Mareferensiya a txibhukwana txa mitshangano ya Mahanyelo a Wukristu
6-12 KA MAIO
TITHOMBA TA MU KA DIPSWI DA TXIZIMU | 2 VAKORINTO 4-6
“Kha hi gumi mtamo”
w04 15/8 25 ¶16-17
U nga gume mtamo hambi u di karate
Ditshuri ti to kukhatalela didhawa dathu da moya nda lisima ngutu. Ngako hi di ni wuxaka wa wunene ni Jehovha Txizimu, ti nga maha hi va hi di karate ngu didhawa da nyama, kambe kha hi leki kukhozela Jehovha. Nguko Ene a “ninga mtamo ka wule a nga karala, kambe a engetela mtamo ka wule asi ngako ni mtamo ni wudotho.” (Isaya 40:28, 29) Mpostoli Paulo awu a nga pfa ditshuri da mapswi eyo a bhate tiya: “Kha hi gumi mtamo. Hambi mmidi wathu ngu hahanze wu txi maha wo onheka, kambe ngu mndani wu hinduka wu txi maha wa wuphya ditshiku ni ditshiku.”—2 Vakorinto 4:16.
Wona mapswi aya ma ku: “Ditshiku ni ditshiku.” Ona makombisa ti to hi fanete kuwuyelwa ngu malulamiselo a Jehovha a ditshiku ni ditshiku. Mwanathu mwani wa txisikati awu a nga thuma a di thembekile kota murumiwa 43 wa malembe, a womba to a ti tshangana ni sikarato so fana ni kukarala ngu didhawa da nyama, kambe kha guma mtamo. A womba tiya: “Ni tivekete makungo o wukela ngutu ni mixo, ni si se maha txilo, ni ti khongela ni tshumela ni gonda Bhiblia. Mkhuva wonewo wu ni vhuni kohokela nyamsi.” Athu hi nga kholwa ka wusikoti wa Jehovha wo hi xayisa “ditshiku ni ditshiku”, hi khongela hi tshumela hi alakanyisisa ngu tifanelo tatwe to guleka ngutu ni sithembiso sakwe.
it-1 p.724-725
Kutimisela
Nda lisima kwa mbi luza themba yathu ya Wukristu, wutomi wo mbi guma ku si nga ni txionho. Hambi hi txo dawa ngu vakaneti kha hi luzi themba yoneyo. (Var 5:4, 5; 1 Vat 1:3; Mtu 2:10) Sikarato sa nyamsi hi nga sa txilo hi txi si fananisa ni kuhetiseka ka txithembiso txonetxo. (Var 8:18-25) Hi txi veka mapimo athu ka wutomi wo mbi guma, sikarato si si wonekako nga nza hombe, hi nga sa txilo ni ku “sa pinda.” (2 Vak 4:16-18) Kukhumbula ti to siduko si hi mananako naso sa pinda ni ku ñolisisa themba yathu ti na hi maha hi si karateki ngutu, se hi si thembeki ka Jehovha Txizimu.
Lavetela tithomba ta moya
w12 1/2 28-29
“Tsakisani Jehovha”
David Splane wa Mmidi wu wu fumako a ningete m’wombawombo awu wu nga sekelwa ka Mibhalo. (2 Vakorinto 4:7) I txani thomba? Ina wuzivi mwendo wutxhari? “Ahim-him.” A xamute m’veki wa m’wombawombo. “Thomba ayi mpostoli Paulo a nga ti yi womba, mthumo wo gondisa vathu ditshuri.” (2 Vakorinto 4:1, 2, 5) Mwanathu Splane a khumbuxetile vagondi va Giliyadhi ti to mtxhanu wa mitxima yile yi va lulamisete ti to ve va ni siavelo so sawuleka ka mthumo. Va ti fanete kuninga lisima lungelo yoneyo.
