GONDO 17
NDANDO 111 Txivangelo txa litsako lathu
U nga thuki u leka paradhise ya moya
“Aniko mi na tsaka mi pfalisa, ngu ha ku si gwitiko, ngu si ni si vangako.”—ISAYA 65:18.
TXIKONGOMELO TXA GONDO
Kugonda ngu makatekwa ya hi ma manako ngu kuva ka paradhise ya moya, ni ku hi nga maha txani kasi ku vamwani ve pateka ka yona.
1. Nji txani paradhise ya moya, ni ku ngu tihi ati hi fanelako ku tiemisela kumaha?
NYAMSI hamafuni ku ni paradhise yo fanekisela a ha vathu va hanyako ngu kurula, ni kuva ni ta tingi to ti maha. Vathu va va ku ka paradhise yiya va tiemisete kwambi thuka ve yi leka. Ni ku va lava ti to mtalo wa vathu ve ti pata navo ka wukhalo wuwa wo sawuleka. Ngu yihi paradhise yoneyo? I paradhise ya moya!a
2. Nji txani txo xamalisa ngutu ngaku hi txi womba-womba ngu paradhise ya moya?
2 Ta xamalisa ku wona nzila yi Jehovha a nga maha ngu yona wukhalo wo fanekisela, ahawa vathu vakwe va hanyako ngu kurula ni wumwewo, hambi va txi hanya ka mafu yawa ma nga tala ngu wubihi ni ku vengelana. (1 Joh. 5:19; Mtu. 12:12) Tate wathu wa lirando wa tiziva ti to tikarata ku hokela hani ku hanya ka mafu yawa, ngu toneto a maha totshe kasi ku vathu vakwe ve tipfa va di vhikelekile kasi ku ve mana ku m’thumela ngu litsako. Bhiblia yi womba ti to paradhise ya moya yi fana ni ‘wuthavelo‘ ni “thembwe yo theletelwa mati.” (Isaya 4:6; 58:11) Ngu ku katekiswa ngu Jehovha ava va mahako txienge txa paradhise ya moya va nga tipfa va di tsakile hambi va txi hanya ka masiku yawa o gwita o karata ngutu.—Isaya 54:14; 2 Tim. 3:1.
3. Ku ve dihi dikhambi do khata adi mapswi a Isaya 65 ma nga hetiseka ngu dona?
3 Jehovha a thumisile mprofeti Isaya kasi ku kombisa nzila yi wutomi wu no va ngu yona ka paradhise ya moya. U nga gonda mapswi oneyo ka Isaya 65. Wuprofeti wonewo wu hetisekile kukhata ngu 537 a si se ta Kristu mbimo yi Majudha ma nga khululwa wukhumbini ka Bhabhilona me tshumelela ditikoni ka ona. Jehovha a katekisile vathu vakwe ni ku vhuna Majudha kuwuseta didhoropa da Jerusalema adi di nga ti hoxotilwe. Majudha ma ndi na maha Jerusalema ku va wukhalo wo tshura ku hanya ka wona ni ku wuseta dithepele kasi ku kuva mzinda wo khozela Jehovha khe Israyeli.—Isaya 51:11; Zak. 8:3.
4. Mapswi a Isaya 65, ma hetiseka ngu nzila muni ka timbimo tathu?
4 Dikhambi da wumbidi a di wuprofeti wa Isaya wu nga hetiseka ngu dona kuve ngu 1919. Ka dilembe donedo vakhozeli va Jehovha va timbimo ta ngweno, va khulutwe wukhumbini ka Bhabhilona wa hombe. I ngu mbimo yoneyo paradhise ya moya yi nga khata ku anda se ku simekwa mabanza a mangi hamafuni kotshe. Vavamna ni vavasikati a va va nga ti ni mahanyelo a nzambwa, va khatile ku kombisa tifanelo ta tinene ta Wukristu ni ‘ku londeta mahanyelo a m’thu wamphya, awu a nga vangwa e mahwa txifaniso txa Txizimu.’ (Vaef. 4:24) Ditshuri ti to ku tala ka makatekwa ya Isaya a nga womba-womba ngu ona ma na ta hetiseka mbimo yi yi tako ka mafu a maphya. Kambe hambi konku a va va ku ka paradhise ya moya va nga va ni makatekwa a mangi. A hi wone to ngu kutxani i di ta lisima ku va ka paradhise ya moya, ni ku ngu kutxani hi sa fanela ku yi leka.
