Sileletelo sa mtshangano wa mahanyelo athu a Wukristu ni mthumo wo txhumayela

Ati ti ku mndani

• Mapswi o khata 2

• Tithomba ta mu ka Dipswi da Txizimu 3-5

  • M’wombawombo 3

  • Lavetela tithomba ta moya 4

  • Kurela ka Bhiblia 5

• Ti tolovete ka mthumo wo txhumayela 6-11

  • Tivhidhiyo ta sikombiso sa mabhulo a Bhiblia 7

  • Liendo lo khata 8

  • Liendo lo wuyela 9

  • Gondo ya Bhiblia 10

  • M’wombawombo 11

• Mahanyelo a Wukristu 12-13

  • Gondo ya Bhiblia ya dibanza 13

• Mapswi o gwita 14

• Hisekela kulera ni kugondisa 15

• Kuninga txivhuno 16

• Kuxayisa mbimo 17

• Divhiki do sawuleka 18

• Divhiki da mtshangano wa txigava mwendo wa m’ganga 19

• Divhiki da Txialakanyiso 20

• Muwoneleli wa mtshangano wa mahanyelo athu a Wukristu 21

• M’zumba txitulo wa mtshangano wa mahanyelo athu a Wukristu 22

• Mtshanganisi wa mmidi wa madhota 23

• Mlayeli wo vhuneta 24

• Makhalo o engeteleka 25

• Tivhidhiyo 26

1. Mtshangano wa Mahanyelo athu a Wukristu ni mthumo wo txhumayela wu fanete kutsimbila ngu kulondisela txibhukwana txa mitshangano ni sileletelo si si londiselako. Votshe vahuweleli va fanete ku kuzetwa ti to ve ningela matina awe kasi ku ve maha sienge sa vagondi. Avale va xalelako mitshangano mbimo yotshe ve tshumela ve tumelelana ni tigondo ta Bhiblia ni kuhanya ngu tona va nga ti bhalisa ni vona.​—⁠be-T diphepha 282.

MAPSWI O KHATA

2. Meneti yimweyo. Otshe mavhiki, msana ka ndando ni mkombelo wo khata, mzumba txitulo wa mtshangano wa Mahanyelo athu a Wukristu a fanete ku navetisa ati ti no gondwa ka mtshangano wonewo. Mzumba txitulo a fanete kuwomba-womba ngu ti ti no vhuna ngutu dibanza dotshe.

TITHOMBA TA MU KA DIPSWI DA TXIZIMU

3. M’wombawombo: 10 wa timeneti. Txibhukwana txa mitshangano ya Mahanyelo athu a Wukristu txi ta ni msungu mhaka ni tigondo timbidi mwendo tiraru ati ti nga kombiswa. Txienge txiya txi fanete kuavelwa didhota mwendo dilanda da wuthumeli adi di fanelekako. Ngako ku txi khatwa dibhuku dimwani da Bhiblia adi di no gondwa divhiki donedo, ku fanetwe ku kombiswa vhidhiyo ya txiwuletiso txa dibhuku donedo. M’wombawombi a nga kombisa kuyelana ka vhidhiyo ni msungu mhaka. Kambe a fanete ku thumisa totshe tigondo ti ti nga kombiswa ka txibhukwana. Ngako mbimo yi txi tumela, a fanete kuthumisa mifota ayi yi yelanako ni txienge txakwe.

4. Lavetela tithomba ta moya: 10 wa timeneti. Atxiya njienge txa siwotiso ni tixamulo, kha ku mahwi txiwuletiso mwendo mapswi o vhala. Txienge txiya txi fanete kuavelwa didhota mwendo dilanda da wuthumeli adi di fanelekako. M’wombawombi a nga avela mbimo ka siwotiso ngu kuya ngu txilaveko txa dibanza. Kambe a fanete kumaha sotshe siwotiso. A nga tshumela e sawula to ku nga gondwa totshe ti ndimana ati ti nga kombiswa mwendo ahim-him. Ava va ningelako tixamulo va fanete va si pindi 30 wa masegundu.

