Themba yako ya mbimo yi yi tako yi na maheka ngu ditshuri

1. Ngu kutxani Abrahamu a ti fanete kutsaniseka ti to a na va ni mwanana?

JEHOVHA a thembisile mngana wakwe Abrahamu ti to a ndi nava ni mwanana ni ku otshe matiko ma ndi na mana makatekwa ngu kona ha kwakwe. (Gen. 15:5; 22:18) Abrahamu ati ni likholo lo tsana ka Txizimu, ngu toneto ene a ti ni kuthemba ka ditshuri ka ti to txi na hetisisa txithembiso txa txona. Kambe Abrahamu a ti ni kona mu ka 100 wa malembe, ani Sara 90, kambe vona va si se va ni mwanana. (Gen. 21:1-7) Hambiketo Bhiblia yi womba tiya: “Ngu kona ha ka themba Abrahamu, a khotwe ti to a nava tate wa tixaka to tala madingano ni ti ti nga wombwa.” (Var. 4:18) Ni ku wa tiziva ti to ati Abrahamu a nga txi ti rinzela ti mahekile ngu ditshuri. Ene a ve tate wa Isaake, mwanana wu a nga ti m’verela ngutu. Kambe ngu kutxani Abrahamu a nga ti fanete kuva ni themba yoneyo ka Jehovha?

2. Ngu kutxani Abrahamu a nga txi themba ti to txithembiso txa Jehovha txi ndi na hetiseka?

² Abrahamu atxi mziva kwati Jehovha, ngu toneto “atxi kholwa ta tinene ti to awu [Txizimu] a nga m’thembisa ani mtamo wa ku ti maha.” (Var. 4:21) Jehovha a tsakete Abrahamu ni ku a m’dhani to mbwo lulama ngu kona ha ka likholo lakwe. (Jak. 2:23) Nga ha Varoma 4:18 yi kombisako ngu kona, likholo ni themba ya Abrahamu si ti tsimbitisana. Konku hi na wona ka Varoma kapitulo 5 ati Paulo a hi gelako mayelano ni themba.

3. Paulo a wombile txani mayelano ni themba?

³ Paulo a txhamusela ti to ngu kutxani hi di fanete kutsaniseka ti to “kuthemba kha ku hi wisi tingana.” (Var. 5:5) A tshumela e hi vhuna kupfisisa ti to themba yathu yi nga tsana ngu nzila muni. Hi txi xolisisa ati hi nga ti gonda ka Varoma kapitulo 5 vhersikulo 1-5, pimisa ngu nzila yi themba yako yi yako yi tsana ngu kutsimbila ka mbimo. Ati Paulo a nga bhalela Varoma ti na kuvhuna kuwona nzila yi u nga tsanisako ngu yona likholo la wena nyamsi. Kambe kukhata he wone themba yo tsakisa ayi Paulo a nga womba ti to kha yi na mbi hi thela tingana.

THEMBA YATHU YO TSAKISA

4. Kuwombwa wombwa ngu txani ka Varoma 5:1, 2?

⁴ Lera Varoma 5:1, 2. Paulo a bhate mapswi yawa atxi bhalela dibanza da Roma. Vanathu va dibanza diya va di gondile ditshuri mayelano ni Jehovha ni Jesu, va ti kulisile likholo lawe niku se i ti Makristu. Ngu toneto Txizimu txi va ‘amukete kota vo lulama ngu kukholwa kwawe’ ni ku va tota ngu moya wo sawuleka. Se va ndi na emela ku amukela hakelo yo tsakisa, se va txi themba ti to ti na maheka ngu ditshuri.

5. Ngu yihi themba yi vasawuleki va ku nayo?

⁵ Paulo ngu msana a bhalete Makristu o sawuleka a khe Efesu mayelano ni themba yi va nga ti yi amukete. Themba yoneyo yi txi pata ku amukela “thomba ya vasawuleki.” (Vaef. 1:18) Mbimo yi a nga txi bhalela Vakolosa, Paulo a kombisile a mu Makristu o sawuleka ma ndi no amukela kona hakelo. Paulo a wombile ti to ‘kuthemba kwawe va ti veketwe kona nzumani.’ (Vak. 1:4, 5) Ngu toneto, themba ya vasawuleki ngu ti to mbimo yi va no wuswa va na hanya ngu ha ku si gumiko nzumani, a ha va no ya fuma kumweko ni Kristu.—1 Vat. 4:13-17; Mtu. 20:6.

