Vathu vavangi kha va ti dhundi kuwomba-womba ngu timhaka ta mataho. Hambiketo Bhiblia ya womba-womba ngu mhaka yiya ni ku yona yi womba-womba ngu nzila ya txixonipho. Ati yi ti wombako ta hi wuyelisa. Eto ta pfisiseka nguko aku Jehovha i ku M’vangi wathu wa ti ziva ati i ku tatinene kwathu. Ene wa hi gela ati hi fanelako kumaha ti to hi m’tsakisa ni ti ti no hi vhuna ku hi zumba hi di tsakile mbimo yotshe.

1. Ngu yahi mawonelo a Jehovha ngu timhaka ta mataho?

Timhaka ta mataho i ningo ayi yi tako ngu ka Jehovha. Jehovha a lava ti to timhaka ta mataho ti mahwa ngu wamsikati ni wamwamna ava va nga txhadha kumweko dwe. Ningo yiya kha ya mahelwa ti to ava va nga txhadha ve va ni vanana dwe, kambe yi maha ni ti to ava va nga txhadha ve kombisana lirando ali mmwani ni mmwani a ku nalo ngu mkwawe ngu nzila ya mtumbuluko ni yo tsakisa. Ngu toneto Dipswi da Txizimu di wombako tiya: “Tsakiswa ngu msikati wa wuphya wako.” (Mavingu 5:18, 19) Jehovha a lava ti to wamwamna ni wamsikati ve thembana, ngu toneto Mkristu kha fanela kumaha wugango.—Lera Vahebheru 13:4.

2. Ti womba txani kutiñola ngu nzila yo biha ngu ta mataho?

Bhiblia yi womba ti to ‘vagelezi . . . kha va na ku si kota kudya thomba ya mfumo wa Txizimu.’ (1 Vakorinto 6:9, 10) Bhiblia yi thumisa dipswi da Txigriki adi di ku por·neiʹa yi txi womba kutiñola ko biha ngu ta mataho. Dipswi diya di pata 1) ku vathu ava va nga mbi txhadha va txi maha ta matahoa, 2) kumaha ta mataho ni mwamna kuloni mwendo ni msikati kuloni ni 3) kuotela ni sihari. Ngako hi “txi tshuralela txionho txa wugango,” hi na wuyelwa ni ku hi na tsakisa Jehovha.—1 Vatesalonika 4:3.

ENGETELA WUZIVI WAKO

3. Vayilela kutiñola ko biha ngu ta mataho

Josefa i nga ti wamwamna wo thembeka a lwite ti to eva ni mahanyelo a manene. Lera Genesisi 39:1-12, mi gwita mi bhula ngu siwotiso siya:

• Ngu kutxani Josefa a di tutumile? —Wona vhersikulo 9.

• U pimisa ti to Josefa a mahile txisungo txa txinene? Ngu kutxani?

VHIDHIYO: Thava wugango (5:06)

Jehovha a lava ti to hi vayilela wugango. Lera 1 Vakorinto 6:18, mi gwita mi bhula ngu siwotiso siya:

• Ngu sihi siemo asi si nga mahako m’thu e wela ka txionho txa wugango?

• U nga wu vayilelisa kutxani wugango?

4. Awe u nga si xula siduko

VHIDHIYO: Xula siduko ngu kulera Bhiblia (3:02)

• Ngu tihi ati mwanathu awu hi nga m’wona ka vhidhiyo a nga ti maha mbimo yi a nga wona to simaho sakwe ni mipimiso yakwe si nga mmaha a si thembeki ka msikati wakwe?

Mbimo yimwani hambi Makristu aya ma nga thembeka ti nga lava me lwa ni mipimiso yo biha. Nji txani txi no kuvhuna ku u si zumbeli kupimisa ngu timhaka ta mataho? Lera Vafilipiya 4:8, mi gwita mi bhula ngu siwotiso siya:

• Ngu tihi ati hi fanelako kuzumba hi txi ti pimisa?

• Kugonda Bhiblia ni kuzumba hi di ñolekile ka mthumo wa Jehovha, ti nga hi vhunisa kutxani ku hi xula siduko?