5. Kulera ka Bhiblia: U nga pindi 4 wa timeneti. Txienge txiya txi fanete kumahwa ngu mwanathu wa txiwamna. Awu a ku ni txienge txiya a fanete kulera aha a nga avelwa kona, kha fanela kuwomba mapswi o tula mwendo o vhala. Mzumba txilu a fanete kuvhuna awu aku ni txienge txiya ti to e lera ngu nzila yo kongoma, yo pfisiseka, yo lera kwati, yo khanyisa mhaka ngu kuya ngu ti m’bhalo wu tilavisako tona, yo womba kwati mapswi, yo xonipha amu ko ndinda moya ni ngu mtumbuluko. Aku ka siavelo sa Kulera ka Bhiblia ku tshukako kuva ni tindimana to lapha mwendo to koma, muwoneleli wa mtshangano wa mahanyelo athu a Wukristu a fanete kualakanyisisa ngu wusikoti wa va ava avelako sienge soneso.

TI TOLOVETE KA MTHUMO WO TXHUMAYELA

6. U nga pindi 15 wa timeneti. Txienge txiya tximahela kuvhuna votshe ti to ve ti toloveta ka mthumo wo txhumayela ni ku txhukwatisa nzila yo txhumayela ni yo gondisa. Va gondi va fanete kuthumisa sikombiso sa mabhulo ka siavelo sawe sa liendo lo khata ni maendo mamwani, asi si manekako ka diphepha do khata ka Txibhukwana txa mitshangano ya Mahanyelo athu a Wukristu. Vagondi va nga sawula to va na ningela dibhuku do gonda mwendo kukombisa tivhidhiyo ati ti ku ka Farameti yo Gondisa. Aku sikombiso sa mabhulo si vhunako kutxhumayelani, konkuwa si pata ni txienge txi txi ku: “Xola M’bhalo wa kona ka Farameti yo Gondisa.” Se awu a ku ni txiavelo, a nga sawula to mwendo a na thumisa txinge txiya mwendo ku txi leka. Txibhukwana txa mitshangano ya Mahanyelo athu a Wukristu txa kombisa mbimo ya txienge ni txienge, mbimo yimwani txi ya ni sileletelo mayelano ni txienge txonetxo. Ava va mahako sienge siya kha va fanela kuengetela didungula ngu txikongomelo txo thumisa yotshe mbimo. Mikombiso ayi yi nga lulamiselwa kwati yi nga ningelwa kutshumela kusala meneti mwendo kupinda. Ngu kuya ngu txilaveko, madhota ni ona ma nga amukela siavelo sa txienge txiya.

7. Tivhidhiyo ta sikombiso sa mabhulo a Bhiblia: Mtxima ni mtxima ku na kombiswa kutshumelwa ku bhulwa ngu tivhidhiyo ta sikombiso sa mabhulo. Tivhidhiyo toneto ti kombisa liendo lo khata ni lo wuyela. Txienge txa tivhidhiyo txi fanete kumahwa ngu mzumba txitulo wa mtshangano wa Mahanyelo athu a Wukristu wa divhiki donedo.

8. Liendo lo khata:Txienge txiya txi nga avelwa mwanathu wa txiwamna mwendo wa txisikati. M’vhuni a fanete kuva wa limbewu limwelo ni nyamni wa txiavelo mwendo wa mwaya wumwewo. Va nga maha txienge txiya va di emile mwendo va di khalahatshile. Ava va mahako txienge txiya va nga sawula maloselo aya ma nga toloveleka ka wukhalo wonewo. Mabhulo awe ma fanete kuseketelwa ka sikombiso sa mabhulo asi si ku ka Txibhukwana txa mitshangano ya Mahanyelo athu a Wukristu.

9. Liendo lo wuyela: Txienge txiya txi nga avelwa mwanathu wa txiwamna mwendo wa txisikati. M’vhuni kha fanela kuva wa limbewu lo hambana. (km-T 5/97 diphepha 3) Va nga maha txienge txiya va di emile mwendo va di khalahatshile. Mgondi a fanete kukombisa nzila yo bhula ni m’thu wu a nga kombisa kutsakela ka liendo lo khata. Mabhulo awe ma fanete me sekelwa ka sikombiso sa mabhulo ka Txibhukwana txa mitshangano ya Mahanyelo athu a Wukristu.

