• Nji txani txi no kuvhuna ti to u simama u gonda Bhiblia
    Hanya wutomi wo tsakisa kala kupinduka!—Kursu ya Bhiblia
    • Gondo 12. Mame wo kari ni vanana vakwe va vambidi va gonda Bhiblia ni mmweyo wa Tifakazi ta Jehovha.

      GONDO 12

      Nji txani txi no kuvhuna ti to u simama u gonda Bhiblia?

      Kugonda Bhiblia ta wuyelisa. Hambiketo hi nga mbimo yotshe ti hehukako. Mbimo yimwani u nga tiwotisa to ina na sikota kusimama ni gonda Bhiblia kani? Ina ti ni lisima kumaha mizamo yo gonda Bhiblia? Nji txani txi no ni vhuna kutimisela hambi ni txi manana ni sikarato?

      1. Ngu lihi lisima lo gonda Bhiblia?

      “Dipswi da Txizimu da hanya, di ni mtamo.” (Vahebheru 4:12) Bhiblia nja lisima nguko yi ku gela ati Txizimu txi tipimisako ni ti txi tipfisako tona ngu ngawe. Yona ya kuvhuna ti to u mana wuzivi, wutxhari ni themba. Kambe txa lisima ngutu Bhiblia ya kuvhuna to u va mngana wa Jehovha. Mbimo yi u gondako Bhiblia u yi tumelela ti to yi kuvhuna ka wutomi wako.

      2. Ngu kutxani ti txi lava u ziva lisima la ditshuri da mu ka Bhiblia?

      Ditshuri da mu ka Bhiblia di fana ni thomba ya lisima. Ngu toneto, Bhiblia ya hi kuzeta yi txi: “Xava wunene [ditshuri, NM] aniko u nga wu xavise.” (Mavingu 23:23) Ngako hi txi ziva lisima la ditshuri da mu ka Bhiblia, hi na maha totshe ti hi ti kotako ti to hi yi gonda hambi hi txi manana ni sikarato.—Lera Mavingu 2:4, 5.

      3. Jehovha a nga kuvhunisa kutxani ti to u simama u gonda?

      Jehovha awu i ku M’vangi ni mngana wako a lava ti to u m’ziva. Ene a nga kuninga ‘kuxuva ni [mtamo wo] thuma kuranda kwakwe.’ (Lera Vafilipiya 2:13.) Jehovha a nga kuvhuna ti to u va ni mixuvo yo gonda Bhiblia ni ku u kota kuthumisa ati u tigondako. Ene a nga kuninga mtamo wo xula sikarato ni kukanetwa. Mbimo yotshe kombela Jehovha ti to e kuvhuna u kota kusimama u gonda Bhiblia.—1 Vatesalonika 5:17.

      ENGETELA WUZIVI WAKO

      Wona ti to u nga sikotisa kutxani kusimama u gonda Bhiblia ku si nga ni mhaka ni kuzumba u di bhisi ni kukanetwa ngu vamwani. Tshumela u wona to Jehovha a nga kuvhunisa kutxani ti to u si godholi.

      4. Ninga lisima gondo ya Bhiblia

      Mbimo yimwani u nga zumba u di ñolekile aha ko u ti wona u si nga ni mbimo yo gonda Bhiblia. Nji txani txi nga kuvhunako? Lera Vafilipiya 1:10, mi gwita mi bhula ngu siwotiso siya:

      • Ngu tihi ati u ti wonako i di “ta tinene ngutu” ka wutomi wako?

      • U nga maha txani ti to u ninga lisima gondo yako ya Bhiblia?

      A. Mifota: Txikombiso txa txibhaketiyana txo tala ngu marigwi ni mafu. 1. Mumbu wa marigwi ni mumbu wa mafu. 2. Mafu aya ma nga gwitela hagari ka txibhaketiyana. 3. Marigwi ya hombe ma nga bela ka txibhaketiyana mmwani me sala hahatshi. B. Mifota: 1. Mumbu wowu wa wumwewo wa mafu ni marigwi. 2. Txibhaketiyana txontxi txa timwetxo txi nga tala ngu marigwi a hombe. 3. Mafu ma mani wukhalo wo bela ka txibhaketiyana ngu madhawani ka marigwi. Mafu a madotho aya ku nga tala txibhaketiyana me sala.

