GONDO 19

I mani i ku txithumi txo thembeka na a di ni wutxhari?

Jesu a txi wombawomba ni vagondiswa vakwe

Fakazi ya Jehovha yi txi gonda dibhuku di di nga seketelwa ka Bhiblia — Hotshethu ha wuyelwa ngu sakudya sathu sa moya

Siro simbidi sa Mmidi wu wu Fumako wa Tifakazi ta Jehovha

A di hafuhi ni kufa, Jesu a bhute ni vagondiswa vakwe va mune va di vokha—Pedro, Jakobe, Johane ni Andrewu. A txi profeta ngu ta kuta kwakwe ka masiku o gwita, Jesu a mahile txiwotiso txa lisima: “I mani i ku txithumi txo thembeka na a di ni wutxhari, awu a nga vekwa ngu nyamne masoni ka sithumi sakwe, kasiku e si phamela sakudya ngu txikhati txi txi fanelako kani?” (Matewu 24:3, 45; Marku 13:3, 4) Jesu, kota “nyamne” wa vagondiswa vakwe, a ti va thembisa ti to a ndina sawula “txithumi” txi txi nga ndina ningela sakudya sa moya mbimo yotshe ka vapizani vakwe ka mbimo ya magwito. I mani txithumi txonetxo?

Txona mtxawa wa wudotho wa vapizani va Jesu va va nga sawulwa. “Txithumi” txonetxo txi ti kombile i di Mmidi wu wu Fumako wa Tifakazi ta Jehovha. Txi ningela sakudya sa moya ngu mbimo ka vakhozeli va Jehovha. Athu hi themba txithumi txo thembeka ti to txi hi ninga sakudya sathu ‘kasiku avela sakudya ngu mbimo yi yi lavekako’.—Luka 12:42.

Txona txi khatalela mwaya wa Txizimu. (1 Timoti 3:15) Jesu a ningile txithumi wutixamuleli wa hombe, wo wonelela mthumo wu wu mahwako ngu sengeletano ya Jehovha ya ha mafuni—txi khatalela silo sakwe asi si wonekako, txi wonelela mthumo wo txhumayela ni ku hi gondisa ngu ku thumisa mitshangano yathu. Ti to txi hi phamela sakudya si hi si lavako ngu mbimo yi hi si lavako ngu yona, ‘txithumi txo thembeka na txi di ni wutxhari’ txi ningela sakudya sa moya ngu ka mabhuko ya hi ma thumisako ka wuthumeli wathu, ku engetela ka mlongoloko wu hi ku nawo wa mitshangano ni ka tisengeletano tathu.

Txithumi txa thembeka ka ditshuri da Bhiblia ni ka mthumo wu txi nga ningwa wo txhumayela mahungu a manene, ni ku nja wutxhari ngu nzila yi txi khatalelako ngu yona kuranda ka Kristu ha mafuni. (Mithumo 10:42) Jehovha wa wu katekisa mthumo wonewo ngu ku engeteleka ka vathu ni makatekwa o tala a moya.—Isaya 60:22; 65:13.

Jesu a ningile mani wutixamuleli wo phamela vagondiswa vakwe sakudya sa moya?
“Txithumi” txi thembekile ni ku txhariha ngu nzila yihi?