U TI PFISA KUTXANI NGU KUVA KA PARADHISE YA MOYA?
5. Ngu ku ya ngu Isaya 65:13 ngu yahi makatekwa hi ma manako ngu ku va ka paradhise ya moya?
5 Ha mana sakudya ngu didhawa da moya. Wuprofeti wa Isaya wu kombisa ti to ku ni ku hambana ka hombe ka mahanyelo a vale va ku ka paradhise ya moya ni a vale va si ngaku ka yona. (Lera Isaya 65:13.) Jehovha ngu lirando a ninga Malanda akwe sotshe si ma si lavako kasi ku me simama me mkhozela. Ene wa hi ninga moya wakwe wo sawuleka, Dipswi dakwe i ku Bhiblia ni sakudya sa moya sasingi kasi ku hi kota ‘kudya, . . . kusela, . . . [ni] kutsaka’. (Wona ni Mtuletelo 22:17.) Txiemo txathu txa hambana ni txiemo txa va va ku hahanze ka paradhise ya moya. Vathu vonevo “va pfa nzala . . . , va pfa ditora . . . , ni ku va wa tingana” va tipfa to ka txhota txo kari ka wutomi wawe, nguko kha va nga ni wungana ni Txizimu.—Amosi 8:11.
6. Joyeli 2:21-24 a txhamusela ngu nzila muni silo si Jehovha a hi ni nga ku, ni ku hi nga si londolisa kutxani soneso?
6 Mprofeti Joyeli a thumisile silo sa ditshiku ni ditshiku so fana ni mbewu, vhinya, ni mafura kasi kukombisa ti to Jehovha a ni lirando. Se ene wa hi ninga sotshe si hi si lavako ngu didhawa da moya. (Joy. 2:21-24) Jehovha a maha toneto ngu ku thumisa Bhiblia, mabhuku athu, site ya jw.org, mitshangano ya dibanzani, ma asembleya ni ma kongresu. Ngako hi txi londola sotshe si Jehovha a hi ningako, hi na tipfa kwati ni ku eneliseka ngu didhawa da moya.
7. Nji txani txi mahako ti to “timbilu tathu ti tsaka”? (Isaya 65:14)
7 Ha tsaka. Vathu va Txizimu va nga “embelela ngu ku tsaka” nguko mbilu yawe yi tate ngu ku bonga totshe ti Jehovha a va mahelako. (Lera Isaya 65:14.) Athu ‘hi ni timbilu ti ti nga tsaka’ ngu mhaka ya ditshuri da mu ka Bhiblia adi di hi tsanisako, ni ngu mhaka ya themba yathu ayi yi nga seketelwa ka digandelo da Jesu. Hahanze keto kubhula ni vanathu ngu timhaka tiya to tsakisa, ta engetela litsako lathu!—Mas. 34:8; 133:1-3.
8. Ngu tihi timhaka timbidi ta lisima ati ti emelako paradhise ya moya?
8 Paradhise ya moya yi emelwa ngu timhaka timbidi ta lisima: Lirando, ni wumwewo hagari ka vathu va Jehovha. “Txitsaniso txo hetiseka txa wumwewo” txi hi komba ati wutomi wu no ta va ngu tona ka mafu a maphya, mbimo yi malanda a Jehovha ma no ta hanya ngu lirando ni wumwewo ku pinda nyamsi. (Vakl. 3:14) Mwanathu wo kari wa txisikati a kontarela ati a nga ti pfisa tona mbimo yi a nga ziva Tifakazi ta Jehovha ngu dikhambi do khata. Ene a womba tiya: “Ni si khali ku va ni litsako, hambi ka mwaya wangu. Dikhambi do khata ni nga wona vathu va txi kombana lirando la ditshuri i ve ka tifakazi ta Jehovha.” Mmwani ni mmwani awu a lavako ku tipfa adi tsakile a fanete kuziva paradhise yathu ya moya. Vathu va nga womba ti va ti lavako mayelano ni Tifakazi ta Jehovha, kambe athu ha tiziva ti to hi ni ditina da dinene ni nduma ya yinene ka Jehovha, ni hagari ka vanathu ha mafuni kotshe.—Isaya 65:15.
