Jehovha a dhunda ava va ‘velekako mihando ngu kutimisela’

1, 2. a) Ngu kutxani hi txi tsaniswa ngu vanathu ava va txhumayelako makhalo ya vathu va si tsakeliko? (Wona mfota wu wu ku makhatoni.) b) Jesu a wombile txani ngu kutxhumayela “ditikoni kwawe”? (Wona txhamuselo ya hahatshi.)

SERGIO NI OLINDA i mpatwa wa vanyaphandule khe Estados Unidos. Ngu wumbidi wawe va ni malembe ya ma pindako 80. Vona va ni txikarato txa minenge. Kambe se va ni malembe o tala va txi ya txhumayela a ha ku belwako kona mimovha didhorapani kwawe ngu 7h ni mixo. Va ema ka wukhalo wawe ve ningela marevhista ka va va pindako. Vona va zumba va ti tsakile hambiku vathu vavangi va si tsakeliko. Ngu dhina va txheketela va txi tshumela mtini. Va maha toneto mixo wumwani ni wumwani. Kukhukhela kale vona va txhumayela mtxhanu wa masiku ni dimwedo mndani ka divhiki.

² Ku ni vanathu vavangi vo thembeka vo fana ni Sergio ni Olinda ava va txhumayelako ka makhalo a mabanza awe malembe o tala hambiku vathu vo tala va si tsakeliko. Ti nga maha nawe u txi txhumayela makhalo ya ma fanako. Ti di ngeto, ha kundunduzela nguko u yako masoni u txi timisela ni kutxhumayela hambi ti txi karata.a (Wona txhamuselo ya hahatshi.) Txikombiso txako txa thavelela vanathu vavangi hambi va va ku ni malembe va txi txhumayela. Hi nga pfa ati muwoneleli wa txigava a nga womba: “Mbimo yi ni thumako ni vanathu vonevo ka mthumo wa thembwe, ni mana mtamo ngu txikombiso txawe.” “Likholo lawe la ni tsanisa ti to ni kota kutimisela ni kuva ni txibindi ka wuthumeli wangu.” “Txikombiso txawe txa ni gwesa mbilu.”

3. Ngu sihi siwotiso siraru asi hi no si xamula? Ngu kutxani?

³ Ka gondo yiya hi na xamula siwotiso siraru: Ngu kutxani mbimo yimwani hi nga tipfako hi txi guma mtamo? Tiwomba txani kuveleka mihando? Nji txani txi no hi vhuna kusimama hi veleka mihando ngu kutimisela? Kuziva tixamulo ta siwotiso siya ti na hi tsanisa ku ya masoni hi maha mthumo wu Jesu a nga hi ninga wo txhumayela.

NJI TXANI TXI NGA HI HETAKO MTAMO?

4. a) Paulo a tipfisile kutxani ngu kwambi tsakela ka Vajudha? b) Ngu kutxani a di tipfisile toneto?

⁴ U khala kutipfa u di gumile mtamo nguko u nga txhumayela wukhalo wu vathu va si tsakeliko mahungu a Mfumo? U na tipfa kufana ni mpostoli Paulo. A txhumayete konamu ka 30 wa malembe, a vhunile vathu vavangi ti to ve va Makristu. (Mithumo 14:21; 2 Vakorinto 3:2, 3) Kambe ene a ti si khali kuvhuna Vajudha vavangi ti to ve va Makristu. Wungi wawe va lambile kuengisa Paulo, vamwani va mu ruruvisete. (Mithumo 14:19; 17:1, 4, 5, 13) Paulo a tipfisile kutxani ngu ma mahelo onewo o biha? A ti khene: “Na pfa kuxaniseka ka hombe ni kupandiseka ko mbi guma mbiluni kwangu.” (Varoma 9: 1-3) Ngu kutxani a di tipfisile toneto? Nguko ati tidhunda nguto kutxhumayela ni ku ati va randa vathu. Paulo a ti karatete kuvhuna Vajudha ni ku kha tsaka mbimo yi vona va nga lamba wuxinji wa Txizimu.

5. a) Nji txani txi hi susumetelako ku txhumayela? b) Ngu kutxani ti si xamalisi ku tipfa hi txi guma mtamo?

