Etetela tingilozi to thembeka

1-2. a) Ngu tihi ti hi mahako hi hambana ni tingilozi? b) Ngu tihi ti hi fanako ka tona ni tingilozi?

KOTA vakhozeli va Jehovha, athu hi lumba mwaya wakwe awu wu ku ni lirando ni wu wu mkhozelako. Mwaya wonewo wu pata vanathu va hamafuni kotshe kumweko ni timiliyoni ta tingilozi. (Dhan. 7:9, 10) Hi txi pimisa ngu tingilozi ha wona nzila yi tona ti hambanako ni nathu. Ngu txikombiso, tona ti vangilwe kale vathu va si se kuvangwa. (Jobe 38:4, 7) Ti ni mtamo ngutu ku hi pinda. Tona ti sawulekile ni kululama ngutu ku hi pinda nguko athu hi vathu vo mbi hetiseka.—Luka 9:26.

² Ti singa ni mhaka ni kuhambana koneko athu hi ni timhaka tatingi ati hi fanako ka tona ni tingilozi. Ngu txikombiso, kufana ni tingilozi ha si kota kukombisa tifanelo ta tinene ta Jehovha, hi ni mkhululeko wo ti mahela sisungo, hi ni matina, wuthu wo hambana ni siavelo so hambana ka mthumo wa Jehovha. I si nga eto dwe, hi ni txilaveko txo khozela Jehovha.—1 Pedro 1:12.

3. Ngu tihi ati hi no ti gonda ka tingilozi?

³ Aku hi fanako ka timhaka tatingi ni tingilozi, txikombiso txa txinene txa tona txi nga hi kuzeta ni ku hi gondisa timhaka tatingi ta lisima. Ka gondo yiya, hi na wona nzila hi nga etetelako ngu yona kutiveka hahatshi ka tingilozi to thembeka, nzila yi ti randako ngu yona vathu, kutimisela ka tona ni mizamu yi ti yi mahako kasiku dibanza di zumba di di basile.

TINGILOZI TA TI VEKA HAHATSHI

4. a) Ngu tihi ati tingilozi ti ti mahako ti kombisako to ta tiveka hahatshi? b) Ngu kutxani tingilozi ti txi tiveka ngutu hahatshi? (Masalmo 89:7)

⁴ Tingilozi to thembeka ta ti veka hahatshi. Hambiku tona ti ku ni txiperiyensiya, mtamo ni wutxhari ta engisa mkongomiso wa Jehovha. (Mas. 103:20) Mbimo yi ti hetisisako siyavelo sa tona khati ti guleti hambi kuthumisa mtamo wa tona kasi kutilavela nduma. Tona ta tsaka ngu kumaha kudhunda ka Jehovha hambi matina a tona ma si ziwi.a (Gen. 32:24, 29; 2 Vafu. 19:35) Tingilozi ta lamba ku amukela wudhumo wu wu lumbako Jehovha. Ngu kutxani tingilozi ti txi ti veka ngutu hahatshi? Nguko tona ta mranda Jehovha ni ku mxonipha ngutu.—Lera Masalmo 89:7.

5. Ngilozi yi kombisile ngu nzila muni kutiveka hahatshi mbimo yi yi nga kawuka mpostoli Johani? (Wona ni mfota.)

⁵ Wona txikombiso atxi txi kombisako to tingilozi ta tiveka hahatshi. Ngu dilembe da 96 E.C., ngilozi yo kari yi humelete ka Johani ngu mloro. (Mtu. 1:1) Johani angulisile kutxani? Ene a zamile kukhozela ngilozi. Kambe ngilozi yile yo thembeka ngu txikuluveta yi kawukile Johani yi txi: “Lambi! U nga mahe eto. Ani ni txithumi kufana ni nawe ni vakakwanu va veketako wufakazi wa Jesu. Txizimu ngu txona u fanelako ku txi khozela!” (Mtu. 19:10) Hi nga wona kutiveka hahatshi ka ngilozi yile! Yona yi si lavi kukhozelwa nem kudhumiswa. Ngilozi yi gete Johani ti to a ti fanete kukhozela Jehovha Txizimu. Yi tshumete yi kombisa txixonipho ka Johani. Hambiku ngilozi yi nga ti ni malembe a mangi yi txi khozela Jehovha ni ku yi ti ni mtamo kupinda Johani, yona yi m’woni kota txithumi kuloni. Hambiku ngilozi ti nga lava yi kawuka Johani, yona yi ya maha toneto ngu nzila ya tshofu. Yona yi wombawombile ni Johani ngu nzila ya wunene nguku yi ti pfisisile ti to Johani atxi lava ku yi khozela ngu mhaka muwoniso wule wo xamatisa.

