GONDO 15
NDANDO 30 Tate wangu, Txizimu txangu ni mngana wangu
Ndinene “kuzumba hafuhi ni Txizimu!”
“Aniko kwangu, ndinene kuzumba hafuhi ni Txizimu.”—MAS. 73:28.
TXIKONGOMELO TXA GONDO
Ngu wona nzila yi hi nga tshuketako ngu yona hafuhi ni Jehovha ni wuyelo yi hi nga yi manako ngu kumaha toneto.
1-2. a) Ngu tihi ti u nga ti mahako kasiku u va ni wungana wa hombe ni m’thu? b) Hi na bhula ngu txani ka gondo yiya?
INA u ni mngana wa hombe? Nji txani txi u nga txi maha kasiku wungana wanu wu kula? Ti nga maha mi di hetile mbimo yo tala mi di kumweko, u gonda ka txiperiensiya txakwe txa wutomi ni kutumbula ati a ti dhundako ni ti asi ti dhundiko. Ti nga maha u di tumbute tifanelo takwe ta tinene ati u lavako ku ti etetela. Se eto ti kumahile u m’dhunda ngutu mngana wako.
2 Kumaha wungana wa hombe ni m’thu ti lava mbimo ni mizamo yo tala. Nguha kufanako, ti lava mbimo yo lapha kasiku hi va ni wungana wa hombe ni Jehovha. Ka gondo yiya, hi na wona nzila yi hi nga tshuketako ngu yona hafuhi ka Txizimu ni wuyelo yi hi yi manako ngu kumaha toneto. Kukhata, he woneni ti to ngu kutxani i di ta tinene kutshuketa hafuhi ka Mngana wathu Jehovha.
3. Ngu kutxani i di ta lisima kualakanyisisa ngu wuyelo ayi hi nga yi manako ngu kutshuketa hafuhi ka Jehovha? Ningela txikombiso.
3 Kha hi kanakani ti to kutshuketa hafuhi ka Jehovha ndinene. Kambe kualakanyisisa ngu nzila yi i ku ta tinene ngu yona, ti nga hi kuzeta ku hi simama hi tshuketa hafuhi kwakwe. (Mas. 63:6-8) Ngu txikombiso, athu ha tiziva ti to kumaha dhiyeta, kutxhukumisa mmidi, kuotela maora o dingana ni kusela ngutu mati, ndinene kwathu. Hambiketo, vathu vavangi kha va ti teki i di ta lisima timhaka tiya ni ku kha va ningi lisima dihanyo dawe. Kambe ngako hi txi pimisa ngu nzila yi i ku ta tinene ngu yona kuva ni dihanyo da dinene, ti na hi kuzeta kusimama hi di khatalela. Nguha kufanako, athu ha tiziva ti to kutshuketa hafuhi ni Jehovha nda tinene, kambe kualakanyisisa ngu wuyelo yi hi no yi mana ngu kumaha toneto, ti na hi kuzeta kusimama hi tshuketa hafuhi kwakwe.—Mas. 119:27-30.
4. Ngu tihi ti m’bhali wa Masalmo 73:28 a nga ti womba?
4 Lera Masalmo 73:28. Mbhali wa Masalmo 73 i ti Mlevhi wu a nga ti sawutwe kuthuma kota muembeleli ka dithempele da Jehovha. Ene se ati thumela Jehovha ngu kuthembeka kudingana malembe o tala. Kambe a woni txilaveko txo khumbula ni kukhumbutisa vamwani ti to “kutshuketa hafuhi ka Jehovha” ndinene kwawe. Ngu yihi wuyelo ayi hi nga yi manako ngu kumaha toneto?
“KUTSHUKETA HAFUHI KA TXIZIMU” TI TISA LITSAKO
5. a) Ngu kutxani kutshuketa hafuhi ka Jehovha ti txi hi ninga litsako? b) Ngu kuya ngu Mav. 2:6-16, wutxhari wu Jehovha a ku ningako wu nga kuvhunisa kutxani?
5 Hi txi tshuketa ka Jehovha ha mana litsako. (Mas. 65:4) Ku ni sivangelo sasingi si hi mahako hi womba toneto. Txo khata, ha vhuneka ngako hi txi thumisa wutxhari wu hi wu manako mu ka Dipswi da Txizimu i ku Bhiblia. Wutxhari wonewo wa hi vhikela ka mikuzetelo yo biha ni ko maha sionho sa hombe. (Lera Mavingu 2:6-16.) Ngu toneto, Bhiblia yi womba tiya: “A katekile m’thu wule a manako wutxhari, ni m’thu wule a manako wuzivi.”—Mav. 3:13.