6. Mwanathu mmwani wa msawuleki a wombile txani mayelano ni themba yakwe?

⁶ Makristu o sawuleka ma yi ninga ngutu lisima themba yiya. Mmweyo wa vanathu vonevo vo sawuleka, mwanathu Frederick Franz, dikhambi dimwani a wombile ti a nga ti ti pfisa tona: “Themba yathu yi na hetiseka ngu ditshuri, niku mmweyo ni mmweyo wa ava va 144.000 a na amukela ati Txizimu txi nga hi thembisa. Ni ku hakelo yathu yi nava ya lisima ngutu kupinda tximwani ni tximwani txi hi nga vako natxo.” Ngu 1991, msana ko a di thumile malembe a mangi ngu kuthembeka, mwanathu Franz a wombile tiya: “Hi ngadi hi txi yi ninga lisima la wombe ngutu themba yathu. . . . Mbimo hi yi rinzelako hi mana litsako la hombe. Hi ti emisete ku yi verela ngu maso o bhilivila hambi ti txi lava hi rinzela malembe a mangi. Ani na yi ninga ngutu lisima themba yi hi ku nayo.”

7-8. Ngu yihi themba yi malanda o tala a Jehovha ma ku nayo? (Varoma 8:20, 21)

⁷ Va vangi ava nyamsi va khozelako Jehovha va ni themba yi yi si faniko. I ku themba yi Abrahamu a nga ti nayo ya wutomi wo mbi guma hamafuni, hahatshi ka Mfumo wa Txizimu. (Vaheb. 11:8-10, 13) Paulo a bhate mayelano ni themba yoneyo yo tshura. (Lera Varoma 8:20, 21.) Nji txani atxi txi nga kugwesa mbimo yi u nga gonda mu ka Bhiblia mayelano ni themba yiya yo tsakisa? Ina kuve kuziva ti to ditshiku dimwani u na khululwa ka txionho ni lifo u va wo pelela? Mwendo u tsakisilwe ngu kuziva ti to u na tshumela u wona kambe ka Paradhise hamafuni vathu va u va dhundako va nga fa? Kha ti kanakanisi ti to timhaka to xamatisa ti hi emete ngu kona ha ka “txithembiso” txiya txo tsakisa.

⁸ Ti si nga ni mhaka ni ti to themba yathu njo ya hanya nzumani mwendo ka Paradhise hamafuni, hotshethu hi ni sivangelo sa sinene so hi tsaka. Themba yoneyo yo tsakisa yi nga ya masoni yi tsana ngutu. Paulo a txhamusela ti to ti nga kotekisa kutxani toneto. Ati a nga bhala ti na hi vhuna kuya masoni yi tsaniseka ka ti to themba yathu yi na hetiseka.

THEMBA YATHU YI NGA TSANA NGUTU NGU NZILA MUNI?

9-10. Nga ha hi nga ti wona ngu kona ka txikombiso txa Paulo, ngu tihi ti Makristu ma ti emelako? (Varoma 5:3) (Wona ni mifota.)

⁹ Lera Varoma 5:3. Paulo a wombile ti to mbimo yi hi pindako ngu ka sikarato ti na hi vhuna kutsanisa themba yathu. Eto ti nga hi xamalisa. Kambe ditshuri ngu ti to otshe malanda a Jesu Kristu ma nga emela kupinda ngu ka sixaniso. Wona txikombiso txa Paulo. Ene a gete tiya Makristu a Tesalonika: “Kha ditshuri, mbimo yi hi nga ti ni nanu, hi txi mi gela t i to hi fanete kuxaniswa, se toneto ti mahekile, nga ti mi ti zivisako tona.” (1 Vat. 3:4) Niku ka Vakorinto Paulo a bhate tiya: “Vanathu, kha hi ti lavi ku mi sisela kuxaniseka ku ku nga hi mana . . . Hi xanisilwe, ngu mpimo wa hombe ngutu kupinda mtamo wathu, ahawa hi nga ti si thembi ti to hi nga hanya.”—2 Vak. 1:8; 11:23-27.

¹⁰ Nanathu nyamsi hi nga emela kuwonisana ni sikarato. (2 Tim. 3:12) Awe ko? Ina u khala nga xaniswa ngu kona ha ka likholo lako ka Jesu? Ina vangana vako mwendo maxaka va ti nga kupoyilela? Ti nga maha va di ku ñote ngu nzila yo biha. Mwendo ti nga maha u di ve ni sikarato mthumoni ngu kona ha ka wuthembeki wako. (Vaheb. 13: 18) Ni ku ti nga maha kambe u di wuketwe ngu wukoma ngu kona ha ko pateka ka mthumo wo txhumayela. Kambe ti si nga ni mhaka ni ti to ngu xaniswa ko zumbisa kutxani ku hi wonisanako nako, Paulo a wombile ti to hi nga tsaka. Ngu kutxani?

