MAHANYELO A WUKRISTU
Tiwone nga ti Jehovha a ku wonisako tona
“MKOMA a tsakiswa ngu vathu vakwe.” (Mas 149:4) Hambiku hi nga mbi hetiseka, ene a wona tifanelo tathu ta tinene ni wusikoti wathu. Hambiketo, mbimo yimwani ti nga thuka ti hi karatela ku tiwona ngu nzila yoneyo. Ti nga maha hi tipfa hi si nga va txilo ngu ti vamwani va hi ñolisako ngu yona. Mwendo ngako hi txi veka mapimo ka tiphazamo tathu ta kale, ti nga maha hi kanakana to Jehovha wa hi randa ngu ditshuri. Nji txani txi nga hi vhunako ngako hi txi wonisana ni matipfelo o nga toneto?
Khumbula to Jehovha a wona ti ti ku mndani ka mbilu. (1 Sam 16:7) Eto ti womba to ene a wona ati athu hi si ti kotiko ku tiwona hipune. Ha bonga ngutu, aku Bhiblia yi hi vhunako kupfisisa nzila yi Jehovha a hi wonako ngu yona. Kambe hi ngo ti pfisisa dwe ngako hi txi gonda matimu a mu ka Bhiblia aya ma kombisako nzila yi Jehovha a randako ngu yona vakhozeli vakwe.
XALELA VHIDHIYO YI YI KU TSANISA MBILU YAKO KA JEHOVHA, U GWITA U XAMULA SIWOTISO SIYA:
Txikombiso txa mtutumi ni tate wakwe txi hi gondisa txani mayelano ni ti Jehovha a hi wonisako tona?
Ngako m’thu wu a nga maha txionho txa hombe a txi teka mazambo o lulamisa wuxaka wakwe ni Jehovha, a nga yi tsanisisa kutxani mbilu yakwe ka Jehovha?—1 Joh 3:19, 20
Ngu wuyelo yi mwanathu a nga yi mana ngu kugonda ni kualakanyisisa ngu matimu a Dhavhidha ni Josafati?