Ditshuri mayelano ni mbimo yi yitako
Ina u khala ku ti wotisa ti to mbimo yi yitako yi na ta zumbisa kutxani? Bhiblia yi womba to ku ni ti ti no maheka ti no gwesa votshe vathu ha mafuni.
Jesu a txhamusete ti to hi na ti zivisa kutxani “ti taku wu hokile Mfumo wa Txizimu.” (Luka 21:31) A profetile ti to ku ndi na humelela tiyimbi, kuzinginika ka mafu, tinzala, ni mitungo, i ku ti hi ti wonako ti txi maheka nyamsi.—Luka 21:10-17.
Bhiblia yi tshumela yi womba to “masiku o gwita” a kufuma ka vathu ma ndi na ti komba ngu nzila yi vathu va pimisako ngu yona i ku ti to vathu va ndi na va vo pepulwa. U nga gonda timhaka toneto ka 2 Timoti 3:1-5. U txi wona vathu va txi hanyisa tiya nyamsi wa ditshiku, u nga ti wona to mpela wuprofeti wa Bhiblia mbwa ditshuri.
Se ti womba txani tiya? Ti womba to mbimo yi hokile yo Mfumo wa Txizimu wu maha kutxitxa ka hombe aku ku no maha wutomi ha mafuni wu tshukwala ngutu. (Luka 21:36) Ka Bhiblia, Txizimu txi thembisa kuphindula mafu ni ku mahela ta tinene vathu va va no hanya hamafuni. Wona timwani ati Txizimu txi no ti maha:
MAFUMELO MA NA VA A MANENE
“Se a to ningwa [ene Jesu] kufuma, ni wudhumo, ni mfumo, kasi ku votshe vathu, matiko, ni tidimi si mthumela; kufuma kwakwe ngu fuma ka kwa mbi gwita, kha ku na mbi pinda, kambe mfumo wakwe, ngu wona wokha wa kwa mbi khundumuswa.”—DHANIYELI 7:14.
Ti womba ti to: U nga hanya wutomi wa wunene hahatshi ka mfumo wa mafu otshe awu Txizimu txi no wu veka, se Mwanana wa txona a na va Mkoma.
DIHANYO DA DINENE
“Se muaki ni wammweyo kha na mbi khene: ‘Na lwala.’”—ISAYA 33:24.
Ti womba ti to: Khu na mbi lwalwa mwendo kulimala; u na hanya u si fi.
KU NA VA NI KUDIKHA
“[Jehovha] wa fuvisa tiyimbi kotshe ha mafuni.”—MASALMO 46:9.
Ti womba ti to: Kha ku na mbi swa kuva ni tiyimbi ni yotshe xuphe yi yi vangwako ngu tona.
MAFU MA NA TALA NGU VATHU VA VANENE
“Khu na mbi va wona kambe vabihi . . . avale vo thutha va na mana mafu.”—MASALMO 37:10, 11.
Tiwomba ti to: Vabihi va na mbi maneka kambe, ku na ta hanya ava va lavako kuengisa Txizimu dwe.
MAFU MA NA TXITXA ME MAHA PARADHISE
“Va na aka tinyumba, ve zumba ka tona; va na phaya mivhinya, ve dya mihando ya kona.”—ISAYA 65:21, 22.
Tiwomba ti to: Mafu otshe ma na ta txitxa me tshura. Txizimu txi na ta xamula mkombelo wathu wa ti to kudhunda kwakwe ku na maheke ha “mafuni.”—Matewu 6:10.