Jehovha a lava ti to hi va wonisa kutxani avale va nga maha txionho txa hombe?

1. Ngu tihi ati Jehovha a lavako ti to votshe vathu ve ti maha?

JEHOVHA a mahile vathu va di ni mkhululeko wo ti sawulela. Awe wa yi thumisa ningo yoneyo mbimo yi u mahako sisungo. Txisungo txa hombe atxi mmwani ni mmwani wathu a nga txi mahako ngu tiningetela ka Jehovha ni ku mthumela kumweko ni vanathu. Jehovha a navela ti to votshe ve maha toneto. Ngu kutxani? Nguko ene wa va randa votshe vathu ni ku a va navelela tatinene. Jehovha a lava ti to hi va vangana vakwe ni ku hi hanya ngu ha ku si gumiko.—Dhewut. 30:19, 20; Vag. 6:7, 8.

2. Jehovha a ti pfisa kutxani ngu vaonhi ava a si si ku ti sola? (1 Johani 2:1)

² Kambe Jehovha kha sinzisi m’thu kasiku e mthumela. Ene a tumelela ti to mmwani ni mmwani e sawula ati a no ti maha. Se ngaku mkristu awu a nga bhabhatiswa atxi leka kuengisa milayo ya Jehovha e maha txionho txa hombe? Ngaku a si ti soli a fanete kuthaviswa dibanzani. (1 Vak. 5:13) Hambiketo, Jehovha a emela ti to muonhi e tisola e tshumelela kwakwe. Ngu ditshuri, txivangelo txa lisima txo va Jehovha a di hi ningile mterulo, ngu maha ti to sionho sa va va ti solako si divalelwa. (Lera 1 Johani 2:1.) Jehovha Txizimu txa lirando ni ku wa ti lava ngutu ti to vaonhi ve ti sola.—Zak. 1:3; Var. 2:4; Jak. 4:8.

3. Hi na bhula ngu txani ka gondo yiya?

³ Jehovha wa hi gela ati a ti pfisako tona ngu txionho ni vale va mahako txionho txa hombe. Ni ku ene a lava ti to nathu hi ti pfisa toneto. Gondo yiya yi na hi vhuna kuwona ti to hi nga ti mahisa kutxani toneto. Hi na gonda ngu ti Paulo a nga gela dibanza da Korinto ti to di ti maha mbimo yi mwanathu a nga maha txionho txa hombe. Hi na gwita hi xolisisa ati Paulo a nga gela dibanza ti to di ti maha msana ka kuva mwanathu a di ti sote. Ni ku hi na gonda ngu ti Jehovha a ti pfisako tona ngu vale va mahako txionho txa hombe.

ATI DIBANZA DA KORINTO DI NGA TI MAHA MBIMO YI MWANATHU A NGA MAHA TXIONHO TXA HOMBE

4. Ngu tihi ati ti nga txi maheka ka dibanza da Korinto? (1 Vakorinto 5:1, 2)

⁴ Lera 1 Vakorinto 5:1, 2. Ka diendo dakwe da wuraru kota murumiwa, Paulo a pfite ti to ka dibanza da Korinto ku txi mahwa timhaka to thisa. Mwanathu wo kari wa dibanza dileya a txi maha timhaka ta matahu ni madraxta wakwe. Hambi vathu ava va nga si khozeli Jehovha va txi tiziva ti to tileya ti di bihile ngutu. Vanathu va ti pimisa ti to kha ku nga ni txikarato ku mwanathu wuleya e ti pata ni dibanza hambiku a nga txi maha wubihi wonewo. Ti nga maha vamwani dibanzani va ti pimisa ti to kumaha toneto ngu kombisa wumbilu kufana ni Jehovha. Kambe Jehovha kha tumeleli ti to vathu vakwe ve maha to biha. Mahanyelo o biha a wamwamna wuleya ma txi onha nduma ya yinene ya dibanza. Ngaku a di ko simama e lumba dibanza, mamwani Makristu ma ndi na etetela mahanyelo akwe o biha. Se ngu wuhi mkongomiso awu Paulo a nga ninga vanathu va dibanza da Korinto?

5. Ngu tihi ati Paulo a nga gela dibanza ti to di ti maha ni ku nji txani txi nga txi pateka ka toneto? (1 Vakorinto 5:13) (Wona ni mfota.)

⁵ Lera 1 Vakorinto 5:13. Jehovha a huhutete Paulo kubhalela dipasi dibanza dile e txhamusela ti to muonhi wule wa kwa mbi tisola a di fanete kuthaviswa dibanzani. Makristu o thembeka ma ti fanete ku mu wonisa kutxani? Paulo a va gete ti to va ti fanete “kuema kusengela mwendo kupatana” nayo. Ti txi pata txani toneto? Paulo a va gete ti to va sa fanela “kudya” nayo. (1 Vak. 5:11) Kudya ni m’thu ti nga hi maha hi lava ku va ni wungana nayo. Paulo a txi lava kuwomba ti to vanathu va sa fanela ku ti pata ni wamwamna wule. Eto ti ndi na vhikela dibanza ka mkuzetelo wo biha. (1 Vak. 5:5-7) Hahanze keto, ngako vanathu va ti ko engisa txialakanyiso txa Paulo, eto ti ndi na vhuna wamwamna wule ku e pfisisa ti to ati a nga di ti mahile ti henyisile ngutu Jehovha, se e telwa ngu tingana e ti sola.