5. Milayo ya Jehovha ya hi wuyelisa

VHIDHIYO: M’thu wo kelelelwa ngu mapimo (9:31)

• I ngu nzila yihi dijaha diya di nga ti beta ka txiduko?—Wowa Mavingu 7:8, 9.

• Ngu kuya ngu Mavingu 7:23, 26, kutiñola ko biha ngu ta mataho ti nga hi tisela wuyelo yo panda. Se ngako hi txi tiñola ngu nzila ya yinene, hi si mahi wugango, ngu sihi sikarato asi hi nga si vayilelako?

• Kuva ni mahanyelo a manene ti nga hi vhunisa kutxani ti to hi tidila ngu wutomi ngu ha ku si gumiko?

Vamwani va pimisa to ati Bhiblia yi ti wombako ngu kutekana ka wamwamna ni wamwamna kulowe, wamsikati ni wamsikati kulowe hi nga tatinene. Kambe Jehovha Txizimu txa lirando ene a lava ti to hi zumba hi di tsakile mbimo yotshe. Ti to toneto ti koteka ti lava hi hanya ngu kuya ngu ti a hi gondisako. Lera 1 Vakorinto 6:9-11, mi gwita mi bhula ngu txiwotiso txiya:

• Ina kumaha ta mataho wamwamna ni wamwamna kulowe, wamsikati ni wamsikati kulowe ngu toneto dwe Jehovha a ti nyenyako?

Ti to hi tsakisa Txizimu, hotshethu ti lava hi maha kutxitxa ko kari ka wutomi. Ina mizamo yoneyo ya vhuna? Lera Masalmo 19:8, 11, mi gwita mi bhula ngu siwotiso siya:

• U pimisa to milayo ya Jehovha ya mahanyelo ya vhuna? Ngu kutxani?

ATI HI NGA TI WONA

Kumaha ta mataho ka mwamna ni msikati ava va nga txhadha i ningo ayi yi tako ngu ka Jehovha ayi yi va tiselako litsako.

Ngu tihi ti u nga ti gonda

• Ti pata txani kutiñola ko biha ngu timhaka ta mataho?

• Nji txani txi nga hi vhunako ku hi vayilela kumaha wugango?

• Ngu yihi wuyelo yo engisa milayo ya Jehovha ya mahanyelo?

XOTA TIMWANI

Wona to ngu kutxani i di ta lisima ku wamwamna ni wamsikati ve zumba kumweko va di txhadhile.

“Ngu tihi ati Bhiblia yi ti wombako mayelano ni kuzumba kumweko mi sa txhadha?” (Msungo mhaka wu ku ka site)

Wona to hambiku Bhiblia yi wombako to kumaha timhaka ta mataho ni m’thu wa limbewu li li fanako ti bihile, ngu kutxani eto ti si wombi kunyenya ava va mahako toneto.

“Ina ti bihile ku vathu va limbewu limwelo ve maha ta mataho?” (Msungo mhaka wu ku ka site)

Wona nzila yi milayo ya Txizimu mayelano ni ta mataho yi hi vhikelako ngu yona.

“Ina ndinene kumaha ta mataho ngu txisofu?” (Msungo mhaka wu ku ka site)

Kasi kuwona ati ti nga txitxa wutomi wa m’thu awu a nga ti maha ta mataho ni m’thu wa limbewu li li fanako, e tsakisa Txizimu, lera experiyensia atxi txi ku: “Va ni ñote ngu nzila ya yinene.”

“Bhiblia ya txitxa wutomi wa vathu” (Muwoneleli wa 1 ka Abril wa 2011)

Ka makhalo mamwani, vathu vamwani va pimisa ti to u ngo mana litsako basi ngako u txi txhadha. Kambe hi nga votshe ava va nga txhadha va manako litsako ni ku hi nga votshe ava va nga mbi txhadha va si maniko litsako. Bhiblia yi womba ti to kuva u di txhadhile ni kuva u sa txhadha i ningo ayi yi tako ngu ka Jehovha.