M’wombawombi a txhamusete ti to “siya sa dibumba” si ti fanekisela mmidi wathu wo mba hetiseka. A kombisile kuhambana ka siya sa dibumba ni sa nzalama. Siya sa nzalama kha si thumiswi ngutu. Siya sa dibumba si mahetwe kuthumiswa. Ngako hi txo veka thomba ka txiya txa nzalama, hi na zumbela kuwoneleta txona ni thomba ya kona. “Anu vagondi, kha mi lavi kuti kombekisa,” a wombile Mwanathu Splane. “Kota varumiwa mi lava kukongomisa vathu ka Jehovha. Anu mi siya sa dibumba.”
w09 15/11 21 ¶7
Kulisa lirando la txikoma ni txinanda
Athu ko? Hi nga ti ‘tula’ hi kombisa lirando la txikoma ni txinanda ngu nzila yihi? Ti nga maha vathu va i ku va tanga yimweyo mwendo va di velekilwe wukhalo wumwewo ti va hehukela kuva vangana. Ngu mtolovelo, vathu va va dhundako misakano yo fana, va tolovela kuheta mbimo yo lapha va di votshe. Kambe ngako silo si hi si dhundako so fana ni sa m’thu mwani si txi hi veka kule ni vanathu vamwani hi fanete ku ti ‘tula’. Ti nga va tinene ku ti wotisa tiya: Ina na maneka kumweko thembweni mwendo ka misakano ni vanathu va i si nga ko vangana vangu? Ni ti mitshanganoni, ina na vayilela ku ti tshanganisa ni va i ku ngadi kona va nga khata kuta Nyumbani ya Mfumo, ni txi womba to va fanete ku kula ti to ve faneleka kuva vangana vangu? Ina na losa vo kumba kumweko ni vaphya va dibanzani?’
13-19 KA MAIO
TITHOMBA TA MU KA DIPSWI DA TXIZIMU | 2 VAKORINTO 7-10
“Kuvhuna vo welwa ngu phango njienge txa wuthumeli wathu”
w98 1/11 25 ¶1
“Txizimu txi randa awu a ningelako ngu litsako”
Kukhata Paulo a gete Vakorinto mayelana ni Vamakedhoniya ava i nga ti txikombiso txa txinene ka timhaka to vhuna ava vo welwa ngu phango. Ene a bhate tiya: “Hagari ka mihumbo ya kuxaniseka ka hombe, ayi ma nga dukwa ngu yona, kambe kutsaka kwawe ku to engeteleka, se hagari ka wusiwana wawe wa hombe va to humisa msengo wawe ngu wuha wa kupindisa mpimo.” Vamakedhoniya ti si lave ve sinziswa kuningela. Kuhambana nito, Paulo a ti khene, “va hi kombete ngu mtamo, kateko ya kusengela ni nathu ka m’thumo wa kuvhuna.” Kuningela kwawe ngu litsako kutshumela kuxamatisa ngako hi txi khumbula ti to vona va ti ‘hagari ka wusiwana wa hombe.’—2 Vakorinto 8:2-4.
kr 209 ¶1
Kuvhuna vo welwa ngu phango njienge txa wuthumeli wathu
I ti kona mu ka dilembe da 46 EC, Judheya a welwa ngu nzala ya hombe ngutu. Vagondiswa va Jesu va Vajudha ava va zumbako Judheya, kha va na male yo hakela sakudya so dhula asi si nga ti tshuka si maneka. Nzala nja hombe ngutu, ti nga maha ve luza ni wutomi. Hambi keto, va ha fuhi ni kupfa diwoko da Jehovha do vhikela ngu nzila yo kha ngaho Mukristu mmwani a nga khala ku di pfa ngu yona. Nji txani txi lavako kumaheka?
kr 209-210 ¶4-6
Kuvhuna vo welwa ngu phango njienge txa wuthumeli wathu
Ka dipapilo dakwe da wumbidi adi di yako ka Vakorito, Paulo a wombile ti to Makristu ma ni wuthumeli wumbidi. Hambiku dipapilo da Paulo di nga ti tiya ka Makristu ya ma nga sawulwa, nyamsi mapswi akwe ma thuma ka Makristu ya i ku ‘tinvuta’ timwani. (Joh. 10:16) Txienge tximwani txa mthumo wathu i “m’thumo wa kutshanganisa vathu” i ku mthumo wo txhumayela ni wo gondisa. (2 Vak. 5:18-20;1 Tim. 2:3-6) Txienge tximwani txi pata “m’thumo wa kuvhuna” nga ha Paulo a nga womba ngu kona i ku mthumo wo vhuna Makristu kulothi. (2 Vak. 8:4) Dipswi adi di ku “m’thumo wa kutshanganisa vathu” ni di di ku “m’thumo wa kuvhuna” ka timhaka tiya timbidi, dipswi “m’thumo” dita ngu ka dipswi da Txigriki adi di nga hunduluxelwa i ku di·a·ko·ni a. Ngu kutxani atiya ti txi pfala?
