Jesu e maha sidiwukiso sasingi

Jehovha a rumete Jesu hamafuni kasiku e ta Jesu txhumayela mahungu a manene a Txizimu. A tshumete e ninga mtamo Jesu wo maha sidiwukiso. Sidiwukiso soneso, si kombisa ati Jesu a no ta mahela vathu mbimo yi a no va Mkoma wa Mfumo wa Txizimu. Jesu a txi hanyisa otshe malwati, ngu toneto vathu ava va nga txi lwala va txi tsula kwakwe niku ene a txi va hanyisa votshe. Jesu a txi hanyisa mabhofu, siduma ni va vo lemala. Ene a txi hinga ni madhimoni. Vamwani va txi hanyiswa ka malwati yawe ngu kugwesa simaha sa Jesu dwe. Vathu va txi londisela Jesu kotshe mu a nga txi ya kona. Mbimo yotshe Jesu adi tiemisete kuvhuna vathu, hambi mbimo yi a nga txi lava kuhumula.

Dikhambi dimwani, majaha o kari ma to teka m’thu wu a nga ti lemate me tsula nayo ka nyumba yi Jesu a nga di ka yona. Kambe nyumbani mule ku ti tate vathu vavangi aha ko kha va nga sikota ni kubela. Se, majaha yale ma to kwela txitimwi ka nyumba me ya dhoda ditshoko, me txhikisa m’thu wule a nga ti lemate kala aha Jesu a nga ti kona. Jesu a to gela tiya dijaha dile: ‘Khukha u tsimbila.’ Se dijaha dile di to khukha di tsimbila. Votshe vathu va to xamala.

Ditshiku dimwani, Jesu a to bela ka txidhoropana txo kari, se e londiswa ngu 10 wa majaha aya ma nga ti ni wulwati awu va nga txi khona i tshekela. Ka mbimo yile, awu a nga ti ni tshekela a sa fanela kuzumba hafuhi ni vathu. Ngu toneto, vona va to zumba ngu kule ve kwangula va txi khona: ‘Jesu hi vhuni’. Jesu a to gela majaha yale ti to me tsula dithempeleni. Mbimo yi ma nga txi tsula dithempeleni ona ma to hanyiswa. Mbimo yi dijaha dimwedo di nga tumbula to se di ti hanyile ka malwati a dona, di to tshumela di wuya di ta bonga Jesu ni Txizimu. Phela ka 10 wa majaha yale ma nga txi lwala, ngu dona dwe di nga wuya di ta bonga.

Ku ti ni wamsikati awu a nga heta 12 wa malembe a txi lwala ni ku ene atxi lava kuhanyiswa ka wulwati wakwe. Se a to bela aha ku nga ti ni vathu vavangi e nzwingamela e tsula e ya gwesa tshoka ya simaha sa Jesu. Ka yona mbimo yile, ene a to hanya ka malwati akwe. Kambe Jesu a tipfite ti to ku ti ni wu a nga ti m’gwesile, se a lavile kuziva to i ti mani. A wule wamsikati a to thava ngutu nguku awule a nga ti ni wulwati wule a sa fanela kutshuketa hafuhi ni vathu. Hambiketo, wamsikati wule a wombile ti to ngene a nga ti gwesile simaha sa Jesu. Se Jesu a m’gete tiya: ‘Mwanangu, tsula ngu kurula.’

Dijaha dimwani adi di nga txi dhanwa ku i Jayiro, di kombete Jesu ti to e tsula mtini ka dona kasi ku ya hanyisa mwanana wa dona wa txihoranana nguku a txi lwala ngutu. Kambe, mwanana wule a fite na Jesu a si se hoka mtini ka Jayiro. Mbimo yi Jesu a nga hoka kheya ene a woni vathu vavangi va txi dila, kupata ni mwaya wa txihoranana txile. Se Jesu a to khene: ‘Mi nga dileni, ene a to otela.’ Se Jesu a to ñola diwoko da txihoranana txile, a txi khene: ‘Txihoranana, wuka.’ Ka yona mbimo yile, txihoranana txile txi to wuka. Se Jesu a to gela vaveleki va txona ti to ve txi ninga sakudya. Hi nga alakanya nzila yi vaveleki va kona va nga tsaka ngu yona.