6. Nji txani txi nga maha to m’bhali wa Masalmo e luzekelwa ngu litsako?
6 Ditshuri ti to hambi vangana va Jehovha va wonisana ni timbimo to karata. M’bhali wa Masalmo 73 a luzeketwe ngu litsako mbimo yi a nga khata kupimisa ngu nzila yo biha. Ene a henyile mbimo yi a nga wona vathu va va nga si thumeli Txizimu va txi humelela. Ene atxi pimisa ti to vathu vonevo vo biha va si pwatekelwi ngu txilo ni ku va si xaniseki. (Mas. 73:3-7, 12) Ngu mhaka ya wubihi wu a nga txi wu wona, ene a txi pimisa ti to kha ti vhuni txilo kuthumela Jehovha. Ngu kupandiseka ene a wombile tiya: “Kha ditshuri, kha ta vhuna txilo kubasisa mbilu yangu ni ku va ni manza o basa ka totshe to biha!”—Mas. 73:13.
7. Ngaku hi txi tipfa hi di pandisekile, hi nga maha txani kasiku hi wuseta litsako lathu? (Wona wa kapa.)
7 Hambiku m’bhali wa Masalmo a nga ti pandisekile, ene a mahile txo kari kasiku e txitxa mapimiselo akwe. Ene a “wulete nyumbani ko sawuleka ka Txizimu,” aha Jehovha a nga lulamisa mapimiselo akwe. (Mas. 73:17-19) Jehovha, mngana wathu wa hombe, wa hi wona ngaku hi di pandisekile. Ngaku hi txi maha mkombelo hi kombela mkongomiso wakwe, hi tumela txivhuno txi a hi ningako ngu kuthumisa Dipswi dakwe ni dibanza, ha mana mtamo wo wonisana ni sikarato sathu. Hambi hi txo tipfa hi txi txikwa ngu sikarato, Jehovha a na hi thavelela ni ku hi maha hi thutha.—Mas. 94:19.a
Mlevhi awu a nga bhala Masalmo 73 adi emile “nyumbani ko sawuleka ka Txizimu” (Wona paragrafu 7)
“KUTSHUKETA HAFUHI KA TXIZIMU” KA HI NINGA THEMBA
8. Ngu kutxani i di ta lisima kutshuketa hafuhi ka Txizimu?
8 Ku ni wuyelo yimwani yi hi nga yi manako ngu kutshuketa hafuhi ka Txizimu. Yo khata, hi nga va ni wutomi wo tsakisa ngako hi txo va ni wuxaka wo tsana ni Jehovha. Ya wumbidi, hi nga va ni themba ya mbimo yi yi tako. (Jer. 29:11) Ahi xolisiseni kwati mhaka yiya.
9. Ngu kutxani kutshuketa hafuhi ka Txizimu ti txi hi ninga wutomi wo tsakisa?
9 Ngako Jehovha i di mngana wathu wa hombe, athu hi na va ni wutomi wo tsakisa. Vathu vo tala va womba ti to Txizimu kha txi ngaho. Vona kha va tizivi ti to ngu kutxani vathu va diho hamafuni ni ku va kholwa ti to ka mbimo yi yi tako vathu va mbi ta vaho. Kambe mbimo yi hi gondako Bhiblia, ha tsaniseka ka ti to Txizimu “txiho ni ti to txa ninga txhatxhazelo ka vale va txi lavako.” (Vaheb. 11:6) Ni nyamsi ha tsaka, nguko hi maha ti hi nga avelwa tona, i ku kuthumela Jehovha Tate wathu wa nzumani.—Dhewut. 10:12, 13.
10. Ngu kuya ngu Mas. 37:29, ngu tihi ti Jehovha a thembisako kumahela avale va mthembako?
10 Vathu vavangi kha va nga ni themba ya ditshuri ya mbimo yi yi tako. Txawe ngu thuma basi, ve txhadha, veva ni vanana ni kusengeletela mali kasiku va ta yi thumisa mbimo yi va no ema kuthuma. Vona kha va tizivi ati Txizimu txi no ta ti maha ka mbimo yi yi tako. Kambe athu ha tiziva ti to Jehovha wa khatalela malanda akwe. (Mas. 25:3-5; 1 Tim. 6:17) Athu ha mthemba Jehovha, Txizimu txathu ni Mngana wathu. Themba yathu yi pata lungelo yo ta mkhozela nguha ku si gumiko ka Paradhesi.—Lera Masalmo 37:29.
