7. Milayo ya Mfumo wa Txizimu nja lisima ngutu kupinda milayo ya mfumo wa vathu

Mifumo ya vathu yi maha milayo ayi yi vhunako vathu ni ku va vhikela. Mfumo wa Txizimu ni wona wu ni milayo. Lera 1 Vakorinto 6:9-11, mi gwita mi bhula ngu siwotiso siya:

• U alakanya ti to mafu yawa ma ndi na zumbisa kutxani i di ku vathu votshe va txo engisa milayo ya Txizimu?a

• U pimisa ti to Jehovha a ni fanelo yo lava ti to vathu ve engisa milayo ya mfumo wakwe? Ngu kutxani?

• Nji txani txi kombisako ti to vathu ava va si engisiko milayo yoneyo ti nga maha ve txitxa?—Wona vhersikulo 11.

Vathu vavangi kha va ti dhundi kuwomba-womba ngu timhaka ta mataho. Hambiketo Bhiblia ya womba-womba ngu mhaka yiya ni ku yona yi womba-womba ngu nzila ya txixonipho. Ati yi ti wombako ta hi wuyelisa. Eto ta pfisiseka nguko aku Jehovha i ku M’vangi wathu wa ti ziva ati i ku tatinene kwathu. Ene wa hi gela ati hi fanelako kumaha ti to hi m’tsakisa ni ti ti no hi vhuna ku hi zumba hi di tsakile mbimo yotshe.

1. Ngu yahi mawonelo a Jehovha ngu timhaka ta mataho?

Timhaka ta mataho i ningo ayi yi tako ngu ka Jehovha. Jehovha a lava ti to timhaka ta mataho ti mahwa ngu wamsikati ni wamwamna ava va nga txhadha kumweko dwe. Ningo yiya kha ya mahelwa ti to ava va nga txhadha ve va ni vanana dwe, kambe yi maha ni ti to ava va nga txhadha ve kombisana lirando ali mmwani ni mmwani a ku nalo ngu mkwawe ngu nzila ya mtumbuluko ni yo tsakisa. Ngu toneto Dipswi da Txizimu di wombako tiya: “Tsakiswa ngu msikati wa wuphya wako.” (Mavingu 5:18, 19) Jehovha a lava ti to wamwamna ni wamsikati ve thembana, ngu toneto Mkristu kha fanela kumaha wugango.—Lera Vahebheru 13:4.

2. Ti womba txani kutiñola ngu nzila yo biha ngu ta mataho?

Bhiblia yi womba ti to ‘vagelezi . . . kha va na ku si kota kudya thomba ya mfumo wa Txizimu.’ (1 Vakorinto 6:9, 10) Bhiblia yi thumisa dipswi da Txigriki adi di ku por·neiʹa yi txi womba kutiñola ko biha ngu ta mataho. Dipswi diya di pata 1) ku vathu ava va nga mbi txhadha va txi maha ta matahoa, 2) kumaha ta mataho ni mwamna kuloni mwendo ni msikati kuloni ni 3) kuotela ni sihari. Ngako hi “txi tshuralela txionho txa wugango,” hi na wuyelwa ni ku hi na tsakisa Jehovha.—1 Vatesalonika 4:3.

ENGETELA WUZIVI WAKO

3. Vayilela kutiñola ko biha ngu ta mataho

Josefa i nga ti wamwamna wo thembeka a lwite ti to eva ni mahanyelo a manene. Lera Genesisi 39:1-12, mi gwita mi bhula ngu siwotiso siya:

• Ngu kutxani Josefa a di tutumile? —Wona vhersikulo 9.

• U pimisa ti to Josefa a mahile txisungo txa txinene? Ngu kutxani?

VHIDHIYO: Thava wugango (5:06)

Jehovha a lava ti to hi vayilela wugango. Lera 1 Vakorinto 6:18, mi gwita mi bhula ngu siwotiso siya:

• Ngu sihi siemo asi si nga mahako m’thu e wela ka txionho txa wugango?

• U nga wu vayilelisa kutxani wugango?

4. Awe u nga si xula siduko

VHIDHIYO: Xula siduko ngu kulera Bhiblia (3:02)

• Ngu tihi ati mwanathu awu hi nga m’wona ka vhidhiyo a nga ti maha mbimo yi a nga wona to simaho sakwe ni mipimiso yakwe si nga mmaha a si thembeki ka msikati wakwe?

Mbimo yimwani hambi Makristu aya ma nga thembeka ti nga lava me lwa ni mipimiso yo biha. Nji txani txi no kuvhuna ku u si zumbeli kupimisa ngu timhaka ta mataho? Lera Vafilipiya 4:8, mi gwita mi bhula ngu siwotiso siya:

• Ngu tihi ati hi fanelako kuzumba hi txi ti pimisa?

