Gondisa ngu nzila yo hehuka

Ati Jesu a nga ti maha

VHIDHIYO: Jesu a mahile txikombiso txa nzila yi Jehovha a hi khatalelako ngu yona

1. Wona VHIDHIYO, mwendo kulera Matewu 6:25-27. U gwita u alakanyisisa ngu siwotiso siya:

1. Jesu a kombisile ngu nzila yihi ati Jehovha a hi khatalelisako tona?

2. Hambiku Jesu a nga txi ziva timhaka to tala ngu sinyana, kambe ngu tihi ti a nga womba-womba ngu tona kasi kuhehukisa ati a nga txi ti gondisa? Ngu kutxani ayiya i di nzila yo hehuka yo gondisa?

Hi gonda txani ka txikombiso txa Jesu?

2. Ngako hi txi gondisa vathu ngu nzila yo hehuka, ti na va hehukela kukhumbula ati hi va gondisako ni ku ti na va tsakisa.

Etetela Jesu

3. U nga womba-wombi ngutu. Mi txi bhula ngu mhaka yo kari u nga wombi-wombi to tala ati u ti zivako ngu yona, kambe gwitela ka ti ti nga bhalwa ka dibhuku di mi gondako ngu dona. Neti u maha txiwotiso, ema kala kuza e xamula. Ngako a si yi zivi xamulo mwendo a txi womba ati ti lwisanako ni ti Bhiblia yi ti gondisako, maha siwotiso so engeteleka kasi ku m’vhuna e pfisisa mhaka. Se ngako a di ti pfisisile, pindani mi ya kumwani.

4. Vhuna txigondo txako txi txhavinyeta ati mi gondako ngu tona ni ti se txi ti zivako. Ngu txikombiso, mi si se gonda mayelano ni kuwuswa ka vafi, mi nga wusetanyana ati se mi nga gonda mayelano ni ti ti mahekako ngako m’thu a txi fa.

5. Tiwonele u txi thumisa sidinganiso. U si se thumisa txidinganiso txo kari, pimisa ngu tiya:

1. ‘Ina txidinganiso txiya txa hehuka?’

2. ‘Ina txi na m’hehukela ku txi pfisisa?’

3. ‘Ina txi na m’vhuna ku e pfisisa mhaka yi hi bhulako ngu yona mwendo a no khumbula txidinganiso dwe?’