Hamafuni kotshe, vathu va ni mawonelo o hambana-hambana mayelano ni wusuke. Vamwani va dhunda kusela ngako va di ni vangana vawe. Kasi vamwani va wona i di tshuko kwambi sela. Kambe vamwani va sela ve za ve leva. Se Bhiblia yi womba txani ngu wusuke?

1. Ina ti bihile kusela?

Bhiblia kha yi wombi to ti bihile kusela. Kuhambana nito yona yi womba tiya: ‘Vhinya yi yi tsakisako timbilu’ yimweyo ya tiningo ati Jehovha a nga hi ninga. (Masalmo 104:14, 15) Vamwani vavamna ni vavasikati vo thembeka va timbimo ta Bhiblia va ti sela wusuke.—1 Timoti 5:23.

2. Ngu wuhi mlayo awu Bhiblia yi ningako avale va sawulako kusela wusuke?

Jehovha a womba ti to ti bihile kusela ngutu ni kuleva. (Vagalatiya 5:21) Bhiblia yi womba tiya: “U nga maneke hagari ka vaseli va vhinya.” (Mavingu 23:20) Ngu toneto ngako hi txi sawula kusela, hi fanete kudinganisela hambi hi txi sela hi di hokha. M’thu wu a selako ngutu kha sikoti kupimisa kwati, a ti ati mahako ni ti a ti womba-wombako ti nga huma nzilani. I si nga eto dwe kusela ngutu ti nga onha dihanyo dakwe. Ngako hi si sikoti ku ti pimela mbimo yi hi selako, hi nga maha txisungo txo leka kusela.

3. Hi nga txi xoniphisa kutxani txisungo txa vamwani mayelano ni wusuke?

Kusela wusuke njisungo txa m’thu a pune. Ngu toneto kha ha fanela kulamula mmwani ngako a txi sawula kusela ngu kudinganisela, ni ku kha ha fanela ku kurumeta m’thu ti to e sela wusuke. (Varoma 14:10) Hi nga maha txisungo txo mbi sela ngako eto ti txi khuvekisa vamwani. (Lera Varoma 14:21.) Athu ‘kha hi lavi asi si vhunako athu, hi lava asi si vhunako vamwani.’—Lera 1 Vakorinto 10:23, 24.

ENGETELA WUZIVI WAKO

4. Maha txisungo txo sela mwendo kwa mbi sela wusuke

Ngu yahi mawonelo a Jesu mayelano ni kusela wusuke? Txidiwukiso txo khata txa Jesu txi hi vhuna kumana xamulo ya txiwotiso txiya. Lera Johani 2:1-11, mi gwita mi bhula ngu siwotiso siya:

• Txidiwukiso txiya txi hi vhunisa kutxani kuziva mawonelo a Jesu mayelano ni wusuke ni va va sawulako kusela?

• Aku Jesu a nga mba womba ti to ti bihile kusela, Makristu ma nga va wonisa kutxani avale va sawulako kusela?

Hambiku Mkristu a ku ni mkhululeko wo ti mahela txisungo txo sela, hi nga ka siemo sotshe i ku ta tinene kumaha toneto. Lera Mavingu 22:3, mi gwita mi bhula ngu siemo asi si nga gwesako txisungo txako:

• Ngako u txi lava kutsimbitisa mmovha.

• U di ni txirumbu.

• Ngako dhokodhela a txi kugela to u nga sele.

• Ngako u di ni txikarato txo ti pimela mbimo yi u selako.

• Ngako mlayo wa wukoma wu si kutumeleli ti to u sela.

• Ti nga maha u txi zumba ni m’thu awu a nga maha txisungo txo mbi sela ngu mhaka ya ku a nga manana ni sikarato ka mbimo yi yi nga pinda.

Ina ni nga xava wusuke ngako ni di ni festa ya mtxhadho mwendo mibuso yimwani? Nji txani txi nga kuvhunako ti to u maha txisungo txa txinene? Xalela VHIDHIYO.

VHIDHIYO: Ina ni fanete kuningela wusuke? (2:41)

Lera Varoma 13:13 ni 1 Vakorinto 10:31, 32. Msana ko lera ndimana yimweyo ngu yimweyo gwitani mi bhula ngu txiwotiso txiya:

• Kuthumisa matshina yawa ya milayo ti nga kuvhunisa kutxani kumaha txisungo atxi txi no tsakisa Jehovha?

5. Maha txisungo txa mpimo wa wusuke awu u no sela

Ngako u txi maha txisungo txo sela wusuke, u fanete u alakanya tiya: Jehovha kha tsimbisi kusela wusuke, kambe a tsimba kusela ngutu. Ngu kutxani? Lera Hoseya 4:11, 18, mi gwita mi bhula ngu txiwotiso txiya:

• Kumaheka txani ngako m’thu a txi sela ngutu?

