Jeremiya a txhumayete ngu txibindi

Jehovha a sawute Jeremiya kasiku eva mprofeti khe Judha. Jeremiya ati fanete kutxhumayela ni kugela vathu ti to va di fanete kuleka kumaha timhaka to biha. Kambe, Jeremiya ati khene: ‘Jehovha, ani ni ngadi mwanana. Kha ni tikoti kuwombawomba hagari ka vathu.’ Se Jehovha ati khene: ‘U nga thavi Jeremiya. Ani ni na kugela ati u fanelako ku ti womba. Ni na kuvhuna.’

Ditshiku dimwani, Jehovha a gete Jeremiya ti to a di fanete kusengeleta madhota a Judha e faya txikhadiyana masoni kwawe, e gwita e va gela tiya: ‘Jerusalema a na loviswa kufana ni txikhadiyana txiya.’ Mbimo yi Jeremiya a nga maha ati Jehovha a nga di m’gete, madhota yale ma to henya ngutu. Mmweyo wa vaprista awu a nga txi dhanwa ku i Paxuri, a pekile Jeremiya e m’sunga mawoko ni minenge aha ka dipulangu. Jeremiya a hetile wusiku wotshe a si tikoti ni ku ti zinginisa. Mangwanani ka kona va m’txhatxhile. Jeremiya adi henyile ngutu aha koza e womba ti to a si na kutxhumayela kambe. Kambe, ina Jeremiya a lekile kutxhumayela? Ahim-him. Ene a emile e alakanyisisa, e gwita e womba tiya: ‘Didungula da Jehovha do nga mndilo awu wu turako mndani kwangu. Kha ni sikoti kuema kutxhumayela.’

Ku di pindile malembe, ku vile ni mkoma mmwani awu a nga fuma Judha. Vaprista ni vaprofeti va makuhu, va txi ti nyenya ati Jeremiya a nga txi ti womba. Se va to gela vathangeli va Judha va txi kha vona: ‘Dijaha diya di lava kudawa.’ Kambe, Jeremiya ati khene: ‘Ngaku mi txo ni daya, mi nava mi txo daya m’thu wo mbina mnandu. Ati ni mi gelako kha ti ti ngu kwangu, ti ta ngu ka Jehovha.’ Mbimo yi vathangeli va Judha va nga pfa tile, va to khona: ‘Hi nga di dayeni dijaha diya.’

Jeremiya a simamile e txhumayela. Kambe, ngu tsimbila ka mbimo, vathangeli va khatile ku m’henyela se va kombete mkoma ti to e daya Jeremiya. Mkoma a gete vathangeli vale ti to ve maha ati va ndi no ti lava ngu Jeremiya. Se vathangeli vale va to teka Jeremiya ve m’beta amu ka txisima txa hombe atxi txi nga di ni madhaka. Se Jeremiya a to khata kumitwa ngu madhaka.

Mbimo yi dijaha adi di nga txi dhanwa ku i Ebhedhi-meleki di nga tiziva, di tsute diya womba-womba ni mkoma di txi kha dona: ‘Vathangeli va rinzile Jeremiya amu ka txisima! Phela va si ngo ya m’humisa mule, a na fa.’ Mkoma a rumile Ebhedhi-meleki ti to e tsula txisimani ni 30 wa majaha kasiku veya humisa Jeremiya. Hambiku a nga pekwa, e sungwa ka dipulangu ni kubetwa ka txisima txa madhaka, Jeremiya a simamile eva ni txibindi ni ku kha leka kutxhumayela. Awe ko? Ina wa ti lava kufana nayo?