GONDO 46
Ngu kutxani u di fanete kutiningetela ka Jehovha ni ku bhabhatiswa?
Txisungo txa lisima ngutu atxi hotshethu hi nga txi mahako ka wutomi wathu, ngu tiningetela ka Jehovha. U tiningetela ka Jehovha mbimo yi u mahako mkombelo u m’thembisa ti to u na khozela ene dwe ni kuthangetisa kumaha kudhunda kwakwe ka wutomi wako. (Masalmo 40:8) Msana keto u nga bhabhatiswa. U txi maha toneto u tiveka hakubasani ti to u ti ningetete ka Jehovha. Txisungo txo tiningetela ka Jehovha txa txitxa wutomi wa m’thu. Nji txani atxi txi nga kuzetako m’thu ku e maha txisungo txonetxo?
1.Nji txani atxi txi kuzetako m’thu ku e ningetela wutomi wakwe ka Jehovha?
Lirando ngu lona li hi kuzetako to hi tiningetela ka Jehovha. (1 Johani 4:10, 19) Bhiblia yi womba tiya: “Randa Mkoma Txizimu txako ngu yotshe mbilu yako, ngu wotshe muhefemulo wako, ngu otshe mapimo ako ni wotshe mtamo wako.” (Marku 12:30) Hi kombisa ti to ha m’randa Jehovha i singa ngu txisofu dwe kambe ni ngu mithumo yathu. Kufana ni vathu ava va randanako ngu ditshuri va mahako txisungo txo txhadha, lirando lathu ngu Jehovha la hi kuzetela ti to hi tiningetela kwakwe ni kubhabhatiswa.
2.Ngu yahi makatekwa aya Jehovha a ningako avale va nga bhabhatiswa?
Ngako u txi bhabhatiswa, u na lumba mwaya wa Jehovha awu wu nga tsaka. Se lirando ali Jehovha a ku nalo ngu ngawe u na lipfa ngu tinzila to hambana-hambana. Ni ku wuxaka wako ni Jehovha wu nava wo tsana ngutu. (Lera Malakiya 3:16-18.) Hahanze kova ni Jehovha kota Tate dwe, u na va ni vanathu va ha mafuni kotshe, va txiwamna ni va txisikati ava va randako Jehovha, ve randa ni nawe. (Lera Marku 10:29, 30.) Ditshuri ti to u si se bhabhatiswa ku ni ti tilavako ku u ti maha. Kukhata ti lava u gonda ngu Jehovha, u m’randa ni kuva ni likholo ka Mwanana wakwe Jesu. Ngu magwito u ningetela wutomi wako ka Jehovha. Ngako u txi maha totshe tiya u tshumela u bhabhatiswa u nava ni mkhanjo wo hanya kala kupinduka. Dipswi da Txizimu di womba tiya: ‘txibhabhatiso . . . txa mi hanyisa.’—1 Pedro 3:21.
ENGETELA WUZIVI WAKO
Xolisisa ti to ngu kutxani i di ta lisima ku tiningetela ka Jehovha ni ku bhabhatiswa.
3. Hotshethu ti lava hi sawula to i mani awu hi no m’thumela
Ka ditiko da Israyeli wa kale, vathu vamwani va ti pimisa ti to va nga tikota kukhozela Jehovha ni txizimu txa makuhu Bhahali ngu mbimo yimweyo. Kambe Jehovha a rumete mprofeti wakwe Elija ti to e ya va kawuka ngu mapimiselo awe o biha. Lera 1 Vafumeli 18:21, mi gwita mi bhula ngu txiwotiso txiya:
Ngu txihi txisungo atxi Vaisrayeli va nga ti fanete ku txi maha?
Kufana ni Vaisrayeli, nathu hi fanete kumaha txisungo txa ti to i mani awu hi no m’thumela. Lera Luka 16:13, mi gwita mi bhula ngu siwotiso siya:
Ngu kutxani ti si kotekiko kukhozela Jehovha ni sizimu simwani ngu mbimo yimweyo?
Hi nga kombisisa kutxani ti to hi sawula kukhozela Jehovha dwe?
4. Alakanyisisa ngu lirando ali Jehovha a ku nalo ngu ngawe
Jehovha a hi ningile tiningo to tala ta lisima. Se athu ko, hi nga m’ninga txani? Xalela VHIDHIYO.
