Joxuwa ni Vagibhiyoni

Votshe vathu va Kanana va ti zivile ati ti nga maheka ka didhoropa da Jeriko. Ngu toneto, vakoma va mamwani madhoropa a Kanana va ti woni i di tshuku ku ve patana, kasiku ve ya lwa ni Vaisrayeli. Kambe, vathu va didhoropa do kari da Kanana di nga txi dhanwa ku i Gibhiyoni, va zamile ku ti maha nga i singa Vakanana. Se vona va rumile majaha o kari me ambala simaha so sakala me ya womba-womba ni Joxuwa ma txi khona: ‘Athu hi ta ngu ka wukhalo wa kule ngutu. Hi ti zivile ati Jehovha a nga mi mahela Egipta ni Mowabhi. Se ngaku anu mi txi hi thembisa ti to kha mi na mbi dhumela didhoropa dathu, athu hi na mi thumela, hi maha sibotxhwa sanu.’

Joxuwa a khotwe ati majaha yale ma nga womba, se eva thembisa ti to a si na kudhumela didhoropa dawe. Kambe, ku di pindile masiku mararu, Joxuwa a tumbute ti to majaha yale ma si ti ngu kule ni ku i ti Vakanana. Se a ma dhani e ta ma wotisa tiya: ‘Ngu kutxani anu mi di hi hembete?’ Vona va to xamula va txi khona: ‘Athu hi txo thava! Ha tiziva ti to Jehovha wa mi vhuna kuteka ditiko da Kanana. Se ho kombela mi si dayi vathu va didhoropa dathu.’ Joxuwa a mahile a ti a nga ti va thembisile, se kha daya Vagibhiyoni.

Ku di pindile mbimonyana, 5 wa vakoma va Kanana va ti ya lwa ni Vagibhiyoni. Joxuwa ni masotxhwa akwe va tsute, va tsimbite wusiku wotshe kasiku veya vhuna Vagibhiyoni. Se, mangwanani ka kona ni mixo va to khata kulwa. Vakanana va to tutuma ve hangalaka, se Jehovha a to wisa maralala a hombe me va balisela. Kasiku ve simama ve lwa, Joxuwa a to kombela Jehovha ti to e emisa ditambo. Phela Joxuwa asi khali kuwona ditambo di ti emile. Se ngu kutxani ene a di kombete toneto? Nguku ene a txi mthemba ngutu Jehovha. Ditambo di emile ditshiku dotshe di si swi. Di to swa msana kova Vaisrayeli va di xute votshe vakoma va Kanana ni masotxhwa awe.