10. Gondo ya Bhiblia: Txienge txiya txi nga avelwa mwanathu wa txiwamna mwendo wa txisikati. M’vhuni kha fanela kuva wa limbewu lo hambana. (km-T 5/97 diphepha 3) Va nga maha txienge txiya va di emile mwendo va di khalahatshile. Txienge txiya txi fanete kukombisa gondo yi se yi ku masoni. Kha va fanela kumaha txiwuletiso mwendo kuvhala hahanze ka loko va ti avetwe ka timhaka ti ti nga wombwa. Kha ti sungi kulera totshe tindimana, kambe loko u txi titsakela u nga lera totshe. Ku fanete kuthumiswa magondiselo a manene.

11. M’wombawombo: Txienge txiya txi fanete kumahwa ngu mwanathu wa txiwamna. A fanete kuveka m’wombawombo wo kongoma dibanza.

MAHANYELO A WUKRISTU

12. Msana ka ndando ya txienge txiya, 15 wa timeneti ti fanete kuthumiswa ka sienge simbidi mwendo tximwetxo si no vhuna vanathu ti to ve thumisa Dipswi da Txizimu. Loko ku si kombiswi timwani, sienge soneso si fanete ku avelwa madhota mwendo malanda a wuthumeli a ya ma fanelekako, txienge txa silaveko sa dibanza, txi fanete ku vekwa ngu didhota.

13. Gondo ya Bhiblia ya dibanza: Ku nga pindwi 30 wa timeneti. Txienge txiya txi fanete kuvekwa ngu didhota adi di fanelekako. (Amu madhota i ku madotho, ku nga thumiswa malanda a wuthumeli a ya ma fanelekako ngako ti txi sunga.) Mmidi wa madhota wu fanete kusunga to mba mani va nga tsimbitisako Gondo ya Bhiblia ya dibanza. Ava va no sawulwa, va fanete kuveka timhaka ti va ti gondisako ngu nzila ya yinene, ve junyatisa kwati mibhalo yi yi nga ñola mhaka ni kuvhuna vaengiseli ti to ve yi thumisa. Va nga mana txivhuno ngu kugonda sileletelo sa matsimbitiselo a Muwoneleli. Kha ka fanelwa kugondwa to pinda ti ti nga kombiswa ka txiemiso. Ngako ti txi koteka, mtsimbitisi ni m’gondi wa tindimana va fanete ku txitxwa otshe mavhiki. Ngako mzumba txitulo wa mtshangano atxo kombela ti to gondo yi hunguta mbimo, mtsimbitisi wa gondo a fanete kusawula nzila yo hunguta mbimo ya gondo. Ku tilava a nga sawula ti to tindimana timwani ti si gondwi.

MAPSWI O GWITA

14. U Nga pindi 3 wa timeneti. Mzumba txitulotxitulo wa mtshangano wa Mahanyelo athu a Wukristu, a fanete kuwuseta timhaka ta hombe ta mtshangano, ti patako ni kuwomba txiwotiso txa mu ka Diphepha da tixamulo ta mtshangano wa Mahanyelo athu a Wukristu. A fanete kuwomba tidotho ta divhiki di ditako, e tshumela e maha txiwotiso atxi txi no ta xamulwa divhiki di di londiselako. Ngako mbimo yi txi tumela, a nga zivisa ava va ku ni sienge ka txienge txa va vagondi. Ngako ku si nga ni mkongomiso wumwani, mzumba txitulo a fanete kulera mapasi ngu yona mbimo yile ya mapswi o vhala. Siziviso sa timhaka ti ti mahwako mbimo yotshe so fana ni basiselo, lungiselelo ya mthumo wa thembwe, kha sa fanelwa kuziviswa txiluveloni, si fanete kuvekwa ka dibhokiso da siziviso sa dibanza. Ngako ku di ni mapasi o ma nga pinda timeneti tiraru ma txi lerwa, mzumba txitulo a fanete kukombela ava va no va ni sienge ka txienge txa Mahanyelo a Wukristu ti to ve hunguta mbimo yawe. (Wona ndimana 13 ni 17.) Mtshangano wu na vhala ngu ndando ni mkombelo.