• Kugonda Bhiblia ni kuzumba hi di ñolekile ka mthumo wa Jehovha, ti nga hi vhunisa kutxani ku hi xula siduko?

5. Milayo ya Jehovha ya hi wuyelisa

VHIDHIYO: M’thu wo kelelelwa ngu mapimo (9:31)

• I ngu nzila yihi dijaha diya di nga ti beta ka txiduko?—Wowa Mavingu 7:8, 9.

• Ngu kuya ngu Mavingu 7:23, 26, kutiñola ko biha ngu ta mataho ti nga hi tisela wuyelo yo panda. Se ngako hi txi tiñola ngu nzila ya yinene, hi si mahi wugango, ngu sihi sikarato asi hi nga si vayilelako?

• Kuva ni mahanyelo a manene ti nga hi vhunisa kutxani ti to hi tidila ngu wutomi ngu ha ku si gumiko?

Vamwani va pimisa to ati Bhiblia yi ti wombako ngu kutekana ka wamwamna ni wamwamna kulowe, wamsikati ni wamsikati kulowe hi nga tatinene. Kambe Jehovha Txizimu txa lirando ene a lava ti to hi zumba hi di tsakile mbimo yotshe. Ti to toneto ti koteka ti lava hi hanya ngu kuya ngu ti a hi gondisako. Lera 1 Vakorinto 6:9-11, mi gwita mi bhula ngu txiwotiso txiya:

• Ina kumaha ta mataho wamwamna ni wamwamna kulowe, wamsikati ni wamsikati kulowe ngu toneto dwe Jehovha a ti nyenyako?

Ti to hi tsakisa Txizimu, hotshethu ti lava hi maha kutxitxa ko kari ka wutomi. Ina mizamo yoneyo ya vhuna? Lera Masalmo 19:8, 11, mi gwita mi bhula ngu siwotiso siya:

• U pimisa to milayo ya Jehovha ya mahanyelo ya vhuna? Ngu kutxani?

ATI HI NGA TI WONA

Kumaha ta mataho ka mwamna ni msikati ava va nga txhadha i ningo ayi yi tako ngu ka Jehovha ayi yi va tiselako litsako.

Ngu tihi ti u nga ti gonda

• Ti pata txani kutiñola ko biha ngu timhaka ta mataho?

• Nji txani txi nga hi vhunako ku hi vayilela kumaha wugango?

• Ngu yihi wuyelo yo engisa milayo ya Jehovha ya mahanyelo?

XOTA TIMWANI

Wona to ngu kutxani i di ta lisima ku wamwamna ni wamsikati ve zumba kumweko va di txhadhile.

“Ngu tihi ati Bhiblia yi ti wombako mayelano ni kuzumba kumweko mi sa txhadha?” (Msungo mhaka wu ku ka site)

Wona to hambiku Bhiblia yi wombako to kumaha timhaka ta mataho ni m’thu wa limbewu li li fanako ti bihile, ngu kutxani eto ti si wombi kunyenya ava va mahako toneto.

“Ina ti bihile ku vathu va limbewu limwelo ve maha ta mataho?” (Msungo mhaka wu ku ka site)

Wona nzila yi milayo ya Txizimu mayelano ni ta mataho yi hi vhikelako ngu yona.

“Ina ndinene kumaha ta mataho ngu txisofu?” (Msungo mhaka wu ku ka site)

Kasi kuwona ati ti nga txitxa wutomi wa m’thu awu a nga ti maha ta mataho ni m’thu wa limbewu li li fanako, e tsakisa Txizimu, lera experiyensia atxi txi ku: “Va ni ñote ngu nzila ya yinene.”

“Bhiblia ya txitxa wutomi wa vathu” (Muwoneleli wa 1 ka Abril wa 2011)

Hamafuni kotshe, vathu va ni mawonelo o hambana-hambana mayelano ni wusuke. Vamwani va dhunda kusela ngako va di ni vangana vawe. Kasi vamwani va wona i di tshuko kwambi sela. Kambe vamwani va sela ve za ve leva. Se Bhiblia yi womba txani ngu wusuke?

1. Ina ti bihile kusela?

Bhiblia kha yi wombi to ti bihile kusela. Kuhambana nito yona yi womba tiya: ‘Vhinya yi yi tsakisako timbilu’ yimweyo ya tiningo ati Jehovha a nga hi ninga. (Masalmo 104:14, 15) Vamwani vavamna ni vavasikati vo thembeka va timbimo ta Bhiblia va ti sela wusuke.—1 Timoti 5:23.