6. Hi nga etetelisa kutxani kutiveka hahatshi ka tingilozi?

⁶ Hi nga ku etetelisa kutxani kutiveka hahatshi ka tingilozi? Ngu kuthuma ngu kuhiseka ka mthumo wa Jehovha kambe hi si tiguleti ngu ti hi ti mahako mwendo ngu wusikoti wu hi ku nawo. (1 Vak. 4:7) Hahanze keto, kha ha fanela ku tiwona hi di va lisima kupinda vamwani nguko i ku kale hi txi thumela Jehovha mwendo ngu ku hi ku ni malungelo o kari ka sengeletano. Ngu ditshuri, hi fanete ku ti wona hi di va vadotho mbimo yi hi amukelako malungelo o tala ka sengeletano. (Luka 9:48) Hi lava kuthumela vamwani kufana ni tingilozi. Kha hi lavi to vamwani ve pimisa ti to hi va lisima kuva pinda.

7. Hi nga kombisa ngu nzila muni kutiveka hahatshi ngako hi txi lava kukawuka mwendo kuningela txialakanyiso ka m’thu?

⁷ Hi nga tshumela hi kombisa kutiveka hahatshi mbimo yi hi ningelako txialakanyiso ka mwanathu mwendo ka mwanana wathu. Mbimo yimwani ti na lava hi ningela txialakanyiso txo kongoma. Kufana ni ngilozi yi nga kawuka Johani ngu nzila ya wunene, nathu hi lava kuningela txialakanyiso txo kongoma kambe i si nga ngu nzila ya tshofu. Ngako hi si tiwoni hi di va lisima kupinda vamwani, hi na ningela sialakanyiso a si si nga seketelwa amu ka Bhiblia ngu nzila ya lirando ni ya txixonipho.—Vakl. 4:6.

TINGILOZI TA VA DHUNDA VATHU

8. a) Ngu kuya ngu Luka 15:10, tingilozi ti li kombisisa kutxani lirando la tona ngu vathu? b) Tingilozi ti hi vhunisa kutxani ka mthumo wo txhumayela? (Wona ni wa kapa.)

⁸ Tingilozi ta khatala ngu vathu. Tona ta va dhunda vathu ni ku ti va teka i di va lisima. Ngu txikombiso, tingilozi ta tsaka mbimo yi muonhi a ti solako mwendo mbimo yi m’thu wo kari a mahako kutxitxa e thumela Jehovha. (Lera Luka 15:10.) Tingilozi ta hiseka ka mthumo wo txhumayela. (Mtu. 14:6) Hambiku ti si txhumayeliko ngu kukongoma, mbimo yimwani ti nga kongomisa muhuweleli ka m’thu wu a lavako kugonda ngu Jehovha. Hambiketo, hi nga mbimo yotshe hi nga wombako to tingilozi ta hi kongomisa ka m’thu wo kari. Jehovha wa thumisa tinzila timwani to fana ni moya wakwe wo sawuleka kasi kuvhuna vathu ni kukongomisa malanda akwe o thembeka. (Mith. 16:6, 7) Ene a tshumela e thumisa tingilozi kasiku ti hi vhuna ka mthumo wo txhumayela. Se mbimo yi txhumayelako, hi nga tsaniseka ti to tingilozi ti ni nathu kasiku hi vhuna.—Wona di kwadru di di ku “Mikombelo yawe yi xamutwe.”b