      1. Ngako u txo khata ngu mafu u thela ka txibhaketiyana, u gwita u lava kubeta marigwi, kha ma na mbi enela

      2. Ngako u txo khata ngu marigwi u beta ka txibhaketiyana, u nga gwita u thela mafu o tala me enela. Ngu ha kufanako ngako u txi thangetisa ati i ku “ta tinene ngutu,” ka wutomi wako u na salelwa ngu mbimo yo maha timwani

      Kugonda Bhiblia ta enelisa txilaveko txathu txa moya, i ku txilaveko txo lava kuziva Txizimu ni ku txi khozela. Lera Matewu 5:3, mi gwita mi bhula ngu txiwotiso txiya:

      • Hi nga wuyelwa ngu txani ngako hi txi ninga lisima gondo ya Bhiblia?

      5. Timisela mbimo yi u kanetwako

      Mbimo yimwani vamwani va nga kuheta mtamo mbimo yi u gondako Bhiblia. Wona txikombiso txa Francesco. Xalela VHIDHIYO, mi gwita mi bhula ngu siwotiso asi si londiselako.

      VHIDHIYO: Txibindi txakwe txi vite ni wuyelo ya yinene (5:22)

      Mfota wa vhidhiyo ayi yi ku: ‘Txibindi txakwe txi vite ni wuyelo ya yinene’ Francesco a txi hambana ni vangana vakwe msana ko va gela ti to kha na mbi swa e sakana navo.

      • Mwaya ni vangana va Francesco, va mahile txani mbimo yi a nga va gela ngu ti a ti gondako?

      • Ngu yihi wuyelo ayi a nga va nayo ngu kuva a di kombisile txibindi?

      Lera 2 Timoti 2:24, 25, mi gwita mi bhula ngu siwotiso siya:

      • Mwaya ni vangana vako va tipfisa kutxani ngu ti u tigondako?

      • Ngu kuya ngu ma vhersikulo yawa, u nga maha txani ngako vamwani va si tsaki ngu ku u gondako Bhiblia? Ngu kutxani?

      6. Tsaniseka to Jehovha a na kuvhuna

      Mbimo yi hi yako hi tshuketa ka Jehovha hi ya hi navela ku m’tsakisa. Hambi keto ti nga hi karatela kutxitxa mahanyelo athu ti to hi tsakisa Jehovha. Ngako u txi tipfisa toneto, u nga godholi. Jehovha a na kuvhuna. Xalela VHIDHIYO, mi gwita mi bhula ngu siwotiso asi si londiselako.

      VHIDHIYO: Jehovha a hi vhuni hi txitxa mahanyelo athu (3:56)

      • Ngu kuya ngu vhidhiyo ayi hi nga yi wona, ngu kuhi kutxitxa aku Jim a nga kumaha ti to e tsakisa Jehovha?

      • Nji txani txi nga kutsakisa ka txikombiso txakwe?

      Lera Vahebheru 11:6, mi gwita mi bhula ngu siwotiso siya:

      • Jehovha a na va mahela txani ava va mu “lavako”, i ku ava va mahako totshe ati va nga ti kotako ti to ve m’tsakisa?

      • U wona ti to Jehovha a tipfisa kutxani mbimo yi a wonako mizamo yako yo gonda Bhiblia?

      NGAKO VAMWANI VA TXI WOTISA VA TXI: “Ngu kutxani u txi gonda Bhiblia?”

      • U nga va xamulisa kutxani?

      ATI HI NGA TI WONA

      Kugonda Bhiblia mbimo yimwani kha ti hehuki, hambi keto ti nga kumaha u va ni wutomi awu wu si gumiko. Simama u themba Jehovha, ene a na kuhakela.

      Ngu tihi ti u nga ti gonda

      • Ngu kutxani ditshuri da mu ka Bhiblia i di da lisima kwako?

