Ina wa ti tsakela kuamukela vapfhumba?

1. Ngu sihi sikarato asi Makristu a kale ma nga ti naso?

HAGARI ka dilembe da 62 ni 64, mbimo yimwani mpostoli Pedro a bhalete “valuveli va va nga hangalaka matikoni ka Ponto, ni Galatiya, ni Kapadhokiya, ni Asiya ni Bhitiniya.” (1 Pedro 1:1) Vanathu vonevo va ti ta ngu ka makhalo o hambana. Vona va ti xaniswa ngu “mndilo wa kudukwa” mwendo kuxaniswa, se ku ti laveka mapswi o tsanisa ni mkongomiso. Ka masiku awe, wutomi wu ti karata ngutu. Pedro a ti khene: “Magwito a sotshe simaha ma hafuhi.” Didhoropa da Jerusalema di ndina khundumuswa ku si se pinda digumi da malembe. Ka masiku onewo o karata,njitxani txi ndi no vhuna Makristu ka makhalo ya ma nga ti ka ona?​—1 Pedro 4:4, 7, 12.

2, 3. Ngu kutxani Pedro a di layile vanathu ti to ve ziva kuamukela vapfhumba? (Wona mfota wu wu ku makhatoni.)

² Mhaka yimwani ayi Pedro a nga laya vanathu ku ve yi maha i ti ‘kuziva kuamukelana mbimo yi va endelanako.’ (1 Pedro 4:9) Ngu Txigriki, “kuziva kuamukela vapfhumba” ti womba “kutsakela, mwendo wunene, ka valuveli.” Kambe Pedro a ti gela vanathu ti to ve ‘amukelana’, hambiku va nga ti zivana ve tshumela ve thuma votshe. Kuziva kuamukelana ti ti ndina va vhunisa kutxani?

³ Ti ndina va vhuna ti to ve tolovelana. Awe ko? Ina wa khumbula litsako li u nga li mana ditshiku di mwanathu a nga khala ku kuramba mtini kwakwe? Mwendo ditshiku di awe u nga khala kuramba mwanathu mtini kwako? Mi zivanile kwati. Phela nzila ya yinene yo zivana ni vanathu ngu va ramba mtini kwathu. Makristu a mbimoni ya Pedro ti ti lava me seketelana nguko sikarato si txo ya si engeteleka. Ka “masiku akugwitisa” aya hi ku ka ona, nathu ti lava hi maha toneto.​—2 Timoti 3:1.

4. Ngu sihi siwotiso asi hi no bhula ngu sona ka msungo wuwa?

⁴ Ka msungo wuwa hi na bhula ngu siwotiso siya: Hi nga “amukelana” ngu zila yihi? Nji txani txi nga hi tsivelako kuamukela vapfhumba ni ku hi nga tshukwatisa ngu nzila yihi? Hi na vhunwa ngu txani ti to hi va vapfhumba va vanene?

MIKHANJO YO AMUKELA VAPFHUMBA

5. Hi nga va amukelisa kutxani vapfhumba hi di mitshanganoni?

⁵ Mitshanganoni: Jehovha ni sengeletano yakwe va hi ramba ti to hi ya mitshanganoni. Hi lava ti to votshe va va tako mitshanganoni ve tipfa va di txhatxhekile, ngutu-ngutu ava vo ngadi kukhata. (Varoma 15:7) Kha hi lavi ku va dhukisela, ku singa ni mhaka ni ti va nga zumbisa tona mwendo ti va nga ambalisa tona nguko ni vona mbapfhumba va Jehovha. (Jakobe 2:1-4) Ngako u txi wona m’thu a di ekha, m’dhani u ta zumba nayo. A nga tsaka ngako u txi mu vhuna kupfisisa ati mitshangano yi no tsimbilisa tona mwendo kutula Bhiblia ngu mbimo ya mitshangano. Eyo yi nga va nzila ya yinene yo “amukela vapfhumba ngu manza mambidi.”​—Varoma 12:13.

