Mareferensiya a txibhukwana txa mitshangano ya Mahanyelo a Wukristu
1-7 KA ABRIL
TITHOMBA TA MU KA DIPSWI DA TXIZIMU | 1 VAKORINTO 7-9
“Kwa mbi txhadha—I ningo”
w11 15/1 17-18 ¶3
Tidile ngu ningo yako ya kwa mbi txhadha
Ngu txitalo, vathu va va nga mbi txhadha va ni mbimo yo tala ni mkhululeko kupinda ava va nga txhadha. (1 Vak. 7:32-35) Eto ti va ninga lungelo ya hombe yo andisa mthumo wawe, yo kulisa lirando lawe ngu vamwani, ni yo tshuketa ka Jehovha. Ngu toneto, Makristu o tala ma tiwona tiwuyelo to mbi belela wukati se ma timahela txisungo txo maha toneto, kudingana mbimo yo kari. Vamwani kutilava kha va ngo ti sawulela kuzumba va sa txhadha, kamba ngako siemo sawe si txi txitxa, va khongela ngutu ni kualakanyisisa ngu siemo sawe se ve tsaniseka ti to ngu txivhuno txa Jehovha va nga txitxa matipfelo awe. Se va amukela kutxitxa ka siemo sawe ve sunga kwa mbi belela wukati.—1 Vak. 7:37, 38, Tradução do Novo Mundo.
w08 15/7 27 ¶1
Timhaka ta hombe ta dipapilo da Paulo ka Vakorinto
7:33, 34—Nzitxani “sa ditiko” asi wamwamna mwendo wamsikati wu a nga txhadha a khutalelako sona? Paulo a ti womba-womba ngu silo sa ditshiku ni ditshiku sa wutomi asi Makristu ya ma nga txhadha ti lavako me veka mapimo ka sona. Sona si pata sakudya, so ambala ni ko zumba kona, kambe kha kupatwi silo so biha sa ditiko diya asi Makristu ma si vayilelako.—1 Johani 2:15-17.
w96 15/10 12-13 ¶14
Kwa mbi txhadha—Ditimba da mthumo wo mbi khulumetelwa
Mkristu wu a nga mbi txhadha awu a tivekelako makungo o timahela takwe kha mahi “ti i ku ta tinene ngu kupindisa” ka Makristu ya ma nga txhandha. Ene a simama a si txhadhi i singa “ngu kufela Mfumo wa nzumani” kambe ngu sivangelo sakwe. (Matewu 19:12) Wamwamna mwendo wamsikati wu a nga mbi txhadha a fanete e “khutalela si i ku sa Mkoma,” e ti karatela “kumaha ti ti si kotako kutsakisa Mkoma,” ni ku “khutalela kumaha kuranda ka Mkoma.” Eto ti womba ku ti ningetela kuthumela Jehovha ni Jesu ngu mbilu yotshe. I ngu nzila yoneyo dwe wamwamna mwendo wamsikati wu a nga mbi txhadha a mahako “ti i ku ta tinene ngu kupindisa” ka Makristu ale ma nga txhadha.
Lavetela tithomba ta moya
lvs 251
Titxhamuselo to gwitisa
Mbimo yimwani Makristu ma sunga ku lekana hambi i si nga ngu txivangelo txa wugango. (1 Vakorinto 7:11) A hi wone siemo simwani aha Makristu ma nga sungako kulekana.
• Kulamba kuwunja mwaya khakwenye: Wamwamna a nga lamba kulavela mwaya silo so tihanyisa, aha koza mwaya wu sala wu si nga ni male mwendo sakudya.—1 Timoti 5:8.
• Kupeka: Kuzumbela kudikhela mngana wa wukati aha koza wutomi wakwe e wupfa wu di ha phangoni.—Vagalatiya 5:19-21.
