“Paulo . . . a to bonga ka Txizimu e tsanisa mbilu”

Mbimo yi dibanza da Roma di nga pfa ti to Paulo wa ta, mtxawa wa vanathu wu to tsimbila mpfhuka wa 64 km va txi m’hingeta. Kutikarata kwawe ngu lirando ku m’gwesisile kutxani Paulo? “Ngako Paulo a di va woni, a to bonga ka Txizimu e tsanisa mbilu.” (Mith 28:15) Hambiku Paulo a nga ti tiziwa ngu kutsanisa mabanza ya a nga ti ma endela, ngu mbimo yiya ene i ti txibotxhwa, se ngene a nga tsaniswa.—2 Vak 13:10.

Nyamsi vawoneleli va sigava va endela mabanza ti to ve tsanisa vanathu. Kufana ni votshe vathu va Txizimu, mbimo yimwani va wonisana ni kukarala, kuvilela ni kuguma mtamo. Ka dikhambi di muwoneleli wa txigava ni msikati wakwe va no endela dibanza dako, ngu tihi ti u no maha ti to u va tsanisa, kasi ku hi “thavelelana ngu likholo li hi ku nalo”?—Var 1:11, 12.

• 

  Xalela mitshangano ya mthumo wa thembwe. Muwoneleli wa txigava wa thaveleleka mbimo yi vahuweleli va tikaratako ti to ve wuyelwa ngu txitalo ka divhiki do sawuleka da mthumo. (1 Vat 1:2, 3; 2:20) Ti ngo txani u va nyaphandule wo vhuneta ka mtxima wa divhiki do sawuleka? U nga ti bhalisa ti to u ta huma nayo thembwe ni msikati wakwe mwendo kuramba mmweyo wawe ti to mi ya tsimbitisa txigondo? Vona va ti tsakela kuthuma ni vahuweleli vo hambana-hambana, kupata ni va vo ngadi kukhata mwendo va va ti wonako nga kha va ti koti kutxhumayela kwati.

• 

  Kombisa kuamukela vapfhumba. Ti ngo txani u va amukela mtini kwako mwendo ku va ramba mi ta susula? Eto u komba muwoneleli wa txigava ni msikati wakwe ti to wa va dhunda. Vona kha va emeli silo so sawuleka.—Luk 10:38-42.

• 

  Engisa ni kuthumisa mkongomiso ni sialakanyiso sakwe. Muwoneleli wa txigava ngu lirando wa hi vhuna ti to hi wona nzila yo kulisa mthumo wathu ka Jehovha. Mbimo yimwani ti lava e hi ninga txialakanyiso txo tsana. (1 Vak 5:1-5) Ti mu tisela litsako ngako hi txi txi engisa ni kutiveka hahatshi.—Vaheb 13:17.

• 

  Kombisa kubonga. Gela muwoneleli wa txigava ni msikati wakwe nzila yi u wuyelwako ngu yona ngu mthumo wawe. U nga maha toneto ngu ku m’gela mwendo ngu dipasi.—Vakl 3:15.