11. Ngu kutxani hi di fanete ku ti emisela kutsanisela, ti si nga ni mhaka ni sikarato si hi wonisanako naso?

¹¹ Athu hi nga tsaka mbimo yi hi wonisanako ni sikarato nguko eto ti hi vhuna ku hi sakulela fanelo ya lisima. Varoma 5:3 a womba ti to “Kuxaniseka ka ninga kutsanisela, [NM].” Otshe Makristu ma na wonisana ni sikarato, ngu toneto ti lava me tsanisela. Ngu toneto ti lava hi ti emisela kutsanisela ti si nga ni mhaka ni sikarato si hi wonisanako naso. O va ngu nzila yoneyo hi nga wonako kuhetiseka ka themba yathu. Athu kha hi lavi kufana ni vale Jesu a nga va fananisa ni timbewu ti ti nga wela ka marigwi. Vathu vonevo makhatoni va tumela ditshuri ngu litsako. Kambe ngako “ku txita kupandiseka mwendo kuxaniseka” va godhola ve tshuralela ditshuri. (Mat. 13:5, 6, 20, 21) Ditshuri ti to kuwonisana ni kuwukelwa mwendo sikarato kha ti tsakisi, kambe kutsanisela ngu magwito ku tisa wuyelo ya yinene. Ngu nzila muni?

12. Hi wuyelwa ngu nzila muni ngako hi txi tsanisela sikarato?

¹² Jakobe a wombile ti to kutsanisela ti si nga ni mhaka ni sikarato ti nga hi tisela wuyelo ya yinene. Ene a ti khene: “Ta laveka ti to kuhonisela mwendo kutsanisela ku txi veka mthumo wo hetiseka, kasi ku mi txi maneka mi di vathu vo hetiseka, vo lulama, mi si nga ni txisolo ni txa tximwetxo.” (Jak. 1:2-4) Jakobe a wombile ti to kutsanisela kwathu ku ni txikongomelo. Ngu txihi txikongomelo txa kona? Kutsanisela kwathu ku nga hi vhuna ku hi va ni pasiyensia, likholo ni kuthemba Jehovha. Kambe kutsanisela kwathu ku nga hi tisela yimwani wuyelo ya lisima ngutu.

13-14. Ku humelela txani ngako hi txi tsanisela, ni ku eto ti yi gwesisa kutxani themba yi hi ku nayo? (Varoma 5:4)

¹³ Lera Varoma 5:4. Paulo a womba ti to kutsanisela “kuninga kutsana sidukoni.” Eto ti la kuwomba ti to mbimo yi u tsaniselako, u tsakelwa ngu Jehovha. Eto kha ti lavi kuwomba ti to mbimo yi u wonisanako ni kuwukelwa mwendo sikarato, Jehovha wa tsaka. Ahim him. Kuwomba ditshuri, Jehovha a tsaka ngu ngawe. Ta tsanisa ngutu kuziva ti to mbimo yi hi tsaniselako hi tsakisa Jehovha.—Mas. 5:12.

¹⁴ Khumbula ti to Abrahamu a tsanisete, hambi ku a nga txi wonisana ni sikarato so hambana-hambana. Ni ku Jehovha a tsakile ngutu ngu toneto. Jehovha atxi mu wona kota mngana wakwe ni kutshumela e mu wona kota wamwamna wo lulama. (Gen. 15:6; Var. 4:13, 22) Ati ti fanako ti nga maheka ni kwathu. Kutsakelwa ku hi ku manako ka Jehovha, kha ku yi ngu ti hi ti kotako kumaha ka mthumo wakwe, hambi ngu malungelo ya hi ku nawo. Jehovha a hi tsakela nguko ha tsanisela ngu likholo. Ti si nga ni mhaka ni tanga, siemo mwendo wusikoti, hotshethu hi nga tsanisela. Ina u wonisana ni txikarato txo kari atxi ti lavako u tsanisela ka mbimo yiya? I di ina, khumbula ti to u tsakisa Jehovha. Mbimo yi hi tumbulako ti to hi tsakisa Jehovha, themba yi hi ku nayo ya ti to a na hetisisa ti a nga hi thembisa, yiya yi tsana.

THEMBA YO TSANA NGUTU

15. Ngu tihi ti Paulo a nga womba ka Varoma 5:4, 5, ni ku ku guleka txiwotiso txihi?

¹⁵ Nga ha Paulo a nga womba ngu kona, hi amukelwa ngu Jehovha ngako hi txi simama hi di thembekile kwakwe ni kutsanisela siduko. Wona ti Paulo a simamako e ti womba ka dipasi dakwe da Varoma: “Kutsana sidukoni kuninga kuthemba. Kuthemba kha ku hi wisi tingana.” (Var. 5:4, 5) Eto ti nga woneka nga kha ti pfisiseki. Ngu kutxani? Nguko msana nyana nga ha ti nga bhalwa ka Varoma 5:2, Paulo a gete Makristu a Varoma ti to se va ti ni themba, themba ya “wudhumo wa Txizimu.” Ngu toneto, m’thu a nga ti wotisa tiya: ‘Aku Makristu onewo ma nga ti ni themba, ngu kutxani Paulo a di tshumete e womba-womba kambe mayelano ni themba?’