HISEKELA KULERA NI KUGONDISA

15. Votshe va va ku ni siavelo va fanete kuta ni dibroxura di di ku Kugondisa. Mzumba txitulo a fanete kuthumisa dibroxura di di ku Kulera ni kugondisa mbimo yi a ningelako txivhuno ka wu aku ni txienge. Txienge txi txi ku “Bhala tigondo ti u nga tshukwatisa” txi mahetwe ku na thumiswa ngu wu a nga ti ni txienge, se mzumba txitulo kha fanela kubhala txilo.

KUNINGELA TXIVHUNO

16. Msana ka mkombiso wumwani ni wumwani, mzumba txitulo a fanete ku ndunduzela ni kuninga txivhuno awu a nga ti ni txienge ngu meneti yimweyo basi, a fanete kuthumisa dibroxura di di ku Kulera ni kugondisa. Mbimo yi mzumba txitulo a rambako awu aku ni txienge kha fanela kuzivisa gondo yi txi thumelako ka yona. Msana kova awu aku ni txienge a di mahile mkombiso, mbimo yi mzumba txitulo a ndunduzelako awu a nga ti ni txienge a nga womba gondo a yi txi nga ti thuma ka yona, e tshumela e womba ngu mapswi a madotho to ngu kutxani txi di humelete ka mkombiso wa txona mwendo txi di fanete kusimama txi tshukwatisa ka gondo yoneyo. Mzumba txitulo a nga tshumela e bhulanyana ngu mkombiso i di ti to ku ni ti a nga wona to ti nga vhuna vaengiseli. Ngako a txi ti lava, mzumba txitulo a nga tshumela e ningela txivhuno tximwani msana ka mitshangano mwendo ngu mbimo yimwani, a nga thumisa dibroxura di di ku Kulera ni kugondisa mwendo beneficie-se, mwendo e thumisa gondo yi awu a nga ti ni txienge a nga ti thumela ka yona. Ti to u mana ti ti nga engeteleka mayelano ni mthumo wa mzumba txitulo wa mtshangano wa mahanyelo athu ni mthumo wo txhumayela ni Mningeli wa txivhuno ka va wombawombi, wona ndimana paragraphs 17, 22, ni 24.

KUXAYISA MBIMO

17. Kha ku nga ni txienge txi fanelako kupinda mbimo yi txi nga vekelwa yona, hambi mzumba txitulo kha fanela kudya mbimo. Sienge sa Kulera ka Bhiblia ni sa Ti tolovete ka mthumo wo txhumayela si fanete kuemiswa ngu nzila ya wutxhari ngako ava va vekako sona va txi dya mbimo. Ngako mwanathu ka sienge simwani a txi pindisa mbimo, a fanete kuningwa txivhuno msana ka mitshangano ngu mlayeli wo vhuneta. (Wona ndima 24.) Mtshangano wotshe kumweko ni mikombelo ni tindando, wu fanete kuteka diwora ni 45 wa timeneti.

DIVHIKI DO SAWULEKA

18. Mbimo yi dibanza di endelwako ngu muwoneleli wa txigava, mitshangano yi fanete kutsimbila ngu kulondisela Txibhukwana txa mitshangano ya Mahanyelo athu a Wukristu ni mthumo wo txhumayela ni sileletelo si si londiselako: Gondo ya Bhiblia ya Dibanza ka txienge txa Mahanyelo a Wukristu yi fanete ku tsivetwa ngu m’wombawombo wa mthumo wa 30 wa timeneti awu wu no vekwa ngu muwoneleli wa txigava. Ku si se vekwa m’wombawombo wa mthumo, mzumba txitulo a fanete kuwuseta ni kuwomba tidotho ta divhiki di ditako, e maha siziviso, e lera mapasi ngako ma diho, e gwita e ramba muwoneleli. A txi gwita kuveka m’wombawombo, muwoneleli wa txigava a na vhala mitshangano ngu ndando ayi a nga yi sawula. Ene a nga gwita e ramba mwanathu mmwani ti to e vhala ngu mkombelo. Kha ka fanela kuva ni sienge sa vagondi ka makhalo o engeteleka ngu divhiki do sawuleka. Ngako ku ti ni mtxawa wumwani, wu nga timahela mitshangano hambi dibanza di di wu wonelelako di di ka divhiki do sawuleka. Kambe mtxawa wonewo wu fanete kuxalela ni dibanza m’wombawombo wa mthumo wu wu vekwako ngu muwoneleli wa txigava.

