Etetela kuhiseka ka Jesu ka mthumo wo txhumayela

1. Ngu tihi ati ti hambanisako vathu va Jehovha ni va va ti gelako to Makristu?

ATI ti hambanisako vathu va Jehovha ni vale va tigelako ti to Makristu, ngu hisekaa ka mthumo wo txhumayela. (Tit. 2:14) Kambe mbimo yimwani ti nga hi karatela kutsakela mthumo wo txhumayela. Ti nga maha awe u txi tipfa kufana ni didhota dimwani do hiseka adi di nga womba tiya: “Ku ni mbimo yimwani ni si ngako ni vhontadhi yo ya kutxhumayelani.”

2. Ngu kutxani mbimo yimwani ti nga hi karatelako ku tsakela mthumo wo txhumayela?

² Ti nga maha hi tsakela kumaha mithumo yimwani ka mthumo wa Jehovha, kupinda mthumo wo txhumayela. Ngu kutxani ti txi maheka toneto? Nguku mbimo yi hi akako ni kulungisa tinyumba ta Mfumo, hi vhuna vanathu va va nga welwa ngu tiphango ta mtumbuluko mwendo kuva kuzeta, ha kuluveta hi wona wuyelo ya mthumo wathu ni ku eto ti hi maha hi tsaka. Hahanze keto, mbimo yi hi mahako mithumo yoneyo, ha sikota kuwona lirando ni wumwewo asi si kuho hagari ka vanathu ni ku ha tsaniseka ti to mthumo wathu mbwa lisima. Se ka mthumo wo txhumayela, ti nga maha hi di ni malembe o tala hi txi txhumayela ka teritoriyo ya yimweyo kambe hi si woni wuyelo ya mthumo wathu mwendo vathu va si engisi ati hi va gelako. Ni ku ha tiziva ti to mbimo yi magwito ma yako me tshuketa, hi na wonisana ni sikarato so tala ka mthumo wo txhumayela. (Mat. 10:22) Se njitxani txi no hi vhuna ku hi engetela kuhiseka kwathu ka mthumo wo txhumayela?

3. Hi gonda txani mayelano ni kuhiseka ka Jesu ka dibhuku da Luka 13:6-9?

³ Hi nga gonda mayelano ni kuhiseka ka mthumo wo txhumayela ngu kuxolisisa txikombiso txa Jesu. Mbimo yi a nga ti hamafuni kuhiseka kwakwe kha ka pumbeka. Ngu ditshuri, ene a mahile mizamo ti to e simama e hiseka ka mthumo wakwe. (Lera Luka 13:6-9.) Ka txidinganiso txo kari, Jesu a fananisile mthumo wakwe wo txhumayela ni mizamo ya wamwamna wo kari a wu a nga txi khatalela thembwe ya mivhinya. Wamwamna eneyo a hetile 3 wa malembe a txi zama kukhatalela mkuwu awu wu nga si veleki mihando. Ngu ha kufanako, Jesu a hetile kona mu ka 3 wa malembe a txi txhumayela Vajudha kambe mtalo wawe kha va engisa didungula dakwe. Se kufana ni wamwamna wule a nga mbi godhola kukhatalela mkuwu, Jesu kha godhola kutxhumayela vathu. Hahanze keto, ene a hisekile kasi kuvhuna vathu ve tumela mahungu a manene.

4. Ngu tihi ti hi no ti gonda mayelano ni kuhiseka ka Jesu?

⁴ Ka gondo yiya, hi na wona nzila yi Jesu a nga kombisa ngu yona kuhiseka, ngutu-ngutu ka 6 wa mitxima yo gwita ka mthumo wakwe wo txhumayela. Kugonda mayelano ni ti Jesu a nga ti gondisa ni kuetetela txikombiso txakwe, ti na hi vhuna kusimama hi hiseka. Hi na wona 4 wa timhaka ati hi nga tigondako ka txikombiso txa Jesu: 1) Ene a ti veka mapimo ko maha kudhunda ka Jehovha, 2) atxi wu ziva kwati wuprofeti wa Bhiblia, 3) a txi themba txivhuno txa Jehovha, ni ku 4) ati ni mawonelo a manene mayelano ni vathu.