16. Themba yi ku nayo yi nga engetela ngu nzila muni? (Wona ni mifota.)

¹⁶ Athu hi nga pfisisa mapswi a Paulo ngako hi txi khumbula ti to themba tximaha txi txi nga engetelako mwendo kukula. Ngu txikombiso, ina wa khumbula dikhambi do khata a di u nga pfa themba yo tsakisa mayelano ni Mfumo wa Txizimu ka gondo yako ya Bhiblia? Ti nga maha makhatoni u di pimisile ti to kuhanya ngu ha ku si gumiko ka Paradhise hamafuni i di ta tinene ngutu kasi ku ti va ditshuri. Kambe msana ko u di gondile mayelano ni Jehovha kumweko ni sithembiso sakwe sa mu ka Bhiblia, themba yako ka Jehovha ya ti to a na hetisisa totshe ti a nga ti thembisa yi yite yi tsana.

17. Themba yako yi simama yi kula ngu nzila muni hambi msana ko u di ti ningetete ni kubhabhatiswa?

¹⁷ Hambi msana ka kuva u di bhabhatisilwe u na simama u ziva Jehovha ni ku lirando lako ngu ngene li naya li kula. Ngu nzila yoneyo themba yako yi naya yi tsana ngutu. (Vaheb. 5: 13–6:1) Awe u na tsaniseka ka ti Varoma 5:2-4 yi ti wombako. Ti hakubasani ti to u pindile ngu ka sikarato so tala kambe u simamile u tsanisela ni ku Jehovha a kombisile ti to wa tsaka ngu ngawe. Ngu kuziva ti to Jehovha wa kuranda, konku u ni txivangelo tximwani txo zumba u txi verela ati Jehovha a nga thembisa. Themba yako yi tsani ngutu kupinda mbimo yi u nga ziva ditshuri. Konkuwa themba yoneyo nja ditshuri ngutu kwako, ni ku yi ni txhamuselo yo sawuleka ngutu kwako. Yona yi gwesa totshe ti u ti mahako ka wutomi wako. Yi txitxa nzila yi u ñolako ngu yona va mwayani kwako, nzila yi u mahako ngu yona sisungo ni nzila yi u thumisako ngu yona mbimo yako.

18. Ngu txihi txitsanisekiso txi Jehovha a hi ningako?

¹⁸ Paulo a simama a womba-womba ngu mhaka yo xamatisa ngutu mayelano ni themba ayi hi ku nayo msana ko hi di amuketwe ngu Jehovha. Ene wa hi tsanisekisa ti to themba yathu yi na hetiseka ngu ditshuri. Ngu kutxani hi nga tsanisekako ka toneto? Paulo a bhate txitsanisekiso txiya ka Makristu: “Nguko lirando la Txizimu li thetwe timbiluni kwathu, ngu Moya wo Sawuleka, wu hi nga ningwa.” (Var. 5:5) Hi ni sotshe sivangelo sa ti to hi kholwa ka themba yi Jehovha a nga hi ninga—eyo i themba yathu.

19. U nga tsaniseka ka tihi mayelano ni themba yako?

¹⁹ Tihe mbimo yo alakanyisisa ngu txithembiso txi Jehovha a nga mahela Abrahamu ni ka nzila yi Jehovha a nga mtsakela ngu yona ni ku m’wona kota mngana wakwe. Kurinzela ka Abrahamu kha ka va myuko wa yimbwa. Bhiblia yi khene: “Se Abrahamu, ngu kutimisela kwakwe, a to mana si a nga thembiswa sona.” (Vaheb. 6:15; 11:9, 18; Var. 4:20-22) Abrahamu kha thelwa mati o titila. Nanawe khu na mbi thelwa mati o titila ngako u txi simama u di thembekile. Themba yako yi na hakelwa. Themba yako nja ditshuri, txivangelo txo u tsaka i si nga txo u poyileka. (Var. 12:12) Paulo a bhate tiya: “Txizimu txa txithembo txi na mi tate ngu litsako lotshe ni kudikha amu ka likholo lanu, kasiku ngu mtamo wa Moya wo Sawuleka txithembo txanu txi tala txi thekelela.”—Var. 15:13.