⁵ Kufana ni Paulo, hi txhumayela nguko hi dhundako vathu ni kulava ku va vhuna. (Matewu 22:39; 1 Vakorinto 11:1) Ha tiziva hipuni ti to kuthumela Jehovha ti ninga wutomi wo tsakisa. Se hi lava kuvhuna vamwani ti to ve wona to wutomi wawe ni wona wu nga tsakisa! Ngu toneto hi simama hi va tsanisa ti to ve gonda ditshuri ngu Jehovha ni txikongomelo txakwe ngu vathu. Eto ti kombisa to hi va tisela ningo yo tshura hi va gela tiya: ‘Amukelani’. Se ngako va si tumeli ningo yoneyo, kha ti xamalisi aku hi ‘pandisekako mbiluni kwathu’ kufana ni Paulo. Eto kha ti wombi to hi ni likholo la lidotho, kambe nguko hi dhundako vathu. Ngu toneto hambi hi txi tipfa hi txi guma mtamo, ha simama hi txhumayela. Ha tumela mapswi a Helena, awu a ku ni 25 wa malembe i di nyaphandule, a ti khene: “Ni mani sikarato ka mthumo wo txhumayela. Kambe kha ku na mthumo wumwani ni ngo wu tsakela ku wu maha wo pinda wuwa.”

TI WOMBA TXANI KUVELEKA MIHANDO?

6. Ngu txihi txiwotiso atxi hi no xamula konkuwa?

⁶ Hi nga tsaniseka ngu txani ti to hi nga humelela ka wuthumeli wathu ti singa ni mhaka ni mu hi txhumayelako? Ti to hi xamula txiwotiso txiya txa lisima, a hi bhuleni ngu sidinganiso simbidi sa Jesu, a ha a womba-wombako ngu “kuveleka mihando.” (Matewu 13:23) Txidinganiso txo khata nja mndonga wa m’vhinya.

7. a) Ka txidinganiso txa Jesu mba mani ava va emelako “mdimi,” “mndonga wa m’vhinya” ni “didhavi”? b) Ngu txihi txiwotiso txi hi lavako xamulo ya txona?

⁷ Lera Johani 15:1-5, 8. Ka txidinganiso txiya, Jesu a txhamusete ti to Jehovha i “mdimi,” ene Jesu i “mndonga wa m’vhinya,” vagondiswa vakwe i “madhavi.”b (Wona txhamuselo ya hahatshi.) Msana keto Jesu a gete vapostoli vakwe atxi khene: “Tate wangu a na dhumiswa, ngako mi txi veleka mihando yo tala, mi maha vagondiswa vangu.” Se ti womba txani kuveleka mihando? Ka txidinganiso txiya, Jesu kha womba ti to mihando nji txani, kambe a hi ningile nzila yo tumbula xamulo ya txiwotiso txonetxo.

8. a) Ngu kutxani ka txidinganiso txa Jesu “kuveleka mihando” ti si wombiko kuvhuna m’thu ti to e tumela ditshuri? b) Hi nga tsaniseka ngu txani ka ti Jehovha a hi rumako tona?

⁸ Jesu a wombile tiya ngu Tate wakwe: “Ene wa thavisa kwangu otshe madhavi aya ma si velekiko mihando.” Ngu mawombelo mamwani, hi nga va malanda a Jehovha ngako hi txi veleka mihando basi. (Matewu 13:23; 21:43) Se ka txidinganiso txiya, kuveleka mihando kha tiwombi ku gondela m’thu e tumela ditshuri. (Matewu 28:19) I ti ku o va toneto, Tifakazi to thembeka ati ti nga mbi sikota kuvhuna m’thu ti to e tumela ditshuri ti ndina fana ni madhavi o mbi veleka mihando. Kambe toneto hi nga ditshuri! Ngu kutxani? Nguko hi nge kurumeti vathu ku va vagondiswa. Jehovha i lirando. Hi nga tsaniseka ti to Jehovha a nge hi rumi tomaha ti hi nga ti tandako kumaha. A hi kombela ati hi nga ti kotako.—Dhewuteronome 30:11-14.

9. a) Hi velekisa kutxani mihando? b) Ngu txihi txidinganiso atxi hi no bhula ngu txona?

⁹ Se tiwomba txani kuveleka mihando? Tiwomba timhaka ti hotshethu hi nga tikotako kumaha. Ngu wuhi mthumo awu Jehovha a nga ninga otshe malanda akwe? Ngu txhumayela mahungu a manene a Mfumo wa Txizimu.c (Wona txhamuselo ya hahatshi.) (Matewu 24:14) Txidinganiso txa Jesu txa tiveka ha kubasani. Konkuwa he bhuleni ngu txidinganiso txi txi londiselako.