• Kutsimbwa kukhozela Jehovha: Wamwanma mwendo wamsikati a txi tsivela mkatakwe ti to a si thumeli Jehovha.—Mithumo 5:29.
w00 7/15 31 ¶2
U nga simama u di sawulekile ka mafu awa a nzambwa
Vaphya kha va fanela kututumela kutxhadha mbimo yi minavelo ya timhaka ta mataho i ku ya hombe. Mtxhadho ngu tisunga, se kulaveka kuvitwa ti to u hanya ngu kutumelelana ni txisungo txonetxo. (Genesisi 2:24) Nda tinene kurinzela kala ka ‘tanga ya kutekwa’—mbimo yi kunavela ka timhaka ta mataho i si ngako ka hombe ha koza ku khulumetela wuzivi wa m’thu. (1 Vakorinto 7:36, NM) Ku nga va i di wuhundwa ni txionho ngako m’thu wu a nga kula a navelako kutxhadha e geleza ngu kuva a siya mana m’thu wu a fanelekako wo txhadha nayo!
8-14 KA ABRIL
TITHOMBA TA MU KA DIPSWI DA TXIZIMU | 1 VAKORINTO 10-13
“Jehovha a thembekile”
Tixamulo ta siwotiso sa vagondi
Mpostoli Paulo a bhate ti to Txizimu “kha txi na kutumela ti to mi txi dukwa ngu si si ku txitimwi ka mtamo wanu”. (1 Vak. 10:13) Ina ti la kuwomba ti to Jehovha o thanga ngu kuwona txikarato, se e txi wona ti to hi na sikota kutsanisela e txi leka txi hi humelela?
▪ Ti to hi yi pfisisa kwati mhaka yiya, alakanya ngu tiya: Mwanana wa mfana wa mwanathu wo kari a ti sungile. Mwanathu wule a karatekile ngutu. Ti nga maheka a di pimisile ti to Jehovha a txi ti ziva ti to ti na humelela ni ku a ti woni ti to ene ni msikati wakwe va ndina sikota kutsanisela. Ditshuri ti to hotshethu hi na humelelwa ngu sikarato. Kambe, ina hi fanete kutumela ti to Jehovha a wona totshe ti ti mahekako ka wutomi wathu?
Mbimo yi hi xolisisako 1 Vakorinto 10:13, hi wona ti to Bhiblia kha yi hi geli ti to Jehovha a khata ngu kuwona ti to hi na sikota kutsanisela, se e gwita e leka txikarato txi hi humelela. Ngu kutxani hi txi womba eto? He xolisise mune wa sivangelo.
Txo khata, Jehovha a hi ningile mkhululeko wo tisawulela. Ene a lava ti to hi ti mahela sisungo hipune. (Dhewut. 30:19, 20; Jox. 24:15) Ngako hi txi maha sisungo asi si tsakisako Jehovha hi kombisa ti to ha mthemba ni ku hi lava ku kongomiswa ngu ngene. (Mav. 16:9) Kambe hi txi phaya so biha hi na elula so biha. (Vag. 6:7) I di ti to Jehovha ngene a sawulako sikarato asi si hi humelelako, ina hi nawo mkhululeko wo tisawulela?
Txa wumbidi, Jehovha kha na ku hi vhikela ka “tiphango ta txitshuketi”. (Ekl. 9:11, NM) M’thu a nga welwa ngu phango ngu mhaka yo va a di ka wukhalo awu i singako wa wunene, mwendo ngu mbimo yi i singako ya yinene. Dikhambi dimwani Jesu, a womba-wombile ngu 18 wa vathu ava va nga fa ngu mhaka yo welwa ngu nyumba. Ene a ti vekile ha kubasani ti to phango kha ya mahwa ngu Txizimu. (Luka 13:1-5) Ngu toneto kha ti pfali kuwomba ti to phango yi si se humelela Txizimu txa m’ziva awu a no fa.
