Mareferensiya a txibhukwana txa mitshangano ya Mahanyelo a Wukristu
4-10 KA JANEIRO
TITHOMBA TA MU KA DIPSWI DA TXIZIMU | LEVHI 18-19
“Vana ni mahanyelo o basa”
Tiwonele txikelemu txa Sathani
Mbimo yi Jehovha a nga womba-womba mayelano ni matiko ale a ti khene: “Mi nga maheni . . . tile va mahako Vakanana vathu va ditiko dile ni lavako ku mi yisa ka dona. Ditiko di nyenyezile, se ani ni tsayisa wubihi wa dona.” Wutomi wa Vakanana wu ti nyamile masoni ka Txizimu txi txi nga sawuleka, ha ko za ditiko di va di nga nyenyeziswa.—Lev. 18:3, 25.
Jehovha wa Thangela Vathu Vakwe
Vathangeli va matiko mamwane va ti thangela vathu ngu ku ya ngu wutxhari wawe. Ngu txikombiso, Vathangeli va Vakanana ni vathu vawe va ti ni mahanyelo o biha aya ma patako ku tekana ka maxaka. Ngu txikombiso, tate ni mwanana mwendo ndiya ni ndiya, kutekana ka vathu va limbewu limwelo, ku ningela magandelo ngu vanana, ni wubhemba. (Lev. 18:6, 21-25) Vathangeli va Bhabhilona ni va Jerusalema va singa ni milayo yo fana ni ya vathu va Txizimu ti txita ka mhaka yo basa. (Mit 19:13) Vathu va Txizimu va tiwoni ti to vathangeli vawe vo thembeka va ti va kuzeta kusimama ve va ni wukhozeli awu wu nga basa, ve basa ka mahanyelo awe ni kuvayilela wugango. Ngu ditshuri Jehovha wa thangela vathu vakwe.
w14 1/7 7 ¶2
Txizimu txi na maha txani ngu wubihi
Hi nga khathu txani ngu vale va ti omisako misungo, ve lamba ku txitxa tinzila tawe ta mahanyelo ve zumbela ku maha to biha? Alakanya ngu txithembiso txiya txo kongoma: “Nguko vo lulama vana zumba ha mafuni, ni vale vo thembeka vana zumba ka ona yotshe mbimo aniko va onhi vana dulwa ha mafuni, ni vakanganyisi vana lumbwa ngu kufuviswa.” (Mavingu 2:21, 22) Khaku na mbi swa ku va ni vathu vano kuzetela ku maha to biha. Hahatshi ka siemo so dikha, vathu va va engisako va thuswa wukhumbini wo mbi hetiseka.—Varoma 6:17, 18; 8:21.
Tithomba ta moya
w06 15/6 22 ¶11
“Nzila yi ni Wu Randako ngu Yona Mlayo Wako!”
Mhaka ya wumbidi ya Mlayo wa Mosi wu txi komba ku alakanyela ka Txizimu ngu vathu vakwe mbimo ya kwelula siyalo. Jehovha a leletile ti to ngako mdimi wa Muisrayeli a txi elula mihando ya thembweni kwakwe, txisiwana txi ndi na tumelelwa kurolela a siya va thumi va nga sisiya msana. Vadimi va si faneli kuelula kotshe madhawani ka thembwe yawe amu ku ku ni mauvha mwendo ma olivha i ku si si nga sala. Hambi va ti ko divala mlumbi wa mafaka va singa ni fanelo yo tshumela ve ya rolela. A yawa i ti malulamiselo a lirando ma nga ti vhuna sisiwana, valuveli, vanana va nga felwa ngu vaveleki ni tinoni. Ngu nzileyo, msana ka mthumo wo nemela wawe, va sina ku tshumela ve dila ni kukombela txivhuno.—Levhi 19:9, 10; Dhewuteronome 24:19-22; Masalmo 37:25.
11-17 KA JANEIRO
TITHOMBA TA MU KA DIPSWI DA TXIZIMU | LEVHI 20-21
“Jehovha a hambanisile vathu vakwe”
w04 15/10 11 ¶12
Paradhise—Wa themba to yi na Vaho?
Ku ni ti hi si faneliko ku tihunda ka tona. Txizimu txi gete Vaisrayeli ku khene: “Ngu toneto, vekisa sotshe sirumo si ni mi leletako nyamsi, kasi mi mana mtamo wa kuwulela, mi teka ditiko di mi txhatukelako ku ya di fuma.” (Dhewuteronome 11:8) Mu ka Levhi 20:22, 24, di kombisilwe ditiko donedo: “Vekisani koko sotshe sileleto sangu, ni milayo yangu, mi txi yi londeta, kasiku ditiko di ni miyisako ka dona ku ya zumba ka kona, di si mi kosi. Ani ni mi gete ni txi khani: ‘Anu mi na fumela ditiko dawe, ni na mi ninga dona di txiva thomba yanu, ditiko edo di khulungako masi ni wulombe. Ani ngani Mkoma, Txizimu txanu, ni nga mi thavisa hagari ka vamwani vathu.’”Ngu toneto, ku teka ditko di ya da Txithembiso i singa kubhobha mwando dwe, ti txi lava ku ve va ni wuxaka wa wunene ni Jehovha Txizimu. Txizimu txi lekile Vabhabhilona ve xula Vaisrayeli ve va bhobha ditikoni kwawe ngu kwa mbi engisa.