Nji txani txi nga hi vhunako ku hi si seli kupinda mpimo? Hi fanete kudinganisela mwendo ku wu ziva kwati mpimo wathu. Lera Mavingu 11:2, mi gwita mi bhula ngu txiwotiso txiya:

• Ngu kutxani i di ta lisima kuziva mpimo wa wusuke awu u no sela?

6. Ati ti nga vhunako awu a selako kupinda mpimo

VHIDHIYO: ‘Ani ni ti ni sikarato ka wutomi wangu’ (6:32)

• Nga ha hi nga ti wona ka vhidhiyo, Dmitry a ti maha txani ngako a di levile?

• Ka dikhambi do khata ina a sikoti kuema kusela?

• A wu xulisile kutxani wudevi?

Lera 1 Vakorinto 6:10, 11, mi gwita mi bhula ngu siwotiso siya:

• Ina ngu ditshuri, kuleva txikarato txa hombe?

• Nji txani txi kombisako ti to m’thu wu i ku didevi a nga txitxa?

Lera Matewu 5:30, mi gwita mi bhula ngu txiwotiso txiya:

• Ka txidinganiso txa Jesu txo hi wila diwoko a txi lava kuwomba to ti lava hi maha mizamo yo kari ti to hi tsakisa Jehovha. U nga maha txani ngako u txi lwisana ni vhisiyo yo sela wusuke?a

Lera 1 Vakorinto 15:33, mi gwita mi bhula ngu txiwotiso txiya:

• Ngako u di ni vangana ava va selako ngutu ti nga ku gwesisa kutxani toneto?

ATI HI NGA TI WONA

Wusuke yimweyo ya tiningo ati Jehovha a nga hi ninga, kambe ene wa tsimba kusela ngutu ni kuleva.

Ngu tihi ti u nga ti gonda

• Ngu yahi mawonelo a Bhiblia ngu wusuke?

• Ngu yihi phango yo sela kupinda mpimo?

• Hi nga txi xoniphisa kutxani txisungo txa vamwani?

XOTA TIMWANI

Vaphya vanga si mahisa kutxani sisungo sa sinene mayelano ni kusela wusuke?

Maha sisungo sa wutxhari ka mhaka yo sela wusuke (2:31)

Wona ati u nga ti mahako kasi ku u xula txikarato txa wusuke.

“Ziva kudinganisela” (Muwoneleli wa 1 ka Janeiro wa 2010)

Ina Mkristu a fanete kumaha txhim-txhim, i ku kugumulisana tikopo?

“Tixamulo ta siwotiso sa vagondi” (Muwoneleli wa 15 ka Fevereiro wa 2007)

Wona nzila yi wamwamna wo kari a nga xula ngu yona kusela ngutu wusuke ka txiperiyensia atxi txi ku: “Ani ni ti txilovekelo txa wusuke.”

“Bhiblia ya txitxa wutomi wa vathu” (Muwoneleli wa 1 ka Maio wa 2012)

Nzila yi m’thu a ambalako ni ku tixhuna ngu yona ya hambana ni ya mmwani. Kambe ku ni matshina a milayo ya Bhiblia aya ma nga hi vhunako kuambala a si hi si lavako kambe hi si henyisi Jehovha. He woneni mamwani a matshina oneyo.

1. Ngu yahi matshina a milayo ya Bhiblia aya ma nga hi vhunako kusawula syambalo sa sinene ni ku ti lungisa?

Hi fanete kusawula “syambalo si sifanelekako” so kombisa “txithavo ni ku tiñola,” ni ku ti lungisa ngu nzila ayi yi kombisako to hi “makholwa” mwendo vathu ava va khozelako Txizimu. (1 Timoti 2:9, 10) He wone mune wa matshina a milayo ya Bhiblia: (1) Syambalo sathu si fanete si va so xonipheka. Nga ha u ti wonako ngu kona ka mitshangano yathu ya dibanza, vathu va Jehovha va ambala simaha sa sitayela so hambana. Kambe simaha soneso ni nzila yi hi ti lungisako ngu yona misisi si kombisa ti to ha xonipha Jehovha Txizimu txathu. (2) Syambalo sathu si fanete si kombisa txithavo mwendo ku kha sa fanela si wusa minavelo ya ta mataho mwendo si va so dhaneta ngutu. (3) Hi kombisa to ha “tiñola” ngu kwambi londisela maambalelo a txingweno a ditiko diya. (4) Ku ti lungisa kwathu mbimo yotshe ku fanete kukombisa ti to hi “makholwa,” i ku ti to vathu va fanete ve tiwona to athu hi khozela Txizimu txa ditshuri.—1 Vakorinto 10:31.

2. Maambalelo athu ma nga gwesa vanathu ngu nzila yihi?

Hambi ku hi ku ni mkhululeko wo ti sawulela asi hi lavako kuambala, kambe hi fanete kupimisa ngu nzila yi syambalo sathu si nga gwesako ngu yona vamwani. Hi maha totshe ati hi nga ti kotako kasi ku hi si henyisi m’thu, i singeto dwe ‘hi lava kutsakisa vathu vamwani hi va navelela ati ti no va aka.’—Lera Varoma 15:1, 2.