9. Ngu ku ya ngu Isaya 65:16, 17 ku na maheka txani ngu ti ti hi mahako hi xaniseka?
9 Ha va vo rula. Ka Isaya 65:14 hi gonda ti to ngu txihi txiemo txa vale va sawulako kwa mbi pateka ka paradhise ya moya: ‘Vona va peka tihuwa ngu ku pandiseka ka timbilu, va txi yowe, ngu ku xaniseka ka moya.’ Ditshuri ti to vathu va Txizimu ni vona va wonisana ni sikarato. Kambe i singa kale sikarato soneso ‘si na divalwa, si na fenengetwa ka maso a Txizimu.’ (Lera Isaya 65:16, 17.) Jehovha a na maha ti to sikarato sathu si nyamalala, ni ku ngu kutsimbila ka mbimo, hambi mialakanyo yo biha ayi yi hi mahako hi pfa ku panda yi na nyamalala da magwito.
10. Ngu kutxani u txi pimisa ti to kuva kumweko ni vanathu makatekwa? (Wona ni mfota.)
10 Hambi nyamsi wa ditshiku, kuya mitshanganoni ti maha ti to mapimo athu me zenga. A kheya, ha pfa kurula ni ku divala txitrese txa mafu yawa o biha. Ngako hi txi kombisa tifanelo ati ti mahako txienge txa mihando ya moya wa Txizimu, to fana ni lirando, litsako, kurula, wunene ni kuthutha, hi pateka ko maha ti to ka paradhise ya moya ku va ni kurula. (Vag. 5:22, 23) Ka hotshethu i lungelo ya hombe ku va kumweko ni sengeletano ya Txizimu. Se ava va simamako ka paradhise ya moya, i singa kale va na wona kuhetiseka ka txithembiso txa Txizimu txo maha “nzuma ya yiphya ni mafu a maphya.”
I lungelo ni litsako la hombe kuva ka paradhise ya moya ni ku maha txienge txa vathu va Txizimu (Wona paragrafu 10) c
11. Ngu ku ya ngu Isaya 65:18, 19, u ti pfisa kutxani ngu ku ziva ti to Jehovha a mahile paradhise ya moya?
11 Ha ziva kubonga. Isaya a hi ninga txivangelo tximwani txo ‘hi tsaka ni ku pfalisa’ ka paradhise ya moya: Paradhise yiya yo fanekisela yi mahilwe ngu Jehovha. (Lera Isaya 65:18, 19) Misengeletano ayi yi nga mahwa hamafuni kha yi gondisi vathu mayelano ni Txizimu. Ngu toneto ta pfisiseka ngaku Jehovha a txi hi thumisa kasi ku hi humisa vathu vonevo ka misengeletano yoneyo, kasi ku ve maha txienge txa paradhise ya moya yo tsakisa ngutu! Ha tsaka ngutu ngu otshe makatekwa aya hi ma manako ngu kuva ka ditshuri. Se hi lava kubhulela vamwani ngu makatekwa oneyo o tsakisa.—Jer. 31:12.
12. Nji txani txi ku gwesako mbilu, mbimo yi u gondako txithembiso atxi txi ku ka Isaya 65:20-24 ni ku ngu kutxani?
12 Ina awe khu tsaki ni ku tala ngu ku bonga mbimo yi u alakanyisisako ngu themba yi hi ku nayo, ni ku hi lumbako txienge txa paradhise ya moya? Emanyana u alakanyisisa ngu ti wutomi wu no ta va tona ka mafu a maphya a Txizimu! Bhiblia yi thembisa tiya: “Kha ku na mbi maneka kambe mwanana wo hanya masiku a madotho, hambi txikosana txi txi no mbi hetisa masiku a txona.” Athu hi na ‘aka tinyumba, hi zumba ka tona, hi phaya mivhinya, hi dya mihando ya kona.’ ‘Kha hi nambi thuma mahala’ nguko hi na va “vo katekiswa ngu MKOMA.” Ene a thembisa ku hi ninga wutomi awu wu ku ni txikongomelo txa ditshuri, wo vhikeleka ni wo tsakisa. “[Hi] sanzi kupeka huwa,” Jehovha a na ti ziva ti mmwani ni mmwani a ti lavako ni ku “a na ninga si si lavekako ka votshe va va hanyako.”—Isaya 65:20-24; Mas. 145:16.
