Ka otshe makhambi ya Aroni a nga leka nkongomiso wa Jehovha, hi nga ene a nga khata mhaka, kambe tiwoneka nga ene a tumete kukuzetelwa ngu vamwani ve mjikisa ka nzila ya yinene. Ngutu-ngutu ka dikhambi do khata nga a di thumisile ditshina da mlayo di di ku ka Eks 23:2 adi di ku: “U nga londete mtxawa wa mtalo wa vale va mahako to biha.” Hambi keto ditina dakwe da thumiswa ngu nzila ya txixonipho ni ku hambi mbimo yi Jesu a nga ti ha mafuni a zivile lisima la wuphaxeli wa Aroni.—Mas 115:10, 12; 118:3; 133:1, 2; 135:19; Mat 5:17-19; 8:4.

Ku xuxa timhaka ngu nzila ya wukanganyisi ti txi fananiswa ni wubhofu, ka Mlayo ku ti ni to tala a ti ti nga txi kombisa ti to wukanganyisi wu bihile, i ngava ngu kuningela tiningo mwendo simwani, nguko silo soneso si ti maha mlamuli a si yi ngu ti mhaka yi nga zumbisa tona, nguko se a vhatwe maso. “Nguko txiningo txa vhala maso avale va wonako.” (Eks 23:8) “Kuxavelela ka vhala maso m’thu wo ziva.” (Dhet 16:19) Hambi i di ti to mlamuli wa xuxa timhaka ngu nzila ya yinene, mbimo yimwani a nga thuka a si lamuli kwati ngu mhaka ya tiningo ti a nga ningwako ngu vale va patekako ka dihungo donedo. Bhiblia yi kombisa to hi nga tiningo basi ti vhalako maso, kambe ni matipfelo a m’thu, ngu toneto yi wombako tiya: “Mi nga hambaniseni mhaka kulamulani kwanu; u nga wone khohe ya wule i ku txisiwana, kambe u nga khatalele nyatithombe.” (Lev 19:15) Mlamuli a sa fanela kutumelela ti to matipfelo akwe mwendo ati vathu vamwani va wombako ti mmaha e ninga mnando nyatithombe ngu ku a ku naso basi.—Eks 23:2, 3.