Mareferensiya a txibhukwana txa mitshangano ya Mahanyelo a Wukristu
3-9 KA MAIO
TITHOMBA TA MU KA DIPSWI DA TXIZIMU | MITENGO 27-29
“Tekelela Jehovha ngu kwa mbi va ni txisawu-sawu”
w13 15/6 10-11 ¶14
Tsakela Tifanelo ta Jehovha
Mtxhanu wa vanana va Zelofehadhi va ti ya wotisa Mosi va txi: “Aku tate a nga mbi va ni vanana, ditina dakwe di na thaviswa hagari ka mti wakwe kani?” Va m’dilete va txi: “Hi ningeni wukhalo wu wu no va wathu, hagari kwathu.” Se Mosi ava xamute a txi, ‘Ka mhaka yiya Jehovha kha ningela mlayo wo kongoma.’ Ene a ti ya “gela Jehovha mhaka yiya.” (Mit. 27:2-5) Yi ve yihi xamulo? Jehovha a gete Mosi atxi khene: “Vanana va Zelofeyadhi va womba to pfala; mi fanela ku va ninga makhalo, awe awa ma no maha thomba hagari kwawe; se mi va ninga sotshe si tate wawe a nga si siya.” Jehovha a mahile to hambana ni ti m’thu a nga ti pimisako. Ene a ningete mkongomiso wumwani ka Mosi atxi: “Ngako m’thu a txi fa a si nga ni mwanana wa dijaha, ningani mwanana wa dihorana thomba yakwe.” (Mit. 27:6-8; Jox. 17:1-6) Kukhukhela koneho votshe vavasikati va va Israyeli ava va ndi no va ka txiemo txonetxo va ti fanete kuvhikelwa.
w13 15/6 11 ¶15
Tsakela Tifanelo ta Jehovha
Hi nga wona txisungo txa wunene ni txo mbi na txisawu-sawu! Jehovha a ñote kwati vavasikati vale va nga ti ka txiemo txa hahatshi, kufana ni Vaisrayeli ava va nga ti ka txiemo txo guleka. (Mas. 68:5) Atxiya njimwetxo txa sikombiso sa mu ka Bhiblia atxi txi kombisako ti to: Jehovha a ñola vathu votshe ngu nzila yi yi fanako.—1 Sam. 16:1-13; Mith. 10:30-35, 44-48.
w13 15/6 11 ¶16
Tsakela Tifanelo ta Jehovha
Hi nga etetilisa kutxani kwa mbi na txisawu-sawu ka Jehovha? Khumbula ti to kwa mbi txisawu-sawu kupata siemo simbidi. Ngako hi si nga ni txisawu-sawu hi na ñola vamwani ngu nzila ya yinene. Ditshuri ti to, hotshethu ha womba ka miaalakanyo yathu ti to kha hi nga ni txisawu-sawu. Kambe hi nga tumela ti to hi nga mbimo yotshe ti hehukako kuxola matipfelo athu hipune. Se, hi nga maha txani ngako hi txi tumbula to hi hi ziwa hi di ni txisawu-sawu? Phela, mbimo yi Jesu a nga ti lava kuziva ti to ngu tihi ti vathu va ti wombako ngu ngene a wotisile vangana vakwe vo thembeka: “Kasi vathu va womba ku i mani Mwanana wa m’thu kani?” (Mat. 16:13, 14) Ngu kutxani u si u mu eteteli Jesu? U nga wotisa mngana wako awu u zivako to a na kugela ditshuri to m’thu wu u ziwako u si na txisawu-sawu. Kambe loko a txi kugela to u nga ti ni moyanyana wo khedha vathu ngu kuya ngu lixaka lawe, mazumbelo mwendo txiemo txawe txa timali, u nga maha txani? Maha mkombelo ka Jehovha ngu mbilu yotshe u m’gela matipfelo ako ti to e kuvhuna to u lulamisa mawonelo ako kasi ku u xula moya wa txisawu-sawu kudotho-kudotho.—Mat. 7:7; Vakl. 3:10, 11.
Tithomba ta moya
it-2509 ¶1
Miningelo
Miningelo ya so sela. Miningelo ya sa kusela yi txi ningelwa kumweko ni yimwani miningelo, ngutu-ngutu msana kova Vaisrayeli va di hokile ka Ditiko da Txithembiso. (Mit 15:2, 5, 8-10) Miningelo yiya i ti vhinya (“so sela so bava”) yi txi thelwa txitimwi ka txiluvelo. (Mit 28:7, 14; dinganisa ni Eks 30:9; Mit 15:10.) Mpostoli Paulo a bhalete tiya Makristu a Vafilipiya: “Aniko, hambi idiku mnoha wangu wo theketwa ngu mphaxo wa mhamba, ni kuthumela likholo lanu, na nengela ni va ni tsaka kumweko ni nanu motshe.” Ahawa ene a thumisile divingwa da mningelo wa so sela, kasi kukombisa kutiningetela kwakwe ngu Makristu kulowe. (Vaf 2:17) A di hafuhi ni kufa, ene a bhalete Timoti atxi: “Nguko ani se ni hafuhi ni kuningelwa nga mhamba ya kubhawa; txikhati txa kurura kwangu txi hokile.”—2 Tim 4:6.