Txa wuraru, mmwani ni mmwani wathu a fanete kusimama e thembeka ka Jehovha. Sathani a wombile ti to malanda a Jehovha ma mthumela ngu mhaka ya ku a ma ningako so maha. A tshumete a txi khene loko hi txi manana ni sikarato hi na leka kuthembeka ka Jehovha. (Jobe 1:9-11; 2:4; Mtu. 12:10) Se i di ti to Jehovha wa tsivela simwani sikarato, ti womba ti to Sathani a womba ditshuri.
Txa wumune, Jehovha kha na mhaka ni kuhuta ati ti no hi humelela mbimo yi yi tako. Ditshuri ti to Jehovha a txo ti lava a nga tiziva ati ti no hi mahekela mbimo yi yi tako. (Isaya 46:10) Kambe Bhiblia yi kombisa ti to kha ti mahi toneto. (Gen. 18:20, 21; 22:12) Jehovha i lirando ni ku mbwa mnene, ngu toneto wa wu xonipha mkhululeko wathu wo maha sisungo.—Dhewut. 32:4; 2 Vak. 3:17.
Kambe Paulo a ti la kuwomba txani loko a txi khene Txizimu “kha txi na kutumela ti to mi txi dukwa ngu si si ku txitimwi ka mtamo wanu”? Ene a si txhamuseli loko txikarato txi si se humelela, kambe ngu mbimo yi txi humelelako. Mapswi a Paulo ma hi tsanisekisa ti to ku si nga ni mhaka ni sikarato si hi mananako naso, hi txi themba Jehovha, ene a na hi vhuna ti to hi si tsanisela. (Mas. 55:22, NM) Ngu kutxani Paulo a di wombile toneto? Konkuwa he xolisise sivangelo simbidi.
Txivangelo txo khata, ngu ti to sikarato si hi tshanganako naso si “tolovekile ka vathu”. Aku hi hanyako ka mafu ya ma fumwako ngu Sathani, hi na manana ni sikarato. Kambe hi txi themba Jehovha hi na sikota kutsanisela, ni ku hi na simama hi thembeka. (1 Pedro 5:8, 9) A si se womba a ti ti ku ka 1 Vakorinto 10:13, Paulo a womba-wombile ngu simwani sa sikarato asi Vaisraeli va nga manana naso kheya txiwulani. (1 Vak. 10:6-11) Kambe ava va nga ti themba Jehovha va tsanisete, kasi Vaisraeli vamwani kha va engisa Jehovha. Vona i ti sindakamilayo ni ku va sa thembeka ka Jehovha.
Txa wumbidi, ngu ti to “Txizimu txa thembeka.” Ti womba txani eto? Ka nzila yi Jehovha a nga ma khatalela ngu yona malanda akwe a kale, hi wona ti to wuthembeki wakwe wa vhuna “avale va mu randako ni kuxayisa milayo yakwe”. (Dhewut. 7:9) Hi gonda ti to mbimo yotshe ene wa hetisisa sithembiso sakwe. (Jox. 23:14) Hi nga tsaniseka ti to 1) Jehovha kha na mbi tumelela ti to hi welwa ngu txiduko txi hi no txi tanda ku txi tsanisela, ni ku 2) ene a na hi “komba nzila yo huma” ka txona.
Jehovha a va kombisa kutxani “nzila yo huma” avale va thembekako kwakwe? Ngu ku va thavisela txikarato txonetxo. Kambe khumbula, Paulo ati khene Jehovha a na ku “komba nzila yo huma loko u txi tsanisela ka txona.” Ene wa hi komba nzila ngu ku hi tsanisa ti to hi kota kusimama hi thembeka kwakwe. Konkuwa he woneni ti to a ti mahisa kutxani toneto.
▪ Jehovha wa “hi thavelela ka sotshe sixaniso sathu”. (2 Vak. 1:3, 4) Ene a nga pepisa mialakanyo, mbilu ni matipfelo athu ngu kuthumisa Bhiblia, moya wakwe wo sawuleka ni txithumi txo thembeka.—Mat. 24:45; Joh. 14:16; Var. 15:4.
