Mwaya wako wu nga li manisa kutxani litsako?—Txienge 1

Ava va nga txhadha va navela ti to litsako ali va nga va nalo ka ditshiku adi va nga txhadha ngu dona li simama mbimo yotshe. Eto ti nga koteka. Makristu aya i ku kale ma di txhadhile aya ma tikaratelako kuthumisa sialakanyiso sa mu ka Bhiblia, ma ti ziva ti to eto ta koteka.

1. Ngu sihi sialakanyiso asi Bhiblia yi si ningelako ka vavamna?

Jehovha a sawute wamwamna ti to eva msungo wa mwaya. (Lera Vaefesu 5:23.) Ene a emela ti to wamwamna e maha sisungo asi si no wuyelisa mwaya wotshe. Bhiblia yi womba tiya ka vavamna: “Randani vasikati vanu.” (Vaefesu 5:25) Ti womba txani toneto? Wamwamna awu a ku ni lirando wa ñola kwati msikati wakwe, hambi va di vokha mwendo va di ha ka vathu. Ene wa m’vhikela ni ku wa maha totshe ti a nga ti kotako kasi ku e khatalela silaveko sakwe sa nyama ni sa matipfelo. (1 Timoti 5:8) Kambe txa lisima ngutu wa khatalela silaveko sakwe sa moya. (Matewu 4:4) Ene a nga maha mkombelo ni kulera Bhiblia kumweko ni msikati wakwe. Wamwamna awu a khatalelako msikati wakwe, wa tsanisa wungana wakwe ni Jehovha.—Lera 1 Pedro 3:7.

2. Ngu sihi sialakanyiso asi Bhiblia yi si ningelako ka vavasikati?

Dipswi da Txizimu di womba tiya: ‘Wamsikati a na xoniphe mwamna wakwe.’ (Vaefesu 5:33) A nga timahisa kutxani toneto? A nga ninga lisima tifanelo ti mwamna wakwe a ku nato ni mizamo ayi a yi mahako ti to e mu khatalela ni kukhatalela vanana. Ene a nga tshumela e kombisa txixonipho ngu kuseketela sisungo sa mwamna wakwe ni kuwomba-womba nayo ngu nzila yo thutha hambi i di ti to hi nga Mkristu. Ene kha womba-wombi kubiha ngu mwamna wakwe ka vathu vamwani.

3. Ava va nga txhadha va nga wu tsanisisa kutxani wukati wawe?

Bhiblia yi womba tiya ka va va nga txhadha: “Vona ngu wumbidi wawe va na va nga m’thu mmweyo dwe.” (Matewu 19:5) Eto ti womba ti to va fanete kumaha totshe ati va nga ti kotako kasiku lirando ali va li pfako ngu mmwani ni mmwani wawe li si holi. Va nga maha toneto ngu kutiha mbimo yo va kumweko, ve bhula ni ku thembana mbimo yi mmwani ni mmwani wawe a wombako matipfelo akwe. Kha va fanela kutumelela m’thu e belela timhaka tawe vavambidi, hahanze ka Jehovha dwe i ku ene wa lisima ngutu ka wukati wawe. Vona va fanete ku tiwonela ti to va si thuki ve navela m’thu mmwani awu va nga mbi tekana nayo.

ENGETELA WUZIVI WAKO

4. Vavamna, randani vasikati vanu ni ku va khatalela

VHIDHIYO: Vavamna, randani vasikati nga ti mi ti randisako tona (9:53)

• Wamwamna a nga kombisisa kutxani ti to wa m’randa msikati wakwe ni kutshumela e m’khatalela?

Lera Vakolosa 3:12, mi gwita mi bhula ngu txiwotiso txiya:

• Wamwamna a nga ti kombisisa kutxani tifanelo toneto?