DIVHIKI DA MTSHANGANO WA TXIGAVA MWENDO WA M’GANGA

19. Kha ku nga ni mitshangano ngu divhiki da mtshangano wa txigava mwendo wa m’ganga. Ati ti nga ti fanete kugondwa ngu divhiki donedo, m’thu a nga ti gondela apune mwendo ngu mwaya.

DIVHIKI DA TXIALAKANYISO

20. Ngako ditshiku da txialakanyiso di txi va hagari ka divhiki, mitshangano ya Mahanyelo athu a Wukristu ni mthumo wo txhumayela kha yi na mbi vaho. Kambe mtshangano wa mthumo wa thembwe ngu ditshiku da txialakanyiso wu fanete kumahwa.

MUWONELELI WA MTSHANGANO WA MAHANYELO ATHU A WUKRISTU

21. Mmidi wa madhota wu fanete kusawula didhota di di no va muwoneleli wa mtshangano wa mahanyelo athu a Wukristu. Ene a ni wutixamuleli wo maha ti to mitshangano yi lulamiselwa kwati, e tshumela e tsanisekisa ti to sileletelo sa thumiswa khakwati. A fanete kuthumisana kwati ni Mlayeli wo vhuneta. Ku txa nga hoka Txibhukwana txa mitshangano ya Mahanyelo athu a Wukristu txa mtxima wo kari, muwoneleli wa mtshangano wa mahanyelo athu a Wukristu a fanete kumaha siavelo sa va va no nova ni siavelo sa Kulera Bhiblia ni ka Ti tolovete ka mthumo wo txhumayela ka mtxima wonewo. (Wona tindimana 5-11.) Siavelo soneso s i fanete kuningelwa ngu kutxhelwa ku di sate mavhiki mararu ti to kuhoka ditshiku da txienge txonetxo, kufanete kuningelwa siavelo ngu kuthumisa txiphephana txi txi ku Txiavelo txa mitshangano ya Mahanyelo athu a Wukristu (S-⁠89).

MZUMBA TXITULO WA MTSHANGANO WA MAHANYELO A WUKRISTU NI MTHUMO WO TXHUMAYELA

22. Divhiki dimwani ni dimwani didhota dimwedo di thuma kota mzumba txitulo wa mtshangano wa mahanyelo a Wukristu ni mthumo wo txhumayela. (Ngako dibanza di ti ni madhota a madotho, ku nga avelwa dilanda da wuthumeli di di fanelekako ngako ku ti ni txilaveko.) Mzumba txitulo ngene a lungiselako mapswi o khata, e bhulisana ni vaengiseli ngu txienge txa tivhidhiyo a “Sikombiso sa mabhulo a Bhiblia” kumweko ni tivhidhiyo ta dibroxura di di ku Kulera ni kugondisa. Ngene kambe a rambako ava va ku ni sienge, ngu kuya ngu mtengo wa madhota, a nga tshumela e maha sienge simwani ka mtshangano. Mapswi ya a ma thumisako hagari ka sienge ma fanete kuva o koma. Mmidi wa madhota ngu wona wu kambelako aya ma fanelekako kumaha txienge txiya. Aya ma nga sawulwa ma avelwa txienge txiya mbimo ni mbimo. Ngu kuya ngu txilaveko txa dibanza, muwoneleli wa Mtshangano wa Mahanyelo athu a Wukristu a nga thumiswa ngutu ka txienge txiya kupinda madhota mamwani. Ngako didhota do kari di txi faneleka kutsimbitisa gondo ya Bhiblia ya dibanza tiwomba to da faneleka kuva mzumba txitulo. Khumbulani tiya, mzumba txitulo a fanete kuninga txivhuno ka va va ku ni sienge sa Kulera Bhiblia ni ka Ti tolovete ka mthumo wo txhumayela ngu nzila ya lirando ayi yi vhunako. Mzumba txitulo a ni wutixamuleli kambe wo tsanisekisa ti to mitshangano yi guma ngu mbimo. (Wona ndimana 14 ni 17.) Ngako ku di ni wukhalo, mzumba txitulo atxi ti tsakela a nga thumisa mikrofoni wu wu ku didhawani ti to e dhana ava va ku ni sienge. Ngu ha kufanako, a nga sawula kambe kukhalahatsha ka tximezana txi txi zumbako txiluveloni mbimo yi kulerwako Bhiblia ni ka sienge sa Ti tolovete ka mthumo wo txhumayela. Eto ti nga vhuna kuxayisa mbimo.

