• Ti nga koteka kuva mngana wa Txizimu
    Hanya wutomi wo tsakisa kala kupinduka!—Kursu ya Bhiblia
    • Gondo 8. Dijaha adi di nga khalahatsha ka dibhanku di txi wonetela nzumani.

      GONDO 08

      Ti nga koteka ku u va mngana wa Jehovha

      Jehovha a lava ti to u m’ziva. Ngu kutxani? Ene wa tiziva ti to ngako hi txi gonda ngu ngene hi ziva tifanelo takwe, nzila yi a mahako ngu yona to maha ni makungo akwe hi na lava kuva mngana wakwe. Ina ti nga koteka kuva mngana wa Txizimu? (Lera Jakobe 2:23.) U nga maha txani ti to u va mngana wa Txizimu? Bhiblia ya xamula siwotiso soneso ni ku ya womba ti to ngu kutxani kuva mngana wa Txizimu i di tona i ku tatinene ngutu.

      1. Jehovha a kuramba ku u maha txani?

      “Tshuketani hafuhi ka Txizimu, kasi ni txona txi na tshuketela hafuhi kwanu.” (Jakobe 4:8) Ti womba txani tiya? Jehovha wa kuramba ku u va mngana wakwe. Vamwani va nga ti wona ti txi karata kumaha wungana ni Txizimu nguko kha txi woneki. Hambi keto aku Jehovha a hi gelako ti to ene a zumbisile kutxani ngu kuthumisa Bhiblia, ta koteka ku hi va vangana vakwe. Mbimo yi hi lerako mapswi a Txizimu aya ma ku mu ka Bhiblia wungana wathu ni txona wu na kula ngutu hambiku hi si txi woniko.

      2. Ngu kutxani Jehovha i di mngana wa mnene kupala votshe vangana ava u nga vako navo?

      Kha ngaho wu a ku ni lirando ngutu kupinda Jehovha. Ene a lava ti to u tsaka, se ngako u txi karateka, u nga mu tshuketela. Awe u nga ‘veka masoni ka Txizimu kotshe kukarateka kwako, nguko txona txa kukhatalela.’ (1 Pedro 5:7) Mbimo yotshe Jehovha a na kuvhuna, e ku thavelela ni ku kuengisa.—Lera Masalmo 94:18, 19.

      3. Jehovha a lava ti to ava i ku vangana vakwe ve maha txani?

      Jehovha wa randa votshe vathu, kambe “txihunja txakwe txi ni vale vo lulama.” (Mavingu 3:32) Jehovha a lava ti to vangana vakwe ve maha ati aku khene ndinene ve vayilela ati aku khene ti bihile. Vamwani va nga tiwona ti txi karata kuhanya ngu milayo ya Jehovha. Kambe Jehovha a ni wumbilu. Ene wa dhunda votshe ava va mu engisako.—Masalmo 147:11; Mithumo 10:34, 35.

      ENGETELA WUZIVI WAKO

      Wona to u nga mahisa kutxani ti to u va mngana wa Jehovha, u tshumela u wona to ngu kutxani kuva mngana wakwe i di tona i ku ta tinene ngutu.

      4. Abrahamu i ti mngana wa Jehovha

      Matimu a Abrahamu (awu a nga ti dhanwa ku i Abramu) ma hi vhuna kuwona to kuva mngana wa Txizimu ti womba txani. Lera mayelano ni Abrahamu ka Genesisi 12:1-4. Mi gwita mi bhula ngu siwotiso siya:

      • Ngu tihi ati Jehovha a nga gela Abrahamu ku e timaha?

      • Ngu tihi ati Jehovha a nga mu thembisa?

      • Abrahamu a mahile txani?

      5. Ngu tihi ati Jehovha a ti lavako ka vangana vakwe?

      Athu hi lava ti to vangana vathu ve hi mahela to kari.

      • Ngako u di ni mngana ngu tihi ati u ti lavako ku e kumahela?

      Lera 1 Johani 5:3, mi gwita mi bhula ngu txiwotiso txiya:

      • Ngu tihi ati Jehovha a ti lavako ka vangana vakwe?

      Ti to hi engisa Jehovha ti lava hi txitxa mahanyelo. Lera Isaya 48:17, 18, mi gwita mi bhula ngu txiwotiso txiya:

      • Ngu kutxani Jehovha a txi lava to vangana vakwe ve txitxa mahanyelo?

      Dijaha adi i ku muaki di txi ningeta makarape mngana wakwe awu i ku muaki nene.

      Mngana wa mnene kha kuleki u huma nzilani. Jehovha nene a maha toneto ka vangana vakwe

      6. Jehovha a va mahela txani vangana vakwe?

      Jehovha wa vhuna vangana vakwe ti to ve xula sikarato. Xalela VHIDHIYO, mi gwita mi bhula ngu txiwotiso atxi txi londiselako.

      VHIDHIYO: Jehovha a ni mahete to tala (3:20)

      • Jehovha a mu vhunisile kutxani wamsikati awule hi nga mu wona ka vhidhiyo ti to e xula kukarateka kwakwe?

      Lera Isaya 41:10, 13, mi gwita mi bhula ngu siwotiso siya:

      • Jehovha a thembisa ku va mahela txani vangana vakwe?

      • U pimisa ti to Jehovha ngene i ku mngana wa mnene kupinda votshe? Ngu kutxani?