3. Maambalelo athu ma nga kuzetisa kutxani vamwani ti to va khozela Jehovha?

Hi lava ku ti lungisa ngu nzila ya yinene ka siemo sotshe kambe ngutu-ngutu hi txiya mitshanganoni ni ka mthumo wo txhumayela. Kha hi lavi ti to syambalo sathu si ningela wufakazi wo biha ngu kumaha ti to vathu va si engisi didungula di hi va txhumayelako. Hahanze keto hi lava kuambala ngu nzila ayi yi no kuzeta vathu ku ve gonda ngu Jehovha ni ku yi “ninga lisima, . . . gondo ya Txizimu, Muhanyisi wathu.”—Titosi 2:10.

ENGETELA WUZIVI WAKO

4. Ku ti lungisa ngu nzila ya yinene ti kombisa ti to ha xonipha Jehovha

Ngu txihi txivangelo txa lisima atxi txi hi mahako hi ti karatela ku ti lungisa ngu nzila ya yinene? Lera Masalmo 47:2, mi gwita mi bhula ngu siwotiso asi si londiselako:

• Kuziva ti to hi emela Jehovha ti nga ma gwesisa kutxani maambalelo athu?

• U pimisa ti to ta pfisiseka kualakanyisisa ngu maambalelo athu mbimo yi hi yako mitshanganoni mwendo ka mthumo wo txhumayela? Ngu kutxani?

5. Hi nga mahisa kutxani ti to hi ambala ni ku ti lungisa kwati

Xalela VHIDHIYO.

VHIDHIYO: Mahani totshe ngu moya wa kudhumisa Txizimu (10:18)

Syambalo sathu kha ti sungi ku si va so dhula ngutu, kambe si fanete si va si si nga basa ni kutsimbitisana ni tximahakalo txonetxo. Lera 1 Vakorinto 10:24 ni 1 Timoti 2:9, 10. Mi gwita mi bhula ngu txivangelo txi txi hi mahako hi si ambali syambalo . . .

• so vharukela, sa hombe ngutu mwendo sa nyeketa.

• so manya, so wonekela mwendo asi si wusako minavelo ya ta mataho.

Hambiku Makristu ma si ngako hahatshi ka mlayo wa Mosi, ona ma nga gonda mhaka ya lisima mayelano ni mapimiselo a Jehovha. Lera Dhewuteronome 22:5, mi gwita mi bhula ngu txiwotiso atxi txi londiselako:

• Ngu kutxani hi di fanete kuvayilela syambalo mwendo sitayela sa misisi asi si mahako wamsikati e woneka nga mbwa mwamna, mwendo wamwamna e woneka nga mbwa msikati?

Lera 1 Vakorinto 10:32, 33 ni 1 Johani 2:15, 16, mi gwita mi bhula ngu siwotiso asi si londiselako:

• Ina maambalelo angu ni nzila yi ni ti lungisako ngu yona sa henyisa m’thu dibanzani mwendo ka wukhalo wu ni zumbako ka wona?

• Vathu va wukhalo wu u zumbako ka wona va tolovela ku ambala ni ku ti lungisa ngu nzila yihi?

• U pimisa ti to nda tinene ku Mkristu e ambala ni ku ti lungisa ngu nzila yoneyo? Ngu ku txani?

ATI HI NGA TI WONA

Ngako hi txi maha sisungo sa sinene mayelano ni maambalelo athu ni ku ti lungisa, hi kombisa txixonipho ka Jehovha ni ka vamwani.

Ngu tihi ti u nga ti gonda

• Ngu kutxani nzila yi hi ambalako ni ku ti txhuna ngu yona i di sa lisima ka Jehovha?

• Ngu yahi matshina a milayo aya ma nga hi vhunako ti to hi ambala ni ku ti txhuna ngu nzila ya yinene?

• Maambalelo athu ma nga ningela wufakazi wa wunene mwendo wo biha ngu Jehovha. Ngu nzila yihi?

XOTA TIMWANI

Wona ati vathu va ti pimisako ngu ngawe ngaku va txi wona syambalo sako.

“Ni wonekisa kutxani?” (Msungo mhaka wu ku ka site)

Wona to ngu kutxani i di ta lisima kukhata ngu kupimisa u si se maha matatuwaji.

“Ngu tihi ti Bhiblia yi ti wombako ngo timhaka ta matatuwaji?” (Msungo mhaka wu ku ka site)

Wona mamwani matshina a milayo ya Bhiblia aya ma nga ku vhunako kusawula syambalo sa sinene.

“Ina maambalelo ako ma dhumisa Jehovha?” (Muwoneleli wa Setembro wa 2016)

Wona nzila yi wamsikati wo kari a nga tumelelana ngu yona ni nzila yi vathu vamwani va nga ti ambala ngu yona.

“Nzila yi ni nga txi ambala ni ku ti lungisa ngu yona i ti txikhuvekiso kwango” (Khenjemuka! wa 22 ka Dezembro wa 2003)