11. Kutshuketa ka Txizimu ti hi gwesisa kutxani ni ku txona txi tipfisa kutxani?
11 Kutshuketa hafuhi ni Txizimu ka hi wuyelisa ngu tinzila timwani. Ngu txikombiso, Jehovha wa thembisa kudivalela sionho sathu ngaku hi txi tisola. (Isaya 1:18) Kota wuyelo, ha pumba kutipfa mnando ngu mhaka sionho si hi nga maha kale. (Mas. 32:1-5) Ni ku ha tsaka ngutu ngako hi txi maha ti ti tsakisako Jehovha. (Mav. 23:15) Ngu ditshuri, ku ni makatekwa a mangi ya hi nga ma mahako ngako hi txi tshuketa ka Jehovha. Konku, he bhuleni ngu ti hi nga ti mahako kasiku hi tshuketa ka Jehovha.
HI NGA SIMAMISA KUTXANI HI “TSHUKETA HAFUHI KA TXIZIMU”?
12. Ngu tihi ti u nga ti maha kasiku u tshuketa hafuhi ka Jehovha?
12 Msana ko bhabhatiswa kota Tifakazi ta Jehovha, hi mahile tatingi kasiku hi va vangana vakwe. Athu hi gondile ditshuri mayelano ni Jehovha ni Jesu, hi ti sote ka sionho sathu, hi kombisile ti to hi ni likholo ka Jehovha ni ku hi mahile totshe ti to hi hanya ngu milayo yakwe. Kasiku hi tshuketa hafuhi ka Txizimu, ti lava hi simama hi maha timhaka tiya.—Vakl. 2:6.
13. Nji txani txi txi no hi vhuna kusimama hi tshuketa ka Jehovha?
13 Nji txani txi no hi vhuna kusimama hi tshuketa ka Jehovha? 1) Hi fanete kusimama hi lera ni kugonda Bhiblia. Mbimo yi hi gondako Bhiblia, hi lava kumaha to pinda kulera basi. Hi lava ku zama kupfisisa kudhunda ka Jehovha ni ku hanya ngu matshina a milayo ya ma nga seketelwa mu ka Bhiblia. (Vaef. 5:15-17) 2) Hi na tshumela hi tsanisa likholo lathu ngu kualakanyisisa ngu nzila yi Jehovha a hi dhundako ngu yona. 3) Ni ku hi na simama hi nyenya ati Jehovha a ti nyenyako, ni ku hi na vayilela kuva ni wungana ni vathu va va mahako to biha.—Mas. 1:1; 101:3.
14. Ngu kuya ngu 1 Vak. 10:31, ngu tihi ti hi nga ti mahako kasiku hi tsakisa Jehovha? (Wona ni mifota.)
14 Lera 1 Vakorinto 10:31. Nda lisima kumaha ati ti tsakisako Jehovha. Kambe ti lava hi maha to pinda kuya kutxhumayelani ni mitshanganoni. Kumaha ta tinene ka Jehovha ti pata ni ti hi ti mahako ditshiku ni ditshiku. Ngu txikombiso, ngako hi txi thembeka ka silo sotshe ni kuabana ni vamwani asi hi ku naso, hi na tsakisa Jehovha. (2 Vak. 8:21; 9:7) Ene a lava ti to hi kombisa kubonga ngu wutomi wu a nga hi ninga. Athu ha tshuketa ka mningi wa wutomi ngu kusimama hi dinganisela ka ta madyelo, ka so sela ni kukhatalela dihanyo dathu. Mbimo yi Jehovha a hi wonako hi txi zama kumaha ati ti mtsakisako, lirando lakwe ngu ngathu la engeteleka.—Luka 16:10.
Timwani a ti hi nga timahako kasiku hi tsakisa Jehovha ngu tiya: Kutsimbitisa movha ngu nzila ya yinene, kukhatalela dihanyo dathu ngu kutxhukumisa mmidi, kudya sakudya asi si ningako dihanyo da dinene ni kuva ni wuha (Wona paragrafu 14)
15. Jehovha a lava ti to hi va ñolisa kutxani vamwani?
15 Jehovha wa kombisa wunene ka va va mahako ta tinene ni ka vabihi. (Mat. 5:45) Ene a lava ti to hi kombisa wunene ka votshe vathu. Ngu txikombiso, athu ‘kha hi nga ni fanelo yo womba kubiha ngu m’thu hambi kuwusa mazunga, kambe hi kombisa txithavo ka votshe.’ (Tit. 3:2) Se ngako vathu va si kholwi ka Jehovha, kha hi lavi kuva wonela hahatshi. (2 Tim. 2:23-25) Athu ha tshuketa ka Jehovha nguku mbimo yotshe hi ñola vamwani ngu nzila ya yinene.
