GONDO 29
Kuhumelela txani ngako m’thu a txi fa?
Ina u khala kufelwa ngu m’thu awu u m’dhundako? Ngako u di ka txiemo txiya txo karata ti nga maha u ti wotisa siwotiso so fana ni siya: ‘Kuhumelela txani ngako hi txi fa? Ina yaho themba ya ti to maxaka athu aya ma nga fa hi nga tshumela hi ma wona?’ Ka gondo yiya ni yi yi londiselako u na mana tixamulo to thavelela ta mu ka Bhiblia ta siwotiso siya.
1. Kuhumelela txani ngako m’thu a txi fa?
Jesu a fananisile lifo ni wukohe wa hombe. M’thu awu a ku ka wukohe wa hombe kha pfi txilo ka ti ti mahwako hambi ngu vathu ava va ku hafuhi kwakwe. Lifo li fana ni wukohe ngu nzila muni? Ngako m’thu a di fite kha pfi txilo ni ku kha kupfi kupanda. Ene kha xaniseki nem kha pfi txiwunda. Bhiblia yi womba ti to “vofa kha va zivi txilo ni txa tximwetxo.”—Lera Ekleziyaste 9:5.
2. Kugonda ditshuri mayelano ni vafi ti nga kuvhuna ngu nzila yihi?
Vathu vo tala va thava kufa ni kuthava ava va nga fa. Kambe u nga thaveleleka ngu kuziva ati Bhiblia yi ti wombako mayelano ni vafi. Jesu a ti khene: “ditshuri di na mi khulula.” (Johani 8:32) Titxhetxhe to tala ti womba ti to ku ni moya awu wu salako wu hanya ngako m’thu a di fite, kambe eto hi nga tona ati Bhiblia yi ti wombako. Ngu toneto, kha ngaho awu a xanisekako ngako a di fite. I si nga eto dwe, vafi kha va nge hi dayisi, nem kha va zivi txilo ka ti ti mahekako. Ngu toneto kha ti lavi hi maha to kari kasi ku va tsakisa, mwendo ku va khozela hambi ku va khongelela.
Vamwani va womba ti to va nga sikota kuwomba-womba ni vafi. Kambe eto ti nge koteki. Nga ha hi nga ti wona ngu kona, vafi “kha va zivi txilo.” Ava va pimisako to va womba-womba ni maxaka aya ma nga fa, va womba-womba ni madhimoni aya ma ti mahako nga mbathu va va nga fa. Se kuziva ditshuri mayelano ni vafi ti nga hi vhikela ka madhimoni. Jehovha wa hi txharihisa ti to hi si zami kuwomba-womba ni vafi nguko wa tiziva to madhimoni ma ni phango.—Lera Dhewuteronome 18:10-12.
ENGETELA WUZIVI WAKO
Gonda to tala mayelano ni ti ti mahekako ngako m’thu a txi fa. U na tshumela u gonda to Txizimu txa lirando i ku Jehovha kha txi xanisi m’thu hambi a di fite. Eto ti na tsanisa themba yako ka Jehovha Txizimu txathu txa lirando.
3. Gonda ditshuri mayelano ni txiemo txa vafi
Hamafuni kotshe, vathu va ni mawonelo o hambanelana mayelano ni ti ti humelelako ngako m’thu a di fite. Kambe ti hakubasani ti to hi nga otshe mawonelo i ku a ditshuri.
Ngu tihi ati vathu va mu u zumbako kona va ti kholwako mayelano ni txiemo txa vafi?
Ti to u wona ati Bhiblia yi ti gondisako, xalela VHIDHIYO.
Lera Ekleziyaste 3:20, mi gwita mi bhula ngu siwotiso siya:
Ngu kuya ngu mavhersikulo yawa, kuhumelela txani ngako m’thu a txi fa?
Msana ka kuva m’thu a di fite, ina ku ni txi txi salako txi hanya?