Ngu kuthumisa dipswi da Txigriki ka mithumo yiya ya yimbidi, Paulo a ti fananisa mthumo wo vhuna ava vo welwa ngu phango ni mithumo ayi yi nga ti mahwa dibanzani da Wukristu. A bhate tiya: “Ku ho kuhambana ka mithumo, aniko Mkoma i mmweyo; kuho kambe kuhambana ka mathumelo, . . . Aniko totsheto ngu wona Moya wu wa wumwewo dwe wu ti thumako.” (1 Vak. 12:4-6, 11) Paulo a fananisile mithumo yi yi mahwako dibanzani ni mthumo wo sawuleka. (Var. 12:1, 6-8) Kha ti xamalisi a ku ene a nga ti wona ti di fanete kuheta mbimo a txi “thumela vasawuleki”!—Var. 15:25, 26.
Paulo a vhuni Vakorito ve wona ti to ngu kutxani mthumo wo vhuna ava va nga welwa ngu phango wu txi maha txienge txa wuthumeli wawe ni txo khozela Jehovha. Wona ti a nga womba: Makristu ya ma nga ti vhuna ava va nga welwa ngu phango va ti maha toneto nguko vona va ti engisa “Evhangeli ya Kristu.” (2 Vak. 9:13) Ngu toneto kunavela kuthumisa tigondo ta Kristu, kususumetete Makritu ti to me vhuna vatumeli kolowe. Nga ha Paulo a nga womba ngu kona, simaho sawe sa wunene asi va nga mahela vanawe njikombiso txa ‘kateko ya kuxamalisa va nga ningwa ngu Txizimu.’ (2 Vak. 9:14; 1 Pedro 4:10) Yi txi womba-womba ngu kuthumela vanathu va va ku ni txilaveko, ati ti patako mthumo wo vhuna ava va nga welwa ngu phango, A Sentinela de 1 de março de 1976 yi wombile tiya: “Kha ha fanela ku kana-kana ti to Jehovha ni Mwanana wakwe Jesu Kristu va wu ninga lisima mthumo wuwa.” Ti ha kubasani ti to mthumo wo vhuna ava vo welwa ngu phango i nzila ya lisima ya mthumo wo sawuleka.—Var. 12:1, 7; 2 Vak. 8:7; Vaheb. 13:16.
kr 196 ¶10
Mithumo ya dibanza yi hakeliswa kutxani?
Txo khata, hi maha miningelo yo tidhundela nguko hi dhundako Jehovha ni ku hi lava ‘kumaha ati ti m’tsakisako.’ (1 Joh. 3:22) Jehovha wa tsaka ngutu ngu mkhozeli wu a ningelako ti txi huma mbiluni. A hi xolisise mapswi a mpostoli Paulo mayelana ni miningelo ya Makristu. (Lera 2 Vakorinto 9:7.) Mkristu wa ditshuri kha ningeli ngu nzila yo tiguleta mwendo ngu kusinziswa. Kuhambana nito a ‘ningela kota nga ti a xuvisako tona mbiluni kwakwe.’ I ku ti to a si se ningela a thanga ngu kualakanyisisa ngu txilaveko ni nzila ayi a nga vhunetako ngu yona. M’ningi eneyo wa tsakelwa ngu Jehovha “nguko Txizimu txi randa awu a ningelako ngu litsako.” Wuhunduluxeli wumwani wu womba tiya: “Txizimu txi randa mningi wu a nga tsaka.”
Lavetela tithomba ta moya
w16.01 12 ¶2
Tumelela ‘txihiwa txo mbi balwa’ txa Txizimu txi ku susumetela
Paulo a ti ti ziva to sotshe sithembiso sa Txizimu so tsakisa si na hetiseka ngu kona ha ka digandelo do hetiseka da Kristu. (Lera 2 Vakorinto 1:20.) Eto tiwomba to ‘txihiwa txo mbi balwa’ txi pata ni otshe makatekwa, wunene ni lirando lo thembeka ali Jehovha a hi kombako ngu kona ha ka Jesu. Txihiwa txiya, txi hi gwesa ngu nzila yo nem kha hi nge sikoti ku yi txhamusela ngu mapswi. Kuamukela txihiwa txiya ti hi gwesa ngu nzila yihi? Txi hi kuzeta kumaha txani aku hi ti lulamiselako kuya ka txialakanyiso ngu ditshiku da 23 ka Março wa 2016?
g99 8/7 20-21
Ina ti bihile ku ti dhumisa?