10-16 KA MAIO
TITHOMBA TA MU KA DIPSWI DA TXIZIMU | MITENGO 30-31
“Hetisisa sixambanyo sako”
it-21215 ¶10
Txixambanyo
Txixambanyo, txa sunga ku txi hetisisa ngako txi txi mahwa. Sixambanyo i ti so tiningetela. Kambe, ngako m’thu a di mahile txixambanyo ngu mlayo wa Txizimu, ti txo sunga ku txi hetisisa. Ngu nzila yoneyo, txithembiso txi ti dhanwa ku i ‘resa ya wutomi wakwe,’ ti wombako to njitsaniso txa ti to a na hetisisa mapswi ya a nga ma womba. (Mit 30:2; wona kambe Var 1:31, 32.) Ngako wutomi wu nga ti ha phangoni, ta pfala to ngu kutxani Mibhalo yi txi hi txharihisa ku tiwonela hi si se maha txixambanyo, hi xolisisa kwati ati ti patekako ni wutixamuleli wu hi ku nawo ka txixambanyo txonetxo. Mlayo wu txi womba a ti: “Ngako u txi xambanya txixambanyo txo kari ka Mkoma . . . Txizimu txako, a na vilela kwako se u na maneka u di ni txionho. Kambe ngako u sa xambanya kumaha txilo, khu na mbi va ni txionho.”—Dhet 23:21, 22.
it-21215 ¶7
Txixambanyo
Njithembiso txa lisima atxi txi mahwako ka Txizimu kasi kuhetisisa to kari, to fana ni kumaha mningelo mwendo ningo yo kari, kubelela mthumo wo kari mwendo kuva ka txiemo txo kari, kuvayilela silo so kari hambi i di ti to kha sa biha. Txixambanyo i ti txithembiso txo maha ngu ku tidhundela. Ngako i ku txithembiso txa lisima, txixambanyo txi ti fanete kuhetisiswa, mbimo yimwani mapswi awa ma thumiswa otshe mu ka Bhiblia. (Mit 30:2; Mat 5:33) “Txixambanyo” mbufakazi wo womba minavelo yako, kasi “txithembiso” njikombelo txi mahwako ka wukoma kasi kutsanisekisa ati ti nga wombwa. Sixambanyo makhambi o tala si tsimbitisana kumweko ni txitumelelano.—Gen 26:28; 31:44, 53.
w04 1/8 27 ¶3
Timhaka ta Hombe ta mu ka Dibhuku da Mitengo
30:6-8—Ti nga koteka ku wamwamna wu i ku Mkristu e thindekisa sixambanyo sa msikati wakwe? Ka mhaka ya sixambanyo, Jehovha a thumisana ni dilanda dimwani ni dimwani dakwe. Ngu txikombiso, ku ti ningetela ka Jehovha njithembiso txa m’thu apune. (Vagalatiya 6:5) Wamwamna kha na fanelo yo vhalela mwendo kutsivela txithembiso txonetxo. Wamsikati, a fanete ku e vayilela kumaha txithembiso atxi txi lwisanako ni Dipswi da Txizimu mwendo ni tifanelo takwe ka mwamna wakwe.
Tithomba ta moya
it-2 26 ¶3
Jefta
Vathu va ti sawulwa kasi ku ya thumela Jehovha va di dithepeleni. Vaveleki va di ni fanelo yo maha toneto. Samuwele mmweyo wa va a nga ti thembisilwe ku ya thumela tabernakelani ngu mhaka ya txithembiso txi txi nga ti mahilwe ngu mame wakwe Ana na a si se velekwa. Txixambanyo txonetxo txi tumeletwe ngu mwamna wakwe, Elikana. Msana kova Samuwele a di lekisilwe tshumbu, Ana a mningete ti to eya thuma ka wukhalo wo sawuleka. Ana a tsute kumweko nayo, eya ningela mhamba ngu txihari. (1 Sam 1:11, 22-28; 2:11) Mwanana mmwani a nga ningelwa ka mthumo wa Txizimu kota mnazira i Samsoni.—Val 13:2-5, 11-14; dinganisa wuthangeli wa tate ka dihorana dakwe, nga ha ti nga kombiswa ka Mit 30:3-5, 16.
17-23 KA MAIO
TITHOMBA TA MU KA DIPSWI DA TXIZIMU | MITENGO 32-33
“Tutumisani vazumbi va ditiko dile”
w10 1/8 23 ¶4
Ina u txi ti ziva?
I ti txani “makhalo o guleka” aya kuwombwa-wombwako ngu ona makhambi o tala ka Mibhalo ya Txihebheru?
Mbimo yi Vaisrayeli va nga ti hafuhi ni kuwulela Ditikoni da Txithembiso, Jehovha a va gete to ve dhilizela otshe makhalo a wukhozeli wa Vakanana va va nga txi zumba kona mule ditikoni. Ene a va leletile atxi: “Mi na . . . khundumusela sotshe sithombe sawe; kambe mi na khundumusela sotshe sifaniso sawe sa tisimbi, mi na khundhumusela sotshe sithombe sawe.” (Mitengo 33:52) Makhalo oneyo a wukhozeli wa makuhu ti nga maha i ti makhalo a ha kubasani aha tendelani mimangoni, siluvelo asi si nga txi akwa ka makhalo ma mamwani, hahatshi ka mindonga mwendo madhoropani. (1 Vafumeli 14:23; 2 Vafumeli 17:29; Ezekhiyele 6:3) Ka makhalo oneyo ti nga maha ku ti ni magandelo, tiphande to sawuleka, sifananiso, mabaselo ni siya simwani si nga txi thumiselwa wukhozeli.
w08 15/2 27 ¶5-6
Gonda ka tiphazamu ta Vaisrayeli
Nyamsi, hi tshangana ni siduko so tala so fana ni si va nga tshangana naso Vaisrayeli. Vathu nyamsi va ni sizimu so tala: Male, vaembeleli, va ta misakano, timhaka ta politika, vafundisi vo kari va wukhongeli, hambi ni maxaka athu. Hi si tiwoneli silo siya hi nga si thangetisa ka wutomi wathu. Kumaha wungana ni m’thu wu a si randiko Jehovha ti nga veka haphangoni wutomi wathu.