▪ Jehovha a nga hi kongomisa ngu moya wo sawuleka. (Joh. 14:26) Moya wonewo wu nga hi vhuna ti to hi khumbula matshina a milayo aya ma ku mu ka Bhiblia ti to hi kota kumaha sisungo ngu wutxhari.
▪ Jehovha a nga hi vhuna ngu kuthumisa tingelozi takwe.—Vaheb. 1:14.
▪ Jehovha a nga hi vhuna ngu kuthumisa vanathu. Vona va nga hi tsanisa ngu mapswi ni ngu simaho.—Vakl. 4:11.
Kambe hi gondile txani ka mapswi a Paulo aya ma ku ka 1 Vakorinto 10:13? Jehovha kha sawuli sikarato asi si fanelako ku hi humelela. Kambe hi nga tsaniseka ti to hi txi themba Jehovha, hi na sikota kutsanisela txikarato txihi ni txihi. Ha ti ziva ti to mbimo yotshe Jehovha a na hi komba nzila yo huma ti to hi simama hi thembeka kwakwe.
Lavetela tithomba ta moya
w04 1/4 29
Tixamulo ta siwotiso sa vagondi
Ngu kutxani m’bhalo wa 1 Vakorinto 10:8 wu txi womba to i 23.000 wa va Israyeli va nga fa ngu kumaha wugelegele na Mitengo 25:9 yi womba ti to i 24.000 va nga fa?
Ku ni sivangelo so tala asi si nga txhamuselako kuhambana ka tindimana tiya ta timbidi. Txo hehuka ngu ti to mtengo wo kongoma wu maneka hagari ka 23.000 ni 24.000, se eto timahile tikoteka kuwomba mtengo wa hafuhi, wa masoni mwendo wa msana.
He wone txivangelo tximwani. Mpostoli Paulo a wombile mhaka ya Vaisrayeli va di Sitime ti to e txharihisa Makristu a Korinto wa kale, i nga ti didhoropa adi di nga ti ziwa ngu wutomi wo thangetisa tigondo ta txitimwi. A wombile tiya: “Hi nga ti ningeleni ka mithumo ya wugelezi, nga ti vamwani ka vona va nga ti maha, se ve wa ngu ditshiku dimwedo 23.000.” A txi womba ava va nga dawa ngu Jehovha ngu mhaka ya wugelezi, Paulo o ti khene i 23.000.—1 Vakorinto 10:8.
Kambe Mitengo ndima 25 yi womba to “Israyeli a to ti tshanganisa ni Bhahali-Peyori, kuhenya ka MKOMA ku to tura masoni ka Israyeli.” Se Jehovha e gela Mosi ti to e daya votshe “vathangeli va vathu.” Se Mosi a gete valamuli ti to ve mahisa toneto. Ngu magwito, mbimo yi Finiyasi ngu txikuluveta a nga ya daya wamwamna wa Muisrayeli wu a nga ti tisile wamsikati wa Mumedhiyani ditendani, “mtungu wu to ema.” Didungula di vhala ngu kuwomba tiya: “Se ava va nga dawa ngu mtungu wule, i 24.000.”—Mitengo 25:1-9.
Mtengo wotshe wu wu nga wombwa ka dibhuku na Mitengo ti nga maha wu txi pata ni “vathangeli va vathu”, ava va nga dawa ngu valamuli, ni va va nga dawa ngu Jehovha ngu kukongoma. Ti nga maha vathangeli va va nga dawa ngu valamuli i di 1.000 wa vona, ti mahako veza ve hoka 24.000 ava va nga fa. Mwendo vathangeli vonevo va to maha wugelegele mwendo kusengela ka mibuso, mwendo va di lekile vamwani ti to ve maha toneto, vona va ni mnando nguko va ti “tshanganisile ni Bhahali-Peyori.”
