U nga maha txani ti to gondo yako ya Bhiblia yi kuvhuna ni ku kutsakisa?

Joxuwa a txi lera Mlayo; libhiyo la Jeriko li wa, kambe nyumba ya Rahabhi kha yiwi; Joxuwa a txi maha mkombelo a txi guleta manza

JOXUWA a ti fanete kuthangela ditiko da Israyeli e di yisa Ditikoni da Txithembiso. Toneto i ndi na va txikarato txa hombe kwakwe. Ngu toneto, Jehovha a mtsanisile a txi khene: “Tsana, u va ni mtamo.” Ene a gete Joxuwa ti to ngako a txi gonda Mlayo ni ku wu engisa, a ndi na maha sisungo sa wutxhari ni kuhumelela.—Joxuwa 1:7, 8.

Hi hanya ka “timbimo to karata,” se txikwete txi nga thuka txi dima ngu m’hini. (2 Timoti 3:1) Kufana ni Joxuwa, ti lava hi londisela txialakanyiso atxi Jehovha a nga mninga. Ti lava hi gonda Bhiblia mbimo yotshe ni kuthumisa ati hi nga ti gonda kasi ku hi maha sisungo sa sinene.

Gondo ya Bhiblia ya m’thu apuni nja lisima ngutu. Kambe ti nga maha hi si tizivi ti to yi mahiswa kutxani, mwendo hi si ti dhundi kugonda. Se u txo xolisisa dikwadru di di ku “Duketa tinzila tiya”, di nga kuvhuna ti to u va ni gondo yo tsakisa ngutu.

M’bhali wa Masalmo ati khene: “Ni ninge kutsimbila ngu nzila ya sirumo sako, nguko ngu sona si ni tsakisako.” (Masalmo 119:35) Nawe u nga tsaka ngu kugonda Dipswi da Txizimu. U txi simama u va ni gondo ya Bhiblia u na tumbula timhaka to tsakisa ngutu.

Hambiku u no mbi thangela ditiko nga Joxuwa, nawe u nga va ni sikarato. Kufana ni Joxuwa gonda Dipswi da Txizimu ni ku di engisa. U txi maha eto, ti na kutsimbilela kwati.

DUKETA TINZILA TIYA

Maha mkombelo u si se khata gondo yako. Ka Bhiblia kubhatwe mialakanyo ya Jehovha, ni ku yona yi nga kuvhuna. Mbimo yi u gondako, kombela Jehovha e kuvhuna kupfisisa ati u ti gondako ni ku ti khumbula, u ti thumisa ti to u maha sisungo sa sinene.—Ezra 7:10.
Mbimo yi u gondako Bhiblia ni mabhuku ya ma nga seketelwa ka yona, ti wotise siwotiso. Ngu txikombiso u nga tiwotisa tiya: ‘Txienge txiya txi ni gela txani ngu Jehovha? Ti yelanisa kutxani ni Mfumo wa Txizimu? Ni nga ti thumisisa kutxani ti to ni vhuna vamwani?’
Alakanyisisa ngu ti u ti gondako. Emanyana, alakanyisisa ngu ti u ku ngadi kugonda. Ti wotise: ‘Ni ti pfisa kutxani ngu mhaka yiya? Ngu kutxani ni txi ti pfa ngu nzila yiya? Ti yelanisa kutxani ni ti ti nga ni humelela, a ti ti ni humelelako, ni ti ti nga ni humelelako mbimo yi yi tako? Ni nga ma thumisisa kutxani matshina awa mwendo mlayo wuwa ka wutomi wangu?’ (Jobe 23:5; Masalmo 49:3) Mbimo yi u alakanyisisako, wona ti to ngu kutxani Jehovha a txi gela vathu vakwe ti to ve vayilela simaho so kari so biha. Mwendo u alakanya ngu wuyelo yi m’thu wu u gondako ngu ngene a ndi no va a di yi mani idiku a to maha ngu nzila yo hambana.—Dhewuteronome 32:28, 29.
Mbimo yi u lerako maha nga wo ti wona. Ngu txikombiso, ina u nga alakanya ngu mbimo yi vakoma va Josefa va nga mxavisa ka va ka Ismayeli? (Genesisi 37:18-28) Ngu tihi ti u ti wonako, kupfa mwendo m’bhumulo? Tiwone u di ka wukhalo wonewo. I ti yihi mialakanyo ni matipfelo awe ngu mbimo yoneyo? U txi maha nga wo ti wona, ti na maha gondo yako yi tsakisa ngutu.
Thumisa sithumiswa so gonda ngu sona asi sengeletano ya Jehovha yi nga hi ninga. Sona si nga maha ti to wuxolisisi wako wu tsakisa. Si di ho ngu lidimi lako, gonda ku si thumisa. Kombela vamwani ve kugondisa ku si thumisa. Ngu txikombiso, ka Índice de Publicações da Torre de Vigia, mwendo Guia de Pesquisa das Testemunhas de Jeová si na kuvhuna kumana misungo ya timhaka ni titxhamuselo to tala ta tindimana ta Bhiblia. U nga thumisa Apêndice ya Tradução do Novo Mundo das Escrituras Sagradas ngako yona yi di ho ngu lidimi lako. Yona yi ni madungula ya ma vhunako ka ta makhalo, timbimo, mipimo, ni timhaka timwani to tsakisa.
Wuseta timhaka ta hombe. Eto ti na kuvhuna kukhumbula totshe ti u ku ngadi kugonda. Ta lisima ngutu, bhula ni vamwani ngu ti u nga ti gonda. Ti ho ti u nga tithumisako thembweni? Ngu kumaha eto, u na khumbula timhaka ta hombe, ni ku ti nga vhuna ni vamwani.