Timhaka ta mataho ati ti singako mlayoni, ti txi tekwa i di ta lisima ka wukhozeli wa Bhahali, i ti mlawu awu wu nga bzweta Vaisrayeli vavangi. Mlawu wonewo wu ngadi wu txi bzweta vathu va Txizimu nyamsi. Ngu txikombiso, kuthumisa komputadhori ka wukhalo wu u ku wekha, ti nga va txikarato ka m’thu wu a dhundako kubela-bela a mu ku kombiswako sa walo. Ta panda ngako Mkristu a txi bzwetwa ngu mlawu wo xalela sithombe sa walo ka internet.
it-1418 ¶3
Vakanana
Joxuwa, ngu wutxhari, “asi siyi dipswi ni da dimwedo ka ale Mkoma a nga leleta ka Mosi” ka kuloviswa ka Vakanana. (Jox 11:15) Kambe, ditiko da Israyeli di lekile ku londisa wuthangeli wakwe wa wunene ni ku ve gumisa moya wotshe wo biha ka ditiko dile. Ku vaho ka Vakanana hagari kwawe ku mahile ti to ve tshapelwa ngu moya wawe, ngu ku tsimbila ka mbimo ku file vathu vo tala kwawe (hi si bali wugevenga, wugango ni kukhozela sizimu sa walo) atiya ti di humelete ka Vakanana i tiku va to engisa ve va heta nga ha va nga ti getwe ngu kona. (Mit 33:55, 56; Val 2:1-3, 11-23; Mas 106:34-43) Jehovha a ti gete Vaisrayeli ti to kha na mbi kombisa txisawu-sawu ka wululami ni ku lamula kwakwe, ti lava kuwomba ti to ngako Vaisrayeli va do ko khata kupfana ni Vakanana ngu kutekana navo, ve tshanganisa wukhozeli, va txi etelela sihena sawe sa wukhongeli ni simaho sawe so nyenyeza, eto ti txi womba to va di na humelelwa ngu ti mlayo wu nga ti womba tona to ve dawa ni kuva ve ‘koswa ha mafuni.’—Eks 23:32, 33; 34:12-17; Lev 18:26-30; Dhet 7:2-5, 25, 26.
Tithomba ta moya
it-21109 ¶1
Muhingano
Msana ka kuva va tixolo ti komba a mu li manekelako kona lixaka lo kari, ti ndi na laveka ku pima makulelo ya wukhalo wawe ngu kuya ngu txivangelo txa wumbidi: txa mpimo wu wu dinganako. “Se ngu kuxaxuva tixolo, mina mana ditiko di na maha thomba yanu, madingano ni mimwaya yanu; ngu wungi wa kona, mina talelwa ngu tithomba, eyo dikato dino wela kwakwe; madingano ni tihundzu ta vatate vanu, mina teka tithomba.” (Mit 33:54) Txisungo txa dikato ngu kuya ngu ha wu manekako kona wukhalo txi ndi na tsana, kambe ti txi koteka ku txi lungiswa ngu kuya ngu mpimo wa thomba ya kona. Ngu toneto, ngako ku di wonilwe ti to thomba ya Judha i ti ya hombe ngutu, se didhawa da thomba yakwe di hungutwe di ningelwa ka lixaka la Simiyoni.—Jox 19:9.
24-30 KA MAIO
TITHOMBA TA MU KA DIPSWI DA TXIZIMU | MITENGO 34-36
“Teka Jehovha kota wuthavelo wako”
Ina wa mthemba Jehovha kota wuthavelo wako?
Kambe ku ti mahwa txani ngako i di ku m’daya ngu phango? Hambiku i ku phango, a ti ngadi nawo mnando wo daya m’thu wu a singako ni mnando. (Gen. 9:5) Kambe ka mhaka yoneyo, Jehovha a wombile ti to ku na ve ni wuxinji. Ngu toneto, ku ti ni madhoropa a mtxhanu ni dimwedo aya awu a nga phazama e daya m’thu a ndino thavela ka ona e ya barama. Se ngako a txi tumelelwa kuzumba ka ona, a ti vhikelekile. Kambe a ti fanete kuzumba ka didhoropa da wuthavelo kala kufa mphaxeli wa hombe.—Mit. 35:15, 28.
Ina wa mthemba Jehovha kota wuthavelo wako?
Ngako Muisrayeli a txi phazama e daya m’thu, ene a ti fanete e thava e ya ka didhoropa da wuthavelo e ya “xawutela mhaka yakwe” ka madhota a txike txa didhoropa. Madhota ma ti ni fanelo yo mu hoyozela. (Jox. 20:4) Yimwani mbimo ti ti lava e tekwa e yiswa ka madhota a didhoropa adi phango yi nga humelela ka dona ti to e xuxiswa. (Lera Mitengo 35:24, 25.) Se ngako madhota ma txi wona ti to ngu ditshuri i phango yi nga humelela, ma ndina mu tshumeta e ya ka didhoropa da wuthavelo.