ENE A VEKILE MAPIMO KO MAHA KUDHUNDA KA JEHOVHA

5. Jesu a kombisisile kutxani ti to a tiveka mapimo ko maha kudhunda ka Jehovha?

⁵ Jesu a txhumayete ngu kuhiseka “mahungu a manene a Mfumo” nguku atxi tiziva ti to eto ngu ti Txizimu txi nga ti lava ti to e timaha. (Luka 4:43) Ka Jesu, kutxhumayela i ti wona mthumo wa lisima ngutu ka wutomi wakwe. Hambi mbimo yi a nga ti hafuhi ni kuheta mthumo wakwe, ene a simamile ‘atxi tsimbila ngu didhoropa ni didhoropa ni txidhoropana ni txidhoropana’ a txi gondisa vathu. (Luka 13:22) Jesu a tshumete e trenara vamwani kasiku ve txhumayela mahungu a manene kufana ni nene.—Luka 10:1.

6. Mthumo wathu wo txhumayela wu yelanisa kutxani ni mithumo yimwani a yi hi yi mahelako Jehovha? (Wona ni mfota.)

⁶ Nyamsi kutxhumayela mahungu a manene i ngadi mthumo wa lisima ngutu awu Jehovha ni Jesu va lavako ti to hi wu maha. (Mat. 24:14; 28:19, 20) Kuwomba ditshuri, wotshe mthumo wu hi mahelako Jehovha wu tsimbitisana ni kutxhumayela mahungu a manene. Ngu txikombiso, ha aka tinyumba ta Mfumo kasiku ava hi va txhumayelako ve mana wukhalo wo khozela ka wona Jehovha. Hahanze keto, wotshe mthumo wu hi wu mahako Bhetele i para kuvhuneta silaveko sa mthumo wo txhumayela. Ni ku txivhuno txi hi txi ningelako ka vanathu va va nga welwa ngu tiphango ta mtumbuluko, kha txi thumeli basi kasi kukhatalela silaveko sawe sa nyama, kambe txi tshumela txi va vhuna ku ve tshumelela ka mithumo yawe ya moya kupata ni mthumo wo txhumayela. Se ngaku hi txi khumbuka ti to kutxhumayela mthumo wa lisima ngutu a wu Jehovha a lavako ti to hi wu maha, ti na hi susumetela ku hi pateka ngu kuhiseka ka mthumo wonewo. János, didhota da Hungria di womba tiya: “Mbimo yotshe ni zama kukhumbula ti to kha wu ngaho mthumo a wu hi mahelako Jehovha wu no vhaleta mthumo wo txhumayela, nguku kutxhumayela njiavelo txathu txa lisima ngutu kupinda sotshe.”

7. Ngu kutxani Jehovha atxi lava ti to hi simama hi txhumayela? (1 Timoti 2:3, 4)

⁷ Hi nga engetela kuhiseka kwathu ka mthumo wo txhumayela ngu kuwona vathu ngu nzila yi Jehovha a va wonako ngu yona. Ene a lava ti to vathu va vangi ve engisa ni kutumela mahungu a manene kasi ku ve ta hulukiswa. (Lera 1 Timoti 2:3, 4.) Ngu toneto, ene wa hi vhuna ku hi tshukwatisa wusikoti wathu wo txhumayela. Txikombiso txa toneto, dibroxura adi di ku Dhunda Vathu—Va gondise adi di hi vhunako kukhata mabhulo ngu txikongomelo txo tula sigondo sa Bhiblia. Hambi i di ti to vathu kha va mthumeli Jehovha konku, ti nga maha ve ta va ni mkhanju wo ta maha toneto xanisa ya hombe yi si se guma. Se ati hi va gelako konku, podhi ti ta va susumetela kuthumela Jehovha mbimo yi yi tako. Kambe eto ti no koteka dwe ngaku hi txi simama hi txi txhumayela.