      • U nga maha txani ti to u “sawula ati i ku ta tinene ngutu”?

      • Ngu kutxani u di fanete kukombela Jehovha ti to e kuvhuna kasi ku u simama u gonda Bhiblia?

      U nga maha tiya

      XOTA TIMWANI

      Wona mune wa tinzila ati ti nga vhuna vamwani ti to ve thumisa mbimo yawe ngu wutxhari.

      “Londola kwati mbimo yako” (Khenjemuka! wa Fevereiro wa 2014)

      Wona nzila yi Jehovha a nga vhuna ngu yona wamsikati wo kari awu a nga txi ti karatela ku m’tsakisa, kambe mwamna wakwe a si m’pfisisi.

      Jehovha a hi ninga mtamo wo wonisana ni siemo sotshe (5:05)

      Wona nzila yi wamwamna wo kari a nga wuyelwa ngu yona ngu kutimisela ka msikati wakwe.

      Ni khotwe nipune ti to adiya ditshuri (6:30)

      Tifakazi ta Jehovha ta lumbetwa ku ta hoxota timwaya. Ina toneto ditshuri?

      “Ina Tifakazi ta Jehovha to haxula timwaya mwendo to aka?” (Msungo mhaka wu ku ka site)

  • Hi nga si mahisa kutxani sisungo sasinene
    Hanya wutomi wo tsakisa kala kupinduka!—Kursu ya Bhiblia
    • Gondo 35. Wamwamna a txi xolisisa mimovha yo kari ayi yi kombiswako amu ka internet msikati ni vanana va txi wonetela.

      GONDO 35

      Hi nga si mahisa kutxani sisungo sasinene?

      Hotshethu ti lava hi maha sisungo. Simwani sa kona si nga tisa kutxitxa ko kari ka wutomi wathu ni kugwesa wuxaka wathu ni Jehovha. Ngu txikombiso, ti nga lava hi maha sisungo sa ti to hi na zumba hani, hi na yi manisa kutxani male ni ku hi na txhadha mwendo hi na mbi txhadha. Ngako hi txi maha sisungo sasinene, wutomi wathu wu na tsakisa ni ku hi na tsakisa Jehovha.

      1. U nga mahisa kutxani sisungo sasinene ngu kuthumisa Bhiblia?

      U si se maha txisungo, khongela u kombela txivhuno ka Jehovha ni kuwona ti to Bhiblia yi womba txani ngu mhaka yoneyo. (Lera Mavingu 2:3-6.) Ka siemo so kari Jehovha a ningela mkongomiso awu wu ku hakubasani. Ka mhaka yoneyo, tatinene ngu maha txisungo u txi engisa mkongomiso wonewo.

      Se u nga maha txani ngako Bhiblia yi sa veka hakubasani mkongomiso wa ti u lavako ku timaha? U nga godhole, Jehovha a na “kukomba nzila yi u fanelako kutsimbila ngu yona.” (Isaya 48:17) A na timahisa kutxani toneto? Ka Bhiblia ku ni matshina a milayo aya ma nga ku vhunako. Matshina a milayo ya Bhiblia, ditshuri da mu ka Bhiblia adi di hi vhunako kuziva ati Jehovha a ti pimisako mayelano ni mhaka yo kari. Ngu mtolovelo hi tumbula ati Jehovha a yi wonisako tona mhaka yo kari mbimo yi hi lerako Bhiblia. Hi nga maha sisungo asi si tsakisako Jehovha ngako hi txi pfisisa ati a ti pfisako tona ngu sisungo soneso.

      2. Ngu tihi ati u fanelako u alakanyisisa ngu tona u si se maha txisungo?

      Bhiblia yi womba tiya: “M’thu wo txhariha a xolisisa otshe mapswi.” (Mavingu 14:15) Eto ti womba ti to hi si se maha txisungo ti lava hi ema hi alakanyisisa ngu ti ti patekako ka txisungo txonetxo. Ti lava u tiwotisa tiya: ‘Ngu yahi matshina a milayo ya Bhiblia ma thumako ka mhaka yiya? Ina txisungo txiya txi na ni ninga kudikha ka mialakanyo? Txisungo txiya txi na va gwesisa kutxani vamwani? Kambe txa lisima ngutu ngu txiya, ina txisungo txonetxo txi na m’tsakisa Jehovha?’—Dhewuteronome 32:29.