6. Mba mani ava hi felako ku va amukela ngu manza mambidi?

⁶ Ku va ramba hi ta dya txo kari mwendo kususula: Kale vathu va ti amukela vapfhumba ngu kuramba vamwani mitini kwawe ve ta va ninga sakudya, ve kombisa ti to va tilava ku va vangana vawe ni ku va ni kudikha. (Genesisi 18:1-8; Valamuli 13:15; Luka 24:28-30) Mba mani ava hi felako ku va amukela ngu manza mambidi? I vanathu va dibanzani kwathu. Aku wubihi wu ko ya masoni, hi na ti lava kuvhunwa ngu vanathu mwendo athu hi va vhuna. Ngu 2011, Mmidi wu wu Fumako wu txitxile mbimo ya Gondo ya Muwoneleli ya Bhetele ka Estados Unidos yi nga ti mahwa ngu 18:45 yi ya ka 18:15. Ngu kutxani? Txiziviso txi wombile ti to ti nga maha ti hehukela vathumi va Bhetele kukombisana kuamukelana ngako mitshangano yi txi kuluveta yi guma. Madhavi mamwani ni ona ma maha toneto. Awuwa, mkhanjo wa hombe ka mwaya wa Bhetele ti to wu zivana kwati.

7, 8. Hi nga va amukelisa kutxani vanathu va va hi endelako dibanzani?

⁷ Mbimo yimwani, vanathu vota ngu ka mabanza mamwani, vawoneleli va sigava, mwendo vaemeli va Bhetele va ningela miwombawombo dibanzani kwathu. Ewo mkhanjo wa wunene wo amukela vanathu vonevo! (Lera 3 Johani 5-8) Nzila yimwani yo amukela vanathu vonevo ngu va ramba mtini kwathu hi ta dya txo kari mwendo kususula navo.

⁸ Mwanathu mmwani wa txisikati wa Estados Unidos a ti khene: “Se ku ni malembe, ani ni mwamna wangu hi txi amukela vawombawombi vo tala ni vasikati vawe mtini kwathu.” Ene a pfite ti to timwani ni timwani ati vanathu va nga manana nato, ti tsanisile likholo lawe futhi ta tsakisa. A khene: “Kha hi na ku tisola.”

9, 10. a) Mbamani vapfhumba vo swela kutshumela? b) Ina ava va ku ni tinyumba ta tidotho ni vona va nga amukela vapfhumba? Ningela txikombiso.

⁹ Vapfhumba vo swela kutshumela: Mbimoni ya kale, ti ti tolovelekile kuninga vapfhumba wukhalo wo zumba. (Jobe 31:32; Filimoni 22) Ti nga maha nathu ti txi lava hi maha to fana. Vawoneleli va sigava va lava wukhalo wo zumba mbimo yi va endelako mabanza. Ti mahisa toneto ngu vanathu vamwani va va yako ka simwani sa sikolwa sa sengeletano kumweko ni vathumi vo tidhundela ava va thumako ko aka. Se ava va moxelwako miti yawe ngu tiphango ta mtumbuluko ko? Ni vona ti nga maha ve lava wukhalo wo zumba na va txi emela kulungisa miti yawe. Hi nge emeli ti to ve amukelwa ngu va va ku ni tinyumba ta hombe dwe. Ti nga maha se va di amukete vamwani makhambi o tala. Hambi u txo va ni txinyumbana txa txidotho, u nga va amukela!

¹⁰ Mwanathu mmwani wa Corea do Sul a khumbula mbimo yi a nga amukela ava va tako txikolwani. A ti khene: “Makhatoni ni si ti tsakeli nguko ni ti ngadi kutxhadha futhi nyumba yathu i ti yidotho. Kambe mbimo yi hi nga va amukela hi ti tsakiswa ngu kupfa ti va nga manana nato. Kota ku hi nga ti ngadi kutxhadha, hi ti woni ti to mpatwa wu nga li manisa kutxani litsako wu txi thumela Jehovha ni kulwela makungo a moya.”

