Simama u thumisa marevhista

Marevhista athu o ningela ka vathu votshe ma txitxile kukhukhela ngu 2018. Direvhista dimwani ni dimwani di womba-womba ngu mhaka yimweyo. Otshe ma maha txienge txa Farameti yo Gondisa. Ngu toneto hi nga ma thumisa hi txi txhumayela. Hi nga tshumela hi teka marevhista a timhaka to hambana-hambana ngako hi txiya sitolo mwendo hi txi enda. Kha hi mathumisi ti to hi tsimbitisa sigondo, kambe ona ma nga vhuna vathu ti to ve lava gondo ya Bhiblia.

Mbimo yi u bhulako ni m’thu, mlerele m’bhalo wu tsimbitisanako ni mhaka yi yi ku ka direvhista, ayi a no yi tsakela. I di ti to a kulisa vanana mwendo a di karatekile ngu kufelwa hi nga womba to fana ni tiya: “Ku ni mhaka yo tsakisa ayi ni nga yi lera mayelana ni mhaka eyo. Ni nga kukomba?” Ngako u txi wona to m’thu eneyo wa kombisa kutsakela, u nga mninga direvhista mwendo ku mrumelela, hambi i ti dikhambi do khata kubhula nayo. Hambiku txikongomelo i si ngako kuningelela marevhista, kambe ona ma nga hi vhuna kumana vathu va va nga ti emisela kuthumisa ti va ti gondako.—Mith 13:48.

2018

2019

2020