1. Ngu yihi wuyelo ayi yi manwako ngu va va nga mbi txhadha?

Bhiblia yi womba tiya: “Awu a txhadhako a maha ta tinene. Kambe awu asi txhadhiko, a maha ti i ku ta tinene ngutu.” (Lera 1 Vakorinto 7:32, 33, 38, NM.) M’thu awu a nga mbi txhadha “a maha ti i ku ta tinene ngutu” ngu nzila yihi? Makristu aya ma nga mbi txhadha kha ma karateki ngutu ngu kukhatalela silaveko sa mwamna mwendo sa msikati. Ngu toneto vona va ni mkhululeko wa hombe. Vona va nga londola mbimo yi va ku nayo kasi kuengetela mthumo wawe wo txhumayela, hambi kuenda ve ya ka matiko mamwani kasi ku ya txhumayela mahungu a manene. Kambe txa lisima ka totshe vona va ni mbimo yo tala yo tsanisa wuxaka wawe ni Jehovha.

2. Ngu yihi wuyelo yo bhalisa mtxhadho ka wukoma?

Kutxhadha ni kwa mbi txhadha, totshe ta tisa wuyelo ya yinene. Bhiblia yi womba tiya: “I tshuko kuva vambidi kupinda mmweyo.” (Ekleziyaste 4:9) Eto ditshuri, ngutu-ngutu ka Makristu aya ma londetelako sialakanyiso sa Bhiblia ka wukati wawe. Ngako wamwamna ni wamsikati va txi txhadha ngu mlayo wa wukoma, vona va maha txixambanyo txa ti to va na randana, kuxoniphana ni ku khatalelana. Vona va tipfa va di vhikelekile ka wukati wawe kupinda ava va ko hanya votshe va sa txhadha. Tximwani ngu ti to vanana vawe va kula va di vhikelekile.

3. Ngu yahi mawonelo a Jehovha mayelano ni mtxhadho?

Mbimo yi Jehovha a nga wumba mtxhadho wo khata, a wombile tiya: “Wamwamna a na leka tate wakwe ni mame wakwe, eya ti patanisa ka msikati wakwe.” (Genesisi 2:24) Jehovha a lava ti to mwamna ni msikati ve randana ni kuzumba votshe kala ve hambaniswa ngu lifo. Ene a tumelela ti to wamwamna ni wamsikati ve daya wukati ngako mmweyo wawe a di mahile wugango. Ka mhaka yiya Jehovha wa tumela ti to awu a nga onhelwa e sawula to wa daya wukati mwendo nem.a (Matewu 19:9) Jehovha kha tumeli ti to Makristu me va ni ligota i ku kuva ni wamwamna mwendo wamsikati wo pinda mmweyo.—1 Timoti 3:2.

ENGETELA WUZIVI WAKO

4. Ava va nga mbi txhadha, va nga yi thumisisa kutxani mbimo yawe ngu nzila ya yinene?

Ka Jesu i ti lungelo ya hombe kwa mbi txhadha. (Matewu 19:11, 12) Lera Matewu 4:23, mi gwita mi bhula ngu txiwotiso txiya:

• Jesu a yi thumisisile kutxani ningo yakwe ya kwa mbi txhadha ti to e thumela Tate wakwe ni kuvhuna vamwani?

Makristu aya ma nga mbi txhadha ma nga etetela txikombiso txa Jesu. Xalela VHIDHIYO, mi gwita mi bhula ngu txiwotiso atxi txi londiselako.

VHIDHIYO: Vanathu vo thembeka ava va nga mbi txhadha (3:11)

• Mkristu awu a nga mbi txhadha a nga wu thumisisa kutxani mkhululeko awu a ku nawo ka mthumo wa Jehovha?

Ina u ti ti ziva?

Bhiblia kha yi wombi to m’thu a fanete kutxhadha a di ka tanga muni. Hambiketo yona yi kuzeta ti to a nga rinzela kala ka ‘tanga ya ku tekwa’ i ku mbimo yi kunavela ka timhaka ta mataho i si ngako ka hombe ha koza ku khulumetela wuzivi wa m’thu.—1 Vakorinto 7:36.