it-2 314 ¶7
Thomba
Thomba ngu yi yi siyelwako awu i ku mdyi wa yona mwendo ku yi lumba avale va nga sala ku ve vhaleta nyamne wa yona awu a nga fa. Dipswi da Txihebheru di i ku na·chalʹ (Substantivo, na·chalahʹ).Ti pata kuningwa mwendo ku ningela thomba kamadya-thomba, ngutu ngutu loko i ti wu a vhaletako. (Mit 26:55; Eze 46:18) Dipswi ya·rashʹ mbimo yi mwani di thumiswa ku “mvhaleti,” ngako u ti “madya-thomba”. (Gen 15:3; Lev 20:24) Mbimo yo tala di txhamusela “Ku honyolwa; Ku hingwa,” a ti ti mahwako ngu masotshwa yimbini. (Dhet 2:12; 31:3) Mapswi a Txigriki aya ma womba wombako ngu thomba ma tshanganiswa ni dipswi kleʹros, a di ngu makhatoni ya dona di txhamusela dikato “sa singi” aniko da txhamusela kambe “Kusengela” ngu magwito i “thomba.”—Mat 27:35; Mith 1:17; 26:18.
it-1 279 ¶1
Sinyana
Msana ka ndambi ya mafu otshe, Nowa a mahile mningelo ngu “sinyana so sawuleka” kumweko ni sihari. (Gen 8:18-20) Msana keto, Txizimu txi tumelete to sinyana si patwa ni si m’thu a no dya a txa nga leka ku dya mnoha. (Gen 9:1-4; fananisa ni Lev 7:26; 17:13.) Ku ‘sawuleka’ ka sinyana ka mbimo yoneyo i ti wufakazi wa nzumani, a wu nga txi komba ku amukeleka ka mningelo; Mibhalo yi komba a ti to, mayelano ni ku sinyana si thumiswa kota mndiwo, ku si ngaho ni txinyana a txi txi nga sa “sawuleka” wu si se vaho Mlayo wa Mosi. (Lev 11:13-19, 46, 47; 20:25; Dhet 14:11-20) Sivangelo asi si nga txi maha a ti to sinyana si khedhwa ka so “mbi sawuleka” kumaha mningelo, kha sa txhamuselwa a mu ka Bhiblia. Nga ha mtalo wa sinyana soneso, si nga ti sawutwe i ti magama, i ti si nga sothe a si ya si nga sa sawuleka. (Wona POUPA.) Kulambiswa koneko ku emisitwe msana ko khata txitumelelwano txa txiphya, nga ha Txizimu txinga ti kombisa ka Pedro ngu muwoniso.—Mith 10:9-15.
Tithomba ta moya
it-1 572 ¶7
Ku ti txhavela
Mlayo wa Txizimu wu lambisile ku titxhavela ngu kona ha ka m’thu wo fa. (Lev 19:28; 21:5; Dhet 14:1) Txivangelo nguko Israyeli i nga ti ditiko do sawuleka da Jehovha, thomba yo sawuleka. (Dhet 14:2) Ngu nzila eyo, Israyeli a ti fanete kuzumba a ti txhatxhekile ka mazumbelo otshe o khozela sifananiso. Tximwani kambe, sihena sa madila, a si si tsimbiswako ni ku titxhavela ka m’thu apune, i ti txi nyenyeko ka vathu ava va nga txi txi ziva txiemo txa vafi ni themba ya kuwuswa kwawe (Dhan 12:13; Vaheb 11:19) Ngako, ku tsimbiswa ku ti txhavela ti ndi na maha Vaisrayeli ve va ni txixonipho ngu tumbuluko wa Txizimu, i ku mmidi wa m’thu.
18-24 KA JANEIRO
TITHOMBA TA MU KA DIPSWI DA TXIZIMU | LEVHI 22-23
“Mibuso ya Kuelula yi womba txani kwathu”
it-2 125 ¶8-9
M’buso wa Mapawu o mbi Tshumbelwa
Ditshiku do khata da M’buso wa Mapawu o mbi Tshumbelwa i ti mtshangano wo sawuleka, i ti mlongiso. Ka ditshiku da wumbidi i ku 16 ka Nisani, ku txi tekwa nyanda ya si va nga elula so khata, ve si heleketa ka mphaxeli i ti kuelula ko khata ani Palestina. Ku si se hoka m’buso wuwa, ku si faneli ku dyiwa tindoho ta tiphya ta tixaka totshe nem dipawu hambi tindoho to katingwa to ngadi kuelulwa. Mphaxeli a ti na ningela nyanda yo khata ngu nzila yo fananisela ka Jehovha ngu ku ndiwitela nyanda, ka mbimo yoneyo kuningelwa txinvutana txo mbi na wulima txa dilembe dimwedo wu va mningelo wo hiswa. (Lev 23:6-14) Ku si na txileleto txo ya hisa txienge txa nyanda mwendo mpupu wako a ti ngu msana vaphaxeli va nga txi ti maha. Ku si na mningelo wa ha kubasani mwendo wa ditiko wo elula ko khata dwe, kambe ku ti ni malulamiselo yawa mwaya wummwani ni wummwani, mwendo m’thu awu a nga ti ni thembwe Israyeli a ndi no ningela mningelo wo bonga ngu mbimo ya m’buso wonewo.—Eks 23:19; Dhet 26:1, 2; wona MIHANDO YO KHATA.