ATHU “HI NGA TSHUKETA HAFUHI KA TXIZIMU” HAMBI HI DI MAHILE TXIONHO
16. M’bhali wa Masalmo 73 a ti pfisile kutxani kudipindile mbimo yo kari a txi thumela Jehovha?
16 Mbimo yimwani hi nga tipfa hi si fanelwi ngu lirando la Jehovha. Kambe khumbula txikombiso txa m’bhali wa Masalmo 73. Ene a wombile tiya: “Mikondo yangu yi ti lava ku ni timeta, kudotho ni ti lava ku rithimuka.” (Mas. 73:2) Ene apune a wombile ti to a vite “txipumbu” ni ku “asi zivi txilo” “atxi nga o va txihari” masoni ka Jehovha. (Mas. 73:21, 22) Ina a tipfite asi fanelwi ngu lirando la Jehovha ngu mhaka sionho sakwe?
17. a) Ngu tihi ti M’bhali wa Masalmo a nga ti maha mbimo yi a nga ti godhote? b) Hi gonda txani ka txiperiensiya txakwe? (Wona ni mifota.)
17 Ti nga maha m’bhali wa Masalmo adi tipfite adi lekilwe ngu Jehovha ta mbimonyana. Hambi i di ti to a tipfite ngu nzila yoneyo, ene a txi tiziva to ati fanete kutshuketa hafuhi ka Txizimu, ngaha a nga womba ngu kona atxi khene: “Hambiketo, ni ni nawe yotshe mbimo; awe wa ni setela ngu diwoko. Ngawe u ni tsimbitisako ngu mlayo wako, u na ni amukela kudhumiswani kwako.” (Mas. 73:23, 24) Nathu hi fanete kuwona Jehovha kota dirigwi dathu ka mbimo ya sikarato mwendo hi di godhote. (Mas. 73:26; 94:18) Hambi i di ti to hi tipfa ngu nzila yoneyo ta mbimonyana, athu hi nga tshumela ka Jehovha hi txi tsaniseka to ene “a tiemisete kudivalela.” (Mas. 86:5) Mbimo yi hi tipfako hi di godhote ngutu, athu hi lava kutshuketa ka Jehovha.—Mas. 103:13, 14.
Ngaku hi txi pfa ti to likholo lathu li lava kutsaniswa, hi fanete kutshuketa ka Jehovha ngu kuheta mbimo yo tala hi txi maha mkombelo ni kuxalela mitshangano (Wona paragrafu 17)
“TSHUKETA KA TXIZIMU” NGUHA KU SI GUMIKO
18. Ngu kutxani hi no mbi ema ku simama hi tshuketa ka Jehovha?
18 Athu hi na simama hi tshuketa ka Jehovha ni ku hi na mbi thuka hi ema kugonda ngu ngene. Bhiblia yi womba ti to tinzila takwe, wutxhari wakwe ni wuzivi wakwe “kha ti nge koteki ku ti pfisisa ngu kupelela.”—Var. 11:33.
19. Ngu tihi ti Masalmo a hi tsanisekisako ka tona?
19 Masalmo 79:13, yi womba tiya: “Athu hi ku vathu vako, hi ku tinvuta ta mtxhambi wako, hi na kudhumisa ngu ha ku si gwitiko, hi na embelela wudhumo wako ka liveleko ni liveleko.” Ngako u txiya u tshuketa hafuhi ka Txizimu, nawe u nga tsaniseka ti to u va ni makatekwa o mbi guma ni ku u na womba ngu kutsaniseka u txi: “Txizimu ngu txona txi ningako mtamo mbilu yangu; ngu txona i kuthomba yangu yo mbi guma.”—Mas. 73:26.
NDANDO 32 Sawula kuema ni Jehovha!
a Ava va ku ni mbimo yo tala va txixaniswa ngu txitrese, kuvilela, mwendo kukarateka ti ngava tatinene kuya lava txivhuno txa dhokodhela. Kasi kuwona to engeteleka wona Muwoneleli wa, No. 1 wa 2023.