Ka Mibhalo ya Wukristu ya Txigriki, dipswi kau·khá·o·mai di di hunduluxelwako i va “ku ti dhumisa, ku ti kulisa, kutigela,” da thumiswa ngu tinzila timbidi, ya yinene ni yo biha. Ngu txikombiso, Paulo a wombile ti to hi nga ‘tigela na hi txi tsaniswa ngu txithembo txa wudhumo wa Txizimu.’ Kambe a tshumete e alakanyisa tiya: “Awu a ti dhumisako a na ti dhumise ditinani ka Mkoma.” (Varoma 5:2; 2 Vakorinto 10:17) Eto tiwomba to hi fanete ku ti dhumisa ngu kuva Jehovha i di Txizimu txathu, matipfelo aya ma hi mahako hi dhumisa ditina dakwe ni nduma yakwe.
20-26 KA MAIO
TITHOMBA TA MU KA DIPSWI DA TXIZIMU | 2 VAKORINTO 11-13
“Paulo a timisete ‘m’pa ha mmidini’”
w08 15/6 3-4
Mtamo ti si nga ni mhaka ni kutandeka
Dilanda dimwani do thembeka i ku mpostoli Paulo, di kombete Jehovha ti to e di thavisa “m’pa ha mmidini,” i nga ti txikarato txo pinda-pinda. A kombete kuraru ti to e thaviselwa txiduko txonetxo. Ti si nga ni mhaka ni ti to i ti mpando muni awu wu nga fananiswa ni m’pa, wona wu ndina maha Paulo e luza litsako ka mthumo wakwe ka Jehovha. Paulo a fananisile txiemo txiya ni ku peketelwa mbimo yotshe. Xamulo ya Jehovha i ve yiya: “Kateko yangu yi ku enelete. Nguko, mtamo wangu wu ti komba ngu kuhetiseka ahawa ku ku ni kutandeka.” Jehovha kha thavisa m’pa wule ha mmidini kwakwe. Tilavile Paulo e wonisana nawo, kambe a ti khene: “Mbimo yi ni pfako kutandeka, nguyo mbimo ni ku ni mtamo.” (2 Vak. 12:7-10) A ti lava kuwomba txani?
w06 15/12 24 ¶17-18
Jehovha a ninga “moya wakwe wo sawuleka ka vale va mkombelako”
Txi txi xamula mikombelo ya Paulo, Txizimu txi wombile tiya: “Kateko yangu yi ku enelete. Nguko, mtamo wangu wu ti komba ngu kuhetiseka ahawa ku ku ni kutandeka.” Paulo a ti khene: “Ngu toneto, ani ni dhunda ku ti dhumisa ngu kutandeka kwangu, kasiku ni na mana kuvhunwa ngu mtamo wa Kristu.” (2 Vakorinto 12:9; Masalmo 147:5) Ngu nzila yiya, Paulo a ti pfisisile ti to ngu mhaka ya Kristu, a ti vhikeletwe ngu Txizimu ku nga ditenda. Ni nyamsi, Jehovha a xamula mikombelo yathu ngu nzila yi yi fanako. Ene wa ningela wuthavelo ti to e vhikela malanda akwe.
Ditshuri ti to ditenda kha di nge emise mati ma txiwa mwendo moya wa hombe, kambe da vhikela ka silo soneso. Ngu nzila yi yi fanako, wuthavelo wu hi ningwako ngu “mtamo wa Kristu” kha wu tsiveli sikarato mwendo siduko. Kambe wuthavelo wonewo wa hi vhikela ngu didhawa da moya ka mixaselo yi yi tako ngu ka mafu awa ni ka mfumi wa ona Sathani. (Mtuletelo 7:9, 15, 16) Ngu toneto, hambi u txi lwisana ni txiduko txo kari atxi txi si pindiko, tsaniseka ti to Jehovha wa kuwona kulwa kwako ni ku wa xamula “dipswi da kudila kwako.” (Isaya 30:19; 2 Vakorinto 1:3, 4) Paulo a bhate tiya: “Txizimu txi thembekile, kha txi na kutumela ti to mi txi dukwa ngu si si ku txitimwi ka mtamo wanu. Aniko, ngako txiduko txi txi mi tela, a na mi ninga nzila ya kupona ka txona, ni mtamo wa ku txi rwala.”—1 Vakorinto 10:13; Vafilipiya 4:6, 7.