11. Ngu kutxani hi di fanete kuamukela ava va kungadi kuhoka dibanzani?

¹¹ Vanathu ava va ku ngadi kuhoka dibanzani kwathu: Ti nga maha vanathu vamwani va di rurile ve ya ka dibanza dimwani. Ti nga maha va txi tela ku ta vhuneta. Mwendo ti nga maha va di rumetwe kota vanyaphandule. Kwawe, va txitxile to tala. Se va ka dibanza da diphya, wukhalo wa wuphya, ti nga maha lidimi ni lona i di liphya ni mdhawuko ni wona mbwa wuphya. U nga varamba mi ta susula motshe mwendo mi tsimbila mi sakana! Eto ti na va vhuna ku va ni vangana va vaphya ni kwa mbi nemelelwa ngu txiemo txa txiphya txi va ku ka txona.

12. Ku humelete txani atxi txi kombisako ti to kha ti sungi kulungisela so tala ti to u amukela vapfhumba?

¹² Kha ti sungi kulungisela so tala ti to u amukela vapfhumba. (Lera Luka 10:41, 42.) Mwanathu mmwani a khumbula mbimo yi ene ni msikati wakwe va nga va varumiwa ka dikhambi do khata. A khene: “Hi ti ngadi vaphya, hi singa ni wusikoti ni ku hi ti xuva mtini ni vangana. Dimwani ditshiku ni minova, msikati wangu se a ti vilela mtini, ni ti zama ku m’vhuna, kambe ti sikoteki. Se ngu ma 19:30 hi pfite wo losa. I ti m’thu a nga ti ngadi a txi gonda Bhiblia, a nga ti ta hi ninga madimwa mararu. A ti tela ku ta hoyozela varumiwa va vaphya. Mbimo yi a nga bela nyumbani, hi mu ningile kopo ya mati. Hi gwitile hi bhika txaya ni khafi. Txiswahili hi si txi zivi, se nene a si txi zivi Txingiza.” Mwanathu wuwa a khene atiya ti va vhuni ti to ve va ni vangana ni kumana litsako.

U NGA TUMELELI TXILO TXI KUTSIVELA KUAMUKELA VAPFHUMBA

13. Kuamukela vapfhumba ti nga kuvhunisa kutxani?

¹³ Ina wa kana-kana kuamukela vapfhumba? U txi kana-kana, wa luza mikhanjo yo tsakisa ni vangana va kala kupinduka. Kuamukela vapfhumba i nzila ya yinene yo thavisa txiwunda. Se ngu kutxani m’thu mmwani a txi kana-kana kuamukela vapfhumba? Ndise sivangelo simwani.

14. Hi nga mahisa kutxani ngako hi txi pwata mbimo yo amukela vapfhumba?

¹⁴ Mbimo ni mtamo: Vathu va Jehovha va zumba va di ñolekile ni ku va ni wutixamuleli wo tala. Se vamwani va nga wona ti to va nge sikoti kuamukela vapfhumba. Ti di ngeto kwako, u nga txitxa txiemiso txaku ti to u kota ku amukela vapfhumba. Eto nda lisima nguko Bhiblia yi hi laya ti to hi amukela vapfhumba. (Vahebheru 13:2) Se ndinene kuamukela vapfhumba. Kambe ti to u kombisa kuamukela vapfhumba, yimwani mbimo ti nga lava ti to u heta mbimonyana ya yidotho u txi maha ati i singako ta lisima ngutu.

15. Ngu kutxani vamwani va txi thava kuamukela vapfhumba?

¹⁵ Ati u tipfisako tona: Ina u khala kunavela kuamukela vapfhumba, kambe u wona nga u na mbi tikota? Ti nga maha u txi thava ti to vapfhumba va na mbi ta tsaka. Mwendo u nga wona nga khu nga nayo male yo xava asi vanathu vamwani va xavelako vapfhumba vawe. U nga divali, kha ti sungi ti to u va ni mti wo tshura ngutu. Nji txani txi no tsakisa vapfhumba vako? U txa nga hiyela, u veketela sotshe si zumbiseka, u tshumela awe u va ni txingana.