10. a) Nji txani mbewu ni mafu ka txidinganiso txa Jesu? b) Diphumbu di veleka txani?

¹⁰ Lera Luka 8:5-8, 11-15. Ka txidinganiso txa mphayi, Jesu a txhamusete ti to timbewu i “dipswi da Txizimu,” mwendo mahungu a Mfumo wa Txizimu. Mafu i mbilu ya m’thu. Mbewu yi yi nga wa ka mafu a manene yi ve ni mikoloti, yi kula se yi maha mndonga wa m’vhinya. Se “yi veleka ngu dizana.” I ti ku o va diphumbu da fulaho di ndina veleka txani? Diphumbu dimwani? Ahim-him, di ndina humisa timbewu, ati ngu kutsimbila ka mbimo ti ndino humisa fulaho. Ka txidinganiso txiya, mbewu yimweyo yi velekile dizana da timbewu. Eto ti hi gondisa txani ngu mthumo wa thembwe?

11. a) Txidinganiso txa mphayi txi hi gondisa txani ngu mthumo wathu wo txhumayela? b) Hi velekisa kutxani mbewu?

¹¹ Ti nga maha hi di gondile ditshuri ka dixaka mwendo ka m’thu mmwani, kambe votshe ti txi fana ni loko va txo phaya mbewu ka mafu a manene. Vona va tsakile ngu ku hi nga tumela mahungu onewo. Mbewu yoneyo yi kute a ha koza yi veleka mihando. Ngu ha hi nga ti wona makhatoni, diphumbu kha di veleki diphumbu dimwani, kambe di veleka mbewu, nanathu kha hi veleki vagondiswa, kambe mbewu ya yiphya.d (Wona txhamuselo ya hahatshi.) Hi mahisa kutxani toneto? Mbimo yotshe hi gela vathu ngu ta Mfumo wa Txizimu, eto ti fana ni loko hi txo andisa ni kuxwaya mbewu yi yi nga phaywa mbiluni kwathu. (Luka 6:45; 8:1) Se ngako hi simamako hi txhumayela mahungu a Mfumo wa Txizimu, hi “veleka mihando ngu kutimisela.”

12. a) Hi gonda txani ka sidinganiso sa Jesu sa mndonga wa m’vhinya ni mphayi? b) Gondo yiya yi kumaha u ti pfisa kutxani?

¹² Hi gonda txani ka sidinganiso sa Jesu sa mndonga wa m’vhinya ni mphayi? Hi gonda ti to “kuveleka, mbewu” kha ti yelani ni ku vathu ve tumela mahungu a manene. Ti yelana ni kusimama hi txhumayela. Paulo a wombile to fana mbimo yi a nga txhamusela tiya: “Mmwani ni mmwani a na tshungulwa madingano ni m’thumo wakwe.” (1 Vakorinto 3:8) Jehovha a na hi hakela ngu ku va hi di thumile, i singa wuyelo ya mthumo wathu. Matilda a wu a nga phandula konamu ka 20 wa malembe, a ti khene; “Ti ni ninga litsako kuziva to Jehovha wa hakela mizamo yathu.”

VELEKA MIHANDO NGU KUTIMISELA

13, 14. Ngu kuya ngu Varoma 10:1, 2, nji txani txi nga maha Paulo a si emi kutxhumayela?

¹³ Nji txani txi no hi vhuna ti to hi ‘veleka mihando ngu ku timisela’? A hi xolisiseni txikombiso txa Paulo. Ha tiziva ti to Paulo a ti pfite a di gumile mtamo nguko Vajudha va nga mbi tsakela mahungu a manene a Mfumo. Hambiketo, Paulo kha ema ku va txhumayela. Ene a txhamusete nzila yi a nga tipfa ngu yona mbimo yi a nga khene: “Kuxuva ka mbilu yangu ni mikombelo yi ni va mahelako ka Txizimu vanana va Israyeli, ngu ti to ve hanyiswa. Ngukusa na va fakazela ka ti to va na ni kukhutala ka Txizimu, kambe kukhutala kwawe hi nga ka wuzivi.” (Varoma 10:1, 2) Se ngu kutxani Paulo a di simamile e txhumayela?