      Jehovha ngene a ku ni fanelo yo hi gela ati i ku tatinene ni ti i ku to biha. Ngako hi txi ma ziva kwati matshina a milayo ya Bhiblia ni kutiemisela ku ma londisa hi nava hi txo treyinara livhalo lathu. Livhalo, wusikoti awu hi ku nawo wo pfisisa ati i ku tatinene ni ti i ku to biha. (Varoma 2:14, 15) Livhalo ali li nga treyinarwa kwati li nga hi vhuna kumaha sisungo sasinene.

      ENGETELA WUZIVI WAKO

      Wona nzila ayi matshina a milayo ya Bhiblia kumweko ni livhalo lathu si nga hi vhunako ngu yona kumaha sisungo sasinene.

      3. Tumela kukongomiswa ngu Bhiblia

      Matshina a milayo ya Bhiblia ma nga hi kongomisa ngu nzila yihi ngako hi txi lava kumaha sisungo? Xalela VHIDHIYO, mi gwita mi bhula ngu siwotiso asi si londiselako.

      VHIDHIYO: Tumela kukongomiswa ngu matshina a milayo ya Bhiblia (5:54)

      • Nji txani mkhululeko wo tisawulela?

      • Ngu kutxani Jehovha a di hi ningile mkhululeko wo tisawulela?

      • Nji txani atxi Jehovha a nga hi ninga atxi txi hi vhunako ku hi maha sisungo sasinene?

      Ti to u wona txikombiso txa ditshina da mlayo da Bhiblia, lera Vaefesu 5:15, 16. Mi gwita mi bhula ngu nzila yi u nga ‘londolako’ ngu yona mbimo yi u ku nayo ti to . . .

      • u lera Bhiblia ditshiku ni ditshiku.

      • u va wamwamna, msikati, tate mwendo mwanana wa mnene.

      • u xalela mitshangano.

      4. Toloveta livhalo lako kasi ku u kota kumaha sisungo sasinene

      Ngako Bhiblia yi txi ningela mkongomiso wa hakubasani mayelano ni mhaka yo kari, eho ta hehuka kuziva to hi nga maha txani. Se i di ti to Bhiblia kha yi veki hakubasani mhaka yoneyo, hi nga maha txani? Xalela VHIDHIYO, mi gwita mi bhula ngu txiwotiso atxi txi londiselako.

      VHIDHIYO: “Vana ni livhalo la linene” (5:13)

      • Ngu kuya ngu vhidhiyo, ngu tihi ti mwanathu wa txisikati a nga ti maha kasi ku e toloveta livhalo lakwe kumaha sisungo asi si tsakisako Jehovha?

      Ngu kutxani hi sa fanela kukombela vamwani ti to ve hi mahela sisungo? Lera Vahebheru 5:14, mi gwita mi bhula ngu siwotiso siya:

      • Ti nga woneka nga ta hehuka kumahelwa sisungo ngu vamwani, kambe ngu tihi ati mmwani ni mmwani wathu a fanelako ku tiziva?

      • Nji txani txi nga ku vhunako kutoloveta livhalo lako ni kumaha sisungo sasinene?

      M’thu a txi tsimbitisa mmovha txitaratoni. GPS ayi a nga yi veka masoni kwakwe yi txi m’kongomisa nzila ayi a fanelako kutsimbila ngu yona.

      Livhalo li fana ni mapa, lona li nga hi vhuna kusawula nzila ayi hi lavako kutsimbila ngu yona ka wutomi wathu

      5. Xonipha livhalo la vamwani

      Aku vathu va hambanako, ni sisungo asi va si mahako sa hambana. Se hi nga kombisa ngu nzila yihi ti to ha xonipha livhalo la vamwani? He bhule ngu siemo simbidi:

      Txiemo txo khata: Mwanathu wa txisikati awu a dhundako ku ti penda khohe, e rura eya ka dibanza adi vanathu va txisikati va si tsakiko ngako va txi wona mwanathu a di ti pendile.