Ina wa mthemba Jehovha kota wuthavelo wako?
Awu a thavako eya ka didhoropa da wuthavelo, a txi za e bela mndani ka dona, a ti hulukile. Jehovha a ti khene ona ma na thumela ‘kutihulukisa’ ka ona. (Jox. 20:2, 3) Jehovha kha womba ti to awu a thavako a ti fanete e thethiswa kambe ngu mhaka yoneyo ya yimweyo. Mphoteli wa mnoha nene a si tumelelwi ti to e bela ka didhoropa dile ti to e m’daya. Ngako awu a thavako se a di mule didhoropani, ene se a ti manzani ka Jehovha. Hi nga ti to a ti ko va jele. Ene a ndina tsimbila-tsimbila, e vhuna vamwani, ni kuthumela Jehovha ngu kurula. Ngu ditshuri a ndina va ni wutomi wo tsakisa!
Tithomba ta moya
w91 15/2 13 ¶13
Mtirulo awu wu dinganako votshe
Adhamu ni Evha kha va fanelwi ngu mtirulo. Mlayo wa Mosi wu txi womba tiya: “Kambe kha mi na mbi amukela mhamba yo tsiveta wutomi wa m’dayi.” (Mitengo 35:31) Adhamu hi nga ti to a to kanganyiswa, ngu toneto txionho txakwe a to txi maha khanyakwenye. (1 Timoti 2:14) Ku ndaka kwakwe mlayo ti ndi na dayisa liveleko lakwe, nguko lona li ndi na na tshapelwa ngu kwa mbi hetiseka kwakwe, a ti ti nga li maha li tsayiselwa kufa. Ti hakubasani ti to Adhamu ati fanela kufa, nguko, kota mthu wo hetiseka, ati langete apune kwambi engisa mlayo wa Txizimu. Ti ndi na hambana ni matshina a wululami wa Jehovha i diko a ti ko thumisa mtirulo ku tirula Adhamu. Ku diha mholo ngu txionho txa Adhamu, atiya, timaha to txi pfhutwa txitsayiso txa lifo la liveleko la Adhamu! (Varoma 5:16) Ngu mapfisiselo o lulama, mtamo waku daya wa txionho wu witwe ngu ha ditshinani. Mtiruli ‘a dukile lifo kasi ku hanyisa vathu votshe,’ e xaniseka ngu wuyelo ya txionho ngu konaha ka vanana votshe va Adhamu.—Vahebheru 2:9; 2 Vakorinto 5:21; 1 Pedro 2:24.
31 KA MAIO–6 KA JUNHO
TITHOMBA TA MU KA DIPSWI DA TXIZIMU | DHEWUTERONOME 1-2
“Wulamuli wu lumba Txizimu”
w96 15/3 23 ¶1
Jehovha—A randa wunene ni wululami
Madhota aya ma nga vekwa mu dibanzani ma ni fanelo ya kulamula timhaka ta sigoho sa hombe. (1 Vakorinto 5:12, 13) Mbimo yi ma mahako eto, ma alakanya ngu wululami wa Txizimu, to ti lava me thumisa wunene mbimo yotshe. Ngako ku si na wufakazi wu wu kombisako—mhaka ya vagohi vo mbi hunduka—kha va na kukombiswa wunene. Kambe madhota kha ma toveli mgohi ngu mhaka yo lava ku ti photela. Va emela to kuthaviswa kwakwe dibanzani e kota kutisola. (Fananisa ni Ezekhiyele 18:23.) Hahatshi ka wuthangeli wa Kristu, madhota mathuma ngu wululami, ona ma thuma kota “txivhikelo txo vhikela moya”. (Isaya 32:1, 2) Ngu mhaka eyo, ma fanete kwambi va ni txisawu-sawu kambe ma fanete kudinganisela.—Dhewuteronome 1:16, 17.
w02 1/8 9-10 ¶4
Ti veke hahatshi ngu kuengisa wuthangeli wa Txizimu
Hambiketo, a ti to m’thu e va mlamuli ti si lavi e ziva Mlayo dwe. A ku va nga sa hetiseka, va ti fanete ve lwa ni minavelo yawe yo biha—yo fana ni kutigela, txisawu-sawu ni makolo—asi si ndi no maha va si lamuli ngu fanelo. Mosi a va gete atxi: “Mi nga yeni ngu khohe kulamulani kwanu: Mina engisa ngu ku fana mhaka ya wa mdotho ni wa hombe. Mi nga thaveni txiemo txa m’thu, nguko ku lamula kuta ngu ka Txizimu.” Ti ha kubasani ti to valamuli Vaisrayeli va ti emela Txizimu ka wulamuli. Hi nga wonani lungelo yi va nga ti nayo!—Dhewuteronome 1:16, 17.
Tithomba ta moya
w13 15/9 9 ¶9
Sirumo sa Jehovha nzo thembeka
Mbimo yi Vaisrayeli va nga khata dipfhumba dawe adi di nga teka 40 wa malembe “mu txiwulani ko thisa ngutu,” Jehovha kha va txhamusela totshe ku ti ngadi ni mbimo to a na va thangela e va vhikela ni ku va xayisa ngu nzila yihi. Kambe a va kombile to va nga mthemba ve tshumela ve themba sirumo sakwe. Ngu kuthumisa direfu ni mitshikari e thumisa mndilo ni wusiku, Jehovha a txi alakakanyisa Vaisrayeli to wa va seketela ni ku va kongomisa ka dipfhumba dawe do karata. (Dhet 1:19; Eks 40:36-38) Ni ku atxi va ninga sotshe a si va nga txi si lava. “Syambalo sawe kha siya sakala, ni minenge yawe kha ya simba.” Ngu ditshuri, “kha va pwata txilo.”—Neh. 9:19-21.