5. Vavasikati, randani vamna vanu ni ku va xonipha

Bhiblia yi kuzeta vasikati ti to ve xonipha vamna vawe hambi i di ti to kha va thumeli Jehovha. Lera 1 Pedro 3:1, 2, mi gwita mi bhula ngu siwotiso siya:

• Ngako mwamna wako i si nga Mkristu, ditshuri ti to u navela ku e khozela Jehovha. Ngu tihi ati u wonako to ti nga kuzeta mwamna wako? Ngu zumbela ku m’txhumayela mwendo ngu kuva wamsikati wamnene, wa lirando ni wa txixonipho? Ngu kutxani?

Ngu wumbidi wawe va nga maha sisungo sa sinene. Kambe ti nga maha wamsikati a si tumelelani ni mawonelo a mwamna wakwe. Ditshuri ti to wamsikati a nga womba mawonelo akwe kambe ngu nzila yo thutha ni ya txixonipho, a txi khumbula ti to Jehovha a ningile wamwamna wutixamuleli wo maha sisungo asi si no wuyelisa mwaya wotshe. Ene a fanete ku tiemisela kuseketela txisungo atxi txi no mahwa ngu mwamna wakwe. A txi maha toneto a na va a txi hetisisa txienge txakwe txo maha ti to mwaya wu va ni litsako. Lera 1 Pedro 3:3-5, mi gwita mi bhula ngu txiwotiso txiya:

• Jehovha a ti pfisa kutxani ngako wamsikati a txi kombisa txixonipho ka mwamna wakwe?

6. Ina ti nga koteka kuxula sikarato hamwayani?

VHIDHIYO: Tsanisa wukati wako (5:44)

• Ngu kuya ngu ti hi nga tiwona ka vhidhiyo, ngu tihi ati ti kombisako ti to mpatwa wuwa wu si nga ni mabhulo?

• Ngu tihi ati va nga ti maha kasi ku ve tsanisa wukati wawe?

Lera 1 Vakorinto 10:24 ni Vakolosa 3:13. Msana ko lera m’bhalo wumwani ni wumwani bhulani ngu txiwotiso txiya:

• Txialakanyiso txiya txi nga wu tsanisisa kutxani wukati?

Bhiblia yi womba ti to hi fanete kuxoniphana. Kukombisa txixonipho ti pata kuñola m’thu ngu nzila ya wunene ni ya txithavo. Lera Varoma 12:10, mi gwita mi bhula ngu siwotiso siya:

• Ina wamwamna mwendo wamsikati a ngo emela kukombisa txixonipho msana kova mkatakwe a di m’kombisile? Ngu kutxani?

ATI HI NGA TI WONA

Wamwamna ni wamsikati va nga mana litsako ngako va txi randana, va txi xoniphana ni kuthumisa sialakanyiso sa mu ka Bhiblia.

Ngu tihi ti u nga ti gonda

• Wamwamna a nga txi hetisisa kutxani txienge txakwe kasi ku wukati wawe wu va ni litsako?

• Wamsikati, a nga txi hetisisa kutxani txienge txakwe kasi ku wukati wawe wu va ni litsako?

• Ngako u di txhadhile, ngu dihi ditshina da mlayo da Bhiblia adi di nga vhunako wukati wako?

XOTA TIMWANI

Wona ati ti nga mi vhunako ti to mi tsaka hamwayani.

Mwaya wako wu nga mana litsako (dibroxura)

Xalela vhidhiyo ya wutxenje ayi yi kombisako makatekwa aya ma manwako ngu kuthumisa sialakanyiso sa Txizimu mayelano ni wukati.

Eu, você e Jeová (4:26)

Wona ati ti wombako tona kuxonipha wusungo wa wamwamna.

“Ngu kutxani vavasikati va di fanete kuxonipha lulamiselo ya wusungo?” (Muwoneleli wa 15 ka Maio wa 2010)

I ngu nzila muni mpatwa wo kari wu nga xula sikarato so nemelakupata ni dhivhorsiyo?

Ngu ku vhunwa ngu Jehovha hi wusetile wukati wathu (5:14)