1. Vangana ava u va sawulako va nga ku kuzetelisa kutxani?

Ngako hi txi heta mbimo hi txi bhula ni m’thu ka internet mwendo hi di nayo wukhalo wumwewo ti nga maha hi tekelela mahanyelo akwe. Eto ti womba to hi nga m’tekelela ka tatinene mwendo ka to biha. Ngu toneto Bhiblia yi wombako yi txi: “Hanya ni titxhari u na txhariha, aniko mngana wa siphukuphuku [i ku va va si randiko Jehovha] a na xaniswa.” (Mavingu 13:20) Vangana ava va randako Jehovha ni ku m’thumela va nga hi vhuna ti to hi va hafuhi nayo, ni kumaha sisungo sa sinene. Kambe vangana va va si dhundiko Jehovha va nga hi hambanisa nayo. Ngu toneto Bhiblia yi hi kuzetako kusawula vangana ngu wutxhari. Ngako vangana vathu va txi thumela Jehovha ha wuyelwa athu ni vona. Hotshethu ha kota ku ‘thavelelana hi txi akisana.’—1 Vatesalonika 5:11.

Jehovha a hi ningile ningo ya lisima ngutu i ku kuwomba-womba. Ina nda lisima kwakwe nzila yi hi thumisako ngu yona ningo yoneyo? Ngu ditshuri nda lisima! (Lera Jakobe 1:26.) Se hi nga yi thumisisa kutxani ningo yiya ngu nzila ayi yi nga tsakisako Jehovha?

1. Hi nga ma thumisisa kutxani mapswi athu ngu nzila ya yinene?

Bhiblia yi womba ti to “thavelelanani mi txi akisana.” (1 Vatesalonika 5:11) Ina ku ni m’thu wu u mpimisako a lavako kutsaniswa? U nga maha txani ti to m’thu eneyo e tipfa kwati? M’gele to wa khatala ngu ngene. Mwendo ku m’ndunduzela ngu tifanelo takwe ta tinene. Ni ku ti ngo txani u thumisa m’bhalo ti to u mtsanisa? Ku ni tindimana to tala ati u nga ti sawulako. Ni ku, khumbula ti to nzila yi u womba-wombako ngu yona yi nga gwesa m’thu awu u womba-wombako nayo. Ngu toneto zama kuwomba-womba ngu nzila ya yinene ni yo thutha.—Mavingu 15:1.

2. Ngu yahi mawomba-wombelo aya hi fanelako ku ma vayilela?

Bhiblia yi womba tiya: “Di nga thuki di huma dipswi da tingana ngu sisofuni kwanu.” (Lera Vaefesu 4:29.) Eto ti womba ti to kha ha fanela ku thumisa mapswi a nzambwa mwendo o thola aya ma nga khuvekisako m’thu mmwani. Hahanze keto hi fanete hi vayilela manzenze ni makuhu.—Lera Mavingu 16:28.

3. Nji txani txi no hi vhuna ku hi va ni mawomba-wombelo a manene?

Makhambi o tala ati hi womba-wombako ngu ti ti ku mbiluni ni ka mialakanyo yathu. (Luka 6:45) Ngu toneto hi fanete ku ti karatela kupimisa ngu timhaka ta tinene totshe ti i ku ta kululama, totshe ti ti dhundekako, ni totshe ti i ku ta mahanyelo a manene ni ku dhumiseka. (Vafilipiya 4:8) Kasi ku toneto ti koteka nda lisima ku hi sawula kwati misakano ni vangana va vanene. (Mavingu 13:20) Ni ku nda lisima ku hi khata ngu kupimisa hi si se womba-womba. Alakanya ngu nzila yi mapswi a wena ma nga gwesako ngu yona vamwani. Bhiblia yi womba tiya: “Vaho vo kari mapswi awe ma ku nga tshoka ya ditxhari, aniko mawomba-wombelo a txhari mbutomi.”—Mavingu 12:18.