¹⁴ Txo khata, Paulo a wombile ti to a txi txi nga msusumetela kutxhumayela Vajudha ‘nguxuva ka mbilu yakwe.’ A ti ti lava ngutu to ve hanyiswa. (Varoma 11:13, 14) Txa wumbidi, a ti khene i mhaka ya “mikombelo yi ni va mahelako ka Txizimu.” Paulo a kombete Jehovha ti to e vhuna mmwani ni mmwani kuamukela mahungu a Mfumo. Txa wuraru, Paulo a wombile ti to: “Va na ni kukhutala ka Txizimu.” Paulo a woni wunene wawe ni kukhutala kwawe ko thumela Jehovha. Ene a tiwoni to Vajudha vale vo khutala va ndina maha malanda a Kristu o khutala ngutu kufana ni nene.

15. Hi nga mu etetelisa kutxani Paulo? Ningela sikombiso.

¹⁵ Hi nga mu etetelisa kutxani Paulo? Txo khata, hi fanete hi ti emisela kumana ava va ku ni “fanelo ya wutomi wo mbi guma.” Txa wumbidi, ngu kukombela Jehovha ti to e vhuna vathu va mbilu ya yinene ve engisa mahungu ya hi va txhumayelako. (Mithumo 13:48; 16:14) Eto ngu ti a nga maha Silvana, awu a ku ni 30 wa malembe i di nyaphandule. A khene: “Ni si se bela ka m’ti, ni maha mkombelo ka Jehova ti to e ni ninga mawonelo a manene.” Nathu hi tshumela hi kombela ti to tingelozi ti hi vhuna kumana vathu va va no hi amukela. (Matewu 10:11-13; Mtuletelo 14:6) Robert, awu a ku ni malembe o pinda 30 i di nyaphandule a khene: “Kuthuma ni tingelozi ati ti zivako ti ti mahekako ka nyamne wa m’ti ta tsakisa ngutu.” Txa wuraru, ngu tikaratela kuwona wunene ka vathu ni nzila yi va nga mthumelako ngu yona Jehovha. Carl, didhota di ku ni malembe o pinda 50 di di bhabhatisilwe di womba tiya: “Ni zama kuwona ta tidotho ti ti kombisako ti to m’thu eneyo wa tsakela kani, kufana ni masekelo akwe, mawonelo a kona, mwendo txiwotiso txakwe.” I di ti to ha maha tiya, hi nga “veleka mihando ngu kutimisela” kufana ni Paulo.

“U NGA KHALAHATSHI NGU MAWOKO”

16, 17. a) Ngu yihi gondo hi yi manako ka Ekleziyaste 11:6? b) Nzila yi hi txumayelako ngu yona yi nga va gwesisa kutxani ava va hi wonako?

¹⁶ Kha ha fanela kudivala nzila yi kutxhumayela kwathu ku nga gwesako vathu ngu yona, hambi ti txi woneka nga kha va tsakeli. (Lera Ekleziyaste 11:6.) Vathu va hi wona. Vona va ma ziva maambalelo athu a manene ni ku hi ni txixonipho ni txingana. Eto ti nga va xamatisa, ngu kutsimbila ka mbimo hambi va va nga ti ni mawonelo o biha ngu ngathu va nga txitxa mawonelo ve tsakela. Sergio ni Olinda va ti woni toneto.

¹⁷ Sergio a ti khene: “Hi zumbilenyana hi si yi txititxini, ngu mhaka ya malwati. Se mbimo yi hi nga tshumela, vathu va xamate va txi khona: ‘Mi hi kalete! Hi ti mi xuva.’” Olinda a engetete a txi seka: “Va tsimbitisi va sibhomba ni va va nga ti mndani mule va hi gulete mawoko va txi: ‘Thumani kwati!’ Vona va tshumete ve hi kombela marevhista.” Sergio ni Olinda va xamate ngutu mbimo yi dijaha dimwani di nga ya hale va nga ti txhumayela kona, di ya va losa di va ninga siluva ni ku va bonga ngu mthumo wawe.

18. Ngu kutxani hi txi ti emisela “kuveleka mihando ngu kutimisela”?

¹⁸ Hotshethu ‘hi nga khalahatsheni ngu mawoko’ hi si geli vamwani ngu Mfumo wa Txizimu. Hi ni mthumo wa lisima wo ningela “wufakazi ka yotshe mifumo.” (Matewu 24:14) Hi nga va ni litsako la hombe nguko ha ti ziva ti to hi tsakisa Jehovha. Ene wa va randa ava va “velekako mihando ngu kutimisela”!