MTSHANGANISI WA MMIDI WA MADHOTA

23. Mtshanganisi wa mmidi wa madhota ngene a mahako sotshe siavelo sa sienge, hahanze ka siavelo sa sigondo. Eto ti pata ni kumaha siavelo sa vazumba txitulo ava va nga sawulwa ngu mmidi wa madhota. Ngu kuthumisana ni Muwoneleli wa mtshangano wa mahanyelo athu a Wukristu, mtshanganisi wa madhota a fanete kutsaniseka to kopi ya siavelo yi lemilwe ka dibhokiso da siziviso.

MLAYELI WO VHUNETA

24. Mbimo yotshe ngako ti txi koteka, txienge txiya txi fanete kuningwa didhota di i ku mwombawombi aku ni wusikoti. Mlayeli wo vhuneta a ni wutixamuleli wo ngako ti txi laveka, ngu didhawa e ninga txivhuno madhota ni malanda a wuthumeli ka siavelo sawe so fana ni miwombawombo ka Mahanyelo a wukristu, miwombawombo ya ha kubasani, kulera tindimana ka Muwoneleli mwendo ka Gondo ya Bhiblia ya dibanza. (Wona ndimana 17.) Ngako ku di ni madhota a mangi aya i ku vawombawombi ni vagondisi va va ku ni wusikoti, va nga txitxana dilembe ni dilembe. Kha ti sungi kuninga txivhuno vanathu ka txienge ni txienge.

MAKHALO O ENGETELEKA

25. Ngu kuya ngu mtengo wa vagondi, dibanza di nga thumisa makhalo o engeteleka ti to kumahwa sienge sa vagondi. Ka makhalo awa o engeteleka kufanete kuva ni m’tsimbitisi wu a fanelekako, ngako ti txi koteka kufanete kuva didhota. Amu ku ku ni txilaveko ku nga thumiswa dilanda da wuthumeli adi di fanelekako. Mmidi wa madhota wu fanete kusunga to i mani awu a no tsimbitisa ni ku mwendo vatsimbitisi va nga txitxana. Mtsimbitisi a fanete kulondisela sileletelo si ku ka ndimana 16. Ngako ku di ni wukhalo wo engeteleka, ava va nova ni sienge va fanete kurambwa ti to si tsula ka makhalo onewo msana ka txienge txa Lavetela tithomba ta moya txi manekako ka txienge txi txi ku Tithomba ta mu ka Dipswi da Txizimu. Va fanete ve tshumelela ka makhalo awe ku txa ngaza kuguma txienge txi txi ku Ti tolovete ka mthumo wo txhumayela. Ngako ku txi bhulwa ngu vhidhiyo, ava va ku ka wukhalo wo engeteleka va fanete ku yi xalela ni ku engisela mabhulo va di ka wukhalo wonewo wo engeteleka, ngako ti txi koteka. Ngako ti si koteki, mtsimbitisi a nga thumisa foni, tablet mwendo simwani ti to e kombisa vhidhiyo ni kubhula ni vaengiseli.

TIVHIDHIYO

26. Kuthumiswa tivhidhiyo to kongoma ka mtshangano ni mtshangano. Tivhidhiyo totshe ti na maneka ka aplikativho ya JW Library®. Msana ko kombiswa mitshanganoni, tivhidhiyo ta sikombiso sa mabhulo ti nga tshumela ti kombiswa mbimo yimwani ka mitshangano ya mthumo wa thembwe.