Bhiblia ya hi gela ngu lifo la Lazaru mngana wa hombe wa Jesu. Lera Johani 11:11-14, u wona ati Jesu a nga ti womba ngu Lazaru. Mi gwita mi bhula ngu siwotiso siya:
Jesu a fananisile lifo ni txani?
Txikombiso txiya txi hi gondisa txani mayelano ni ti ti humelelako ngako m’thu a txi fa?
Awe u pimisa ti to ati Bhiblia yi ti wombako ta pfisiseka?
4. Kuziva ditshuri mayelano ni lifo ta hi vhuna ngutu
Kuziva ditshuri mayelano ni lifo ta hi khulula ka kuthava vafi. Lera Ekleziyaste 9:10, mi gwita mi bhula ngu txiwotiso txiya:
Ina vafi va nga hi tisela phango yo kari?
Kuziva ditshuri da mu ka Bhiblia mayelano ni vafi, ti na hi vhuna ku hi si kholwi makuhu ya ti to ti lava hi tsakisa vafi mwendo kuva khozela. Lera Isaya 8:19 ni Mtuletelo 4:11, mi gwita mi bhula ngu txiwotiso txiya:
U pimisa ti to Jehovha a ti pfisa kutxani ngako m’thu a txi khozela ni kukombela txivhuno ka vafi?
Kuziva ditshuri mayelano ni vafi ta hi khulula ka sihena asi si si tsakisiko Jehovha
5. Kuziva ditshuri mayelano ni lifo ta hi khulula
Vathu vo tala va gondile ti to va txi fa va na ya xaniseka ngu mhaka ya sionho asi va nga si maha. Kambe ta hi khulula kuziva ti to msana ko fa kha hi na mbi xaniseka hambi i di ti to hi mahile timhaka to biha. Lera Varoma 6:7, mi gwita mi bhula ngu txiwotiso txiya:
Bhiblia yi womba ti to m’thu a di fite a thukunyutwe mwendo ku a hakete sionho sakwe. Se u pimisa ti to ngako m’thu a txi fa a na ya xaniseka ngu mhaka ya sionho asi a nga si maha?
Mbimo yi hi yako hi gonda ngu Jehovha hi ya hi pfisisa ti to kha na mbi thuka e maha ti to vafi ve xaniseka. Lera Dhewuteronome 32:4 ni 1 Johani 4:8, mi gwita mi bhula ngu siwotiso siya:
Ina Txizimu atxi txi ku ni tifanelo ati hi nga ti wona ka mavhersikulo yawa, txi nga xanisa vathu ava va nga fa?
Ina awe wa tipfa u di khululekile ngu kuziva ditshuri mayelano ni ti ti mahekako ngako m’thu a txi fa? Ngu kutxani?
NGAKO VATHU VA TXI KHONA: “Na thava to ku na humelela txani ngu ngani ngako ni txo fa.”
Ngu yihi mibhalo ya mu ka Bhiblia ayi u ndi no yi thumisa kasi kuvhuna m’thu eneyo?
ATI HI NGA TI WONA
Ngako m’thu a txi fa kha swi e ziva txilo. Vathu ava va nga fa kha va xaniseki nem kha va tiseli phango ava va hanyako.
Ngu tihi ti u nga ti gonda
Kuhumelela txani ngako m’thu a txi fa?
Kuziva ditshuri mayelano ni lifo ti hi vhunisa kutxani?
Kuziva ditshuri mayelano ni lifo ti hi thavelela ngu nzila yihi?
XOTA TIMWANI
Wona to Bhiblia yi di txhamuselisa kutxani dipswi adi di ku “moya.”
Wona to ina Txizimu ngu ditshuri txa xanisa vabihi ngu ku va hisa ha mndiloni?
Ina ti lava hi thava vafi?
“Mimoya ya vafi—Ina yi nga kuvhuna mwendo yi nga kudayisa? Ina yiho ngu ditshuri?” (dibroxura)
Wona nzila yi wamwamna wo kari a nga khululwa ngu yona mbimo yi a nga ziva ditshuri mayelano ni txiemo txa vafi.