“Sawulani nyamsi . . . awule mi no mthumela”

1. Ngu tihi ati hi fanelako ku ti maha kasiku hi tsaka, ni ku ngu kutxani? (Isaya 48:17, 18)

TATE wathu wa nzumani wa hi dhunda ngutu ni ku a lava ti to hi tidila ngu wutomi konku ni mbimo ayi yi tako. (Ekl. 3:12, 13) Ene a hi vangile hi di ni wusikoti wo maha timhaka to xamatisa, hambiketo, kha hi ninga wusikoti wonewo kasi ku hi tifuma mwendo kusunga ati i ku tatinene ni to biha. (Ekl. 8:9; Jer. 10:23) Ene wa tiziva ti to kasiku hi tsaka ti lava hi m’thumela ni kuhanya ngu milayo yakwe.—Lera Isaya 48:17, 18.

2. Ngu yahi makuhu aya Sathani a lavako to hi kholwa ka ona, ni ku Jehovha a xamulisile kutxani makuhu oneyo?

² Sathani a lava ku hi kholwa ti to hi nga tsaka hambi hi si kongomiswi ngu Jehovha, ni ti to vathu va nga humelela va txi ti fuma vapune. (Gen. 3:4, 5) Jehovha a xamute makuhu oneyo ngu kutumelela ti to si ndaka milayo si ti fuma si pune kudingana mbimo yo kari. Kambe ta hehuka kutumbula ti to vathu va tandekile ku ti fuma vapune. Ngu didhawa dimwani, Bhiblia yi ni sikombiso so tala sa vavasikati ni vavamna ava va nga mana litsako ngu kuthumela Jehovha. Mmweyo wawe i Jesu Kristu. Ka gondo yiya, hi na wona ti to ngu kutxani Jesu a di sawute kuthumela Jehovha, hi na tshumela hi wona ti to ngu kutxani hi di fanete kukhozela Tate wathu wa nzumani. Ngu magwito, hi na xolisisa sivangelo simwani asi si hi mahako hi sawula kuthumela Jehovha.

NGU KUTXANI JESU A DI SAWUTE KUTHUMELA JEHOVHA?

3. Nji txani atxi Sathani a nga ninga Jesu, ni ku Jesu a sawute kumaha txani?

³ Mbimo yi Jesu a nga ti hamafuni ti lavile e maha txisungo txa ti to a ndi na thumela mani. Msana kova Jesu a di bhabhatisilwe, Sathani a gete Jesu ti to a ndi na mninga yotshe mifumo ya mafu ngaku a txo khizama e mkhozela kumweko dwe. Kambe Jesu a xamute a txi: “Suka Sathani! Nguko ti bhatwe to: ‘U fanete kukhozela Jehovha Txizimu txako, ngene basi u fanelako ku m’mahela mthumo wo sawuleka.’” (Mat. 4:8-10) Ngu kutxani Jesu a di mahile txisungo txiya? A hi wone simwani sa sivangelo soneso.

4-5. Ngu sihi simwani sivangelo asi si nga maha ti to Jesu e sawula kuthumela Jehovha?

⁴ Txivangelo txa hombe atxi txi nga maha ti to Jesu e sawula kuthumela Jehovha lirando la hombe li a nga ti nalo ngu Tate wakwe. (Joh. 14:31) I singeto dwe, Jesu a sawute kuthumela Jehovha nguku i ku tatinene kumaha toneto. (Joh. 8:28, 29; Mtu. 4:11) Ene wa tiziva ti to Jehovha txisima txa wutomi, a ni wuha ni ku wa thembeka. (Mas. 33:4; 36:9; Jak. 1:17) Mbimo yotshe Jehovha a wombawombile ditshuri ni Jesu ni ku a mningile sotshe si a nga ti si lava. (Joh. 1:14) Kuhambana ni Jehovha, Sathani a vangile lifo. Ene i m’hembi, a ni makolo ni ku kha khatali ngu vamwani. (Joh. 8:44) Jesu wa m’ziva kwati Jehovha ni ku wa m’ziva kwati Sathani. Se, ene a si lavi kufana ni Sathani e wukela Jehovha.—Vaf. 2:5-8.

⁵ Txivangelo tximwani atxi txi nga maha ti to Jesu e sawula kuthumela Jehovha ngu wona wuyelo ya yinene yo maha toneto. (Vaheb. 12:2) Ene a txi tiziva ti to ngaku a txi simama a di thembekile a ndi na basisa ditina da Tate wakwe, ni ku a ndi na maha ti to kotshe kuxaniseka aku ku nga vangwa ngu Sathani ku fuviswa.