6. Ngu tihi ti dibanza di nga ti maha msana ka kuva Paulo a di rumete dipasi ni ku muonhi a mahile txani?

⁶ Msana ka kuva Paulo a di rumete dipasi diya a ti wotisile ti to dibanza di ndi na angulisa kutxani. Ngu kutsimbila ka mbimo, Titosi a wile ni mahungu o tsakisa ka Paulo. Dibanza di ti londisile txialakanyiso txakwe, di thavisa muonhi wule. (2 Vak. 7:6, 7) Eto ti ve ni wuyelo ya yinene nguko msananyana ka kuva Paulo a di rumete dipasi donedo, wamwamna wuleya a ti sote ka ti a nga di ti mahile. Ene a ti txitxile mahanyelo akwe e khata kulondisa milayo ya Jehovha. (2 Vak. 7:8-11) Se msana keto, ngu tihi ati Paulo a nga gela dibanza ti to di ti fanete ku ti maha?

DIBANZA DI MU WONISILE KUTXANI MUONHI WULE A NGA DI TI SOTE?

7. Kuthaviswa ka muonhi dibanzani ku hokelete txikongomelo txihi? (2 Vakorinto 2:5-8)

⁷ Lera 2 Vakorinto 2:5-8. Paulo a wombile ti to “ka eneyo m’thu, ka m’dingana kusolwa ku a nga mahelwa ngu wungi wa vathu.” Ngu ma wombelo mamwani, kukawuka ku di hokelete txikongomelo txa kona. I ku kuvhuna wamwamna wule ku e tisola ka ti a nga maha.—Vaheb. 12:11.

8. Ngu wuhi wumwani mkongomiso awu Paulo a nga ninga dibanza da Korinto?

⁸ Paulo a ningete mkongomiso wuwa ka dibanza mayelano ni muonhi wu a nga di ti sote: “Anu m’divaleleni mi txi mtsanisa . . . mi txi kombisa lirando lanu kwakwe.” Aku wamwamna wule a nga di ti sote, Paulo a gete madhota ti to ma di fanete ku m’tumelela ti to e tshumelela dibanzani. Ene a tshumete e va gela ti to va ti fanete ku m’divalela, ku mtsanisa ni ku mkomba lirando. Ngu nzila yoneyo, ene a ndi na tsaniseka ti to votshe va di tsakile aku a nga wuyiselwa dibanzani.

9. Ngu kutxani vamwani ti nga mahako ti di va karatete kudivalela muonhi wule a nga di ti sote?

⁹ Ina vamwani vanathu ti va karatete kutumela ti to mwanathu wuleya adi wuyisetwe dibanzani? Bhiblia kha yi wombi, kambe ti nga maha ti di va karatete. Vamwani ti nga maha va di henyile nguko a di tisile sikarato dibanzani. Hahanze ko tisela sikarato dibanza, vamwani ti nga maha va di henyile nguko a ti va gohete. Msana ka kuva va di mahile mizamo kasi kuengisa Jehovha, vamwani ti nga maha va di pimisile ti to ti si pfisiseki kuamukela muonhi wule ngu lirando. (Wona ni Luka 15:28-30.) Kambe ngu kutxani i nga di ta lisima ku dibanza di kombisa lirando la ditshuri ka mwanathu wule?

10-11. Ngu tihi ati ti ndi nova ti di mahekile ngako madhota ma ti ko lamba kudivalela muonhi wule a nga di ti sote?

¹⁰ Pimisa ngu ti ti ndi nova ti di mahekile ngako madhota ma di ko lamba kuwuyisela dibanzani wamwamna wule a nga di ti sote ngu ditshuri. Ku ndi nava ku ni mahekile txani msana ka kuva mwanathu wule a di wuyete dibanzani kambe vanathu va si mkombe lirando? Paulo a wombile ti to wamwamna wuleya a di na ‘pandiseka ngutu.’ Ene a ndi na pimisa ti to a si na kusikota kambe kuthumela Jehovha.

¹¹ Txo biha ngutu ngu ti to ngako vanathu vale va di ko lamba kudivalela wamwamna wule a nga di ti sote, va di onhile wuxaka wawe ni Jehovha. Ngu kutxani? Nguko va ndi nava va si eteteli Jehovha awu a divalelako vaonhi ava va ti solako. Hahanze keto, va ndi nava va txo etetela Sathani awu a ku ni tshofu, a si kombisiko wumbilu. Vona va ndi na leka Sathani e va tsivela kutsanisa wamwamna wuleya ku e tshumela e thumela Jehovha.—2 Vak. 2:10, 11; Vaef. 4:27.