      Mifota: Vangana va vhunana. 1. Dijaha di txi vhuna kugula meza yo nemela dijaha dimwani. 2. Wamsikati awu awu a gelako txihunja txakwe ka msikati kulowe. 3. Dijaha di txi txhetelisa mngana wa dona.

      Mngana wa mnene wa kuvhuna. Jehovha nene a na kuvhuna

      7. Ti to hi va vangana va Jehovha hi fanete kubhula nayo ni ku mu engisa

      Ngako hi txi bhula ni Jehovha, hi na tsanisa wungana wathu nayo. Lera Masalmo 86:6, 11, mi gwita mi bhula ngu siwotiso siya:

      • Hi nga bhulisa kutxani ni Jehovha?

      • Jehovha a womba-wombisa kutxani ni nathu?

      Mifota: 1. Wamsikati a txi maha mkombelo. Seta yo komba txitimwi ayi yi ku ngu ha msungo kwakwe. 2. Wamsikati a txi lera Bhiblia. Seta yo komba hahatshi yi ku ngu ha msungo kwakwe.

      Hi nga bhula ni Jehovha ngu mkombelo; ene a womba-womba ni nathu ngu kuthumisa Bhiblia

      NGAKO VATHU VA TXI KHONA: “Kha ti koteki kuva mngana wa Txizimu.”

      • Ngu wuhi m’bhalo awu u nga wu thumisako kasi kukombisa ti to ta koteka kuva mngana wa Jehovha?

      ATI HI NGA TI WONA

      Jehovha a lava kuva mngana wako, ene a na kuvhuna ti to mi va vangana.

      Ngu tihi ti u nga ti gonda

      • Jehovha a va mahela txani vangana vakwe ngako va txi manana ni sikarato?

      • Ngu kutxani Jehovha a txi lava ti to vangana vakwe ve txitxa mahanyelo?

      • Ina u pimisa ti to ati Jehovha a lavako ti to vangana vakwe ve timaha ta karata? Ngu kutxani?

      U nga maha tiya

      XOTA TIMWANI

      Kuva mngana wa Txizimu ti nga txitxisa kutxani wutomi wako?

      “Ta vhuna kuziva Txizimu txa ditshuri i ku Jehovha” (Muwoneleli wa 15 ka Fevereiro wa 2003)

      Wona to u nga wu sakulelisa kutxani wungana wako ni Txizimu.

      “Ni nga maha txani ti to ni va mngana wa Txizimu?” (Siwotiso sa vaphya—Tixamulo ati ti vhunako, vholume 2, ndima 35)

      Wona ati kuva ni wungana ni Jehovha ti nga hulukisisa tona wutomi wa wa mmweyo wamsikati.

      “Ni si ti lavi kufa!” (Muwoneleli wa No. 1 2017)

      Wona ati vaphya va ti wombako ngu Jehovha.

      Tiwomba txani kuva mngana wa Txizimu? (1:46)

  • Tivekele makungo o u bhabhatiswa!
    Hanya wutomi wo tsakisa kala kupinduka!—Kursu ya Bhiblia

    • 6. Ngako hi txi bhabhatiswa hi maha txienge txa mwaya wa Jehovha

      Mbimo yi hi bhabhatiswako hi maha txienge txa mwaya wumwewo wa hamafuni kotshe. Ti singa ni mhaka ni ditiko, m’dhawuko wathu, athu hi kholwa ka tigondo to fana ni kuengisa milayo yo fana yi tako ngu ka Txizimu. Lera Masalmo 25:14; 1 Pedro 2:17, mi gwita mi bhula ngu txiwotiso txiya:

      • Msana ka kuva m’thu a di bhabhatisilwe, ngu wuhi wuxaka wu a khatako kuva nawo ni Jehovha kumweko ni va va mkhozelako?

      Mifota: Mwanathu wa txisikati awu a nga bhabhatiswa a txi alakanyisisa ngu wuxaka wu a ku nawo ni vanathu na a di tsakile. 1. A txi bhula to kari ni mwanathu wa txisikati. 2. A txi vhuneta mwanathu wu a nga kumba. 3. A txi dya ni vanathu va ti tanga to hambana-hambana. 4. A txi txhumayela wamwamna wo kari na a di ni mwanathu mmwani wa txisikati. 5. A txi thavisa mfota ni vanathu va matiko mamwani ka mtshangano wa m’ganga.
  • Ngu txihi txikongomelo txa Txizimu ngu vathu?
    Hanya wutomi wo tsakisa kala kupinduka!—Kursu ya Bhiblia

    • 2. Hi nga wu manisa kutxani wutomi wo tsakisa konkuwa?

      Jehovha a hi vangile hi di “sisiwana moyani [txilaveko txa moya, NM]” i ku minavelo yo mziva ni ku mkhozela. (Lera Matewu 5:3-6.) Ene a lava ti to hi va ni wungana wo tsana nayo, hi “londeta totshe tinzila takwe, [hi] mranda, ni ku mthumela “ngu yotshe mbilu.” (Dhewuteronome 10:12; Masalmo 25:14) Hi txi maha eto hi nava ni litsako la ditshuri hambi hi txi manana ni sikarato. Kukhozela Jehovha ti hi maha hi va ni wutomi awu wu ku ni txikongomelo.