Txhamuselo Kudya mapawu o mbi tshumbelwa ka mbimo yoneyo ti txi pfana ni sileleto a si Mosi a nga si amukela ka Jehovha, nga ha ti nga kombiswa ngu kona ka Eksodha 12:14-20, ti patako, ni ti ti ku ka ndimana ya 19: “Mndani ka mtxhanu wa masiku ni mambidi ku nga thuke ku txi maneka mtshumbelo tinyumbani kwanu.” Ka Dhewuteronome 16:3 mapawu o mbi tshumbelwa ma dhanwa “dipawu da kuxaniseka,” i ti txialakanyiso txa dilembe a di majudha ma nga huma ngu dona ditikoni da Egipta, mbimo yi ma nga khukha ngu txi kuluveta (ti komba ti to kha va mana mbimo yo tshumbela fulaho yo vhuwa [Eks 12:34]). Ti di ngeto, va txi alakanya txiemo txawe txo xaniseka, ni txa wukhumbi, a txi va nga thukunyulwa ka txona, nga ha Jehovha a nga womba apune, “U na maha toneto ka otshe masiku a kuhanya kwako, kasi kukhumbula ditshiku da kuhuma kwako ditikoni da Egipta.” Kuhetiseka ka kuthukunyulwa kwawe kota ditiko ni kutumela to Jehovha Mthukunyuli wawe, ti txi maha txisekelo a txi txi fanelako txa m’buso wo khata ka yi ya yiraru ya hombe ya Vaisrayeli ya dilembe ni dilembe.—Dhet 16:16.
it-3 224 ¶3
Pentekoste
Mihando yo khata yo elula fulaho yi ti fanete ku xayiswa ngu nzila yo hambana ni sevhadha. Mipimo yimbidi ya mpupu wa wunene wo bhikwa ni mtshumbelo (4.4 L; 4 dry qt) si ndi maha mapawu mambidi. Ma ti fanete ku va a “mitini kwanu,” a ti ti lava kuwomba to mapawu ma ti fanete me fana ni ya va nga ti maha ditshiku ni ditshiku timwayani kwawe, aya ma nga si nga ni sikongomelo so sawuleka. (Lev 23:17) A ti ti txi mahwa kumweko ni miningelo yo hiswa ni mhamba yo basisa txionho, ni mhamba ya mpatano ayi ku nga txi ningelwa sinvutana simbidi. Mphaxeli a txi ndiwitela mapawu ni sinvutana masoni ka Jehovha e sandzeka manza txitimwi ka mapawu ni makatha a sinvutana, a txi ndiwitela, a txi komba to asi henjeleta masoni ka Jehovha. Msana ka ku a txi ningela mapawu ni sinvutana, asi si txi va sakwe mphaxeli ti to e si dya kota mhamba ya mpatano.—Lev 23:18-20.
w14 15/5 29 ¶11
Ina Wa Longoloka ni Sengeletano Ya Jehovha?
A ku sengeletano ya Jehovha yi hi kongomisako ti to hi londisela mlayo wa mpostoli Paulo ti na vhuna athu. Wona wu womba tiya: “Ahi laveni tinzila to vhunana, hi txi tsaniselana amu ka lirando ni ka mithumo ya yinene. Hi nga lekeni misengeletano yathu, nga vamwani va tolovelako kumaha. Aniko ahi laveni tinzila to tsaniselana yotshe mbimo, ngutu-ngutu akuwa mi wonako ditshiku da Mkoma di txi tshuketela.” (Vaheb 10:24, 25) Mibuso ya dilembe ni dilembe ni simwani simahakalo sa wukhozeli si txi aka Vaisrayeli ngu didhawa da moya. Hahanze keto, timbimo to fana ni M’buso wa Midhuti ka masiku a Nehemiya ti txi tikomba ngu ku va ni litsako la hombe. (Eks 23:15, 16; Neh 8:9-18) Ngu nzila yi fanako, ha vhuneka ka mitshangano ya dibanza, ni mitshangano ya hombe. Ngu mhaka yoneyo, a hi londoleni malulamiselo oneyo kasi kuzumba hi di tsakile ni kutsana mu ka likholo.—Titosi 2:2.
Tithomba ta moya
Xayisa wuthembeki wako!