7-13 KA JUNHO
TITHOMBA TA MU KA DIPSWI DA TXIZIMU | DHEWUTERONOME 3-4
“Milayo ya Jehovha njo lulama ni ku nja wutxhari”
it-1815 ¶5
Kupfisisa
Kukhutala kugonda ni kuthumisa Dipswi ni sileleto sa Txizimu ti nga maha m’thu e va ni wutxhari wa hombe kupinda ava va wonekako i ti vagondisi vakwe, e va ni kupfisisa kupinda va i ku va hombe ngutu ngu tanga. (Mas 119:99, 100, 130; fananisa ni Luk 2:46, 47.) A tiya ti maheka nguko wutxhari ni kupfisisa, sa pfana ni mikongomiso ya ditshuri ni milayo yo lamula ya Txizimu; ngu toneto, ku xayiswa ka yona ko thembeka ngu Vaisrayeli ti txi maha to matiko a vaakelani me va wona kota ditiko da “wutxhari ni kupfisisa.” (Dhewut. 4:5-8; Mas 111:7, 8, 10; fananisa ni 1 Vafu 2:3.) A wu a pfisisako wa ku wona ku ndakwa ka mlayo wa Dipswi da Txizimu, wa kombela kambe txivhuno ka Txizimu mayelana ni mhaka yoneyo. (Mas 119:169) Wa tumelela to Dipswi da Txizimu dibheka mndani kwakwe (Mat 13:19-23), a di bhala mbiluni (Mav 3:3-6; 7:1-4) wa aka livengo ka “totshe tinzila ta makuhu” (Mas 119:104). Mwanana wa Txizimu a kombisile kupfisisa mbimo si a nga ti ha mafuni, a lambile hambi kuvayilela lifo ha phandeni nguko Mibhalo yi ti wombile ti to a fanete kufa ngu nzila yoneyo.—Mat 26:51-54.
w99 1/11 20 ¶6-7
Ngako wuha wu txi anda
Ngu ku xamaliswa ngu ti a nga tipfa ni ku ti wona, mfumeli wa txisikati ngu ku tiveka hahatshi a xamute atxi khene: “Va katekile vathumi vako avale yotshe mbimo va ku masoni kwako, va pfisisako wutxhari wako!” (1 Vafumeli 10:4-8) Ene kha womba to malanda a Solomoni ma ti tsakile ngu mhaka ya ku ma nga ti ni tithomba hambiko va nga ti nato. Kambe a txi lava ku womba to malanda a Solomoni ma ti katekile ngu ku mbimo yotshe ma txi engisela wutxari awu Jehovha anga ti ningile Solomoni. Hi nga wona txikombiso txa txinene atxi mfumeli wa txisikati wa Sabha a nga txi ninga vathu va Jehovha nyamnsi, a va va ti dilako ngu wutxhari wa Mvangi wathu ni Mwanana wakwe, Jesu Kristu!
Mapswi ma mwani o pfisiseka a ya ma nga wombwa ngu mfumeli wa txisikati a txi gela Solomoni ngu yawa: “A na bongwe Mkoma Txizimu txako.” (1 Vafumeli 10:9) Ti ha kubasani ti to mfumeli wuwa a woni to wutxhari ni ku humelela ka Solomoni ku txita ngu ka Jehovha. A ti ti pfana ni ti Jehovha a nga ti thembisile ka Israyeli. ‘Yi xayiseni mi txi yi maha milayo yiya,’ adi khene, “nguko ewo wu nava i di wona wuzivi wanu ni mapimo anu, kuwonani ka vathu votshe. Ngako va txi engisa yotshe milayo yiya, vona vana womba va txi kha vona: ‘Adiya ditiko da hombe da vathu va kuziva ni kupima.’”—Dhewuteronome 4:5-7.
w07 1/8 29 ¶13
Ina u “ganyile masoni ka Txizimu”?
Ngako Jehovha a txi ninga makatekwa vathu vakwe, a va ninga makatekwa a manene. (Jakobe 1:17) Mbimo yi Jehovha a nga ninga Vaisrayeli ditiko adi va ndi no ya zumba ka dona, a va ningile “ditiko do khulunga masi ni wulombe.” Hambiko ku wombwako to ditiko da Egipta di ti naso sotshe eso, kambe ku ti ni txi di nga ti hambanile ngu txona ni ditiko da Txithembiso. Mosi a gete Vaisrayeli atxi khene: “Ditiko di Mkoma Txizimu txako a di xayisako.” Ngu mapswi mamwani, ti womba to ti ndi na va tsimbilela kwati nguko va ti na khatalelwa ngu Jehovha. Ngako Vaisrayeli va txi zumba va ti thembekile ka Jehovha, va ndi na mana makatekwa ni ku ve tidila ngu wutomi awu wu si faniko ni kudotho ni wa matiko otshe aya va nga ti gwatamile nawo. Ngu ditshuri, makatekwa a Jehovha ngu ona “ma ganyisako”!—Mitengo 16:13; Dhewuteronome 4:5-8; 11:8-15.