Ngu tihi tinzila ati Jehovha a kombisako ngu tona ti to wa kudhunda? Lera Masalmo 104:14, 15 ni 1 Johani 4:9, 10, mi gwita mi bhula ngu siwotiso siya:
Ngu tihi tiningo ta lisima ati Jehovha a nga kuninga ati u ti bongako ngutu?
Tiningo toneto ta lisima ti kumaha u tipfisa kutxani ngu Jehovha?
Ngako hi txi amukela ningo ayi yi hi tsakisako ngutu ha ti tsakela kubonga awu a hi ningako ningo yoneyo. Lera Dhewuteronome 16:17, mi gwita mi bhula ngu txiwotiso txiya:
Ngako u txi alakanyisisa ngu totshe tiningo ati Jehovha a nga kuninga, u pimisa ti to awe u nga m’ninga txani?
5. Kutiningetela ka Jehovha ti tisa makatekwa o tala ngutu
Vathu vo tala va pimisa ti to va nga mana litsako ngu kuva ni nduma m’thumo wo holela kwati ni kuva ni male yo tala. Ina toneto ditshuri? Xalela VHIDHIYO, mi gwita mi bhula ngu siwotiso asi si londiselako.
Ngu kutxani mwanathu awu hi nga m’wona ka vhidhiyo a di sawute kuleka kukhavela bhola hambi ku a nga txi yi dhunda?
Ene a sawute kutiningetela ka Jehovha i si nga kutiningetela ka bhola. Ina u wona ti to a mahile txisungo txa txinene? Ngu kutxani?
Mpostoli Paulo a ti zumbisekile a si se va Mkristu. Ene a ti gondisilwe mlayo wa Txijudha ngu m’gondisi wa nduma. Kambe Paulo a tshuralete totshe tiya kasi ku e hunduka e va Mkristu. Ina ene a ti layile ngu kumaha txisungo txonetxo? Lera Vafilipiya 3:8, mi gwita mi bhula ngu siwotiso siya:
Ngu kutxani Paulo a di wombile ti to ati a nga ti ti maha a si se va Mkristu ti txi fana ni “nzambwa”?
Ngu yihi wuyelo ayi Paulo a nga yi mana ngu kuleka ati a nga ti maha kale?
Ina u pimisa ti to wutomi wako wu na tshukwala ngako u txi sawula kuthumela Jehovha? Ngu kutxani?
Mbimo yi Paulo a nga va Mkristu a mani so tala kupinda asi a nga si leka
NGAKO VATHU VA TXI KHONA: “Hi nga txikolo-kolo kutiningetela ka Txizimu, hi fanete kutidila ngu wutomi.”
Ngu kutxani awe u txi wona to ku tiningetela ka Jehovha ngu tona i ku ta lisima ngutu?
ATI HI NGA TI WONA
Lirando ali hi ku nalo ngu Jehovha li hi kuzeta ku hi tiningetela kwakwe ni ku bhabhatiswa.
Ngu tihi ti u nga ti gonda
Ngu kutxani hi di fanete kuranda Jehovha ngu mbilu yathu yotshe ni ku tshumela hi mkhozela?
Jehovha a ma katekisa ngu nzila yihi malanda akwe otshe a ya ma nga bhabhatiswa?
Ina wa tilava ku tiningetela ka Jehovha?
XOTA TIMWANI
Wona ati ti nga maha muembeleli ni m’khaveli wa bhola ve ti ningetela ka Jehovha.
Siwotiso sa vaphya—Ni na maha txani ngu wutomi wangu?—Ni txi alakanya ati ni nga di ti sawute (6:54)
Wona sivangelo simwani asi si nga mahako m’thu e tiningetela ka Jehovha.
“Ngu kutxani u di fanete ku tiningetela ka Jehovha?” (Muwoneleli wa 15 ka Janeiro wa 2010)
Ka vhidhiyo yiya ya wutxenje, wona nzila ayi ava va nga tiningetela ka Jehovha va tsakako ngu yona.
Lera msungo mhaka awu wu ku: “Ni ni malembe o tala ni txi tiwotisa ti to, ‘Ngu kutxani hi di vangilwe?’” kasi ku u wona ati ti nga maha wamsikati wo kari e xolisisa ati a ti thangetisako ka wutomi wakwe.
“Bhiblia ya txitxa wutomi wa vathu” (Muwoneleli wa 1 ka Novembro wa 2012)