Kwathu malanda a Txizimu, wuthembeki ngu randa Jehovha kota M’thu ngu yotshe mbilu ngu kutiningetela ka hombe, ti to sotshe sisungo sathu si tsimbitisana ni nene. Alakanya ngu matiko mamwani. Txhamuselo ya hombe ya mu ka Bhiblia ya dipswi “kuthembeka” ngu yiya: Txo hetiseka, txa txinene mwendo txotshe. Ngu txikombiso, kale Vaisrayeli va ti maha magandelo ngu sihari, se Mlayo wu ti womba ti to sihari soneso si ti fanete si va sa sinene. (Lev. 22:21, 22) Vathu va Txizimu va si tumelelwi kuningela txihari txo mbi na mnenge, nzeve, mwendo diso; nem hambi txo lwala. Ka Jehovha ti ti ni lisima ti to txihari txi enela, i di txa txinene. (Mal 1:6-9) Hi nga ti pfisisa ti to ngu kutxani Jehovha a txi khatala ngu so enela ni sa sinene. Ngako hi txi xava txo maha, ti nga maha i di m’hando, dibhuku, mwendo txiya, kha hi lavi ku txi wona txi di doletwe, mwendo txi txi kelela. Hi txi lava txi txi enela ni ku va txa txinene. Ni Jehovha ali lavisa toneto lirando lathu ni nzila yi hi thembekako ngu yona. Yi fanete yi va ya yinene ni kuhetiseka.
25-31 KA JANEIRO
TITHOMBA TA MU KA DIPSWI DA TXIZIMU | LEVHI 24-25
“Dilembe da kutsaka ka hombe ni kuhulukiswa kwathu”
it-2 697 ¶8
Kutxhatxheka
Txizimu txo Txhatxheka. Jehovha, Txizimu txo txhatxheka. Ene a txhatxhile Vaisrayeli wukhumbini wa Egipta. Ene a va gete to va txi engisa sileleto sakwe vona va na ku mana ku tshatxheka a ku va ku lavako. (Dhet 15:4, 5) Dhavidha a wombile to “kuthuseka” ni kuwonelela makhokhola a Jerusalema. (Mas 122:6, 7) Hambiketo, Mlayo wu ti womba a txi thuka m’thu e va txisiwana a na ti xavise kota khumbi kasi ku hetisa silaveko sakwe ni sa mwaya wakwe. Sekoko kutxhatxheka ku txi tsaniswa ngu Mlayo ka Muhebheru ka dilembe da wu 7 da kuthuma kwakwe. (Eks 21:2) Ka dilembe da Kutsaka ka hombe (di txi maheka ka dilembe da wu 50), kutxhatxheka aku ku txi huwelelwa wotshe wukhalo wu ku nga ti ni vathu. Khumbi yimwani ni yimwani ya Muhebheru yi txi txhatxhwa se yimwani ni yimwani yi tshumela yi ya thombani ka yona.—Lev 25:10-19.
it-2 315 ¶5
Thomba
Thembwe yi nga txi lumba mwaya yi txi pindiselwa ka txitukulwana tximwani ni tximwani yona yi si na fanelo yo xaviswa. Ngako, yi txi xaviswa i ti ku yi lombisa basi ngu mtengo wa kuelula a ku yi ti no kuhumesa, se kuvekwa mtengo wa kuxava ngu kuya ngu mtengo wa malembe kala ka dilembe da ku txhatxhiswa, mbimo yi totshe tithomba ta mafu ti ndi no tshumetelwa ka nyamne wa makhalo, loko ti sa terulwa mwendo ku Txhatxhiswa. (Lev 25:13, 15, 23, 24) Mlayo wu txi pata tinyumba ti ti nga ti madhoropani o mbi bhiyelwa, a ti ti nga txi wonwa to njienge txa thembwe yo tuleka. Se nyumba yi yi nga ti didhoropani muwa ku nga bhiyelwa fanelo yo terulwa mtengo wa yona i ti wa dilembe ku khukhela yi ti xavilwe se koneho yi txi lumba mxavi. Sekoko, tinyumba ti nga ti madhoropani ya va Levhi lungelo yo tirulwa i ti ya txikhati txo mbi na magwito, nguko Valevhi va si na thomba ya mafu.—Lev 25:29-34.
it-2 610 ¶7
Kutsaka ka Hombe
Mlayo wa Kutsaka ka Hombe, wu txi vhikela ditiko, kuhambana ni txiemo txo biha atxi hi txi wonako nyamsi. Ka matiko a mangi a mu ku ku ni ku hambana ka hombe ngutu ka siemo, ku ni va va nga ganya ngutu ni ya va i ku sisiwana so gwita. A si m’thu a nga ti naso si txi tsanisa ditiko, nguko kha ngaho a ndi no va mapwata-txakwe e tsindavetwa ngu kwa mbi na txilo ngu didhawa da timale kambe votshe va ndi na sengela ngu tiningo tawe makotelo awe to ve vhuna ditiko. Ngu malulamiselo a makatekwa a Jehovha, ngu mihando ya mafu ni gondo a nga ti ningile Vaisrayeli, ngako va txi engisa va txi tidila ngu Mfumo wo hetiseka ni kutalelwa a kuwa dwe va ndi no kumana ngu kuningwa ngu Mfumo wa txitimwi.—Isa 33:22.