13. Isaya 65:25 a txhamusela ngu nzila muni kutxitxa ku vathu va ku mahako msana ko gonda ditshuri?
13 Ha va vo vhikeleka ni ku va ni kurula. Ngu kuvhunwa ngu moya wo sawuleka wa Jehovha, vathu vavangi a va va nga txi dhunda mazunga, sibhakela ni ku i si nga vo thembeka, va mahile kutxitxa ko xamatisa ka wutomi wawe. (Lera Isaya 65:25.) Msana ka ku va di mahile mizamo ya hombe, va tikoti ku ambala m’thu wamphya ve leka mahanyelo awe a kale. (Var. 12:2; Vaef. 4:22-24) Ditshuri ti to ngu konaha ka kwambi pelela kwathu ha simama hi maha tiphazamo. Kambe Jehovha wa tshanganisa “votshe vathu” ava va mrandako ni kudhunda vamwani, ni ku kota wuyelo ha va ni kurula ka ditshuri. (Tit. 2:11) Txidiwukiso txiya ova Txizimu txa ditshuri dwe, txi nga kotako ku txi maha!
14. Txikombiso txa mwanathu wu wa txi kombisa ngu nzila muni ti to mapswi a Isaya 65:25 nga ditshuri?
14 Ina m’thu a nga sikota kutxitxa mahanyelo akwe? Wona ti ti nga humelela dijovhem do kari. Kala 20 wa malembe se di ti ñotwe di betwa jele makhambi a mangi ni ku di txi hanya wutomi wa nzambwa ni kudhunda mazunga. Dona di ti ñotwe ngu kupa mimovha, kupfhanya tinyumba, ni wugevenga wumwani. Dona di ti tiemisete kupeka txibhakela ni votshelele. Mbimo yi di nga pfa ditshuri da mu ka Bhiblia di khatile kuxalela mitshangano ya Tifakazi ta Jehovha ni ku di tsanisekile ti to di ti mani tximaha txa lisima, i ku paradhise ya moya. Ni ku msana ka ku bhabhatiswa, mbimo yotshe di txi ema di txi alakanyisisa ngu ti mapswi a Isaya 65:25 ma nga txi di gwesisa tona, dona di ti lekile ku va m’thu wa tshofu kufana ni ngonyamo, diva m’thu wo rula kufana ni nvuta.
15. Ngu ku txani hi txi lava kuramba vamwani ve ta ti pata ni nathu ka paradhise ya moya, ni ku hi nga ti mahisa kutxani toneto?
15 Isaya 65:13 a khata ngu kuwomba tiya: “MKOMA Txizimu a womba tiya.” Ni ku vhersikulo 25 yi gwita ngu kuwomba tiya: “Kuwomba MKOMA.” Athu ha tiziva ti to mbimo yotshe sithembiso sa Jehovha sa hetiseka, mwendo ku paradhise ya moya se yi ho. (Isaya 55:10, 11) Jehovha se a ni mwaya wa vakhozeli awu wu si fananiswiko ni wumwani. Ngu kumaha txienge txa mwaya wonewo ha pfa kurula konku ni ku hi tipfa hi di vhikelekile ka mafu yawa ma nga tala ngu wubihi. (Mas. 72:7) Txivangelo txonetxo txi hi mahako hi lava kuvhuna vathu kasi ku ni vona ve pateka ka mwaya wonewo wa ha mafuni kotshe. Hi nga maha toneto ngu ku veka mapimo ka mthumo wo maha vagondiswa.—Mat. 28:19, 20.
HI NGA VA VHUNISA KUTXANI VAMWANI TI TO VE BELA KA PARADHISE YA MOYA?
16. Nji txani txi nga vhunako vamwani ku ve tsakela kuva ka paradhise ya moya?
16 Mmwani ni mmwani kwathu a nga maha txo kari txa lisima kasi ku e vhuna vamwani ve lava kubela ka paradhise ya moya. Athu hi maha toneto mbimo yi hi etetelako Jehovha. Ene kha sinzise m’thu ku e maha txienge txa sengeletano yakwe. Hahanze keto ene ‘a dhana’ vathu ngu nzila ya lirando. (Joh. 6:44; Jer. 31:3) Ngu toneto msana ko gonda ngu tifanelo ta Jehovha kumweko ni wuthu wakwe kha ti koteki ku m’thu wa mbilu ya yinene a si ve mngana wakwe. Kambe tifanelo tathu ta tinene, ni mahanyelo athu ma nga mahisa kutxani ti to vamwani ve tsakela kuva ka paradhise ya moya?