NGU KUTXANI HI TXI KHOZELA JEHOVHA

6-7. Ngu kutxani vathu va si mthumeli Jehovha, ni ku ngu kutxani athu hi txi sawula kuthumela Jehovha?

⁶ Vathu vavangi nyamsi kha va thumeli Jehovha nguko kha va tizivi tifanelo takwe tatinene ni totshe timhaka tatinene ati a nga va mahela. Vona va fana ni vathu ava Paulo a nga ya va txhumayela khe Atena, ava ni vona va nga si txi zivi Txizimu.—Mith. 17:19, 20, 30, 34.

⁷ Paulo a txhamusete vaengiseli vakwe ti to Txizimu txa ditshuri txa “ninga wutomi, moya awu va wu hefemulako ni sotshe silo.” A engetile atxi khene: “Ngu kona ha ka txona hi ni wutomi, ha tsimbila-tsimbila, hiho.” Kota Mvangi, Txizimu “ngu kuthumisa m’thu mmweyo, txi mahile vathu va totshe tixaka,” ngu toneto ta fanela ku hi txi khozela.—Mith. 17:25, 26, 28.

8. Ngu tihi ti Jehovha a no mbi thuka e timaha? Txhamusela.

⁸ Kota Mvangi ni Mkoma wa mafu otshe, Jehovha a ndi na sinzisa vathu ku ve mthumela. Kambe ene kha na mbi thuka a di mahile toneto. Hahanze keto, wa hi ninga sikombiso sa ti to waho ni ku wa hi dhunda hotshethu. Jehovha a navela ti to votshe vathu ve va vangana vakwe ngu ha ku si gumiko. (1 Tim. 2:3, 4) Ngu toneto, wa hi trenara kasiku hi gondisa vamwani mayelano ni txikongomelo txakwe ni kuva gela timhaka tatinene ati a no mahela votshe vathu. (Mat. 10:11-13; 28:19, 20) A tshumete e wumba mabanza aya hi mkozelako ka ona ni ku ha amukela txivhuno atxi txi tako ngu ka madhota.—Mith. 20:28.

9. Nji txani txi kombisako ti to Jehovha wa va dhunda votshe vathu?

⁹ Jehovha wa kombisa lirando lakwe ngu kumahela tatinene vathu votshe hambi vale va si kholwiko kwakwe. Pimisa ngu tiya: Se kupinda malembe o tala vathu va txi sawula vapune ati i ku tatinene ni to biha hahanze ko engisa Txizimu. Ti singa ni mhaka ni toneto, Jehovha ngu wunene wa va ninga sotshe asi va si lavako kasiku ve tidila ngu wutomi. (Mat. 5:44, 45; Mith. 14:16, 17) Ene a va ningile wusikoti wo ve maha vangana, ve wumba timwaya ni ku tidila ngu mthumo wa manza awe. (Mas. 127:3; Ekl. 2:24) Sotshe sikombiso siya si tiveka hakubasani ti to Tate wathu wa lirando wa va dhunda vathu. (Eks. 34:6) Konku a hi xolisiseni simwani sa sivangelo asi si hi mahako hi sawula kuthumela Jehovha ni ti to ene a hi xamulisa kutxani.

NGU KUTXANI HI TXI SAWULA KUTHUMELA JEHOVHA?

10. a) Ngu txihi txivangelo txa hombe atxi txi hi mahako hi thumela Jehovha? (Matewu 22:37) b) Hi wuyeliswa kutxani ngu pasiyensiya ya Jehovha? (Masalmo 103:13, 14)

¹⁰ Kufana ni Jesu, athu hi thumela Jehovha nguko ha mranda. (Lera Matewu 22:37.) Athu ha tshuketa kakwe mbimo yi hi gondako ngu tifanelo takwe. Ngu txikombiso, Jehovha a tiemisete ku hi divalela. Mbimo yi Vaisrayeli va nga mbi m’engisa, ene a va kombete tiya: “Ngu konaho, hundulukani mmwani ni mmwani nzilani kwakwe ko biha.” (Jer. 18:11) Jehovha wa tiziva ti to kha ha hetiseka ni ti to hi lithulu. (Lera Masalmo 103:13, 14.) Mbimo yi u alakanyisisako ngu pasiyensiya ya Jehovha ni timwani tifanelo takwe tatinene, ina eto kha ti ku kuzeti ku u mthumela ngu ha ku si gumiko?

11. Ngu sihi sivangelo simwani asi si hi mahako hi thumela Tate wathu wa nzumani?

¹¹ Tximwani txi hi mahako hi sawula kuthumela Jehovha ngu ku hi ti zivako to eto nda tinene kwathu. (Mat. 4:10) I singeto dwe, athu ha tiziva ti to ngaku hi txo simama hi thembeka ka Jehovha hi na mana wuyelo ya yinene. Ngaku hi txi simama hi di thembekile hi basisa ditina da Jehovha, hi tsakisa mbilu yakwe ni ku hi kombisa ti to Sathani m’hembi. Phela hi txi thumela Jehovha konku hi nava ni lungelo yo m’thumela ngu ha ku si gumiko!—Joh. 17:3.