Tithomba ta moya
w09 1/9 22 ¶4
Ngako u txi Vhukwa
Ngako Muisrayeli elwa ni mkwawe eza e mthavisa diso a ti fanela kutsayiswa ngu Mlayo. Ngu toneto, ti si nga ka wu a nga dawiswa kuphota mwendo hambi m’thu wa mwaya wakwe. Mlayo wu txi womba to mhaka yi yi ti fanete kuhenjeletwa ka va va ku ni wutixamuleli—i ku valamuli a va va nga sawulwa—yi ti na xuxwa ngu nzila yo lulama. Vathu va txi ti ziva a ti to awu a mahako wugevenga khakwenye mwendo kupeka m’thu eza e mdayisa a ti na tsayiswa ngu nzila yi fanelako. Txitsayiso a txi i ti nzila yo tsimba ku maha wugevenga. Hambiketo, ku ti ni to tala ati tipatekako ka mhaka yiya.
1-7 KA FEVEREIRO
TITHOMBA TA MU KA DIPSWI DA TXIZIMU | LEVHI 26-27
“Hi nga ma manisa kutxani makatekwa a Jehovha”
w08 15/4 4 ¶8
Tshuralela “Silo so mbi na lisima”
“Tithomba” ti nga hunduka ti va txizimu ngu nzila yihi? Ngu txikombiso, hi nga alakanya ngu dirigwi di di ku thembweni ka mu Israyeli wa kale. Dirigwi donedo di ndi na thumiswa kuaka nyumba mwendo libhiyo. Kambe, di txo emiswa kota “txithombe” kasi “ku txi khizamela,” dona di ndi na va txikhunguvanyiso ka vathu va Jehovha. (Lev 26:1) Ngu nzila yi yi fanako, male ni yona yi ni wukhalo wa yona. Ha yi lava to yi hi vhuna ni ku hi nga yi thumisa kuseketela mthumo wa Jehovha. (Ekl 7:12; Luk 16:9) Kambe hi txo thangetisa male masoni ka mthumo wathu wa Wukristu, yona yi nga hunduka yi va txizimu txathu, (Lera 1 Timoti 6:9, 10.) Ka mafu yawa kubhindula ngutu male ngu tona i ku ta lisima ngutu ka vathu, kambe hi fanete kudinganisela ka mhaka yiya.—1 Tim 6:17-19.
it-1 854 ¶7
Xonipha
Ngu kona ha ka nzila yi Jehovha a nga thumisana ngu yona ni Mosi, Mosi a kombisile txixonipho txa hombe (heb., moh·raʼʹ) masoni ka vathu va Txizimu. (Dhet 34:10, 12; Eks 19:9) Ava va nga ti ni likholo va ti xonipha wuthangeli wa Mosi. Vona va txi ti pfisisa to Txizimu ngu txona txi womba-wombako ngu kuthumisa Mosi. Vaisrayeli va ti fanete ve kombisa txixonipho ngu nyumba yo Sawuleka ya Jehovha. (Lev 19:30; 26:2) A tiya ti womba to va ti fanete ve khozela Jehovha nga ti a nga ti va leletisile tona ni kuxayisa yotshe milayo yakwe.
w91 1/3 17 ¶10
“Kudikha ka Txizimu” Ku na Xayisa Mbilu yako
Jehovha a ti khene ka ditiko da Israyeli: “Ngako mi txi londeta sileleto sangu, mi veketa milayo yangu, ni ku yi maha, sekoko ni na mi ninga mati a kuwa ngu mbimo ya kona; mafu mana ninga timbewu ku txi pfuna, mindonga yi na ninga mihando ya yingi. Ni na mi ninga kudikha ditikoni; se mi na otela mi di tsani, kha ku na mbi va ni wa ku mi dhukisa; kambe ni na fuvisa sihari sa tshofu sa mafu, ni ti to ditikoni kwanu kha ku na mbi maneka ditxhari. Ni na va hagari kwanu, ani ni na va Txizimu txanu, nanu mi na va vathu vangu.” (Levhi 26:3, 4, 6, 12) Israyeli a ndi na va ni kudhikha nguko va ndi na vhikeleka ka valala vawe, ve va ni silo so tala ni ku va ni wungana wo tsana ni Jehovha. Ti to ti koteka, ti txi lava ve engisa Mlayo wa Jehovha.—Masalmo 119:165.
Tithomba ta moya
it-3 265 ¶2
Mtungu
Mtungu ngu mhaka ya kuleka Mlayo wa Txizimu. Ditiko da Israyeli di txharihisilwe ti to kulamba kuxayisa txi tumelelano txi va nga ti mahile ni Txizimu txi ndi na va ‘tisela mtungu hagari kwawe’. (Lev 26:14-16, 23-25; Dhet 28:15, 21, 22) Ngu kuya ngu Mibhalo, kuhanya ngu didhawa moya ni da nyama si tsimbilelana ni makatekwa a Txizimu (Dhet 7:12, 15; Mas 103:1-3; Mav 3:1, 2, 7, 8; 4:21, 22; Mtu 21:1-4), kasi malwati tsimbilelana ni txionho ni kwa mbi hetiseka. (Eks 15:26; Dhet 28:58-61; Isa 53:4, 5; Mat 9:2-6, 12; Joh 5:14) Hambiko i ku ditshuri ti to mbimo yimwani Jehovha Txizimu a tisile kupandiseka ka vathu, ko fana ni tshekela ya Miriyamu, Uziya ni Gehazi (Mit 12:10; 2 Mak 26:16-21; 2 Vafu 5:25-27), ti ti komba to ka siemo so tala malwati ni mtungu i di wuyelo ya txionho txa mtumbuluko atxi txi nga txi tsimbilelana ni vathu mwendo matiko. Vona va elute a ti va nga ti phayile; mimidi yawe ya nyama yi xanisekile ngu simaho sawe so biha. (Vag 6:7, 8) Se ava va nga tshumelela ka mahanyelo awe a ku ti ñola ko biha ngu ta mataho, mpostoli a womba to Txizimu “txi to va leka nzambwani kota kunavela ka timbilu tawe, se ve ti onha vapune mimidini kwawe . . . Se ve mana txitsayiso txi txi dinganako txihoheto txawe.”—Var 1:24-27.