Tithomba ta moya
w04 15/9 25 ¶3
Timhaka ta hombe da dibhuku da Dhewuteronome
4:15-20, 23, 24—Kulambiswa ko maha sithombe so vatwa ti lava kuwomba ti to bihile ku ti vatela sifananiso so kari so tshurisela ngu sona? Ahim-him! Ku lambiswa aku ku wombwako ahawa i ti kumaha sithombe kasi ku si khozela—ni ku ‘khizamela sithombe ni ku si thumela.’ Mibhalo kha yi tsimbi kuvata mwendo kudhezenyara sithombe ti to hi tshurisela ngu sona.—1 Vafumeli 7:18, 25.
14-20 KA JUNHO
TITHOMBA TA MU KA DIPSWI DA TXIZIMU | DHEWUTERONOME 5-6
“Gondisa vanana vako ti to ve dhunda Jehovha”
w05 15/6 20 ¶11
Vaveleki khatalelani wumoya wa vanana vanu
Ka mhaka yiya ti nga maha ku si na ndimana yimwani ayi yi wombako-wombako ngu mhaka yiya kupinda ati ti ku ka dibhuku da Dhewuteronome 6:5-7. Hi kombela u tula Bhiblia yako u lera tindimana toneto. Hi tshumela hi wona ti to vaveleki ngu vona vo khata kugelwa ti to ve tidyisa ngu didhawa da moya ni kukulisa lirando lawe ngu Jehovha ni ku ve ti veketa mbiluni kwawe. Se ti lava u va mgondi wamnene wa dipswi da Txizimu, u lera Bhiblia ditshiku ni ditshiku ni kualakanyisisa ngu ti u ti gondako. U txi maha eto u na pfisisa kwati tinzila takwe, milayo ni matshina a milayo ya Jehovha. Wuyelo ya toneto, mbilu yako yi na tsaka ngu ditshuri da mu ka Bhiblia adi di no kumaha u va ni lirando ni txixonipho ka Jehovha. U na va ni ta tingi to gondisa vanana vako.—Luka 6:45.
w07 15/5 15 ¶5
Ni nga va vhunisa kutxani vanana va vango ti to ve mana gondo ya ditshuri?
Minavelo yako, ati u ti pimisako ni sikongomelo sako kha si ngo ti tela dwe ngu ku siwomba kambe si woneka ka ti u ti mahako. (Varoma 2:21, 22) Ku khukhela i ti nga ti va vadotho vanana va gonda ka ti vaveleki vawe va ti mahako. Vona va wona ati i ku ta lisima ka vaveleki vawe, se makhambi o tala va txi kula ati i ku ta lisima kwawe ngu ti va nga ti wona ka vaveleki vawe. Ngako u txi randa Jehovha ngu ditshuri vanana vako vana ti wona. Ngu txikombiso, vana ti wona to wa ninga lisima gondo ya Bhiblia, ni ku wa thangetisa timhaka ta Mfumo ku khata. (Matewu 6:33) Ku vaho kwako mintshanganoni ya wukristu mbimo yotshe ni ku sengemela ka mthumo wo txhumayela ti na va vhuna ku ve tiwona ti to u teka mthumo wa Jehovha i ti wa lisima ngutu kwako.—Matewu 28:19, 20; Vahebheru 10:24, 25.
w05 15/6 21 ¶14
Vaveleki, khatalelani silaveko sa mwaya wanu
Nga ha Dhewuteronome 6:7 yi kombisako ngu kona, ku ni mikhanjo yo tala ayi anu vaveleki mi nga bhulako ni vanana vanu ngu timhaka ta moya. Mbimo yi mi ku kuendani, mi mahako mithumo ya ha mwayani, mwendo mi ti ku humulani, mi nga thumisa mikhanjo yoneyo ti to mi gondisa vanana vanu. Kambe hi nga ti to mina zumbela ku “txhumayela” vanana vanu ngu ti mhaka ta Bhiblia mbimo yotshe. Hahanze keto, duketani kuva ni mabhulo a moya a ya ma akako. Ngu txikombiso, direvista da Khenjemuka! di womba-womba ngu timhaka to hambana-hambana. Misungo yoneyo ya timhaka, yi nga wusa mabhulo a manene, ngu sihari asi Jehovha a nga si vangwa, makhalo o tshura a tumbuluko hamafuni kotshelele ni tixaka to hambana-hambana to xamalisa ta vathu ni nzila yi va hanyako ngu yona. Mabhulo oneyo ma nga kuzeta vanana vako ku lera to tala ati ti ti manekako a mu ka mabhuku aya ma humiswako ngu txithumi txo thembeka na txi di ni wutxhari.—Matewu 24:45-47.
Tithomba ta moya
Lirando ni kululama ka ditiko da Israyeli
Hi gonda txani: Jehovha wa wona ati ti ku mndani, i singa ta hahanze dwe. Ene wa di wona ditshuri da mbiluni kwathu. (1 Sam. 16:7) Kha ku nga ni mipimiso, matipfelo, mwendo simaho asi Jehovha a nga tandekako ku si wona. Ene a xota ati i ku ta tinene kwathu ni ku hi tsanisa. Kambe ene a lava ti to hi thumbula ni kulwa ni mialakanyo yo biha yi si se va simaho so biha.—2 Mak. 16:9; Mat. 5:27-30.