9. Hi nga ti etetelisa kutxani tingilozi ngu kukombisa lirando ka vathu?

⁹ Hi nga ti etetelisa kutxani tingilozi ko kombisa lirando ka vathu? Ngako hi txipfa ti to mwanathu wo kari a wuyisetwe dibanzani hi nga tsaka, hi m’hoyozela ni ku mtsanisekisa ti to ha m’dhunda. (Luka 15:4-7; 2 Vak. 2:6-8) Hi nga tshumela hi etetela tingilozi ngu kumaha totshe ti hi nga ti kotako ka mthumo wo txhumayela. (Ekl. 11:6) Aku tingilozi ti hi seketelako ka mthumo wo txhumayela, nathu hi nga lava tinzila to seketela vanathu ka mthumo wawe wo txhumayela. Ngu txikombiso, Ina u nga langana kuhuma thembwe ni m’huweleli awu i ku ngadi mphya ka mthumo wo txhumayela? Ina u nga seketela vanathu va va nga kula ngu tanga mwendo ava va lwalako ngu kutsula navo kutxhumayelani?

10. Hi gonda txani ka txiperiyensiya txa Sara?

¹⁰ Se hi nga maha txani ngaku txiemo txhathu txi si hi tumeleli kumaha to engeteleka ka mthumo wa Jehovha? Hi nga lavetela tinzila timwani to thumisana ni tingelozi ka mthumo wo txhumayela. Wona txikombiso txa mwanathu Sara,c wa khe India. Msana ka 20 wa malembe a txi thuma kota nyaphandule, Sara a jiyete ngu malwati. Eto ti mmhahile e karateka ngutu. Kambe ngu kuvhunwa ngu vanathu va dibanzani ni gondo yakwe ya Bhiblia, kudotho-kudotho a khatile kuwuseta litsako lakwe. Ene a lavile tinzila ta tiphya to txhumayela. Mbimo yi a nga ti si tikoti kukhahalatsha kasiku e bhala mapasi, ene ati txhumayela ngu kuthumisa telefone. Ati ligarela marevhizita akwe aya ma nga txi mninga ti numero ta vathu vamwani ava va nga txi tsakela kugonda Bhiblia. Yi vite yihi wuyelo? Mndani ka mitximanyana, Sara a vite ni 70 wa sigondo asi a nga ti si tanda ku si gondela sotshe, ngu toneto a ningete sigondo simwani ka vanathu vamwani dibanzani. Hi nga wona nzila yi tingilozi ti tsakako ngu yona ngu kuthuma ni vanathu vo fana ni Sara, awu a maha totshe ka mthumo wo txhumayela.

TINGILOZI TA TIMISELA

11. Nga sihi siemo tingilozi ti kombisako kutimisela?

¹¹ Tingilozi sikombiso sa sinene ko timisela. Tona ti timisete wubihi kudingana malembe o tala. Tona ti timisete mbimo yi ti nga wona Sathani ni tingilozi timwani ati makhatoni ti nga ti thembekile ti txi wukela Jehovha. (Gen. 3:1; 6:1, 2; Judha 6) Bhiblia yi womba-womba ngu ngilozi yo thembeka ayi yi nga wukelwa ngu didhimoni da mtamo. (Dhan. 10:13) Hahanze keto, kukhukhela Adhamu ni Evha va di wumbilwe, tingilozi ta timisela kuwona vathu vavangi va si khozeli Jehovha. Ti singa ni nhaka ni toneto, tingilozi tiya to thembeka ta simama ti thumela Jehovha ngu litsako ni ngu kuhiseka. Tona ta ti ziva ti to ngu mbimo ya kona, Jehovha a na thavisa wotshe wubihi.

12. Nji txani txi no hi vhuna ku hi timisela?

¹² Hi nga ku etetelisa kutxani kutimisela ka tingilozi? Kufana ni tingilozi, ti nga maha hi txi wona wubihi mwendo kuwonisana ni kuwukelwa. Kambe hi nga tsaniseka ti to ngu mbimo ya kona, Jehovha a na fuvisa wotshe wubihi. Kufana ni tingilozi tile to thembeka, athu ‘hi na mbi rereka kuthuma mwendo kumaha ta tinene.’ (Vag. 6:9) Phela Jehovha a na hi vhuna ti to hi timisela. (1 Vak. 10:13) Hi nga maha mkombelo hi kombela moya wo sawuleka ka Jehovha kasiku hi sikota kutimisela ni kuva ni litsako. (Vag. 5:22; Vakl. 1:11) Se i di ti to u wonisana ni kuxaniswa ko? U nga dhudhumele, themba Jehovha. Mbimo yotshe ene a na kuseketela ni ku kutsanisa.—Vaheb. 13:6.