2. Ngu wuhi mlayo awu Bhiblia yi ningako avale va sawulako kusela wusuke?

Jehovha a womba ti to ti bihile kusela ngutu ni kuleva. (Vagalatiya 5:21) Bhiblia yi womba tiya: “U nga maneke hagari ka vaseli va vhinya.” (Mavingu 23:20) Ngu toneto ngako hi txi sawula kusela, hi fanete kudinganisela hambi hi txi sela hi di hokha. M’thu wu a selako ngutu kha sikoti kupimisa kwati, a ti ati mahako ni ti a ti womba-wombako ti nga huma nzilani. I si nga eto dwe kusela ngutu ti nga onha dihanyo dakwe. Ngako hi si sikoti ku ti pimela mbimo yi hi selako, hi nga maha txisungo txo leka kusela.

3. Hi nga txi xoniphisa kutxani txisungo txa vamwani mayelano ni wusuke?

Kusela wusuke njisungo txa m’thu a pune. Ngu toneto kha ha fanela kulamula mmwani ngako a txi sawula kusela ngu kudinganisela, ni ku kha ha fanela ku kurumeta m’thu ti to e sela wusuke. (Varoma 14:10) Hi nga maha txisungo txo mbi sela ngako eto ti txi khuvekisa vamwani. (Lera Varoma 14:21.) Athu ‘kha hi lavi asi si vhunako athu, hi lava asi si vhunako vamwani.’—Lera 1 Vakorinto 10:23, 24.

ENGETELA WUZIVI WAKO

4. Maha txisungo txo sela mwendo kwa mbi sela wusuke

Ngu yahi mawonelo a Jesu mayelano ni kusela wusuke? Txidiwukiso txo khata txa Jesu txi hi vhuna kumana xamulo ya txiwotiso txiya. Lera Johani 2:1-11, mi gwita mi bhula ngu siwotiso siya:

• Txidiwukiso txiya txi hi vhunisa kutxani kuziva mawonelo a Jesu mayelano ni wusuke ni va va sawulako kusela?

• Aku Jesu a nga mba womba ti to ti bihile kusela, Makristu ma nga va wonisa kutxani avale va sawulako kusela?

Hambiku Mkristu a ku ni mkhululeko wo ti mahela txisungo txo sela, hi nga ka siemo sotshe i ku ta tinene kumaha toneto. Lera Mavingu 22:3, mi gwita mi bhula ngu siemo asi si nga gwesako txisungo txako:

• Ngako u txi lava kutsimbitisa mmovha.

• U di ni txirumbu.

• Ngako dhokodhela a txi kugela to u nga sele.

• Ngako u di ni txikarato txo ti pimela mbimo yi u selako.

• Ngako mlayo wa wukoma wu si kutumeleli ti to u sela.

• Ti nga maha u txi zumba ni m’thu awu a nga maha txisungo txo mbi sela ngu mhaka ya ku a nga manana ni sikarato ka mbimo yi yi nga pinda.

Ina ni nga xava wusuke ngako ni di ni festa ya mtxhadho mwendo mibuso yimwani? Nji txani txi nga kuvhunako ti to u maha txisungo txa txinene? Xalela VHIDHIYO.

VHIDHIYO: Ina ni fanete kuningela wusuke? (2:41)

Lera Varoma 13:13 ni 1 Vakorinto 10:31, 32. Msana ko lera ndimana yimweyo ngu yimweyo gwitani mi bhula ngu txiwotiso txiya:

• Kuthumisa matshina yawa ya milayo ti nga kuvhunisa kutxani kumaha txisungo atxi txi no tsakisa Jehovha?

5. Maha txisungo txa mpimo wa wusuke awu u no sela

Ngako u txi maha txisungo txo sela wusuke, u fanete u alakanya tiya: Jehovha kha tsimbisi kusela wusuke, kambe a tsimba kusela ngutu. Ngu kutxani? Lera Hoseya 4:11, 18, mi gwita mi bhula ngu txiwotiso txiya:

• Kumaheka txani ngako m’thu a txi sela ngutu?

Nji txani txi nga hi vhunako ku hi si seli kupinda mpimo? Hi fanete kudinganisela mwendo ku wu ziva kwati mpimo wathu. Lera Mavingu 11:2, mi gwita mi bhula ngu txiwotiso txiya:

• Ngu kutxani i di ta lisima kuziva mpimo wa wusuke awu u no sela?

6. Ati ti nga vhunako awu a selako kupinda mpimo

VHIDHIYO: ‘Ani ni ti ni sikarato ka wutomi wangu’ (6:32)

• Nga ha hi nga ti wona ka vhidhiyo, Dmitry a ti maha txani ngako a di levile?