16, 17. U nga maha txani u txi thava kuamukela vapfhumba?

¹⁶ Ngako u txi karateka ngu kuamukela vapfhumba, hi ngawe wekha. Mwanathu mmwani wa Inglaterra awu i ku didhota a khene: “U nga thuka u karateka u txi lulamisela vapfhumba. Kambe aku ti yelanako ni kuthumela Jehovha, ti ni wuyelo yo tsakisa ayi yi pindako ngutu kukarateka kwathu. Ani se ni ti busile ngu kuzumba ni vapfhumba hi bhula hi txi peka khafi.” Mbimo yotshe, ndinene kukombisa ti to ha khatala ngu vapfhumba vathu. (Vafilipiya 2:4) Vathu vo tala va tsaka ngu kubhula ngu ti va nga manana nato ka wutomi. Hi nga ziva timwani ta wutomi wawe ngu kuva navo dwe. Didhota dimwani di wombile tiya: “Kupfuxelwa ngu vangana va dibanzani ti ni vhuna ku va ziva kwati, ngutu-ngutu ati va nga manisa tona ditshuri.” Ngako u txi kombisa ti to wa khatala ngu vapfhumba vako, tsaniseka ti to votshe va na tsaka.

¹⁷ Mwanathu mmwani wa txisikati wu i ku nyaphandule, a tolovela kuamukela vanathu va va tako txikolwani, a khene: “Makhatoni ni txi karateka nguko ni ni nyumba ya yidotho ni ku ni nga ni siya sa sipya. Msikati wa mwanathu wu i ku ene a gondisako txikolwa, ngu ditshuri a ni hehukisete. A ti khene, mbimo yi ene ni mwamna wakwe va endelako mabanza, mavhiki ya ma tsakisako ngutu ngu ya va ma hetako va di ni vathu vo dhunda timhaka ta moya ava va si khataliko ngu tithomba, va tsakako ngu si va ku naso dwe, va thumelako Jehovha va txi hanya wutomi wo hehuka. Eto ti ni khumbutisile ati mame a nga ti hi gela hi di ngadi vanana: ‘I txhuko kudya mndiwo wa mazokoro, na ku di ni lirando.’” (Mavingu 15:17) Kha ti lavi hi tigumulela, nguko ati ti lavekako ngu kombisa lirando ka vapfhumba vathu.

18, 19. Kuziva kuamukela vapfhumba ti nga hi vhunisa kutxani kuthavisa matipfelo o biha ngu vanathu?

¹⁸ Ati u ti pfisako tona ngu vamwani: Ina ku ni m’thu dibanzani awu u si mtsakeliko? Ngako u si mahi txilo to u thavisa mialakanyo yoneyo, matipfelo ako ma nambi txitxa. Khu nambi ramba m’thu wu u si mtsakeliko ti to eta mtini kwako. Mwendo ti nga maha ku di ni wu a nga kugohela kale, kambe ta ku karatela kudivala ati a nga kumahela.

¹⁹ Bhiblia yi womba to u nga va ni wuxaka wa wunene ni vamwani, hambi ni valala vako, ngako u txi ziva kuamukela vapfhumba. (Lera Mavingu 25:21, 22.) Ngako u txi ramba m’thu mtini kwako, u nga tikota kuthavisa mialakanyo yo biha ni kulwela kuva ni kudikha ni nene. U na khata kuwona tifanelo ta tinene ati Jehovha a nga tiwona mbimo yi a nga mndinda e ta ka ditshuri. (Johani 6:44) Ngako u txi ramba m’thu wu a nga ti sa tiemela kurambwa ngu ngawe, i nga va makhato a wungana wa wunene. U nga tizivisa kutxani ti to ngu ditshuri u m’ramba ngu mhaka ya lirando? Nzila yimwani ngu thumisa txialakanyiso txa Vafilipiya 2:3 txi ku khene: ‘Ngu ku ti veka hahatshi, mi nga alakanyi ti to ma pinda vamwani.’ Hi fanete hi wona tinzila ati vanathu va hi palako ngu tona. Hi nga gonda ka likholo lawe, kutimisela kwawe, mwendo fanelo yo kari ya Wukristu ayi va ku nayo. Kualakanyisisa ngu tifanelo tawe ta tinene, ti na kulisa nzila yi hi va randako ngu yona. Ti na hi hehukela ku va amukela.