17. Hi nga maha txani kasi ku vamwani ni vona ve tsakela kuva ka paradhise ya moya?
17 Nzila yimwani yo maha ti to vathu ve tsakela kuva ka paradhise ya moya ngu ñola vanathu ngu nzila ya lirando. Mbimo yi m’thu a tako ngu dikhambi do khata ka Nyumba ya Mfumo hi lava e tipfa kufana ni vale va nga ya xalela mitshangano ka dibanza do khata akhe Korinto. Vona va vite ni kukholwa se ve womba tiya: “Ka ditshuri Txizimu txiho hagari kwanu.” (1 Vak. 14:24, 25; Zak. 8:23) Ngu toneto ti lava hi simama hi londisa txialakanyiso ‘txo hanya ngu kudikha ni vamwani.’—1 Vat. 5:13.
18. Nji txani txi nga mahako ti to vathu ve tsakela kuva ka sengeletano yathu?
18 Mbimo yotshe tilava hi zama kuwona vanathu nga ti Jehovha a va wonisako tona. Hi maha toneto mbimo yi hi vekako mapimo ka tifanelo tawe ta tinene i singa ka tiphazamo tawe, nguku i singa kale tiphazamo tawe ti na nyamalala. Ngako hi txi thuka hi kandana txizenende ni mwanthu hi nga lulamisa txikarato txonetxo ngu nzila ya lirando. Ngu ku mbimo yotshe ‘hi va vanene, hi pfelana wusiwana, ni ku divalelana.’ (Vaef. 4:32) Ngu nzila yoneyo, vathu va ni vona va tsakelako kuñolwa ngu nzila ya lirando va na tilava kumaha txienge txa paradhise ya moya.b
SIMAMA U DI KA PARADHISE YA MOYA
19. a) Ngu kuya ngu dikwadro adi di ku “Va humile, kambe va tshumete ve wuya” ngu tihi ati vamwani va nga tiwomba msana kova va di wile ka paradhise ya moya? b) Hi fanete kutiemisela kumaha txani? (Wona ni mfota.)
19 Athu ha tsaka ngutu ngu kumaha txienge txa paradhise ya moya! Niku kha ku khali kuva ni vathu va vangi vo maha txienge txa Paradhise ya moya kufana ni masiku aya hi ku ka ona. Ha bonga Jehovha ngu ha ku si gumiko ngu kona ha ka paradhise ya moya ayi a nga hi mahela. Ngako m’thu a txi lava ku tipfa a di tsakile, a di rute ni ku vhikeleka tilava e maha txienge txa paradhise ya moya ni kwa mbi huma ka yona. Kambe tiwonele nguku Sathani a simama e maha ati a nga tikota kasi ku hi kanganyisa ni ku hi humisa ka paradhise ya moya. (1 Pedro 5:8; Mtu. 12:9) He maheni totshe ati hi nga tikota kasi ku hi vhikela kutshura, kubasa, ni kurula aku hi ku nako ka paradhise ya moya.
Ava va ku ka paradhise ya moya konku, va na ta tshumela veva ni litsako lo hanya ka paradhise ayi yi tako kona hawa hamafuni (Wona paragrafu 19)
U NGA XAMULISA KUTXANI?
Nji txani paradhise ya moya?
Ngu yahi makatekwa hi ku nawo nguku hi ku ka paradhise ya moya?
Hi nga va vhunisa kutxani vamwani ti to ve lava kumaha txienge txa paradhise ya moya?
NDANDO 144 Tula maso u wona makatekwa
a TXHAMUSELO YO GWITISA: Dipswi adi di ku “paradhise ya moya” di txhamusela matipfelo ya hi ku nawo o vhikeleka ngu ku hi khozelako Jehovha. Ka paradhise yoneyo ya moya, hi ni litsako lo hanya ngu kurula ni Jehovha ni vamwani.
b Xalela vhidhiyo ayi yi ku Va pfala hani nkonku? Alena Žitníková: Mloro wangu wu mahekisile kutxani, ka jw.org, se u wona makatekwa aya mwanathu a nga ma amukela ngu kuva ka paradhise ya moya.
c TXHAMUSELO YA MFOTA: Mbimo yi vanathu vamwani va londolako kuva kumweko mitshanganoni mwanathu mmwani wa ti hambanisa e zumba ekha.