ENE A TXI WU ZIVA KWATI WUPROFETI WA BHIBLIA

8. Kuziva wuprofeti wa Bhiblia ti yi gwesisile kutxani nzila yi Jesu a nga ti thumisa ngu yona mbimo yakwe?

⁸ Jesu a txi yi ziva nzila yi wuprofeti wumwani wa Bhiblia wu ndi no hetiseka ngu yona. Ngu txikombiso, ene a txi tiziva ti to mthumo wakwe wo txhumayela wu ndi na heta 3 wa malembe ni hafu. (Dhan. 9:26, 27) Ene a txi tiziva ti to a nafa ditshiku muni, ni nzila ayi a ndi nofa ngu yona. (Luka 18:31-34) Ngu toneto, ene atxi thumisa mbimo yakwe ngu nzila ya yinene ngu kutxhumayela ngu kuhiseka kasi kuhetisisa txiavelo txakwe.

9. Ngu kutxani kupfisisa wuprofeti wa Bhiblia ti txi hi kuzeta kutxhumayela ngu kuhiseka?

⁹ Kupfisisa wuprofeti wa Bhiblia ta hi kuzeta kutxhumayela ngu kuhiseka, nguku ha tiziva to i singa kale magwito a mafu awa ma na hoka. Ha yi wona nzila yi simahakalo sa hamafuni kotshe ni nzila yi vathu va hanyako ngu yona, si hetisisako wuprofeti wa Bhiblia mayelano ni masiku a magwito. Hi tshumela hi wona livengo ali li kuho hagari ka mfumo wa hamafuni kotshe wa Anglo-Americano ni Rússia. Livengo liya, li hetisisa wuprofeti wa ti to mfumeli wa wulambwe ni mfumeli wa wuphemba va ndi na lwisana ngu “magwito ka mbimo.” (Dhan. 11:40) Hi tshumela hi pfisisa ti to mikondo ya txithombe txa wuprofeti wa Dhaniyeli 2:43-45, txi emela mfumo wa hamafuni kotshe wa Anglo-Americano. Ha tsaniseka ti to i singa kale, Mfumo wa Txizimu wu na gumisa yotshe mifumo ya vathu. Wuprofeti wuwa wu hi komba ti to hi hafuhi ni magwito, ni ku ti lava hi txhumayela mahungu a manene ngu txikuluveta.

10. Wuprofeti wumwani wa Bhiblia wu hi kuzetisa kutxani ku hi simama hi txhumayela?

¹⁰ Wuprofeti wa Bhiblia wu ni sithembiso so tsakisa sa wumangwana a si hi lavako kugela vamwani. Carrie mwanathu wa txisikati awu a thumelako República Dominicana a womba tiya: “Mbimo yi ni emako ni alakanyisisa ngu timhaka to xamatisa ati Jehovha a thembisako ku ta timaha ka mbimo yi tako, na nyawukelwa kugela vamwani mayelano ni timhaka toneto. Vathu va wonisana ni sikarato sa hombe ni ku ta woneka ti to vona va ti lava kuziva sithembiso sa Jehovha.” Hahanze keto, wuprofeti wa Bhiblia wu hi komba ti to Jehovha wa seketela mthumo wo txhumayela mbimo yotshe. Leila a wu a zumbako Hungria a womba tiya: “M’bhalo wa Isaya 11:6-9 wu ni khumbutisa ti to m’thu mmwani ni mmwani a nga txitxa ngu kuvhunwa ngu Jehovha. Ngu toneto, ani ni lava kugela mahungu a manene votshe vathu hambi vale va ti kombako nga kha va na mbi tumela.” Se Christopher, mwanathu wa Zâmbia a womba tiya: “Dibhuku da Marku 13:10 di womba ti to mahungu a manene ma ndi na txhumayelwa hamafuni kotshe, se i lungelo kwangu kuvhuneta ko hetisisa wuprofeti wuwa.” Se awe ko? Ngu wuhi wuprofeti wa Bhiblia wu ku kuzetako ku u simama u txhumayela?