ENGETELA WUZIVI WAKO

4. Ti wonele ka ti u ti wombako

Mbimo yimwani hi nga gwita hi ti sola ka ti hi nga ti womba. (Jakobe 3:2) Lera Vagalatiya 5:22, 23, mi gwita mi bhula ngu txiwotiso txiya:

• Ngu tihi tifanelo ta tinene ati u nga ti kombelako ka Jehovha ti to u va ni mawomba-wombelo a manene? Tifanelo toneto ti nga kuvhunisa kutxani?

Lera 1 Vakorinto 15:33, mi gwita me bhula ngu txiwotiso txiya:

• Vangana ni misakano ayi hi yi sawulako si nga gwesa mawomba-wombelo athu ngu nzila yihi?

Lera Ekleziyaste 3:1, 7, mi gwita mi bhula ngu txiwotiso txiya:

• I mbimo muni hi fanelako kusimama hi di malate hi emela mbimo ya yinene yo womba-womba?

5. U nga womba-wombe kubiha ngu vamwani

VHIDHIYO: Womba-womba a ti ti akako vamwani (4:07)

• Ka vhidhiyo nji txani a txi txi nga maha mwanathu e lava kutxitxa nzila yi a nga ti womba-womba ngu yona ni vamwani?

• A mahile txani kasi ku e txitxa?

Lera Ekleziyaste 7:16, mi gwita mi bhula ngu txiwotiso txiya:

• Nji txani atxi hi fanelako ku txi alakanya ngako hi txo thuka hi navela kuwomba-womba kubiha ngu vamwani?

Lera Ekleziyaste 7:21, 22, mi gwita mi bhula ngu txiwotiso txiya:

• Ndimana yiya yi nga kuvhunisa kutxani ku u si karateki ngako vamwani va txi womba-womba kubiha ngu ngawe?

6. Womba-womba ni va mwaya wako ngu nzila ya yinene

VHIDHIYO: Lirando ni txixonipho si maha ti to mwaya wuva ni wumwewo (3:08)

• Nji txani txi nga ku vhunako ti to u womba-womba ngu nzila ya wunene ni va mwayani kwako?

Lera Vaefesu 4:31, 32, mi gwita mi bhula ngu txiwotiso txiya:

• Ngu yahi mawomba-wombelo aya u nga ma thumisako kasi ku va mwayani kwako ve tipfa va txi dhundwa?

Jehovha a wombile ti to wa m’dhunda mwanana wakwe Jesu. Lera Matewu 17:5, mi gwita mi bhula ngu txiwotiso txiya:

• U nga mu etetelisa kutxani Jehovha mbimo yi u womba-wombako ni va mwayani kwako?

ATI HI NGA TI WONA

Mapswi ma ni mtamo. Ngu toneto ti lava hi pimisa kwati ngu ti hi no tiwomba, mbimo yi hi no ti womba ngu yona, ni nzila yi hi no womba ngu yona.

Ngu tihi ti hi nga ti gonda

• U nga va vhunisa kutxani vamwani ngu nzila ayi u womba-wombako ngu yona?

• Ngu yahi mawomba-wombelo aya u lavako ku ma vayilela?

• Nji txani txi txi nga hi vhunako ti to mbimo yotshe hi kombisa wunene ni kutsanisa vamwani ngu mapswi athu?

XOTA TIMWANI

Nji txani txi nga hi vhunako ti to hi womba-womba ngu nzila ya yinene?

Thumisa lidimi lako ngu nzila ya wutxhari (8:04)

Wona atxi txi nga ku vhunako ti to u si womba-wombi mapswi o nyenyeza.

“Ina ti ni phango kuwomba-womba mapswi o nyenyeza?” (Msungo mhaka wu ku ka site)

Wona nzila yi u nga vayilelako ngu yona kubwabwata kubiha ngu vamwani.

Ni nga ma vayilelisa kutxani manzenze? (2:36)

Wona nzila yi Jehovha a nga vhuna ngu yona wamwamna wo kari kuleka ku womba-womba mapswi o nyenyeza.

“Ni khatile kuwona nzila yi toneto ti nga txi gwesa ngu yona wutomi wangu” (Muwoneleli wa 1 ka Agosto wa 2013)