5. Sawula kwati awu u no txhadha nayo

Kusawula m’thu wu u no txhadha nayo tximwetxo txa sisungo sa lisima ka wutomi wako. Lera Matewu 19:4-6, 9, mi gwita mi bhula ngu txiwotiso txiya:

• Ngu kutxani Mkristu a sa fanela kututumela kutxhadha?

Bhiblia yi nga kuvhuna kuwona to ngu yahi mahanyelo aya wamwamna mwendo wamsikati a fanelako kuva nawo. Kambe txa lisima ngutu ngu va m’thu wa kona a txi randa Jehovha.b Lera 1 Vakorinto 7:39 ni 2 Vakorinto 6:14. Mi gwita mi bhula ngu siwotiso siya:

• Ngu kutxani Mkristu a di fanete kutxhadha ni wu a khozelako Jehovha?

• U pimisa to Jehovha a nga ti pfisa kutxani ngako hi txo txhadha ni m’thu awu asi m’khozeliko?

6. Vana ni mawonelo a Jehovha ngu mtxhadho

Ka mbimo ya Vaisrayeli vavamna va ti leka vasikati vawe ngu sivangelo so mbi pfisiseka. Lera Malakiya 2:13, 14, 16, mi gwita mi bhula ngu txiwotiso txiya:

• Ngu kutxani Jehovha a txi nyenya kudaya wukati ngu txivangelo atxi txi nga mbi seketelwa ka Bhiblia?

Xalela VHIDHIYO, mi gwita mi bhula ngu txiwotiso atxi txi londiselako.

VHIDHIYO: Mtxadho mbwa mbimo yotshe (4:30)

• Ngako mwamna mwendo msikati wako a si thumeli Jehovha, u nga maha txani ti to u mana litsako ka wukati wanu?

7. Thumisa ati Jehovha a ti wombako ngu mtxhadho

VHIDHIYO: Thumisa ati Jehovha a ti wombako ngu mtxhadho (4:14)

Lera Vahebheru 13:4, mi gwita mi bhula ngu siwotiso siya:

• Ngu kuya ngu mawonelo ako, u pimisa ti to ta koteka kuthumisa ati Jehovha a ti wombako ngu mtxhadho? Ngu kutxani?

Ka matiko o tala mfumo wu lava ti to vathu ve ya sinara ngako va txi daya wukati. Jehovha a lava ti to Makristu me engisa mlayo wonewo. Lera Titosi 3:1, mi gwita mi bhula ngu txiwotiso txiya:

• Ngako u di tekile mwendo kutekwa, ina wa tsaniseka ti to mtxhadho wako wu ha mlayoni?

ATI HI NGA TI WONA

Kutxhadha ni kwa mbi txhadha i ningo ayi yi tako ngu ka Jehovha. Ava va nga txhadha ni va va nga mbi txhadha va nga mana litsako ni kueneliseka ngako va txi hanya ngu kudhunda ka Jehovha.

Ngu tihi ti u nga ti gonda

• Awu a nga mbi txhadha a nga yi thumisisa kutxani mbimo yakwe ngu nzila ya yinene?

• Ngu kutxani Bhiblia yi txi womba to hi fanete kutxhadha basi ni m’thu awu a khozelako Jehovha?

• Ngu txihi txivangelo tximwetxo txo daya wukati atxi txi nga seketelwa amu ka Bhiblia?

XOTA TIMWANI

Tiwomba txani kutxhadha ngu kuya “ngu mlayo wa Mkoma?”

“Tixamulo ta siwotiso sa vagondi” (Muwoneleli wa 1 ka Julho wa 2004)

Xalela mavhidhiyo mambidi aya ma no kuvhuna kumaha sisungo sasinene mayelano ni kunamorara ni kutxhadha.

Ka wu a pimisako kutxhadha (11:53)

Ngu kutxani mwanathu mmwani a di woni to Jehovha a m’ningile thomba ya lisima kupinda asi a nga si siya msana?

Ani ni txi themba ti to ene a na gonda Bhiblia (1:56)

Ngako m’thu a txi pimisa ngu kudaya wukati mwendo kuhambana, ngu tihi ati a fanelako ku ti khumbula?

“Veka txithavo ka si ‘Txizimu txi nga si tshanganisa’” (Muwoneleli wa Dezembro wa 2018)