8-14 KA FEVEREIRO
TITHOMBA TA MU KA DIPSWI DA TXIZIMU | MITENGO 1-2
“Jehovha a sengeleta vathu vakwe”
w94 1/12 9 ¶4
He thangetiseni Wukhozeli wa Jehovha
Hi nga enda ngu mialakanyo u wona Vaisrayeli va va nga gova txiwulani, nji txani u txi wonako? Matenda ma di folisetwe a kona mu ka 3 wa timiliyoni ta vathu ava va nga abaniswa ngu mitxawa yi yi nga hambaniswa ngu tixaka tiraru; wutxani, mswa-ditambo, wuphemba ni wulenge. U txi wona ngu hafuhi ngutu, u ndi na wona a va va nga sengeletwa hagari ka wugovelo. Mitxawa ya mune ya yidotho ya matenda nja timwaya ta lihundzu la va ka Levhi. Hagari ka wugovelo, ka wukhalo wo bhiywa ngu tinguwo ku ni muako wo xamalisa. Wona i ti “ditenda da msengeletano,” mwendo tabernakela, a yi yi nga akwa ngu Israyeli “ngu mbilu ya wutxhari,” ngu ku ya ngu ti Jehovha a ngadi ti lavisile tona.—Mitengo 1:52, 53; 2:3, 10, 17, 18, 25; Eksodha 35:10.
it-1 39 ¶1
Wugovelo
Wugovelo wa Vaisrayel i ti wa hombe ngutu. Mtengo wa kona wu txi hoka kona mu ka 603.550 wa vavamna va yimbi, kupata ni vavasikati ni vanana, sikosana ni vo lemala, 22.000 wa Valevhi, ni “mtalo wa mpatano” wa valuveli—ku ti lava votshe i ti 3.000.000 mwendo kupinda. (Eks 12:38, 44; Mit 3:21-34, 39) Hambiko ti si ziwiko to wugovelo i ti wa hombe kuhokela hani mtengo wa tihunzu wu txi hambanelana. Mbimo yi wugovelo wonewo wu nga txi xoma kuya Jeriko Mikovani ka va Mowabhi, kuwombwa ti to wu txi nawuluka kukhukhela “Bheti-Jasimote kala Abhele-Sitime.”—Mit 33:49.
Tithomba ta moya
it-2 803 ¶9
Bhalela
Bhalela yi txi mahwa ngu kuxaxametwa matina, lixaka ni mwaya. Bhalela ya ditiko a yi yi kombiswako mndani ka Bhiblia yi txi thumela sikongomelo sa singi so fana ni resa, mthumo wo ya yimbini mwendo (kasi Valevhi va nga txi pateka ka sona) i ku kuningwa mithumo yo thumela ka wukhalo wo sawuleka.
15-21 FEVEREIRO
TITHOMBA TA MU KA DIPSWI DA TXIZIMU | MITENGO 3-4
“Mithumo wa Valevhi”
it-2 894 ¶1
Mphaxeli
Mndani ka Txitumelelano txa Mlayo. Txikhati txi Vaisrayeli va nga ti wukhumbini wa Egipta, Jehovha a sawulekisile otshe matiwula a vafana Vaisrayeli mbimo yi a nga daya matiwula a va Egipta ngu mtungu wa wu 10. (Eks 12:29; Mit 3:13) Matiwula oneyo ma ti lumba Jehovha, kasi ku me thumiswa dwe ka mthumo wakwe wo sawuleka. Txizimu txi ndi na va txi ti sawute majaha otshe a Vaisrayeli ve va vaphaxeli ni vawoneleli. Makhaloni eto, dikungo dakwe i di kuteka majaha otshe a lixaka la Levhi ka mthumo wuwa. Ngu mhaka yeto a mahile ti to majaha a va Levhi me vhaleta matiwula ya tixaka timwani ta 12 (ngako ku txi balwa liveleko la vanana va Josefa, i ku, Efrayime ni Manase i ku tixaka timbidi) Bhalela yi yi nga mahwa hale yi kombile to ku ti ni 273 wa matiwula yo va i si nga va Levhi, a va i nga ti va hombe ngu mtxima wumwewo kupinda va Levhi, ngu koneho Txizimu txi kurumetile to ku va ni mtirulo wa mtxhanu wa maxekele ($11) ka mmweyo ni mmweyo wa va va 273, se male ya kona yi ti na ningelwa ka Aroni ni vanana vakwe. (Mit 3:11-16, 40-51) Ku si se mahwa kutxitxana koneko, Jehovha se a ti sawute majaha a mwaya wa Aroni, va lixaka la ka Levhi, kuwumba mtxawa wa vaphaxeli Vaisrayeli.—Mit 1:1; 3:6-10.
