4 wa vafana ava va nga engisa Jehovha

Msana kova mkoma Nebhukodhonosori a di tekile vathu va Judha ve tsula Bhabhilona, ene a txi lava ti to vathangeli va Judha ve mthumela. Se ene a rumile dijaha adi di nga txi dhanwa ku i Aspenazi ti to diya sawula vafana vo txhariha ngutu ni va va ngadi ni dihanyo da dinene. Vafana vonevo va ndi na mana trenamentu kudingana malembe mararu. Vona va ti fanete kugondela kulera, kubhala ni kuwomba-womba lidimi la Bhabhilona. Va ndi na tshumela ve dya sakudya asi si nga txi dyiwa ngu mkoma ni votshe ava va nga txi thuma ka nyumba ya wukoma. Ka vafana ava va nga ti sawutwe, ku ti ni 4 wa vona ava matina awe i nga ti Dhaniyeli, Hananiya, Misayeli ni Azariya. Aspenazi ava rayile matina mamwani a Vabhabhilona, i ku awa: Bheltexazari, Xadrake, Mixake, Abhedhi-Nego. Se, ina trenamentu ayi va nga txi yi mana Bhabhilona yi ndi na maha ti to vafana vale ve leka kuengisa Jehovha?

Vafana vale va 4 va di tiemisete kuengisa Jehovha. Vona va txi tiziva ti to milayo ya Jehovha yi txi tsimba kudya sakudya sile si nga ti dyiwa ngu Vabhabhilona. Ngu toneto, vona va wombawombile ni Aspenazi va txi khona: ‘Hi kombela kwambi dya sakudya sa mkoma.’ Se Aspenazi ava xamute atxi khene: ‘Ngaku anu mi si ngo dya sakudya sa mkoma se e mi wona mi di gomile, ene a na ni daya!’

Dhaniyeli a tsute eya womba-womba ni dijaha adi di nga txi va wonelela, e di gela tiya: ‘Athu hi ningi matawa ni mati kudingana 10 wa masiku. Se ku di pindile 10 wa masiku, u na gwita u hi fananisa ni vafana avale va dyako sakudya sa mkoma.’ Dijaha dile di tumete.

Msana kova ku di pindile 10 wa masiku, Dhaniyeli ni vangana vakwe va ti ni mtamo ngutu kupinda vafana vale vamwani. Jehovha a tsakile ngutu aku Dhaniyeli ni vangana vakwe va nga m’engisa. Jehovha a tshumete e ninga Dhaniyeli wuzivi wo kota kupfisisa ni kutxhamusela miloro.

Mbimo yi trenamentu yi nga guma, Aspenazi a tekile voshe vafana e tsula navo ka mkoma Nebhukodhonosori. Mkoma a tiya va maha siwotiso, se a tumbute ti to Dhaniyeli, Hananiya, Misayeli ni Azariya va txi ziva ngutu kupinda vafana vamwani. Ngu toneto, mkoma a sawute vafana vale va 4 ti to ve thuma nyumbani ka wukoma. Mbimo yotshe mkoma atxi kombela idheya kwawe mbimo yi a nga txi lava kululamisa timhaka ta lisima ngutu. Jehovha a vhuni Dhaniyeli ni vangana vakwe, ti to ve va ni wuzivi kupinda titxhari ni vahuti va mkoma Nebhukodhonosori.

Dhaniyeli, Hananiya, Misayeli ni Azariya va ti kule ni maxaka awe, hambiketo vona kha va leka kuengisa Jehovha. Awe ko? Ina mbimo yotshe u na engisa Jehovha hambi u di kule ni vaveleki vako?