12. Dibanza da Korinto di ndi na mu etetelisa kutxani Jehovha?

¹² Dibanza da Korinto di ndi na mu etetelisa kutxani Jehovha hahanze ko etetela Sathani? Ngu kuñola vaonhi ngu nzila yi Jehovha a va ñolako ngu yona. Wona ti vabhali vamwani va Bhiblia va nga ti womba mayelano ni Jehovha. Dhavhidha a wombile ti to Jehovha mbwa ‘mnene wa divalela.’ (Mas. 86:5) Mika a bhate tiya: “I mani wo fana ni nawe, u divalelako wubihi u divala ni wueyisi.” (Mika 7:18) Isaya a bhate tiya: “M’bihi a na leke nzila yakwe, m’thu wa kwa mbi lulama a na leke mipimiso yakwe, se a na hundulukele ka Mkoma, ene a na mpfela wusiwana; a na tshumelele ka Txizimu txathu, nguko nja hombe ngutu mu ko divalela.”—Isaya 55:7.

13. Ngu kutxani madhota ma nga sa fanela kuswela ku wuyisela wamwamna wuleya dibanzani? (Wona dikwadru adi di ku “Muonhi wule wa Korinto a wuyisetwe ngu mbimo muni?”)

¹³ Kasi kuetetela Jehovha, dibanza da Korinto di ti fanete kudivalela wamwamna wule ni ku mkomba ti to va txi mranda. Ngu kulondisa mkongomiso wu Paulo a nga va ninga, vanathu va Korinto va ndi na kombisa ti to “vaengisi va totshe timhaka.” (2 Vak. 2:9) Ditshuri ti to ku txi pinda mitxima nyana wamwamna wule a di thavisilwe dibanzani, kambe kukawukwa ku mvhuni ti to e tisola. Se ku si nga ni txivangelo txo kupinda mbimo yayingi wamwamna wuleya a si se wuyiselwa dibanzani.

HI NGA WU ETETELISA KUTXANI WULULAMI NI WUMBILU WA JEHOVHA

14-15. Ngu yihi gondo hi yi manako ka ti ti nga maheka ka dibanza da Korinto? (2 Pedro 3:9) (Wona ni mfota.)

¹⁴ Didungula mayelano ni nzila yi dibanza da Korinto di nga wonisana ngu yona ni mhaka yileya, di bhatwe amu ka Bhiblia kasi ku di “txi hi gondisa.” (Var. 15:4) Dona di hi gondisa ti to Jehovha kha tumeleli sionho sa hombe mndani ka dibanza. Vamwani va nga pimisa ti to aku Jehovha a ku ni wumbilu a nga tumelela ti to awu a si tisoliko e simama dibanzani, kambe Jehovha kha kombisi wumbilu wakwe ngu nzila yoneyo. Jehovha kha tumeleli ti to m’bihi awu a si tisoliko e simama e ti pata ni malanda akwe o thembeka. (Judha 4) Nguko eto ti ndi nava ti si kombisi wumbilu ni ku ti ndi na veka dibanza ka phango.—Mav. 13:20; 1 Vak. 15:33.

¹⁵ Hahanze keto hi gondile ti to Jehovha kha ti lavi ti to ni wamweyo a txi lova, kambe a navela ti to votshe ve huluka. Ene wa kombisa wumbilu ka vale va txitxako mapimiselo ni mahanyelo awe o biha, va lavako kutshumelela kwakwe ve mthumela. (Eze. 33:11; lera 2 Pedro 3:9.) Ngu toneto, mbimo yi wamwamna wule wa Korinto a nga tisola e txitxa mahanyelo akwe, Jehovha a thumisile Paulo kasi kutxhamusela dibanza ti to wamwamna wule a ti fanete kudivalelwa ni kuamukelwa dibanzani.

16. U ti pfisa kutxani msana ko gonda ngu ti ti nga maheka ka dibanza da Korinto?

¹⁶ Ati ti nga maheka ka dibanza da Korinto ti kombisa ti to Jehovha a ni lirando, wunene ni wululami. (Mas. 33:5) Eto ti hi maha hi lava kudhumisa Jehovha nguko hotshethu hi vaonhi niku ha ti lava kudivalelwa. Eto ti koteka ngu mhaka ya mterulo. Ngu toneto hi ni sivangelo sasingi so bonga Jehovha ngu ningo yiya. Ta thavelela ngutu kuziva ti to Jehovha wa ma dhunda ngutu malanda akwe ni ku a ma navelela ta tinene.

17. Hi na bhula ngu txani ka tigondo ati ti londiselako?

¹⁷ Se nyamsi ko, ngaku m’thu a txi maha txionho txa hombe, madhota ma etetelisa kutxani lirando la Jehovha ni kuvhuna m’thu ku e tisola? Dibanza di fanete ku angulisa kutxani ngaku madhota ma txi sunga kuthavisa mwendo ku wuyisela m’thu dibanzani? Hi na bhula ngu tixamulo ta siwotiso siya ka tigondo ati ti londiselako.