TINGILOZI TA VHUNA DIBANZA TO DI ZUMBA DI DI BASILE

13. Ngu txihi txiavelo txo sawuleka atxi tingilozi ti ku natxo ka masiku awa o gwita? (Matewu 13:47-49)

¹³ Ka masiku awa o gwitisa Jehovha a ningile tingilozi txiavelo txo sawuleka. (Lera Matewu 13:47-49.) Ngu mhaka mthumo wo txhumayela, vathu vavangi va gonda ditshuri. Se vamwani va sawula kuva Makristu kambe vamwani nem. Tingilozi ti ningilwe txiavelo “txo hambanisa vabihi ka vo lulama,” ti womba ti to tona ti avetwe kuvhuna dibanza ti to di zumba di di basile. Eto kha ti lavi kuwomba to ava va emako kuthumela Jehovha kha va na mbi thuka ve tshumelela kwakwe, mwendo ku dibanzani kha ku na mbi thuka kuva ni sikarato. Kambe hi nga tsaniseka ti to tingilozi ta thuma ngu kuhiseka kasiku di zumba di di basile.

14-15. Hi nga ti etetelisa kutxani tingilozi kasiku dibanza di zumba di di basile ngu didhawa da moya? (Wona ni mifota.)

¹⁴ Hi nga ti etetelisa kutxani tingilozi kasiku dibanza di zumba di di basile? Ngu kumaha totshe ti hi nga ti kotako kasiku dibanza di zumba di di basile ngu didhawa da moya. Hi maha toneto ngu kusawula vangana va va dhundako Jehovha ni kuvayilela totshe ti ti nga henyisako Jehovha. (Mas. 101:3) Hi lava kutshumela hi vhuna vanathu kasiku ve simama va di thembekile ka Jehovha. Ngu txikombiso, hi nga maha txani ngako hi txo ziva to mwanathu wo kari a mahile txionho txa hombe? Ngu lirando, athu hi nga mkuzeta ku eya lava txivhuno txa madhota ngu txikuluveta. Se ngako ene a si mahi toneto, athu hipune hi na ya gela madhota. Athu hi lava ti to votshe ava va lwalako ngu didhawa da moya ve mana txivhuno ngu txikuluveta.—Jak. 5:14, 15.

¹⁵ Txo mbi tsakisa ngu ti to vamwani va va mahako sionho sa hombe ti nga lava ve thaviswa dibanzani. Ka txiemo txonetxo, athu ha ema ‘kusengela’ ni m’thu eneyo.d (1 Vak. 5:9-13) Malulamiselo onewo ma vhuna dibanza ku di zumba di di basile. Hahanze keto, ngako hi txi sawula kwa mbi tipata ni va va nga thaviswa dibanzani, hi na va hi txo kombisa lirando. Txisungo txathu txo tsana ka mhaka yiya, txi nga vhuna muonhi ku e tisola. Ngako hi txi maha toneto, athu hi na tsaka ni ku Jehovha ni tingilozi ni vona va na tsaka.—Luka 15:7.

16. Hi nga ti etetelisa kutxani tingilozi?

¹⁶ I lungelo ya hombe ngutu kwathu kuva Jehovha a di hi tumelete ku hi gonda ngu tingilozi ni kuthuma kumweko nato. Hotshetu a hi eteteleni tifanelo ta tinene ta tingilozi: kutiveka hahatshi ka tona, lirando la tona ngu vathu, kutimisela ka tona ni mizamu yi ti yi mahako kasiku dibanza di zumba di di basile. Ngako hi txi etetela tingilozi to thembeka nathu hi na lumba mwaya wa va khozeli va Jehovha nguha ku si gwitiko.