21-27 KA JUNHO
TITHOMBA TA MU KA DIPSWI DA TXIZIMU | DHEWUTERONOME 7-8
“U nga tekani navo”
w12 1/7 29 ¶2
Ngu kutxani Txizimu txi di wombile ti to malanda a txona ma fanete kutekana ni va vakhozeli kulowe dwe?
Jehovha a txi ti ziva to Sathani a lava ku bhenda vathu vakwe ti to ve khozela sizimu sa makuhu. Ngu nzila yoneyo, Txizimu txi txharihitisile malanda a txona to vathu va va khozelako sizimu sa walo vana “hambukisa mwanana wa wena wa di jaha, a si ngati eni engisa ngu ditshuri vana thumela sizimu simwani.” Va ti hagari ka txikarato. Ngako ditiko da Israyeli di txo thuka di wela txidukoni txo khozela sizimu sa makuhu, Txizimu txi ndi na mbiswa txi va tsakela mwendo ku va vhikela, ati ti ndi no maha valala vawe ve va xasela ngu ku hehuka. Ti di ko maheka eto, Mesiya a wu a nga thembiswa a ndi na humelelisa kutxani? Ti ha ku basani to Sathani ati ni txivangelo atxi txi pfalako txo hunda Vaisrayeli to ve tekana ni vathu va va si khozeliko Txizimu.
w15 15/3 30 ¶5
Kuteka ‘ngu mlayo wa Mkoma’—Ti ngati ti txi thuma?
Ka Bhiblia Jehovha a wombile ti to malanda akwe ma fanete ku tekana ngu mlayo wa Mkoma dwe. Ngu ku txani? Nguko wa ti ziva ati i ku tatinene kwathu ni ku a lava ku hi vhikela. Kha lavi hi maha sisungo asi i si ngaku sa sinene a si si no hi dayisa mwendo si hi maha hi si tsaki. Ka mbimo ya Nehemiya, Vajudha vo tala va tekile vavasikati ava va nga si thumeli Txizimu. Ngu toneto Nehemiya a womba-wombile ngu txikombiso txo biha txa Solomoni. Hambiku “anga txi randwa ngu Txizimu, . . . vavasikati vamatiko va to mu onhisa.” (Neh. 13:23-26) Jehovha wa ti ziva to sitxharihiso sakwe nza sinene kwathu, ngu yona mhakeyo a nga gela Vaisrayeli ti to ve tekana ngu mlayo wa Mkoma dwe. (Mas. 19:7-10; Isaya 48:17, 18) Ha bonga ngutu Jehovha aku a hi ningako milayo ya lirando ni yo thembeka. Ngaku hi txi engisa Jehovha kota Mfumeli wathu, hi tumela ti to ani fanelo yo hi gela ati hi fanelako ku hi ti maha.—Mav. 1:5.
w15 15/8 26-27 ¶12
Sawula vanghana va vanene ka masiku awa a magwito
Makristu aya ma lavako ku belela wukati ma fanete me tiwonela ngaku ma txi sawula mngana wa wukati. Dipswi da Txizimu da hi txharihisa di txi: “Mi nga sungweni ha di kangeni kumweko ni va va sikholwiko. Nguko wusengeli muni wu kuho hagari ka kululama ni ku biha kani? Mwendo wusengeli muni wu kuho hagari ka liwoningo ni txidema kani?” (2 Vak. 6:14) Bhiblia yi gela malanda ya Txizimu to me tekana ni vathu va ku “Mkomani dwe,” ti womba to ve tekana ni mthu awu a nga tiningetela e tshumela ebhabhatiswa, awu a hanyako ngu milayo ya Jehovha. (1 Vak. 7:39) Ngaku mkristu a txi tekana ni mthu awu a randako Jehovha, a na va ni mngana a wu a no mu vhuna ku e zumba a di thembekile ka Txizimu.
Tithomba ta moya
w04 1/2 13-14 ¶4
Jehovha wa hetisisa silaveko sathu sa ditshiku ni ditshiku
Mkombelo wathu wo kombela dipawu da ditshiku ni ditshiku wu fanete wu tshumela wu hi alakanyisa ngu txilaveko txathu txa sakudya sa moya sa ditshiku ni ditshiku. Hambiko Jesu a nga txi pfa nzala ya hombe msana ka kutitona sakudya mbimo yo lapha, a lambite mbimo yi Sathani a nga mduka atxi a na hundule marigwi me maha dipawu, ati khene: “Tibhatwe ti to m’thu khana ku hanya ngu dipawu dwe aniko ngu otshe mapwsi awa ma wombwako ngu Txizimu.’” (Matewu 4:4) Ahawa Jesu a thumisile mapswi a profeti Mosi awu a nga gela Vaisrayeli a txi khene: “Se [Jehovha] a mahile ti to u txi xaniseka, aku lekile u ti ni nzala, eku dyisa manna ale awe u nga si ma zivi, hambi vatate vako va ti si mazivi, kasi ku kukomba to m’thu kha hanyi ngu sakudya dwe, aniko m’thu ana hanya ngu tosthe ti ti humako txisofuni ka Mkoma.” (Dhewuteronome 8:3) Nzila ayi Jehovha anga phamela ngu yona Vaisrayeli manna yi mahile to ve mana sakudya sa nyama ve tshumela ve mana tigondo ta moya. Gondo yo khata ngu ti to va ti fanete ku ve “huma va txi rolela mpimo wa ditshu ni ditshiku.” Ngako va txi sengeleta so tala kupinda sa ditshiku, asi si nga txi sala si txi khata ku nunga si txi huma timbungu. (Eksodha 16:4, 20) Kambe aku si nga si humeleli ngu ditshiku da wu 6 va ti fanete ku sengeleta sa singi to ve dya ngu Sabata. (Eksodha 16:5, 23, 24) Sekoko manna yi va gondisile to va fanete ku engisa ni ku wutomi wawe i si nga kudya dipawu dwe, kambe ni “mapswi otshe ma wombwako ngu Txizimu.”