“A ninga mtamo ka wule a nga karala”
Lera Isaya 40:30. Hi gonda txani? Hi gonda ti to ku ni to tala ati hi ti kotako kumaha, kambe hi nga totshe hi nga mahako ngu mtamo wathu. Mpostoli Paulo a ti ni wusikoti wo maha to tala, kambe ene a si na kusikota kumaha totshe ati a tilavako. Mbimo yi a nga maha mkombelo, Jehovha a ti khene: “Mtamo wangu wu ti komba ngu kuhetiseka ahawa ku ku ni kutandeka.” Paulo a ti pfisisile ati Jehovha a nga mu gela. Ngu toneto a nga khene: “Mbimo yi ni pfako kutandeka, nguyo mbimo ni ku ni mtamo.” (2 Vak. 12:7-10) Ti womba txani toneto?
Paulo a ti tiziva ti to hi nga totshe ati ene a nga mahako ngu mtamo wakwe dwe. Ti ti lava e ningwa mtamo ngu Txizimu. Ene a ndina mana mtamo ngu moya wo sawuleka mbimo yi a ku ni dikhodho. Se wona wu ndina maha to tala. Moya wo sawuleka, wu ndina ninga Paulo mtamo wo maha ati a nga ti si na kutikota ngu mtamo wakwe. Nathu ti nga mahisa toneto. Moya wo sawuleka wa Jehovha wu nga hi ninga mtamo!
Lavetela tithomba ta moya
Tixamulo ta siwotiso sa vagondi
“Nzuma ya wuraru” yi wombwako ka 2 Vakorinto 12:2, ti nga maha i di Mfumo wa Mesiya awu ku no fuma Jesu Kristu kumweko ni va 144.000, i ku “tinzuma ta tiphya.”—2 Pedro 3:13.
Nzuma yoneyo nja “wuraru” nguko i Mfumo wu wu nga guleka kupinda yotshe.
“Paradhise” ayi Paulo a nga “hukwa” eya ka yona ti nga maha i ti 1) paradhise yi yi no vaho ha mafuni, 2) paradhise ya moya yi yi no vaho ka mbimo yi yitako, ayi yi no tava ya hombe kupinda paradhise ya moya ya konku ni 3) “paradhiseni ka Txizimu” nzumani. Otshe ma na maneka ngu mbimo yimweyo ka mafu a maphya.
it-2 p.177
Kupswopswana
“Kupswopswana ko sawuleka.” Ka Makristu o khata, ku ti ni “kupswopswana ko sawuleka” (Var 16:16; 1 Vak 16:20; 2 Vak 13:12; 1 Vat 5:26) mwendo “kupswopswana ka lirando” (1 Ped 5:14), kutilava ku ti mahwa ngu vathu va limbewu limwelo. Malosanelo ayawa a Makristu o khata, ti nga maha i ti mtolovelo wa Vahebheru wo losa vathu ngu kupswopswa. Hambiku Bhiblia yi si wombiko to tala ngu “kupswopswana ko sawuleka” mwendo “kupswopswana ka lirando,” ti nga maha ku ti kombisa lirando lo tsana ni wumwewo awu wu nga ti tiho ka dibanza da Wukristu.—Joh 13:34, 35.
27 KA MAIO–2 KA JUNHO
TITHOMBA TA MU KA DIPSWI DA TXIZIMU | VAGALATIYA 1-3
“Ni tsani ni txi m’konama khohe ni khohe”
Ina u ni mawonelo a Jehovha ngu wululami?
Lera Vagalatiya 2:11-14. Pedro a vite ni dizowa ni vathu. (Mav. 29:25) Pedro a ti ma ziva mawonelo a Jehovha ngu vathu va matiko. Kambe ene a ti thava ti to Vajudha vo ta ngu Jerusalema, va ndina pimisa ta walo aku a nga ti ti tshanganisa ni vathu va matiko. Mpostoli Paulo a gete Pedro ti to wa khata ku va mkanganyisi. Ngu ku txani? Nguko a ti pfite mbimo yi Pedro a nga emela vamatiko ka mtshangano wa Jerusalema ngu 49. (Mith. 15:12; Vag. 2:13) Makristu ya i nga ti vamatiko, aya Pedro a nga ma emelela ma ndina angulisa ku txani? Ina matumelete mhaka yoneyo yi daya wuxaka wawe ni Jehovha? Ina Pedro a luzeketwe ngu malungelo akwe ngu mhaka ya txionho txakwe?