Mayelana ni dipswi “ku ti tshanganisa”, referensiya ya Bhiblia yimwani yi womba ti to di nga womba “kunamarela m’thu.” Vaisrayeli i ti vathu va va nga ti ti ningetete ka Jehovha, se ngu ku ti “tshanganisa ni Bhahali-Peyori”, va ti onha wuxaka wawe wo tiningetela ka Txizimu. Ku di pindile 700 wa malembe, Jehovha a wombile tiya a txi gela Vaisrayeli ngu kuthumisa mprofeti Hoseya: “Kambe vona va toya Bhahali-Peyori, veya ti ningetela ka tximahetxo txa tingana, ve maha manyala kufana ni txile va nga txi randa.” (Hoseya 9:10) Votshe va va nga maha timhaka tiya va ti fanelwa ngu wulamuli wuwa wa Txizimu. Ngu toneto Mosi a va khumbutisile tiya: “Maso anu ma ti woni, tile MKOMA a nga maha ngu Bhahali-Peyori; MKOMA, Txizimu txako, a lovisile hagari kwanu, votshe vale va nga londetela milayo ya Bhahali-Peyori.”—Dhewuteronome 4:3.
w15 15/2 30
Tixamulo ta siwotiso sa vagondi
Ina ta sunga ku muhuweleli wa txisikati e fenengeta msungo mbimo yi a tsimbitisako txigondo na ku di ni muhuweleli wa txiwamna?
▪ Ka “Tixamulo ta siwotiso sa vagondi” ta Sentinela de 15 de Julho de 2002, kuwombilwe to mwanathu wa txisikati a fanete kufenengeta msungo a txi tsimbitisa txigondo a di ni muhuweleli wa tximwamna, a bhabhatisilwe mwendo kha bhabhatiswa. Msana ko xolisisa kwati mhaka yiya ku wonwi ti to kufanete kuva ni kutxitxa ko kari.
Ngako mwanathu wa txisikati a txi tsimbitisa txigondo a di ni mwanathu wa txiwamna awu a nga bhabhatiswa, kha ti kanakanakisi ti to a fanete kufenengeta msungo. A txi maha eto a kombisa txithavo ka wusungo wa dibanzani, awu wu nga vekwa ngu Jehovha, nguko a maha ati tifanelwako kumahwa ngu vanathu va txiwamna. (1 Vak. 11:5, 6, 10) A si lavi kufenengeta msungo, a nga kombela mwanathu wa txiwamna ti to e tsimbitisa txigondo ngako a di tiemisete.
Se ngako mwanathu wa txisikati a txi tsimbitisa txigondo a di ni muhuweleli wa txiwamna wu a nga mbi bhabhatiswa, na i si nga mwamna wakwe, kha ti sungi ku e tiveka hahatshi ka mlayo wa Mibhalo wo fenengeta msungo. Hambi keto, ngu kona ha ka livhalo lawe, vanathu vamwani va txisikati va fenengeta msungo hambi ka txiemo txonetxo.
22-28 KA ABRIL
TITHOMBA TA MU KA DIPSWI DA TXIZIMU | 1 VAKORINTO 14-16
“Txizimu txi nava ‘sotshe ka votshelele’”
w98 1/7 21 ¶10
‘Lifo i mlala wo gwitisa a fanelako kufuviswa’
“Magwito” i magwito ka Mfumo wa Kristu wa Digidhi da malembe, mbimo yi Jesu ngu kutiveka hahatshi ni kuthembeka, a no tshumetela Mfumo ka Txizimu ni Tate wakwe. (Mtu. 20:4) Txikongomelo txa Txizimu txa ‘ti to txi tshanganisa sotshe mfumoni ka Kristu’ txi nava txi di hetisekile. (Vaef. 1:9, 10) Txo khata Kristu a nava “a di fuvisile kotshe kufuma, ni wotshe wukoma ni yotshe mitamo” ayi yi lwisanako ni txikongomelo txa Txizimu. Eto kha ti wombi kulovisa aku ku no tiswa ngu yimbi ya Armagedhoni dwe. (Mtu. 16:16; 19:11-21) Paulo a wombile tiya: Kristu a na “fuma, kala kuza e veka votshe valala hahatshi ka mikondo yakwe. Se mlala wo gwitisa a fanelako kufuviswa, ngu lifo.” (1 Vak. 15:25, 26) Phela yotshe wuyelo ya txionho txa Adhamu ni lifo yi nava yi di thavisilwe. Se to sunga ti to ‘mayiva’ me ta va ma si na txilo ngu kuva Txizimu txi di wusile vafi.—Joh. 5:28.