• Ka dikhambi do khata ina a sikoti kuema kusela?

• A wu xulisile kutxani wudevi?

Lera 1 Vakorinto 6:10, 11, mi gwita mi bhula ngu siwotiso siya:

• Ina ngu ditshuri, kuleva txikarato txa hombe?

• Nji txani txi kombisako ti to m’thu wu i ku didevi a nga txitxa?

Lera Matewu 5:30, mi gwita mi bhula ngu txiwotiso txiya:

• Ka txidinganiso txa Jesu txo hi wila diwoko a txi lava kuwomba to ti lava hi maha mizamo yo kari ti to hi tsakisa Jehovha. U nga maha txani ngako u txi lwisana ni vhisiyo yo sela wusuke?a

Lera 1 Vakorinto 15:33, mi gwita mi bhula ngu txiwotiso txiya:

• Ngako u di ni vangana ava va selako ngutu ti nga ku gwesisa kutxani toneto?

ATI HI NGA TI WONA

Wusuke yimweyo ya tiningo ati Jehovha a nga hi ninga, kambe ene wa tsimba kusela ngutu ni kuleva.

Ngu tihi ti u nga ti gonda

• Ngu yahi mawonelo a Bhiblia ngu wusuke?

• Ngu yihi phango yo sela kupinda mpimo?

• Hi nga txi xoniphisa kutxani txisungo txa vamwani?

XOTA TIMWANI

Vaphya vanga si mahisa kutxani sisungo sa sinene mayelano ni kusela wusuke?

Maha sisungo sa wutxhari ka mhaka yo sela wusuke (2:31)

Wona ati u nga ti mahako kasi ku u xula txikarato txa wusuke.

“Ziva kudinganisela” (Muwoneleli wa 1 ka Janeiro wa 2010)

Ina Mkristu a fanete kumaha txhim-txhim, i ku kugumulisana tikopo?

“Tixamulo ta siwotiso sa vagondi” (Muwoneleli wa 15 ka Fevereiro wa 2007)

Wona nzila yi wamwamna wo kari a nga xula ngu yona kusela ngutu wusuke ka txiperiyensia atxi txi ku: “Ani ni ti txilovekelo txa wusuke.”

“Bhiblia ya txitxa wutomi wa vathu” (Muwoneleli wa 1 ka Maio wa 2012)

Hambi u txi mdhunda Jehovha ni ku tikaratela kumaha kudhunda kwakwe mbimo yimwani u nga thuka u maha sionho. Hambi keto, sionho simwani nza hombe kupinda simwani. (1 Vakorinto 6:9, 10) Ngako u txo thuka u maha txionho txa hombe, khumbula ti to Jehovha a nga txi kuranda ni ku ene wa ti lava kukuvhuna.

1. Hi nga maha txani ti to Jehovha e hi divalela?

Ava va randako Jehovha va txo thuka ve maha txionho txa hombe va pandiseka ngutu. Kambe ta thavelela kuziva ati Jehovha a thembisako vathu vakwe to khene: “Hambi ngako sionho sanu si di mi bhilivilisile mifana ni txiwunguwungu, si na basa kufana ni hunguva.” (Isaya 1:18) Ngako hi txi tisola ti txi huma mbiluni, Jehovha a na hi divalela. Hi nga kombisisa kutxani ti to ha tisola? Hi nga kombisa kutisola ti txi huma mbiluni ngu kuleka kumaha to biha hi simama hi kombela divalelo ka Jehovha. I si nga eto dwe, hi na tikaratela kuleka kupimisa to biha ni mikhuva ayi yi nga hi maha hi onha, se hi tikaratela kumaha ati Jehovha a ti lavako.—Lera Isaya 55:6, 7.

2. Jehovha a ma thumisisa kutxani madhota ti to me hi vhuna ngako hi di mahile txionho?

Ngako hi di mahile txionho txa hombe Jehovha a khene hi na “dhane madhota a Dibanza.” (Lera Jakobe 5:14, 15.) Ona ma mdhunda Jehovha kumweko ni va va mkhozelako. Madhota ma lungekete ku hi vhuna ti to hi tshumela hi va ni wuxaka wo tsana ni Jehovha.—Vagalatiya 6:1.

