Jehovha a vhikete Jesu

Ka wusiku wo kari, majaha o kari aya ma nga txi zumba ka wukhalo wa kule ni Jerusalema, ma to wona txo maha txi txi tura nzumani. Txomaha txonetxo txi txi nga nyeleti. Vona va txi kholwa ti to tinyeleti ti txi kongomisa ni ku vhuna vathu. Ngu toneto, majaha yale ma londisete “nyeleti” yile kala meza me hoka Jerusalema. Mbimo yi va nga hoka khe vona va ti ya wotisa tiya: ‘A hayi mwanana wu a nova mkoma wa Vajudha? Hi lava ku m’ninga maprezenti.’

Herodha, mkoma wa Jerusalema kha tsaka mbimo yi a nga pfa ti to ku di na va ni mkoma mmwani. Ngu toneto, ene a dhani vaprista e ta va wotisa ti to mkoma eneyo adi na velekelwa hayi. Vaprista vale va gete Herodha ti to mwanana wule a di na velekelwa Bhetlehema. Se Herodha a to dhana majaha yale ma nga txi ta ngu kule, e ta ma gela tiya: ‘Tsulani Bhetlehema mi na ya mana mwanana wule, mi na gwita mi ta ni gela to a manekela hayi ka kona. Nanani ni lava kutsula ni ya m’pfuxela.’ Phela Herodha a txo hemba.

Msana ka tile, majaha yale ma to simama me londisela “nyeleti” yile kala meya hoka Bhetlehema. Se “nyeleti” yile yi to ya ema txitimwi ka nyumba yo kari. Majaha yale ma to bela me mana Jesu ni mame wakwe Maria. Ona ma to khizama masoni ka Jesu me mninga maprezenti o dhula. Kambe, ina i ti Jehovha a nga rumela majaha yale ti to me ya wona Jesu? Nadha.

Ka wona wusiku wule, Jehovha a gete Josefa ngu mu ka mloro a txi khene: ‘Herodha a lava kudaya Jesu, pfhuka awe ni Mariya ni Jesu mi tsula Egipta. Ni na mi gela para mi wuya.’ Ngu txikuluveta, Josefa a to pfhuka ni mwaya wakwe ve tsula Egipta.

Jehovha a tshumete e gela majaha yale ti to ma sa fanela kutshumela me ya womba-womba ni Herodha. Mbimo yi Herodha a nga wona ti to majaha yale ma si na kuwuya kambe, a to henya ngutu. Se, aku a nga si sikoti kumana Jesu, a to rumisa to kudawa votshe vanana va vafana khe Bhetlehema, ava va nga di ni tanga ya Jesu. Kambe Jesu a di vhikelekile khe Egipta.

Ku di pindile mbimo, Herodha a fite. Se, Jehovha a gete tiya Josefa: ‘Konku podhi mi tshumela.’ Se, Josefa. Maria ni Jesu va to tshumela ve tsula Israyeli, veya zumba ka didhoropa da Nazareta.