene dwe, hi m’dhumisa hi di mitshanganoni, ni kubhulela vamwani ati hi ti gondako.

Ngu tihi ti u nga ti gonda

• Hi nga yi zivisa kutxani nzila ya yinene yo khozela Txizimu?

• Ngu kutxani hi di fanete kukhozela Jehovha dwe?

• Ngu kutxani hi di fanete kukhozela Txizimu hi di mitshanganoni?

XOTA TIMWANI

Wona nzila ayi wamsikati wo kari a nga leka ngu yona kuthumisa sithombe ka msungo wa mhaka awu wu ku: “Kha ni swi ni thumisa sithombe.”

“Bhiblia ya txitxa wutomi wa vathu” (Muwoneleli wa 1 ka Julho wa 2011)

Wona ati ti nga kuvhunako ti to u xamula u di mitshanganoni.

“Dhumisa Jehovha hagari ka msengeletano” (Muwoneleli wa Janeiro wa 2019)

Wona nzila yi dijovhem do kari di nga vhuneka ngu yona ngu mitshangano hambiku ti nga si mu hehukeli kuya mitshanganoni.

Jehovha a ni khatalete mbimo yotshe (3:07)

Vathu vo tala va womba ti to u txi thumisa txihambano ti kombisa ti to u mkristu, ina toneto ditshuri?

“Ngu kutxani Tifakazi ta Jehovha ti si thumisi txihambano ka wukhozeli wa tona?” (Msungo mhaka wu ku ka site)