ENE A TXI THEMBA TXIVHUNO TXA JEHOVHA

11. Ngu kutxani ti nga txi lava ku Jesu e themba Jehovha kasiku e simama e txhumayela ngu kuhiseka? (Luka 12:49, 53)

¹¹ Jesu ati themba ti to Jehovha a ndi na m’vhuna ku e simama e txhumayela ngu kuhiseka. Hambiku Jesu a nga txi womba-womba ngu nzila ya txixonipho ni ku a ti langa kwati mapswi akwe, ene a txi tiziva ti to mahungu a manene ma ndi na vanga mibhando ni kuwukelwa. (Lera Luka 12:49, 53.) Ngu mhaka ya mthumo wakwe wo txhumayela, vathangeli va wukhongeli va zamile ku m’daya makhambi o tala. (Joh. 8:59; 10:31, 39) Hambiketo, Jesu a simamile e txhumayela mahungu a manene nguku a txi tiziva ti to Jehovha a ti ni nene. Jesu a wombile tiya: “Nguko kha ni nga nokha, Tate wu a nga ni rumela a ni nani . . . kha ni leka nokha nguko mbimo yotshe ni maha ti ti m’tsakisako.”—Joh. 8:16, 29.

12. Jesu a va lulamisete ngu nzila muni vagondiswa vakwe ti to ve simama ve txhumayela hambi va txi xaniswa?

¹² Jesu a khumbutisile vagondiswa vakwe ti to ni vona ve themba txivhuno txa Jehovha. Makhambi o tala, ene a va tsanisekisile ti to Jehovha a ndi na va vhuna hambi va txi wonisana ni kuxaniswa. (Mat. 10: 18-20; Luka 12:11, 12) Jesu a tshumete e va kombela ti to ve txhariha. (Mat. 10:16; Luka 10:3) Ene a va gete ti to va si sinzisi m’thu ku e tumela mahungu a manene a mfumo. (Luka 10:10, 11) Ene a tshumete e va gela ti to ve tutuma ngaku ti txi laveka. (Mat. 10:23) Hambi ku Jesu a nga txi hiseka ni kuthemba Jehovha, ene a si veki wutomi wakwe phangoni ku singa ni txilaveko.—Joh. 11:53, 54.

13. Ngu kutxani u nga tsanisekako ti to Jehovha a na kuvhuna?

¹³ Nathu ha txi lava txivhuno txa Jehovha kasiku hi txhumayela ngu kuhiseka mbimo yi hi xaniswako. (Mtu. 12:17) Ngu kutxani u nga tsanisekako ti to Jehovha a na kuvhuna? Nguku ka mkombelo wu wu nga bhalwa ka dibhuku da Johani kapitulu 17, Jesu a kombete Jehovha ti to e khatalela vapostoli ni ku Jehovha a xamute mkombelo wonewo. Dibhuku da Mithumo di kombisa nzila yi Jehovha a nga vhuna ngu yona vapostoli ti singa ni mhaka ni kuxaniswa. Ka mkombelo wonewo, Jesu a tshumete e kombela ti to Jehovha e khatalela avale va ndi no tumela didungula da vapostoli. Eto ti pata ni nawe, Jehovha wa simama e xamula mkombelo wonewo kala nyamsi. Ene a na kuvhuna nga ha a nga vhuna ngu kona vapostoli.—Joh. 17:11, 15, 20.

14. Ngu kutxani hi nga tsanisekako ti to mbimo yotshe hi na sikota kutxhumayela ngu kuhiseka hambi ka timbimo to karata? (Wona ni mfota.)

¹⁴ Aku magwito ma tshuketako ti nga maha ti karata kutxhumayela mahungu a manene ngu kuhiseka, kambe Jesu a hi tsanisekisile ti to hi na mana txotshe txivhuno a txi hi txi lavako. (Luka 21:12-15) Kufana ni Jesu ni vagondiswa vakwe, athu kha hi sinzisi vathu ku ve engisa ati hi va gelako nem kha hi kanetisani navo. Hambi ka makhalo ya mthumo wathu wu tsimbiswako, vanathu va sikota kutxhumayela mahungu a manene nguku va themba Jehovha i singa mtamu wawe. Nga ha Jehovha a nga tsanisa ngu kona malanda akwe a kale, Ene a na hi ninga mtamu ‘kasiku dipswi di txi txhumayelwa ngu kuhetiseka’ ngu kuya ngu kudhunda kwakwe. (2 Tim. 4:17) Ngu toneto, themba Jehovha, ene a na kuvhuna ku u simama u txhumayela ngu kuhiseka.