kr 237 ¶21
Mfumo wu na tisa kudhunda ka Txizimu ha mafuni
Kuwombwa txani ngu wuyelo yi yi nga toloveleka ya malwati, ni wuyelo ya txionho i ku lifo? Eyo i “mlala wo gwitisa” awu a kotako kuxula votshe vathu va kwa mbi hetiseka. (1 Vak. 15:26) Ina lifo i mlala wu a dhukisako ni Jehovha? Wona ati Isaya a nga profeta: “A na fuvisa lifo ngu ha ku si gwitiko, ngu kumaha keto, MKOMA Txizimu, a na bahula mirongo ka totshe tikhohe.” (Isaya 25:8) Hi nga alakanya ngu mbimo yoneyo! Phela ku na mbi ta va ni kutshotsha vafi hambi mayiva ku si wombwi ni mirongo ni kupandiseka. Kuhambana nito ku no ta va ni mirongo ya litsako mbimo yi Jehovha a no hetisisa txithembiso txakwe txo tsakisa txo wusa maxaka athu ya ma nga fa! (Lera Isaya 26:19) Hi no ta hefu, ngu kuva hi txi hanyiswa silonda so tala si si vangwako ngu lifo.
w12 15/9 12 ¶17
Kudikha hagari ka Digidhi da malembe—ni msana ka dona!
Kha ku na to tsakisa ku tipfa kupinda mapswi awa: “Txizimu txi txi va i di sotshe ka votshelele.” Ti la kuwomba txani toneto? Alakanya ngu mbimo yi Adhamu ni Evha va nga ti Edheni va di hetisekile va txi maha txienge txa kurula ha mafuni kotshe. Mbimo yeneyo, Jehovha Mfumi wa dotshe Ditiko a ti fuma ngu kukongoma vathu ni tingelozi. Sivangwa soneso si txi womba-womba ni nene sipune si tshumela si va ni lungelo yo katekiswa ngu Jehovha. Ene i ti “sotshe ka votshelele.”
Lavetela tithomba ta moya
w12 1/9 9, dibhokiso
Ina mpostoli Paulo a to tsimba vavasikati kuwomba-womba?
Paulo a bhate tiya: “Vavasikati va na malale misengeletanoni”. (1 Vak. 14:34) A ti lava kuwomba txani? Ina a to wu wonela hahatshi wuzivi wawe? Ahi-him. Phela mbimo yimwani a txi womba-womba ngu tigondo ta lisima ta vavasikati. (2 Tim. 1:5; Tit. 2:3-5) Ka dipapilo dakwe adi diyako ka Vakorinto, Paulo a alakanyisile ava va nga ti ni ningo yo gondisa ni yo profeta ti to ve “malala” mbimo yi m’thu mmwani a womba-wombwako, kambe a si geli vavasikati dwe. (1 Vak. 14:26-30, 33) Ti nga maha vavasikati a va va nga ti ngadi kuamukela ditshuri va ti ni siwotiso so tala a ha ko za ve khulumetela ni txiwomba-wombi ngu mbimo ya mtshangano nga ti ti nga ti tolovelekile ka mbimo yile. Se Paulo a kuzetile vavasikati ku ya wotisa vavamna vawe va di mitini.”—1 Vak. 14:35.