w13 15/3 5 ¶12
Ka va va dhundako Jehovha, “kha ku na txikhuvekiso”
Pedro a kombisile kuthava vathu, mbimo yimwani a ti maha phazamo ya hombe; hambi keto a simamile a di thembekile ka Jesu ni ka Jehovha. Ngu txikombiso, a landute M’gondisi wakwe ha kubasani, i si nga dikhambi dimwedo kambe mararu. (Luka 22:54-62) Ngu kutsimbila ka mbimo a ñote Makristu a vamatiko ngu nzila yo mbi nga ya Wukristu, e kombisa ti to hi nga a manene kufana ni Makristu a Vajudha aya ma nga yiswa wukwerani. Kambe mpostoli Paulo a woni mhaka ngu nzila ya yinene—ku si na txivangelo txo hambanisa tixaka hagari ka dibanza. Mawonelo ya Pedro i ti a walo. Paulo a layile Pedro khohe ni khohe na mawonelo akwe ma si se gumisa wumwewo dibanzani. (Vag. 2:11-14) Ina Pedro a pandisekile aha koza e godhola ka mphikizano wa wutomi? Ahi-him. Ene a wu tekete ha msungo mlayo wa Paulo ni ku wu londisa, se e simama ka mphikizano wa wutomi.
Lavetela tithomba ta moya
w14 15/9 16 ¶20-21
Thumela Txizimu ngu kuthembeka ti si na mhaka ni sikarato so tala
Kuwombwa txani ngu mixaselo ya tshofu? Ngu txikombiso, hi nga ku xulisa kutxani kuguma mtamo? Yimweyo ya tinzila ta lisima, ngu alakanyisisa ngu mtirulo. Ngu toneto mpostoli Paulo a nga maha. Mbimo yimwani a ti tipfa i si nga wa txilo. Kambe a ti ti ziva ti to Kristu kha fela vathu vo hetiseka, kambe vaonhi. Se ene i ti mmweyo wa vaonhi vonevo. Ngu toneto, a bhate tiya: “Ni hanya ngu kukholwa ka Mwanana wa Txizimu, awu a nga ni randa, a txi ti ningela ngu ngani.” (Vag. 2:20) Ngu ditshuri, Paulo a amukete mtirulo. A ti pfisisile ti to mtirulo wu ti thumela ene apune.
Kuva ni mawonelo ya ma fanako—u teka mtirulo i di ningo yako ayi Jehovha a nga ninga awe ngu kukongoma—ti nga kuvhuna. Eto kha ti wombi ti to kuguma mtamo ku no kuluveta ku nyamalala. Ti nga maha vamwani kwathu ve lwisana nako kala ka mafu a maphya. Kambe u nga divale: Ava va no ningwa hakelo ngu va va no mbi karala. Se hi hafuhi ngutu ni ditshiku do sawuleka i ku mbimo yi Mfumo wa Txizimu wu no tisa kudikha ni kuhetiseka ka vathu vo lulama. Tiemisele ku ta wulela ka Mfumo wonewo—hambi u txi manana ni sikarato so tala.
it-1 p.880
Dipapilo di di yako ka Vagalatiya
Txikhalo txa Paulo atxi txi ku: “Vagalatiya, maphuphulunu,” kha txi kombisi ti to a ti pimisa ngu lixaka la vathu, ava ngu kukongoma i ku va wuphemba ka Galatiya. (Vag 3:1) Kuhambana nito, Paulo a ti laya vamwani ka mabanza a kheya nguko va nga ti tumela ku kuzetelwa ngu vagondisi va sihena sa Txijudha ava va nga ti hagari kwawe, ava va nga ti tsanisekisa wululami wawe ngu lulamiselo ya mlayo wa Mosi, i si nga ngu “mtamo wa likholo” a li li nga tiswa ngu txitumelelano txa txiphya. (2:15–3:14; 4:9, 10) Ngu kuya ngu lixaka, “mabanza a Galatiya” (1:2) i ku ya Paulo a nga ma bhalela, ma ti patelani, Vajudha ni va i nga si nga Vajudha ngu mtumbuluko kambe va di yite wukwerani kumweko ni vamatiko va va nga mbi ya wukwerani, ni ku vamwani i ti va celta. (Mith 13:14, 43; 16:1; Vag 5:2) Votshe va ti dhanwa ku Makristu a Galatiya nguko wukhalo wu va nga ti zumba ka wona wu ti dhanwa ku i Galatiya. Didungula da dipapilo da Paulo di tiya ka vale va nga ti wulambwe ka txigava txa Roma, i si nga ka vale va nga ti maneka wuphemba, i ku va a nga ti si khali ku va endela.