28 KA JUNHO-4 KA JULHO
TITHOMBA TA MU KA DIPSWI DA TXIZIMU | DHEWUTERONOME 9-10
“Nji txani atxi Jehovha atxi kombelako kwako?”
w09 1/10 10 ¶3-4
Nji txani atxi Jehovha atxi kombelako kwathu?
Nji txani atxi txi hi kuzetako kuengisa Txizimu? Mosi a wombile txivangelo tximwetxo, a ti khene: “Thava Mkoma Txizimu txako.” (Ndimana 12) Atiya kha ti wombi ku thava Txizimu ngu ku thava kutsayiswa kambe ti womba ku xonipha Txizimu ni ku hanya ngu tinzila ta txona. Ngaku hi txi xonipha tatinene Txizimu, hi na vayilela ku txi henyisa.
Nji txani atxi txi fanelako ku hi susumetela ku hi engisa Txizimu? Mosi a wombile tiya: ‘U randa [Jehovha]ni ku . . . mthumela Mkoma, Txizimu txako, ngu yotshe mbilu yako ni wotshe moya wako.’ (Ndimana 12) Ku randa Txizimu ti pata timhaka tatingi to pinda nzila ayi hi ti pfako ngu yona. Dibhuku dimwani di khene: “Mapswi ma nga thumiswa ahawa ya Txihebheru, mbimo yimwani ma komba ti hi nga ti maha ngu nzila yi hi tipfako ngu yona.” Dibhuku donedo di tshumela di txi khene kuranda Txizimu ti womba ku txi “mahela mithumo ya lirando.” Ngu mapswi ma mwani, ngaku hi txi randa Txizimu ngu ditshuri, hi na maha totshe ti ti nga txi tsakisako.—Mavingu 27:11.
w09 1/10 10 ¶6
Nji txani Jehovha ahi Kombelako?
Ku ti emisela kwathu kuengisa ka hi tisela makatekwa. Mosi a bhate tiya: “ku vekisa sirumo . . . a yiya nyamnsi ni ku leletako, kasi ku u mana kuzumbiseka.” (Ndimana 13) Kuwomba ditshuri, sirumo sotshe si Jehovha— ahi kombelako—sa hi vhuna. Yi walo yimwani nzila hahanze ka tiya, nguko Bhiblia yi womba to “Txizimu lirando.” (1 Johani 4:8) Ene a hi ningile sirumo siya, wuyelo ya kona i ku wutomi wo mbina magwito. (Isaya 48:17) Ngako hi txi maha totshe ati Jehovha ahi kombelako hi na ti vhikela ka sikarato sasingi konku ni ku hi na mana makatekwa aya ma si gumiko mbimo yi yi tako hahatshi ka Mfumo wakwe.
cl gondo 2 ¶2
“Ina u nga sikota ngu ditshuri ku tshuketa hafuhi ni Txizimu”?
Abrahamu wa mwamna wa kale i mweyo wa va a nga va ni wungana wonewo. Jehovha a womba wombile ngu kokwane txinguhe eneyo a txi “mngana wangu.” (Esaya 41:8) Ene ati wona Abrahamu i ti mngana wakwe. Abrahamu ati ni wungana wa hombe ngutu nguko ati ni “likholo ka Jehovha.” (Jakobe 2:23) Nyamsi, Jehovha a tute tinzila to ti tshanganisa ni va va mthumelako ni ku mranda. (Dhewuteronome 10:15) Dipswi dakwe da hi khongotela: “Tshuketani hafuhi ka Txizimu, kasi ni txona txi na tshuketela hafuhi kwanu.” (Jakobe 4:8) Ka mapswi aya hi mana txirambo ni txithembiso.
Tithomba ta moya
it-1127 ¶3
Va Anaki
I ti lixaka la vathu va txiemo txo xamalisa ava va nga txi zumba situngani sa Kanana, ni mu tibambe, ngutu-ngutu u txi ya didhawa da mswa-dambu. Ka mbimo yimwani, vavamna vararu va nduma va ka Anaki, i ku va va, Ahimani, Sezayi ni Talmayi, va ti zumba Hebroni. (Mit 13:22) Ku vite ahawa tixoli ta 12 ta Vahebheru ti nga wona ngu dikhambi do khata va Anaki, se 10 wa tixoli ti di ta ningela didungula, ti di ko hikabhweka ngu kuthava ati ti nga tshangana nato,tona ti wombile ti to vavamna vonevo mba lixaka la Vanyasihakati ava va nga humelela msana ka ndambi, ni ku Vahebheru va txo nga “titshera” va txi ti fananisa navo. (Mit 13:28-33; Dhewut. 1:28) Kuzemuka kwawe va kuthumisile kota mpimo wo fananisa ngako va txi txhamusela vavamna va txiemo txo lapha hagari ka va Emime ni va Refayime. Nduma yawe, ngu ditshuri, yi va kuzetile ku ve womba divingwa di di ku khene: “I mani a ndi no ema masoni ka vanana va Anaki kani?”—Dhewut. 2:10, 11, 20, 21; 9:1-3.