it-11197-1198
Ku ambi sina
Ngu mawuselo ya ma fanako ni a Jesu, vafumi kulowe nayo va na mbi wuselwa kuhanya kota sivangwa sa moya a si si fiko, kambe va na wuswa ve nigwa mmidi wa ku ambi fa ni ku ambi sina. Kota ku va nga hanya, ni kuthuma va di thembekile ve gwita ve fa ka mmidi wa nyama awu wu sinako, vona va wuswa ve amukela mmidi wa moya awu wu si siniko nga ha Paulo a nga txhamusela ngu kona ka 1 Vakorinto 15:42-54. Ku ambi fa ku wombwa wutomi awu va tidilako ngu wona, mbwa lisima, kha wu na magwito nem kha wu txhamuseleki, kasi ku ambi sina ti yelana ni mmidi awu Txizimu txi va ningako, mmidi a wu ti si kotekiko ku wu sina nem ku loviswa. Ngu toneto, ti tikomba Txizimu txi txi va ninga mtamo wo tihanyisa, i singa txisima txa mtamo awu wu lavekako ti to sivangwa si si mmwani sa nyama ni sa moya si wu lavako ti to si kota kuhanya. A txiya njikombiso txa kuthembwa kwawe ngu Txizimu. Kambe wutomi wonewo kha wu va ningi mkululeko wo tihanyela va si na mhaka ni Txizimu; kambe kufana ni msungo wawe Jesu Kristu va simama ve tiveka hahatshi ka txikongomelo txa Txizimu ni kuengisa mkongomiso wa txona.—1 Vak 15:23-28.
29 KA ABRIL–5 KA MAIO
TITHOMBA TA MU KA DIPSWI DA TXIZIMU | 2 VAKORINTO 1-3
‘Jehovha—“Txizimu txa kotshe kuthavelela”’
“Dila ni va va dilako”
Tate wathu Jehovha nene wa kuziva kupanda ka kufelwa ngu va ava dhundako, vo fana ni Abrahamu, Isake, Jakobe, Mosi ni Mkoma Dhavhidha. (Mit. 12:6-8; Mat. 22:31, 32; Mith. 13:22) Bhiblia yi womba ti to Jehovha a di rinzete ditshiku a di ene a no wusa vavamna vonevo vo thembeka. (Jobe 14:14, 15) Ngu mbimo yoneyo vona va na va va di tsakile va txi tidila ngu kuhanya va si na mipando. Jehovha a tshumete e pfa kupanda ngu lifo la mwanana wakwe Jesu. Bhiblia yi womba ti to Jesu i ti wu a nga ti “tsakelwa ngutu” ngu Txizimu. (Mav. 8:22, 30, NM) Kha hi na kusikota kualakanya nzila yi Jehovha a nga pfa kupanda ngu yona a txi wona mwanana wakwe a txi dawa ngu nzila ya tshofu!—Johane 5:20; 10:17.
“Dila ni va va dilako”
Ani kuwomba to kari ka wu a dilako ko, ina ta hehuka? Yimwani mbimo ta karata. Bhiblia yi womba ti to “lidimi la mzivi la holisa txilonda”. (Mav. 12:18) Vamwani va mana mapswi o thavelela amu ka dibroxura di di ku Quando Morre Alguém Que Amamos. Kambe txa hombe ngutu atxi awe u nga txi mahako ngu “dila ni va va dilako”. (Var. 12:15) Gaby, wu a nga felwa ngu mwamna a khene takwe ti guma ngu kudila. A tshumete a txi khene: “Ngu toneto na thaveleka ngako vangana va txi dila ni nani. Ngu mbimo yoneyo kha ni tipfi ni di nokha ka txidilo txangu.”
