Thumisa Bhiblia kufana ni txibuko

Mgondiswa Jakobe a fananisile Bhiblia ni txibuko atxi txi hi vhunako kuwona ati hi ku ngu tona. (Jak. 1:22-25) Hi nga yi thumisisa kutxani Bhiblia kufana ni txibuko ngu nzila ya yinene?

Lera ngu mthuthalo. Phela hi txo ti buka ngu txikuluveta, ti nga maha hambi hi txo va ni marongo hi si ma woni. Ngu ha kufanako, ngako hi txo lera Bhiblia ngu txikuluveta ti nga hi karatela kutumbula mkhuwo wo kari wo biha awu hi nga vako hi di ni nawo, ti lavako hi wu tshukwatisa. Ngu toneto, ti lava hi lera Bhiblia ngu mthuthalo.

Veka mapimo kwako i singa ka vamwani. Mbimo yimwani ngaku hi txi ti buka hi di vavangi hi nga leka kuwona khohe yathu, hi wonetela vamwani. Se ku maheka to fana ngako hi txi lera Bhiblia hi txi pimisa ngu ti vamwani va fanelako ku ti tshukwatisa. Eto kha ti na mbi hi vhuna txilo.

Vana wo dinganisela. Ngako hi txo ti buka, se hi zumbela kuwonetela sibawa asi hi ku naso, eto ti nga hi godholisa. Se mbimo yi hi lerako Bhiblia, hi fanete kuva vo dinganisela. Kha ha fanela kumaha to maha ngu nzila yo hetiseka kupinda ti Jehovha a ti emelako kwathu.—Jak. 3:17.