      Lera Varoma 15:1 ni 1 Vakorinto 10:23, 24, mi gwita mi bhula ngu siwotiso siya:

      • Ngu kuya ngu tindimana tiya, ngu tihi ati mwanathu a nga sungako ku timaha? U nga maha txani ngako ku di ni mwanathu awu a mahako sisungo asi livhalo lako li si ku tumeleliko ku si maha?

      Txiemo txa wumbidi: Mwanathu wo kari wa tiziva ti to Bhiblia kha yi tsimbisi kusela wusuke ngu kutipimela, kambe ene a maha txisungo txo mbi sela wusuke. Se e rambwa ngu mwanathu wo kari ti to ve ya lalela votshe. Kheya e ya mana ti to vanathu vamwani vo sela.

      Lera Ekleziyaste 7:16 ni Varoma 14:1, 10, mi gwita mi bhula ngu siwotiso siya:

      • Ngu kuya ngu tindimana tiya, nji txani atxi mwanathu a nga sungako ku txi maha? U nga maha txani ngako vamwani va txi maha txisungo atxi livhalo lako li si ku tumeleliko ku u txi maha?

      U nga maha txani ti to u maha sisungo sa sinene?

      Wamsikati a txi maha mkombelo.

      1. Maha mkombelo ka Jehovha ti to e kuvhuna to u maha txisungo.—Jakobe 1:5.

      Wamsikati ene wule wa mmweyo a txi maha wuxolisisi amu ka mabhuku aya ma nga seketelwa amu ka Bhiblia ni kuthumisa koputadhori.

      2. Maha wuxolisisi ka Bhiblia ni ka mabhuku athu ti to u mana matshina a milayo aya ma no kuvhuna kumaha txisungo. U nga tshumela u wotisa vanathu ava va nga vitwa ngu didhawa da moya.

      A txi alakanyisisa.

      3. Pimisa ngu wuyelo ya txisungo txako ka livhalo lako ni la vamwani.

      NGAKO VATHU VA TXI KHONA: “Wutomi mbwangu ni maha ati ni ti lavako. Kha ni na mhaka ni ti vamwani va ti pimisako.”

      • Ngu kutxani hi di fanete kukhatala ngu ti Txizimu txi ti pfisako tona ni matipfelo a vamwani?

      ATI HI NGA TI WONA

      Ti to hi maha sisungo sasinene, ti lava hi ziva ati Jehovha a yi wonisako tona mhaka yoneyo ni kuwona nzila yi sisungo sathu si nga gwesako ngu yona matipfelo a vamwani.

      Ngu tihi ti u nga ti gonda

      • U nga si mahisa kutxani sisungo asi si tsakisako Jehovha?

      • U nga li treinarisa kutxani livhalo lako?

      • U nga kombisisa kutxani ti to wa xonipha livhalo la vamwani?

      U nga maha tiya:

      XOTA TIMWANI

      U nga mahisa kutxani sisungo asi si no tsanisa wuxaka wako ni Jehovha?

      “Maha sisungo asi si no dhumisa Jehovha” (Muwoneleli wa 15 ka Abril wa 2011)

      Gonda to tala ka sialakanyiso asi Jehovha a hi ningako.

      Jehovha wa kongomisa vathu vakwe (9:50)

      Wona ati ti nga vhuna wamwamna wo kari ti to e maha txisungo txo karata.

      Ngaku u di ni Jehovha totshe ta koteka (5:46)

      U nga maha txani ngaku ku si na mkongomiso wa hakubasani wa mu ka Bhiblia mayelano ni mhaka yo kari?

      “Mbimo yotshe hi lava mkongomiso wa mu ka Bhiblia” (Muwoneleli wa 1 ka Dezembro wa 2003)