ENE A TI NI MAWONELO A MANENE NGU VATHU

15. Hi ti zivisa kutxani ti to Jesu a ti ni mawonelo a manene mayelano ni mthumo wo txhumayela?

¹⁵ Jesu a ti ni mawonelo a manene mayelano ni mthumo wo txhumayela. Eto ti mmahile a si godholi, e simama e hiseka ka mthumo wakwe. Ngu txikombiso, msana ka dilembe a di khatile kutxhumayela, Jesu a pfisisile ti to vathu vavangi va ti ti emisete kuengisa mahungu a manene. Ene a zile e fananisa vathu vonevo ni thembwe ayi yi nga ti lava ku elulwa. (Joh. 4:35) Ku di pindile dilembe ene a gete tiya vagondiswa vakwe: “Kuelula ngu ditshuri nga hombe.” (Mat. 9:37, 38) Ngu kutsimbila ka mbimo, ene a tshumete e womba tiya: “Kuelula ngu ditshuri nga hombe . . . kombelani Nyamne wa kuelula ti to e rumela vathumi ka mthumo wakwe wa kuelula.” (Luka 10:2) Jesu kha thuka e leka kukholwa ti to vathu va ndi na tumela mahungu a manene. Ene a ti tsaka ngutu mbimo yi va nga ti tumela.—Luka 10:21.

16. Sidinganiso sa Jesu si va vhunisile kutxani vagondiswa vakwe ti to ve va ni mawonelo a manene mayelano ni mthumo wo txhumayela? (Luka 13:18-21) (Wona ni mfota.)

¹⁶ Jesu a vhuni vagondiswa vakwe ti to va si godholi ngu kuva komba ti to didungula dakwe di ndi nava ni wuyelo yo tsakisa. Ngu txikombiso, a hi woni sidinganiso simbidi a si Jesu a nga va kontarela kasi kuva vhuna ve pfisisa wuyelo ayi va ndi no yi mana ka mthumo wawe. (Lera Luka 13:18-21.) Txo khata, Jesu a thumisile mbewu ya yidotho ya sinapi kasi kugondisa ti to didungula da Mfumo di ndi na kula ngu nzila yo xamatisa, ni ku kha txi ngaho atxi txi ndi no tsivela kukula koneko. Se ka txidinganiso tximwani, ene a thumisile mtshumbelo kasi kukombisa nzila yi didungula da Mfumo di ndi no hangalaka ngu yona, ni nzila yi di ndi no vanga kutxitxa ka vale va di amukelako hambi i di ti to ti ndi na teka mbimo ku ve di pfisisa. Ngu nzila yoneyo, Jesu a kombile vagondiswa vakwe to didungula adi va nga ti di txhumayela di ndi na vhuna vathu vavangi.

17. Ngu kutxani hi di fanete kusimama hi va ni mawonelo a manene mayelano ni mthumo wo txhumayela?

¹⁷ Athu ha susumeteleka kusimama hi txhumayela mbimo yi hi alakanyako ngu nzila yi mthumo wo txhumayela wu vhunako vathu va vangi hamafuni kotshe. Dilembe ni dilembe, timiliyoni ta vathu ta xalela Txialakanyiso txa lifo la Jesu ni kugonda ni nathu Bhiblia. Magidhigidhi ya vathu ma bhabhatiswa ni kutipata ni nathu ka mthumo wo txhumayela. Athu kha hi tizivi ti to vathu va ngahi va ku ngadi va txi na gonda Bhiblia. A ti hi ti zivako ngu ti to Jehovha wa sengeleta txitshungu txa hombe, atxi txi no huluka ka xanisa ya hombe. (Mtu. 7:9, 14) Jehovha nyamne wa ku elula wa tiziva ti to vathu vavangi va ngadi va txi na tumela mahungu a manene, ngu toneto hi ni sivangelo sa singi so hi simama hi txhumayela.

18. Ngu tihi a ti hi lavako to vathu ve tsaniseka ka tona?

¹⁸ Vagondiswa va Jesu va ziwa kota vathu va va nga txi hiseka ka mthumo wo txhumayela. Ngu txikombiso, vapostoli va txhumayete ngu txibindi ni ngu kuhiseka aha koza vathu “ve tumbula ti to va tsimbite ni Jesu.” (Mith. 4:13) Nyamsi, mbimo yi hi txhumayelako hi lava ti to vathu ve tsaniseka ti to hi etetela kuhiseka ka Jesu.