it-2 222 ¶10
Valevhi
Mithumo. Valevhi va ti wumbwa ngu timwaya tiraru, va tako ngu ka vanana va ka Levhi: Gersoni (Gershom), Kohati, ni Merari. (Gen 46:11; 1 Mak 6:1, 16) Mwaya wu mwani wa yiya wu ti ningwa wukhalo wa ha fuhi ni ditenda do sawulekamu txiwulani. Mwaya wa va Kohati wa va ka Aroni wu ti masoni ka ditenda do sawuleka kuya wulambwe. Vamwani Vakohati va ti didhawa da mswa-ditambo, kasi va Gersoni va ti wulenge, Vamerari vona va ti wutxani. (Mit 3:23, 29, 35, 38) Kugwimba, kuthavisa, ni kurwala ditenda do sawuleka i ti mthumo wa Valevhi. Ngako yi txi hoka mbimo yo rura, Aroni ni vanana vakwe va ti thavisa m’jiyo wu nga ti abanisa wukhalo wo Sawuleka ni wo Sawulekisisa wu nga ti fenengeta dibhokiso ni siluvelo ni siya simwani ni simwani so sawuleka. Sekoko Vakohati i ti vona va nga ti rwala sona. Va Gersoni va ti rwala tinguwo ta ditenda, sifenengeto, so ñolisa, tinguwo to bhiya mthanda, tingoti ta ditenda (ni ti i ngadi tingoti ta txiluvelo) kasi va Merari va txi xayisa maseta, tiphande ni so titsanisa ni tingoti ta ditenda. (ni tingoti ta mthanda wu nga txi bhiya txiluvelo).—Mit 1:50, 51; 3:25, 26, 30, 31, 36, 37; 4:4-33; 7:5-9.
it-2223 ¶2
Valevhi
Ka mbimo ya Mosi, Mlevhi a tiningwa wutixamuleli wo rwala txiluvelo ni siya sa txona mbimo yi va nga txi rura mbimo yi a tshanganisako 30 wa malembe. (Mit 4:46-49) Mithumo yimwani yi ti ningwa ava va nga ti ni w 25 wa malembe, kambe, m’thu a si na kuningwa mthumo wo nemela wo fana ni kurwala txiluvelo. (Mit 8:24) Ka mbimo ya Mkoma Dhavhidha malembe eyo ma hungutwe me va 20. Txivangelo txa kona a txi wombile Dhavhidha ti to txiluvelo (konkuwa txi ndi na vhaletwa ngu dithepele) ti si ngadi ti laveka to txi rwalwa. Mithumo yo kurumetwa yi ti gwitela ka 50 wa malembe. (Mit 8:25, 26; 1 Mak 23:24-26; wona IDADE, ERA.) Valevhi va ti fanete ku wu ziva kwati Mlayo, nguko va ndi na dhanwa mbimo yimwani kuya lera ni kugondisa ditiko.—1 Mak 15:27; 2 Mak 5:12; 17:7-9; Neh 8:7-9.
Tithomba ta Moya
w06 1/8 23-24 ¶13
Txhariha—U Xonipha Txizimu!
Kupfa txivhuno txa Jehovha ngu mbimo ya sikarato ti engetete txixonipho txi Dhavhidha a nga ti natxo ngu Txizimu ni ku ti tsanisile themba yakwe. (Masalmo 31:22-24) Dhavidha a tandekile kukombisa txixonipho ka Txizimu makhambi mararu ni ku eto ti mtisete sikarato sa hombe. Dikhambi do khata ku ve mbimo yi a nga yisa dibhokiso da txitumelelano khe Jerusalema. Dhavhidha a lulamisete txikotxikani ha wukhaloni ko di rwalwa ha makata ngu Valevhi, nga ha Mlayo wa Txizimu wu nga ti womba ngu kona. Mbimo yi Uza awu a nga txi tsimbitisa txikotxikani a nga zama kuñola dibhokiso ti to di siwi, a to fela koneho ngu mhaka ya “tximaho txo pwata txithavo.” Ta pfala to Uza a mahile txionho txa hombe, kambe magwito ka mhaka yiya mnando i ti wa Dhavidha nguko kha kombisa txithavo ngu Mlayo wa Txizimu, se ti vile ni wuyelo yo biha. Kuxonipha Txizimu ti womba kumaha timhaka ngu nzila yi txi hi rumako ngu yona.—2 Samuwele 6:2-9; Mitengo 4:15; 7:9.