Lavetela tithomba ta moya
w16.04 32
Tixamulo ta siwotiso sa vagondi
Nji txani “txivango” ni “sitsaniso” asi msawuleki mmwani ni mmwani wa Kristu a si amukelako ka Txizimu?—2 Vak. 1:21, 22
▪ Txitsaniso: Ngu kuya ngu referensiya yimwani, dipswi di di nga hunduluxelwa i va “txitsaniso” di manekako ka 2 Vakorinto 1:22, di ti thumiswa ka mlayo ni ka mabhindu. Diwomba “m’diho wo khatisa, silo mwendo male yi yi ningelwako ti to yi tsanisekisa to kari.” Txitsanisekiso txonetxo txienge txo khata txa sotshe si si no gwita si hakelwa, mbimo yi txi ningelwako, se txi lumba m’thu eneyo a nga ningwa, txona txi tshumela txi maha txixambanyo txi thuma.” Mbimo yi Mkristu a sawulwako ngu moya wo sawuleka, Jehovha a mninga txitsanisekiso txa hakelo ya mbimo yi yi tako. Kambe hakelo yotshelele, ngu kuya ngu 2 Vakorinto 5:1-5 i mmidi wa moya wo mba sina. Yi pata kambe ni ningo ya kwa mbi fa.—1 Vak. 15:48-54.
Ka Txigriki txa ngweno, dipswi di di ku ni txhamuselo yo fana ni txitsaniso di thumiselwa ka ringi yi va vekako m’thu wu a thembiswako ku tekwa. Kuyelana koneko ka pfisiseka nguko vasawuleki va na va txienge txa msikati wo fanekisela wa Kristu.—2 Vak. 11:2; Mtu. 21:2, 9.
▪ Txivango: Kale txivango txi ti thumiselwa kuxambanya ti to txi tsanisekisa ti to silo so kari nza mani, kutsanisekisa ti to ku ve ni kupfanana ko kari. Ngu nzila yi yi fanako, vasawuleki va ni txivango, tiwombako to va sawutwe ngu moya wo sawuleka ti to ve lumba Txizimu. (Vaef. 1:13, 14) Kambe vasawuleki va mana txivango txonetxo ngu kuhetiseka, va di hafuhi ni kufa va di thembekile, mwendo va na ta tximana ku di sate mbimo yidotho ti to ku hoka xanisa ya hombe.—Vaef. 4:30; Mtu. 7:2-4.
w10 8/1 23
Ina u ti ti ziva?
Mpostoli Paulo a txi womba txani mbimo yi a nga khene “txi hi guletako yotshe mbimo, kudhumiswani ka txona”?
▪ Paulo a bhate tiya: “Txizimu . . . txi hi guletako yotshe mbimo, kudhumiswani ka txona; atxi kambe ngu ngathu txi lavako kuhangalasa ka otshe makhalo kubhumula ka wuzivi wa txona. Nguko, athu hi kubhumula ka kunene ka Kristu masoni ka Txizimu, kubhumula ku ku hangalakako hagari ka vale va hanyiswako ni ka vale va lovako. Ka vale va lovako, ngu bhumula ko biha ku ku dayako; aniko, ka vale va hanyiswako, ngu bhumula ka kunene ku ningako wutomi.”—2 Vakorinto 2:14-16.
Mpostoli Paulo a ti womba tximahakalo atxi txi nga ti tolovelekile khe Roma txo dhumisa mthangeli wa masotxhwa msana kova a di xute valala va ditiko. Ka simahakalo soneso, tithomba ti ti nga tekwa ka valala, sibotxhwa si si nga manwa yimbini si ti kombiswa ha kubasani, marole ma ti tekwa ti to meya mahwa magandelo na masotxhwa ni mthangeli wa ona va txi dhumiswa. Ngu magwito ka kudhumiswa koneko, marole ma ti ningelwa kota digandelo ni ku ti nga maha sibotxhwa sile si nga manwa yimbini si dawa koneho.
Mapswi a Paulo ya ma ku “kubhumula ka kunene ka Kristu” aya ma nga ti womba wutomi mwendo lifo ka vamwani, “kutilava ma ti sekelwa ka tximahakalo txa khe Roma txo hisa dibaselo mbimo yi kutsimbilako dibuthu da vathu di txi dhumisa mthangeli wa masotxhwa”, kuwomba The International Standard Bible Encyclopedia. “Kubhumula ku nga ti womba kuxula ka valala, ku ti khumbutisa sibotxhwa ti to ku ti lava si ndi na dawa i si nga kale.”