12-13. Hi gonda txani ka txiperiyensiya txa Jane ni Pam?

¹² Mbimo yi hi ku ngadi majovhem, hi nga khata ku kulisa lirando lathu ngu Jehovha ni ku lirando lonelo li nga ya li tsana mbimo yi hi kulako. Wona txikombiso txa vanathu vambidi va txisikati i ku Jane ni Pam.a Mbimo yi va nga khata kugonda Bhiblia, Jane a ti ni 11 wa malembe kasi Pam a ti ni 10. Hambiku vaveleki vawe va nga si ti tsakeli kugonda Bhiblia, vona va tumete ti to vanana vawe ve gonda ni Tifakazi ta Jehovha, na va txiya txhetxheni. Jane a womba tiya: “Ati ni nga tigonda mu ka Bhiblia ni Tifakazi ta Jehovha ti ni vhuni kuxula mkuzetelo wa vangana vangu wo dhaha timbangi ni kumaha wugango.”

¹³ Ku di pindile malembe o kari, mahorana yawa ma ve vahuweleli. Msana ka malembenyana, vona va bhabhatisilwe ni ku va khatile kuthuma kota vanyaphandule va txi khatalela vaveleki vawe ava va nga kula ngu tanga. Jane atxi txhamusela totshe ati a nga tipfisa tona ngu ti Jehovha a nga m’mahela, ene a womba tiya: “Ni gondile ti to Jehovha wa khatalela vangana vakwe ava va thembekako nga ha dibhuku da 2 Timoti 2:19 di wombako ngu kona, di txi: ‘Jehovha wa va ziva ava va mlumbako.’” Ngu ditshuri, kha hi kanakani ti to Jehovha wa va khatalela avale va mrandako ni ku m’thumela!

14. Hi nga di lwelisa kutxani ditina da Jehovha? (Wona ni mifota.)

¹⁴ Athu hi lava kuvhuna vathu ve ziva ti to totshe ti va tipfako to biha mayelano ni Txizimu hi nga ditshuri. Pimisa ngu txikombiso txiya: Awe u ni mngana wamnene awu a ku ni wuha, ni ku wa divalela. Se ditshiku dimwani, u pfa m’thu a txi womba-womba kubiha ngu ngene, a txi womba ti to ene a ni tshofu ni ku kha thembeki. Se u ndi na maha txani? Ditshuri ti to u ndi na lwela mngana wako. Ngu ha kufanako, mbimo yi Sathani ni vaseketeli vakwe va zamako kunyetisa ditina da Jehovha, athu ha xamula ngu kuwomba ditshuri mayelano ni Jehovha ni kuseketela ditina Dakwe ngu txibindi. (Mas. 34:1; Isaya 43:10) Athu ha kombisa ti to hi lava kuthumela Jehovha wutomi wathu wotshe, ngu mapswi ni ngu simaho sathu.

15. Paulo a wuyelisilwe kutxani ngu kutxitxa ku a nga kumaha ka wutomi wakwe? (Vafilipiya 3:7, 8)

¹⁵ Athu hi tiemisete kumaha kutxitxa ka wutomi wathu kasiku hi tsakisa Jehovha mwendo kumaha to tala ka mthumo wakwe. Ngu txikombiso, mpostoli Paulo a ti ni txikhunja txa hombe ka wukhongeli wa Txijudha, kambe a lekile wukhongeli wonewo kasiku e va mgondiswa wa Kristu ni kuthumela Jehovha. (Vag. 1:14) Kota wuyelo, ene a mani makatekwa ka wutomi wakwe ni ku a ve ni mkhanju wo fuma kumweko ni Jesu nzumani. Ene kha tisola ngu txisungo atxi a nga txi maha txo thumela Jehovha, se nathu kha hi na mbi tisola.—Lera Vafilipiya 3:7, 8.