22-28 KA FEVEREIRO
TITHOMBA TA MU KA DIPSWI DA TXIZIMU | MITENGO 5-6
“U nga va etetelisa kutxani Vanazira”
it-2 456 ¶8-10; 457 ¶1
Mnazira
Ku ti ni sipimelo siraru sa hombe ka va va nga txi maha txisungo txa Wunazira: (1) Vona va si na fanelo yo sela wusuki wo bava, hambi kudya mhando wa mvhinya wo mbi vitwa, hambi wo vitwa hambi wa kwoma, hambi dosi ya kona yo tshumbelwa yo nga vhinagre. (2) Va ti si na fanelo yo kaya misisi ya misungo yawe. (3) Va si faneli kugwesa txirumbi hambi txa dixaka da hafuhi.—tate, mame, mfowenu, mwendo ndiyawe.—Mit 6:1-7.
Sixambanyo so Sawuleka. M’thu wu a nga txi maha txithembiso txo sawuleka a ti fanela “kuhanya nga Mnazira [ti wombako ku wo tiningetela, wo sawulwa] ka Jehovha” i si nga ti to o khuzwa ngu vathu ngu ku ti lavela ndhuma yo kanganyisa. Kambe, “masiku otshe awu Wunazira wakwe ene mbo sawuleka masoni ka Jehovha.”—Mit 6:2, 8; dinganisa ni Gen 49:26.
Ngu toneto, sipimelo si nga ti vekelwa Vanazira si ti ni txhamuselo ngu nzila yo sawuleka ka wukhozeli wa Jehovha. Kufana ni mphaxeli wa hombe, ngu mhaka ya txi khunja txakwe txo sawuleka a si faneli kugwesa txirumbi, hambi i di txa maxaka akwe a hafuhi, nga ha Vanazira ni vona va nga si mahi. Ti txi tsimbwa ka mphaxeli wa hombe ni vaphaxeli va vadotho, ngu kona ha ka wutixamuleli wa sikhunja sawe kusela vhinya mwendo kusela so bava ngako va txi maha mithumo yo sawuleka masoni ka Jehovha.—Lev 10:8-11; 21:10, 11.
Hahahanze keto, Mnazira, “a fanete ku va wo sawuleka ngu kuleka misisi” yi kula, i ti txikombiso txo guleka a txi a ndi no ziwa ngu txona to mu Nazira wo sawuleka. (Mit 6:5) Dipswi di di fanako da txi Hebheru na·zirʹ di txi thumiswa mayelana ni mvhinya “wombi sendwa” mndani ka malembe o sawuleka a milongiso ni ya kutsaka ka hombe. (Lev 25:5, 11) Ta pfala kambe ti to txiluva txa nzalama a txi txi nga ti namaretilwe masoni ka dibhaji da mphaxeli wa hombe, a hawa ku nga ti bhatwe mapswi aya ma ku “Kusawuleka nga Jehovha,” ti txi dhanwa “txikombiso txo sawuleka txo tiningetela [heber., neʹzer, do fana ni na·zirʹ].” (Eks 39:30, 31) Ngu ha kufanako, txikombiso txa ha msungo a txi txi nga ti ambalwa ngu vakoma vo sawuleka Vaisrayeli, ni txona txi txi dhanwa ku neʹzer. (2 Sam 1:10; 2 Vafu 11:12; wona COROA; DEDICAÇÃO.) Ka dibanza da Wukristu mpostoli a ti khene misisi yo lapha ya wamsikati a ningilwe yona wukhaloni wa txifenengeto. Kwakwe a txi njialakanyiso txa mtumbuluko txa ku a ni txikhunja txo hambana ni txa wamwamna; ene a fanete kualakanya txiemo txakwe txo tiveka hahatshi ka malungiselelo a Txizimu. Sileleto soneso misisi yo mbi kaywa (ati i si ngako ta mtumbuluko ka wamwamna), kwa mbi sela vhinya, ni txilaveko txo zumba a ti basile ni kwa mbi na txisolo txi ti gondisa Mnazira lisima lo tiningetela ni ku tiveka hahatshi ti to e maha kudhunda ka Jehovha .—1 Vak 11:2-16; wona CABELO; COBERTURA PARA CABEÇA; COBERTURA.
Tithomba ta Moya
w05 15/1 30 ¶2
Siwotiso sa vagondi
Samusoni i ti Mnazira ngu nzila yo hambana. Ene a si se velekwa, ngelozi ya Jehovha yi gete mwamwakwe yi txi khene: “Nguko u na mana txirumbu u txi veleka mwanana wa mfana, eyo ha msungo kwakwe ku nga thuki kupinda limu, nguko mfaneyo a na va i di Mnazira wa Txizimu, kukhukhela mndani ka mame wakwe, se ene a na khata kutxhatxhisa va ka Israyeli, manzani ka Vafilista.” (Valamuli 13:5) Ngu nzila eyo, Samusoni ene kha maha txithembiso txo va Mnazira. Ene a to sawulwa ngu Txizimu to e va munazira wotshe wutomi wakwe. Txipimelo txo mbi gwesa txirumbi txi si thumi kwakwe. I ti ku txi txi thuma kwakwe, ngako atxo thuka e gwesa txirumbi ngu phazamo a ndi na sikotisa kutxani kukhateta eva Mnazira awu a nga ti wukhatile kuvelekwani kwakwe? Sekoko, ti ha kubasani ti to ku ni kuhambana ka sipimelo sa va va nga ti ti sawulela ku va Mnazira ni va i nga ti vanazira wotshe wutomi wawe.