VANA MPFHUMBA WA MNENE

20. Ngako hi txi amukela txirambo txa mwanathu, ngu kutxani hi di fanete kumaha ati hi nga thembisa?

²⁰ Mkoma Dhavhidha a wotisile a txi khene: “MKOMA, i mani a no zumba Dithepeleni kwako ko sawuleka kani?” (Masalmo 15:1) Dhavhidha a gwitile e womba tifanelo ati mpfhumba wa Jehovha a fanelako ku va nato. Yimweyo ya kona ngu hetisisa ati hi nga thembisa: “Awule a mahako ti a nga thembisa, hambi ene a txi luzekelwa.” (Masalmo 15:4) Ngako hi txi amukela txirambo txa mwanathu, kha ha fanela kuthindeka ngu timhaka to mbi pfisiseka. Phela ti nga maha mwanathu a di tikaratile e lulamisela so kari, se ngako hi txi thindekisa, yotshe mizamo yawe yi luzekile. (Matewu 5:37) Vathu vamwani va thindekisa txirambu txo kari ngu mhaka yo lava kuya kumwani amu va wonako ti to ka txhukwala. Ina toneto ti kombisa lirando ni txixonipho? Hi fanete hi bonga txihi ni txihi hi ningwako ngu wu a hi amukelako. (Luka 10:7) Se, ngako ti txi sunga ku hi thindeka, ti nga va tinene ku kuluveta hi zivisa awu a nga ti hi rambile.

21. Kuxonipha mtolovelo wa wukhalo ti nga hi vhunisa kutxani ti to hi va vapfhumba va vanene?

²¹ Ti ni lisima kuxonipha ati ti nga toloveleka ka wukhalo wonewo. Ka makhalo mamwani kha ti nga ni mhaka kuendela m’thu u sa m’zivisa. Kambe ka mamwani ta hambana. Ka makhalo mamwani mpfhumba a ningwa sakudya so sawuleka kupala vamwayani. Kambe mamwani kha ku na kuhambana. Ka makhalo mamwani, a txi rambwa ku ya susula, mpfhumba a fanete e ta a di ñote so kari so seketela. Kambe ka makhalo mamwani ta hambana. Ka midhawuko yimwani, awu a rambwako wa lamba ngu nzila ya yinene a txi rambwa ko khata ni ka wumbidi. Kambe kumwani, ti bihile kulamba u txi rambwa do khata. Hi fanete hi maha totshe ti hi nga tikotako kasiku hi tsaniseka ti to ava va nga hi ramba va na hi tsakela.

22. Ngu kutxani ti di ni lisima ‘kuziva kuamukelana mbimo yi hi endelanako’?

²² Mpostoli Pedro a ti khene: “Magwito a sotshe simaha ma hafuhi.” (1 Pedro 4:7) Kusinga kale hi na wonisana ni xanisa ya hombe ayi yi no mbi tshumela yi humelela kambe. Aku mafu ma ko ya me biha ngutu, ti na lava hi va ni lirando la hombe ngu vanathu. Txialakanyiso txa Pedro txa thuma nguto ka masiku a ngweno: “Zivani kuamukelana mbimo yi mi endelanako.” (1 Pedro 4:9) Ngu ditshuri, kuamukela vapfhumba ta tsakisa ni ku ta laveka konkuwa, ni ngu ha ku si gwitiko.