16. Hi gonda txani ka txiperiyensiya txa Julia? (Wona ni mifota.)

¹⁶ Ngaku hi txi teka kuthumela Jehovha i di ka lisima ngutu ka wutomi wathu, ene a na hi hakela. Wona txikombiso txa mwanathu wa txisikati awu a dhanwako ku i Julia. Mbimo yi Julia i nga ti ngadi dijovhem asi se gonda ditshuri, a ti embelela txhetxheni kwawe, ni ku a ti embelela tatinene aha a nga khata kumana trenamentu kasiku e va m’embeleli wa hombe. Ti sa swela, Julia a txi ziwa ngutu ni ku a txi embelela ka makhalo aya ma nga ti ni nduma. Mbimo yi a nga ti ka txikolwa txo gonda kuembelela, mngana wakwe a khatile kubhula nayo ngu Txizimu ni ku mtxhamusela ti to txona txi ni ditina. Ku sa pinda mbimo yo lapha, Julia a khatile kugonda Bhiblia kumbidi ngu divhiki. Kukhukhela koneho, ene a vekile mapimo ko thumela Jehovha hahanze ko heta mbimo a txi gonda kuembelela. Kambe eto kha ta m’hehukela. Ene a womba tiya: “Vathu vo tala va khatile ku ni gela ti to i ti wubhemba kuleka kuembelela ngu mhaka yo lava kuthumela Jehovha. Kambe ani ni txi lava kuthumela Jehovha wutomi wangu wotshe.” Se konku a ti pfisa kutxani ngu txisungo txi a nga txi maha ka 30 wa malembe ya ma nga pinda? Ene a womba tiya: “Ni ni kurula ka mbilu ni ku na themba ti to Jehovha a na hetisisa kotshe kuxuva ka mbilu yangu mbimo yi yi tako.”—Mas. 145:16.

SIMAMA U THUMELA JEHOVHA

17. Kuziva ti to hi hanya titshokani ka magwito a mafu yawa ti fanete ku va gwesisa kutxani ava va nga sawula kuthumela Jehovha, ni va va si se kumaha txisungo txo m’thumela?

¹⁷ Hi hanya titshokani ka magwito a mafu yawa. Mpostoli Paulo a bhate tiya: “Ku ngadi sate mbimo ya yidotho, ‘ya yidotho ngutu. Se awule a tako, a na bwaka, kha na mbi swela.’” (Vaheb. 10:37) Ti hi gwesisa kutxani toneto? Hi nga womba ti to mbimo ayi yi nga sala kasiku vathu ve sawula kuthumela Jehovha yidotho ngutu. (1 Vak. 7:29) Aku hi nga sawula kuthumela Jehovha ha tiziva ti to ti na lava hi timisela sikarato, kambe i nava “ta mbimo ya yidotho.”

18. Ngu tihi ti Jehovha ni Jesu va lavako hi ti maha?

¹⁸ Jesu a kuzetile vathu ti to ve va vagondiswa vakwe ni kusimama ve mlondetela. (Mat. 16:24) I di ti to hi ni malembe o tala hi txi thumela Jehovha hi fanete kusimama hi maha toneto hi si godholi, hambiku ti lavako mizamo ya hombe. Ditshuri ti to eto kha ti hehuki, kambe hi ngava ni makatekwa amangi ni kuva ni litsako nga ku hi txi simama hi thumela Jehovha!—Mas. 35:27.

19. Hi gonda txani ka txiperiyensiya txa Gene?

¹⁹ Vamwani va pimisa ti to ngaku va txi thumela Jehovha va na mbi mana litsako ka wutomi wawe. I di ti to u dijovhem, ina u tipfa u txi luza txo kari ngu ku u thumelako Jehovha? Dijovhem dimwani di dhanwako ku i Gene di womba tiya: “Ni txi pimisa ti to na mbi thuka ni va ni litsako ngu kuva Fakazi ya Jehovha. Ni ti wona ava ni nga kula navo va txi tidila ngu kusakana, va txi namorara, va txitha gemi yo kombisa mazunga kuve ani ni txi heta mbimo yo tala ni di mitshanganoni ni ka mthumo wo txhumayela.” Mapimiselo oneyo ma m’gwesisile kutxani Gene? Ene a womba tiya: “Ni khatile kumaha timhaka to biha a ti majovhem mamwani ma nga txi ti maha, kambe eto kha ta ni tisela litsako la ditshuri. Ni khatile kupimisa ngu wuyelo ayi hi yi manako ngu kuengisa ati Bhiblia yi ti wombako ni ku ni mahile txisungo txo thumela Jehovha ngu yotshe mbilu yangu. Kukhukhela koneho, ni woni to Jehovha a xamute yotshe mikombelo yangu.”

20. Ngu tihi ati hotshethu hi fanelako kutiemisela ku ti maha?

²⁰ M’bhali wa Masalmo a embelete ka Jehovha atxi khene: “A katekile wule awe u msawulako u txi m’dhana kasiku e hanyela Dithepeleni kwako, hafuhi ni nawe.” (Mas. 65:4) Hotshethu he tiemiseleni kusimama hi thumela Jehovha kufana ni Joxuwa awu a nga womba tiya: ‘Ani ni mwaya wangu, hi na khozela [Jehovha, NM].’—Jox. 24:15.