Madhota ma hi vhunisa kutxani ngako hi txi maha txionho txa hombe? Madhota mambidi mwendo mararu ma na thumisa Bhiblia kasi ku hi komba ti to ngu kutxani ati hi nga maha i di txionho. Ona ma na hi gela ati hi nga ti mahako ni ku hi ninga sialakanyiso so hi vhuna kasi ku hi si tshumeli hi maha txionho txonetxo. Madhota ma nga wona ti to i tshuko hi si pateki ka mithumo yo kari ya dibanzani kudingana mbimo yo kari kala hi wuseta wumoya wathu. Ngako awu a nga maha txionho a si ti soli madhota ma nga sunga ku mthavisa dibanzani kasi kuvhikela vamwani ka mikhuva yakwe yo biha.

ENGETELA WUZIVI WAKO

3. Kuwomba sionho sathu ta hi vhuna

Ngako hi txi onha hi henyisa Jehovha, ngu toneto ku lava hi m’gela sionho sathu. Lera Masalmo 32:1-5, mi gwita mi bhula ngu txiwotiso txiya:

• Ngu kutxani i di tatinene kugela Jehovha sionho si hi nga maha hahanze ko zama ku si sisa?

VHIDHIYO: “Jehovha wa kawuka ava a va randako” (3:01)

• Ngu kuya ngu vhidhiyo, madhota ma mvhunisile kutxani Canon ti to e tshumelela ka Jehovha?

Mbimo yi hi gelako madhota sionho sathu kha ha fanela kuthava, mwendo ku ma sisela timwani nguko ona ma lava ku hi vhuna. Lera Jakobe 5:16, mi gwita mi bhula ngu txiwotiso txiya:

• Ngu kutxani ti txi ma hehukela madhota ngako hi txi ma gela sionho sathu hi si ma siseli txilo?

4. Ngu yihi wuyelo yo thavisa dibanzani m’thu wu a si hundukiko?

Ngako m’thu wu a nga maha txionho txa hombe a txi lamba kulondisa milayo ya Jehovha, kha fanela kusimama dibanzani. Ene wa thaviswa dibanzani hi si swi hi patana nayo hambi kuwomba-womba nayo. Lera 1 Vakorinto 5:6, 11, mi gwita mi bhula ngu txiwotiso txiya:

• Kufana ni mtshumbelo wu vilisako wurathi, kupatana ni muonhi awu a si ti soliko ti nga onhisa kutxani dibanza?

Ngu kutxani nzila yi Jehovha a ñolako ngu yona vaonhi yi txi kombisa ti to ene wa hi alakanyela, a ni wuxinji ni ku wa hi randa?

5. Jehovha wa hi divalela ngako hi txi ti sola

Jesu a thumisile txidinganiso atxi txi hi vhunako kuziva nzila yi Jehovha a tipfako ngu yona ngako m’thu a txi ti sola. Lera Luka 15:1-7, mi gwita mi bhula ngu txiwotiso txiya:

• M’bhalo wuwa wu ku gondisa txani ngu Jehovha?

Lera Ezekhiyele 33:11, mi gwita mi bhula ngu txiwotiso txiya:

• Ngu tihi ati m’thu a fanelako kumaha kasi kukombisa ti to wa tisola ngu ditshuri?

ATI HI NGA TI WONA

Ngako hi di mahile txionho txa hombe, hi txi tisola ti txi huma mbiluni ni ku tiemisela kuleka kumaha to biha, Jehovha a na hi divalela.

Ngu tihi ti u nga ti gonda

• Ngu kutxani i di ta tinene kugela Jehovha sionho sathu?

• Ku laveka hi maha txani kasi ku hi divalelwa sionho sathu?

• Ngako hi di mahile txionho txa hombe, ngu kutxani hi di fanete kukombela txivhuno ka madhota?

XOTA TIMWANI

Wona nzila yi dijaha dimwani di nga kombiswa ngu yona wuxinji wa Jehovha awu wu nga txhamuselwa ka Isaya 1:18.

U nga kanakani wuxinji wa Jehovha (5:02)

Madhota ma nga vhunisa kutxani avale va nga maha sionho sa hombe?

“Madhota ma li kombisisa kutxani lirando ni wumbilu ka vaonhi?” (Muwoneleli wa Agosto wa 2024)

Wona nzila yi ava va nga maha txionho va si tisoli va kombwako ngu yona lirando ni wumbilu.

“Madhota ma nga va vhunisa kutxani ava va nga thaviswa dibanzani?” (Muwoneleli wa Agosto wa 2024)

Ka mhaka ayi yi ku: “Ni ti lava kutshumelela ka Jehovha,” wona ati ti nga maha dijaha dimwedo adi di nga ti lekile ditshuri di wona to Jehovha wa tilava ku di tshumelela kwakwe.

“Bhiblia ya txitxa wutomi wa vathu” (Muwoneleli wa 1 ka Abril wa 2012)